O Sega ni Kila na Ka ena Yaco!

“E na mataka mo kaburaka na nomu sila, ia e na yakavi me kakua ni cegu na ligamu: ni ko sa sega ni kila se cava vei rau ena yaco.”​—DAUV. 11:6.

1. E veivakurabuitaki qai veivakadrukai vakacava na noda raica na tubu ni dua na kau?

E GADREVI vei ira na dauteitei mera dau vosota. (Jeme. 5:7) Ni tea oti na sorenikau, ena waraka me kadre qai tubu. Ena qai basika na kena tubuvou ke vinaka na qele kei na draki. Ena tubu sara me kau, ena vua tale ga se vakalewe. Yaco na gauna sa na rawa ni tatamusuki na dauteitei ni sa matua nona were. E ka veivakurabuitaki dina noda raica na tubu vakacakamana qori! Eda druka ga nida vakasamataki koya e vakavuna na tubu. Io, ni tei na sorenikau eda na rawa ni qarava vinaka, vakasuasuataka tale ga, ia o Jiova duadua ga ena vakatubura.​—Vakatauvatana 1 Korinica 3:6.

2. Na cava e vakatavulica o Jisu me baleta na tubu vakayalo ena ivakatautauvata a veivosakitaki ena ulutaga sa oti?

² Sa vakamacalataki toka ena ulutaga sa oti na nona vakatauvatana o Jisu na vunautaki ni Matanitu ni Kalou ina nona kaburaka na sorenikau e dua na dauteitei. Ena ivakatautauvata me baleta na duidui qele, a vakabibitaka o Jisu nira na tea ga na dauteitei na sorenikau vinaka, ia na kena tubu me lai matua sara ena vakatau ena loma ni tamata yadua. (Mari. 4:​3-9, VV) Ena ivakatautauvata me baleta na dauteitei e moce, a sega ni kila na dauteitei na veika e okati ena tubu, baleta ni yaco na tubu qori ena kaukaua ni Kalou, sega ni sasaga vakatamata. (Mari. 4:​26-​29, VV) Meda veivosakitaka mada qo e tolu tale na ivakatautauvata i Jisu​—na sore ni musita, na leveni kei na lawa ni yavi.a

Na iVakatautauvata ni Sore ni Musita

3, 4. Na cava e vakamacalataki ena ivakatautauvata ni sore ni musita me baleta na itukutuku ni Matanitu ni Kalou?

³ E volai tale ga ena Marika wase 4 na vakatautauvata ni sore ni musita, qai vakamacalataki kina e rua na ka: na tubu vakasakiti ena iwiliwili tamata era kauai ena itukutuku ni Matanitu ni Kalou, kei na nodra karoni o ira na taleitaka na itukutuku qori. Kaya o Jisu: “Tou na vakatautauvatataka na matanitu ni Kalou kei na cava? se cava na ka vakaibalebale me da vakatautauvatataka kina? Sa vaka e dua na sore ni musita, o koya ni sa tei e na qele, sa lailai sobu vei ira kecega na sore ni kau e na qele: ia ni sa tei, sa tubu cake, a sa yaco me levu cake vei ira kecega na kau lalai, a sa vakatabana vakaidina, a sa ro rawa na manumanu vuka e na kena rurugu.”​—Mari. 4:​30-​32.

⁴ E vakamacalataki qori na tubu ni kena vunautaki na “matanitu ni Kalou,” ni laurai sara ga ena tete ni itukutuku ni Matanitu ni Kalou, kei na tubu ena ivavakoso lotu vaKarisito ena Penitiko 33 S.K. me yacova mai nikua. E sorenikau lailai sara na sore ni musita, qai rawa ni vakaibalebaletaka e dua na ka lailai. (Vakatauvatana Luke 17:6.) Ia ni sa tubu, na kena balavu ena rairai yacova na 3 ina 5 na mita, ra qai kaukaua vinaka na tabana. Ena rawa gona ni tukuni ni sa dua na vunikau.​—Maciu 13:​31, 32.

