Vakatotomuri Jisu me Vakadonuya o Jiova Nomu Sokalou
O Jiova e sureti ira vakayalololoma na tamata “mai na veivanua kece, kei na veimataqali, kei na veimatanitu, kei na duivosavosa” mera sokaloutaki koya. (Vkta. 7:9, 10; 15:3, 4) Era ‘raica na lagilagi i Jiova’ o ira na taleitaka na veisureti qori. (Same 27:4; 90:17) Me vakataki koya na daunisame, era vakalagilagia na Kalou ra qai kaya: “Tou mai lotu ka cuva sobu: tou mai vakatekiduru e na mata i Jiova, o koya ka buli keda.”—Same 95:6.
Na Sokalou e Taleitaki Vakalevu
E Luve ni Kalou duabau ga o Jisu, qai levu na gauna a vulica tiko kina na ivakarau ni vakasama i Tamana, nona ivakavuvuli kei na nona ivakatagedegede. E dusimaki keda kina ena nuidei ina sokalou dina. E kaya: “Oi au na sala, kei na vu-ni-dina, kei na vu-ni-bula; sa sega ni torovi Tamaqu walega e dua na tamata, e na vukuqu ga.”—Joni 1:14; 14:6.
E ivakaraitaki vinaka o Jisu ena nona vakamalumalumu vei Tamana. E kaya: “Ni’u sa sega talega ni kitaka e dua na ka vakai au; ia na ka ga sa vakatavulici au kina ko Tamaqu, sai koya ka’u sa vosataka.” E kaya tale: “Ni’u sa kitaka tikoga na ka sa vinakata ko koya.” (Joni 8:28, 29) E vakamarautaki Tamana vakacava o Jisu?
Kena imatai oya na nona yalodina vei Tamana, na ka sara ga e vinakati ena sokalou. E vakaraitaka o Jisu na nona volekati Tamana ena nona talairawarawa vua, e cakava na lomana, dina ni yaco vua e so na veika mosimosi. (Fpai. 2:7, 8, VV) E tiki bibi ni nona sokalou o Jisu me tuberi ira e so tale mera tisaipeli, mani kilai kina me iVakavuvuli vei ira na vakabauta kei ira na tawavakabauta. (Maciu 22:23, 24; Joni 3:2) E veivukei tale ga se veivakacegui ena levu na gauna. Na levu ni nona dau vakuai koya, e taleitaka kina vakalevu na vunau, qai lailai wale na gauna ni nona vakacegu. (Maciu 14:13, 14; 20:28) Dina ni dau osooso, ia se tiko ga na gauna ni nona masu me vosa kina vua na Tamana vakalomalagi. (Luke 6:12) E taleitaka dina na Kalou na ivakarau ni nona sokalou o Jisu!
Na Sasaga me Vakamarautaki Kina na Kalou
E kila vinaka o Jiova na itovo i Luvena qai vakadonui koya. (Maciu 17:5) Ia, e kila vinaka tale ga o Setani na Tevoro nona yalodina voli o Jisu. A taketetaki Jisu sara tiko ga o koya. Na vuna? Ni se sega ni dua na tamata me taucoko sara nona yalodina vua na Kalou, me taucoko kina nona sokaloutaki koya. E saga gona na Tevoro me tarovi Jisu me kua ni vakayacora na sokalou qori.—Vkta. 4:11.
Ena nona saga me vakacalai Jisu o Setani a temaki koya kina. E kauti Jisu “ki na dua na ulu-ni-vanua cecere sara, a sa vakaraitaka vei koya na matanitu kecega e vuravura, kei na kedrai ukuuku.” Sa qai kaya: “A ka kecega oqori ka’u na solia vei iko, kevaka ko na cuva sobu ka vakarokoroko vei au.” Na cava e cakava o Jisu? E kaya: “Mo lako tani, Setani, ni sa volai, Mo vakarokoroko vei Jiova na nomu Kalou, ia mo qaravi koya duaduaga.” (Maciu 4:8-10) E kila vinaka tu o Jisu ni sa na okati me sokalou lasu kevaka e cuva vei Setani, se mani cava ga ena rawata kina. E vakatabakidua ga vei Jiova na sokalou i Jisu.
De dua ena sega ni solia sara vei keda o Setani na matanitu kece era tu qo e vuravura kei na kedra lagilagi meda qai sokaloutaki koya kina. Ia e saga tiko ga vakaukaua me vakacacana na nodra sokalou na lotu vaKarisito yalodina. E vinakata na Tevoro meda sokaloutaka e so tale na ka se dua tale.—2 Kor. 4:4.
