Taro na Dauwiliwili
Ke Uasivi o Atama, A Rawa Vakacava me Valavala Ca?
Ni buli Atama na Kalou a solia vua na galala me vakatulewa ena nona bula, e rawa gona me valavala ca. E sega ni veisaqasaqa na galala ni vakatulewa kei na nona uasivi o Atama. Ia na Kalou duadua ga e vinaka vakaoti. (Vakarua 32:3, 4; Same 18:30; Marika 10:18) Na ka e uasivi se totoka vakaoti vei keda e vakaiyalayala ga. Kena ivakaraitaki, na isele e uasivi ena musu bulumakau, ena uasivi tale beka ga mo kania kina na suvu? Ena uasivi ga e dua na ka ena inaki a buli kina.
Na cava na inaki ni Kalou ena nona buli Atama? A nona inaki mera sucu mai kina na matatamata vuku e tiko nodra galala ni vakatulewa. O ira era vinakata mera bucina nodra lomana na Kalou ra taleitaka nona sala, era na vakaraitaka ena nodra digia mera talairawarawa ina nona ivakaro. A sega ni porokaramutaki ena vakasama ni tamata me talairawarawa, ia a buli me vu mai lomana nona talairawarawa. (Vakarua 10:12, 13; 30:19, 20) Ke a sega ni rawa ni digia o Atama me talaidredre, kena ibalebale ya ni sa sega ni taucoko se bula uasivi. Koya gona na nona vakayagataka o Atama nona galala me vakatulewa, e kaya na iVolatabu ni muri watina ena nona digia me talaidredre ena ivakaro ni Kalou me baleta “na kau sa kilai kina na ka vinaka kei na ka ca.”—Vakatekivu 2:17; 3:1-6.
E dua beka na ka e cala ena nona buli o Atama me sega kina ni vakatulewa dodonu se me vorata na veitemaki? Ni bera ni talaidredre o Atama, a raica na Kalou o Jiova ni “sa . . . vinaka sara” na ka kece e bulia e vuravura, oka kina o rau na imatai ni veiwatini. (Vakatekivu 1:31) Koya gona, ni valavala ca o Atama e sega ni kena ibalebale ni dua na ka e cala ena gauna a buli kina, o koya ga a cala. (Vakatekivu 3:17-19) A sega ni uqeti koya nona lomana na Kalou kei na nona taleitaka na ka dodonu me talairawarawa.
Vakasamataka tale ga nona bula voli e vuravura o Jisu a uasivi me vakataki Atama. Ia ni vakatauvatani kei ira na kawa i Atama, a kunekunetaki o Jisu ena yalo tabu qai sega nona malumalumu me rawai kina ena veitemaki. (Luke 1:30, 31; 2:21; 3:23, 38) A digia o Jisu me yalodina tiko ga vei Tamana, dina ni vakatovolei vakaca sara. E beitaki ga o Atama ena nona vakayagataka cala na galala ni vakatulewa me talaidredre kina ena ivakaro i Jiova.
Na cava e digia kina o Atama me talaidredre vua na Kalou? E vakabauta beka ni na vinaka cake na kena ituvaki? Sega, e kaya na yapositolo o Paula ni a “sega ni temaki ko Atama.” (1 Timoci 2:14) Ia a muria na ka e vinakata o watina, ena nona digia me kana mai na vunikau vakatabui. E levu cake nona via vakamarautaki watina o Atama mai na nona talairawarawa vua na Dauveibuli. Koya gona, ni dulaki vua na vuanikau vakatabui, a rawa ni vakasamataka o Atama se na tara vakacava nona veiwekani kei na Kalou ke talaidredre. Ni sega ni titobu nona lomana na Kalou, a rawarawa sara ga me vecei o Atama, okati kina nona vecei koya o watina.
A valavala ca o Atama ni bera ni vakaluveni, o ira kece tale ga nona kawa era sucu ivalavala ca. Io, me vakataki Atama, o keda tale ga eda sucu vata mai kei na galala ni vakatulewa. Meda vakananuma vakatitobu mada ga na vinaka i Jiova da qai vaqaqacotaka noda lomani koya, ni dodonu meda talairawarawa, meda qaravi koya tale ga.—Same 63:6; Maciu 22:36, 37.