5. Na tubu cava a vakilai ena ivavakoso vaKarisito ena imatai ni senitiuri?

⁵ A tekivu tubu na ivavakoso vaKarisito ena gauna e tauyavutaki kina ena 33 S.K., donuya na nodra lumuti ena yalo tabu e 120 na tisaipeli. Sega ni dede sa tubu na ivavakoso lailai qo, qai mai lewena e vica vata na udolu era vakabauta. (Wilika Cakacaka 2:​41; 4:4; 5:​28; 6:7; 12:24; 19:20.) Ena loma ga ni tolusagavulu na yabaki sa tubu sara ga vakalevu na kedra iwiliwili na dautatamusuki, mani tukuna kina na yapositolo o Paula ina ivavakoso e Kolosa ni “sa vunautaki vei ira na tamata kecega sa tiko e ruku i lomalagi” na itukutuku vinaka. (Kolo. 1:23) Sa dua dina na tubu vakasakiti!

6, 7. (a) Na tubu cava sa yaco tiko me tekivu mai na 1914? (b) Na tubu cava tale ena qai vakilai?

⁶ Me tekivu mai na gauna a tauyavu kina e lomalagi na Matanitu ni Kalou ena 1914, sa tubu na taba ni “kau” ni musita ena dua na ivakatagedegede a sega ni nanumi taumada. Era raica sara ga kina na tamata ni Kalou na vakayacori ni parofisai i Aisea: “Ko koya sa lailai, ena yaco me le dua na udolu; kei koya sa lailai, me matanitu kaukauwa.” (Aisea 60:22) Era sega ni tadra na ilawalawa lailai lumuti era vunautaka tiko na Matanitu ni Kalou ena itekitekivu ni ika20 ni senitiuri, nira na cakava tale ga na cakacaka qori ena 2008, e rauta ni vitu na milioni na iVakadinadina ena sivia na 230 na vanua. E vakasakiti dina na tubu qori, me vaka ga na tubu ni sore ni musita ena ivakatautauvata i Jisu!

⁷ Ena yala beka ga e kea na tubu? Sega. Ena yaco na gauna era na bula ga kina ena vuravura qo, o ira na tamata era vakamalumalumu ina Matanitu ni Kalou. Sa ra na vakarusai na dauveitusaqati kece. Era na sega ni rusa ena kaukaua se sasaga ni tamata, ia ena nona yavala sara ga na Turaga Cecere o Jiova ena vuku ni veika sa yaco tu e vuravura. (Wilika Taniela 2:​34, 35.) Eda na qai raica kina na iotioti ni kena vakayacori e dua tale na parofisai i Aisea: “Ni na roboti ko vuravura e na veikilai kei Jiova, me vaka sa ubia na wasa titobu na wai.”​—Aisea 11:9.

8. (a) E vakaibalebaletaki vei cei na manumanu vuka ena ivakatautauvata i Jisu? (b) Eda taqomaki tiko mai na cava ena gauna sara ga qo?

⁸ E kaya o Jisu nira na vakaruru na manumanu vuka ni lomalagi ena veitaqomaki ni Matanitu qo. Era sega ni vakaibalebaletaki ira na meca ni Matanitu na manumanu vuka qori, me vakataki ira na manumanu vuka ena ivakatautauvata i Jisu me baleta na turaga a kaburaka na sorenikau ena duidui qele. (Mari. 4:4, VV) Ia na manumanu vuka qori e vakaibalebaletaki vei ira na yalomalumalumu, ena nodra lai vakaruru ena ivavakoso vaKarisito mera taqomaki kina. Na gauna mada ga qo, era sa taqomaki tiko vakayalo mai na ivalavala dukadukali kei na itovo vakasisila sa takalevu tu ena vuravura ca qo. (Vakatauvatana Aisea 32:​1, 2.) E vakatauvatana tale ga o Jiova na Matanitu ena veiliutaki kina na Mesaia ina dua na vunikau, ena nona parofisaitaka: “Ka’u na tea e na ulu-ni-vanua cecere nei Isireli: ka na tubu cake na tabana, ka vuataka na vuana, me sa vu ni sitari vinaka sara: ena tiko talega e rukuna na yavusa manumanu vuka kecega; ka ra na tiko ga e na rurugu ni tabana.”​—Isik. 17:23.