A yalodina tiko ga o Jisu Karisito me yacova nona mate. Ena nona yalodina tiko ga vua na Kalou, e vakalagilagi Jiova kina ena sala e sega ni bau cakava e dua tale. Eda saga tale ga na lotu vaKarisito dina nikua meda vakamurimuria na yalodina i Jisu ena noda sokaloutaka vakatabakidua na Dauveibuli. Sega ni vakabekataki ni talei dina na noda veiwekani voleka kei na Kalou.
Eda na Vakalougatataki ni Vakadonui Noda Sokalou
Eda na vakalougatataki vakalevu kevaka eda dau uqeta na “lotu savasava ka sega ni cala” vua na Kalou. (Jeme. 1:27) Kena ivakaraitaki, eda sa bula donuya tu na gauna e levu era sa dau “daulomani ira walega . . . era na dauvinakata nai lavo, era na daubole,” ra qai “daucati ira na tamata vinaka.” (2 Tim. 3:1-5) Ia ena isoqosoqo ni Kalou, eda bula maliwai ira na tamata savasava, era duavata, ra qai saga vagumatua mera dei ena ivakatagedegede e vinakati me sokaloutaki kina o Jiova. Sa bau veivakacegui dina, se vakaevei?
Na noda saga me kua ni takavi keda na duka ni vuravura qo, eda vakalougatataki kina ena lewaeloma e savasava. Eda vinakata me savasava tiko ga noda lewaeloma ena noda muria ena yalomalumalumu na ivakavuvuli dodonu ni Kalou, da qai talairawarawa ina lawa i Sisa e sega ni veisaqasaqa kei na lawa ni Kalou.—Mari. 12:17; Caka. 5:27-29.
E tiko e dua tale na ka eda na vakalougatataki kina nida sokalou mai vu ni lomada. Nida dei tiko ga ni vakayacora na loma ni Kalou, da qai sega ni vakaliuci keda, ena vakainaki na noda bula da qai lomavakacegu. Nida nuitaka na bula tawamudu ena parataisi e vuravura, eda na sega ni kaya kina: “Me da kana ga ka gunu, ni da na mate ni mataka.”—1 Kor. 15:32.
E tukuni ena Vakatakila na gauna era na “bula mai [kina] na veivakararawataki levu” o ira na savasava tiko ga vei Jiova. E tukuni kina ni “ko koya sa tiko e na i tikotiko vakaturaga e na taqomaki ira e na nona tiko e na kedra maliwa.” (Vkta. 7:13-15, VV) Na Kalou ga o Jiova e dabe tiko ena itikotiko vakaturaga, ni lagilagi qai cecere duadua e lomalagi kei vuravura. Vakasamataka mada na marau levu o na vakila ni sureti iko mo nona vulagi, qai taqomaki iko mai na leqa! Eda rawa ni vakila tale ga ena gauna qo nona veitaqomaki kei na nona veikaroni.
Koya gona, o ira kece e vakadonuya na Kalou na nodra sokalou era na tuberi “ki nai vurevure ni wai bula.” Na ivurevure ni wai bula qo e vakatakarakarataka na isolisoli taucoko e vakarautaka o Jiova meda rawata kina na bula tawamudu. Io, “ena tavoya kecega na Kalou na wai ni mata mai na matadra” ena vuku ni isoro i Karisito. (Vkta. 7:17) Era na bula uasivi tale na kawatamata, qai sega ni tukuni rawa na nodra marau o ira na bula tawamudu e vuravura. Na gauna mada ga qo, o ira na dau sokalou era vakavinavinaka ena marau vei Jiova, ra qai duavata kei ira mai lomalagi ena nodra lagata: “A ka levu ka veivakurabuitaki na nomuni cakacaka, na Turaga na Kalou Kaukauwa [o Jiova]; sa dodonu ka dina na nomuni valavala, oi kemuni na Tui ni veigauna kecega. O cei me sega ni rerevaki kemuni, na Turaga [Jiova], ka vakarokorokotaka na yacamuni? ni sai kemuni ga sa yalosavasava: ko ira kecega na veivanua era na lako mai ka cuva e matamuni; ni sa vakatakilai mai na nomuni cakacaka dodonu.”—Vkta. 15:3, 4.
[iYaloyalo ena tabana e 27]
Na cava e vakayagataka o Setani me temaki keda meda biuta kina na sokalou dina?