Na iVakatautauvata ni Leveni

9, 10. (a) Na cava e vakabibitaka o Jisu ena ivakatautauvata ni leveni? (b) E vakaibalebaletaki ina cava na leveni ena levu na gauna e cavuti kina ena iVolatabu? Na taro cava ena veivosakitaki me baleta nona cavuta na leveni o Jisu?

⁹ Ena so na gauna, e sega ni laurai na tubu. Qori na ka e vakabibitaka o Jisu ena nona ivakatautauvata e tarava. E kaya: “Sa tautauvata na matanitu vakalomalagi kei na leveni, sa taura e dua na yalewa, ka vunia e loma ni madrai [“falawa,” NW ] droka e tolu nai vakarau, me sa vakalevenitaki kece mada.” (Maciu 13:33) Na cava e vakaibalebaletaka tiko na leveni qo, qai semati vakacava ina tubu e vauca na Matanitu ni Kalou?

¹⁰ Ni cavuti na leveni ena iVolatabu, e dau vakaibalebaletaki ga vakalevu ina ivalavala ca. Na yapositolo o Paula e vakaibalebaletaka na leveni ina nona veiuqeti ca e dua ena ivavakoso e Korinica makawa. (1 Kor. 5:​6-8) A vakaibalebaletaka beka e dua na ka ca o Jisu ni cavuta na leveni?

11. A vakayagataki vakacava na leveni e Isireli makawa?

¹¹ Ni bera ni saumi na taro qori, meda kila mada e tolu na tikina bibi qo. Kena imatai, dina ni sega ni vakatara o Jiova me vakayagataki na ka e vakaleveni ena kanavata ni Lakosivia, ia e dau vakadonuya ena so tale na gauna na imadrali e vakaleveni. E dau vakaleveni na imadrali ni veivinakati e cabora e dua ena nona via vakaraitaka sara ga vakataki koya na nona vakavinavinakataka na veivakalougatataki i Jiova. E cabori qai laukana ena marau na imadrali qo.​—Vunau 7:​11-​15.

12. Na cava eda vulica me baleta na vakayagataki ni vosa ena iVolatabu mera vakaibalebaletaka e so na ka?

¹² Kena ikarua, ena so na gauna e dau vakaibalebaletaki ina ka ca e so na vosa e cavuti ena iVolatabu, ia ena so tale na gauna e dau vakaibalebaletaki ina ka vinaka. Me kena ivakaraitaki, ena 1 Pita 5:​8, e vakatauvatani o Setani me vaka e dua na laione, baleta ni ca qai voravora na nona itovo. Ia ena Vakatakila 5:​5, [VV] e vakatauvatani tale ga ina dua na laione o Jisu ​—“na Laioni ni yavusa i Juta.” E tukuni e ke na laione me vakaibalebaletaka na yaloqaqa kei na lewadodonu.

13. Ena ivakatautauvata i Jisu, na cava e dusia na leveni me baleta na nona tubu vakayalo e dua?

¹³ Kena ikatolu, ena ivakatautauvata i Jisu, a sega ni tukuna ni na vakacacana na falawa kece na leveni, me sega ni laukana rawa kina. E vakamacalataka tiko ga na ka e dau caka ni buli na madrai. E vakalevenitaka na ka e bulia e dua na yalewa vakawati, qai sega ni ca na ka e vavia. Ena tu e loma ni falawa na leveni. A sega ni raica o koya e bulibuli tiko na kena lai curuma na ka e vavi na leveni. Eda na lai nanuma kina na dauteitei a kaburaka na sorenikau qai moce ena bogi. E kaya o Jisu ni “sa rovu ka tubu tiko ga kina na kau, ia na kena yaco tiko na ka oqo e sega ni kila ko koya.” (Mari. 4:​27, VV) E rawarawa dina na ivakatautauvata qori me baleta nona sa tubu tiko vakayalo e dua, ia e sega ni laurai levu! De dua eda na sega ni raica na nona tubu se toso tiko vakayalo, ia ena qai vakavotui ga ena dua na gauna.

14. Na cava e vakavotui me baleta na cakacaka vakavunau ena ka e cakava na leveni ena gauna e vakayagataki kina?

¹⁴ Eda na sega ni raica e matada na tubu vakayalo sa yaco tiko, ia eda kila ga ni sa roboti vuravura. Qori tale ga na ka e vakabibitaki tiko ena ivakatautauvata ni leveni. E vakalevenitaki kece na ‘tolu na ivakarau falawa.’ (Luke 13:21) Me vaka ga na ka e cakava na leveni qori, na vunautaki ni Matanitu ni Kalou sa vakavuna na tubu vakayalo, qai tete me “yacova nai yalayala kei vuravura” na vunau qori. (Caka. 1:8; Maciu 24:14) E itavi dokai dina meda vakaitavi ena vakatetei ni cakacaka ni Matanitu ni Kalou, ni sa qai vakasakiti tiko ga na kena tubu!

Na Lawa

15, 16. (a) Vakamacalataka vakalekaleka na ivakatautauvata ni lawa? (b) Na cava e vakaibalebaletaki ena lawa? Na cava e vakaraitaka na ivakatautauvata qo me baleta na tubu e vauca na Matanitu ni Kalou?

¹⁵ E sega so ni bibi na kedra iwiliwili na tisaipeli i Jisu, e bibi ga me muri na kena ivakatagedegede. E vakamacalataka qori o Jisu ena ivakatautauvata me baleta na lawa ni ika. E kaya: “E dua tale, sa tautauvata na matanitu vakalomalagi kei na lawa ni yavi, sa viritaki ki wai, ka tagava mai na ika e na kena veimataqali kece ga.”​—Maciu 13:​47, VV.

¹⁶ Na lawa qori, e vakaibalebaletaka na cakacaka vakavunau, era qai soqoni mai kina na veimataqali ika. E kaya o Jisu: “Ni sa sinai, era sa yavia ki matasawa, a ra sa tiko sobu, ka tugana na kena vinaka ki na sova, ka biuta tani na kena ca. Ena vakakina e nai vakataotioti kei vuravura: era na lako mai na agilose, ka tawasei ira tani na tamata ca maivei ira na yalododonu, ka biuti ira laivi tu ki na lovo ni buka waqa: era na dautagi kina, ka vakasequruquru bati.”​—Maciu 13:​48-​50.

17. Na gauna cava ena vakayacori kina na nodra tawasei na tamata me vaka e vakamacalataki ena ivakatautauvata ni lawa?

¹⁷ Na nodra tawasei na tamata e dusia beka na iotioti ni nodra lewai na sipi kei na me, me vaka a tukuna o Jisu ni na yaco ena gauna sa tadu mai kina ena nona lagilagi? (Maciu 25:​31-​33) Sega. Na iotioti ni veilewai qori ena qai yaco ni sa tadu mai o Jisu ena veivakararawataki levu. Ia na veitawasei e tukuni tiko ena ivakatautauvata ni lawa, ena yaco ena gauna ni “ivakataotioti ni veika vakavuravura.” b Qori e donuya sara tiko ga na gauna eda sa bula tu kina qo​—ena veisiga me yacova yani na veivakararawataki levu. E vakayacori tiko gona vakacava na cakacaka ni nodra tawasei na tamata ena gauna qo?

18, 19. (a) Sa vakayacori tiko vakacava nikua na nodra tawasei na tamata? (b) Na cava e dodonu mera cakava na tamata yalomalumalumu ena gauna qo? (Raica tale ga na ivakamacala e ra ena tabana e 21.)

¹⁸ Era sa mai lewena tiko na ivavakoso i Jiova ena gauna qo e vica vata na milioni na tamata, se ika ivakatakarakara. So era dau tiko ena iVakananumi, ena soqoni, so tale era marau nira vulica na iVolatabu. Ia, era lotu vaKarisito dina beka? Me vaka e kaya o Jisu, era na rairai ‘yavi yani e matasawa,’ ia o ira ga na ka “vinaka” era na soqoni ina sova ​—qo e vakaibalebaletaki ina ivavakoso vaKarisito. Era na viritaki laivi na kena e ca, ra qai biu ena bukawaqa vakaivakatakarakara, oya mera rusa vakadua.

¹⁹ O ira na vakaibalebaletaki ina ika ca, era a vulica tu na iVolatabu ena dua na gauna kei ira na tamata ni Kalou, ia era sa muduka koso nodra vuli. So era sega sara ga ni via imuri i Jisu, dina nira lotu vaKarisito na nodra itubutubu. Era vakatulewataka mera kua ni qaravi Jiova, se ra a sokaloutaki koya tu ena dua na gauna, ia qai luluqa nodra vakabauta.c (Isik. 33:​32, 33) Dodonu mera vakamalumalumutaki ira ina ivavakoso era vaka tiko na sova o ira na yalomalumalumu, mera vakarurugi ra qai dei kina ni bera na iotioti ni siga ni lewa.

20, 21. (a) Na cava eda sa bau vulica nida railesuva vakalekaleka na ivakatautauvata i Jisu me baleta na tubu? (b) Na cava o nakita dei mo na cakava?

²⁰ Na cava eda sa bau vulica ena noda raica vakalekaleka na ivakatautauvata i Jisu me baleta na tubu? Kena imatai, me vaka na tubu ni sore ni musita, e vakasakiti dina na kena tubu na wiliwili ni tamata era taleitaka na itukutuku ni Matanitu ni Kalou ena vuravura qo. Sega ni dua e tarova rawa na tete ni cakacaka i Jiova! (Aisea 54:17) Sa vakarautaki tale tu ga na veitaqomaki vakayalo vei ira na vinakata mera ‘vakarurugi.’ Kena ikarua, o Jiova ga e vakatubura tiko. Me vaka na leveni e curuma na ibuli taucoko, na tubu qo e sega ni laurai levu sara, ia e tete ga vakalevu! Kena ikatolu, era sega ni yalodina kece o ira na vakarorogo. So era vaka na ika ca ena ivakatautauvata i Jisu.

²¹ Ia e veivakauqeti dina na noda raica nona vakayarayarataka mai e levu na tamata yalomalumalumu o Jiova! (Joni 6:​44) E laurai sara ga kina na tubu vakasakiti ena veivanua. Me vakalagilagi ga na Kalou o Jiova. Me uqeti keda mada ga qori meda muria na veivakadreti a volai ena vica na senitiuri sa oti: “E na mataka mo kaburaka na nomu sila . . . , ni ko sa sega ni kila se cava vei rau ena yaco [tubu], se na ka oqo se na ka ko ya, se na vinaka vakatautauvata ruarua.”​—Dauv. 11:6.

[iVakamacala e ra]

O na Sauma Vakacava?

• Na cava eda vulica me baleta na tubu e vauca na Matanitu ni Kalou kei na veitaqomaki vakayalo, ena ivakatautauvata i Jisu me baleta na sore ni musita?

• Na cava na ibalebale ni leveni ena ivakatautauvata i Jisu, na ka dina cava me baleta na tubu e vauca na Matanitu ni Kalou e vakamacalataka o Jisu?

• Na cava e vakavotui ena ivakatautauvata ni lawa me baleta na tubu e vauca na Matanitu ni Kalou?

• Eda na vakadeitaka vakacava nida na ‘tiko ga ena sova’?

[iYaloyalo ena tabana e 18]

Na cava eda vulica ena ivakatautauvata ni sore ni musita me baleta na tubu e vauca na Matanitu ni Kalou?

[iYaloyalo ena tabana e 19]

Cava eda vulica ena ivakatautauvata ni leveni?

[iYaloyalo ena tabana e 21]

Na cava e vakaibalebaletaki ina kena tawasei na ika vinaka kei na kena e ca?