Era Vakavuna na iVakadinadina i Jiova na Kavoro ni Bula Vakawati?

“KE DUA vei rau na veiwatini e veisautaka nona lotu, ena kavoro na vakawati.” E levu era dau tukuna tale ga qori ke dua na isa ni vakawati e vakatulewataka me iVakadinadina i Jiova. Ia e dina beka na vakasama qo?

Sa macala tu ga ni na kurabui e dua vei rau na veiwatini ke sa taleitaka na lotu se via veisautaka nona vakabauta o kena isa. De dua ena vakavuna na nuiqawaqawa, yalolailai, kei na cudru.

E levu na gauna e dau nanuma o yalewa ni dodonu me veisau na nona lotu. Ke vuli iVolatabu tiko o watimu yalewa kei ira na iVakadinadina i Jiova, ena vinaka se na ca kina nomudrau bula vakawati? Ke o dua na yalewa vakawati o vuli iVolatabu tiko kei ira na iVakadinadina i Jiova, na cava mo cakava me kua ni lomaleqa vakalevu kina o watimu?

Rai ni Tagane Vakawati

O Mark e vakaitikotiko mai Ositerelia, a tekivu vuli iVolatabu o watina kei ira na iVakadinadina i Jiova ena ika12 ni yabaki ni nodrau vakamau. “Au marautaka na noqu vakawati, e veivakacegui tale ga na noqu cakacaka saumi,” e kaya o Mark. “E vinaka na neirau bula. Ia ni vakatulewataka o watiqu me vuli iVolatabu kei ira na iVakadinadina i Jiova, au vakila ni dodonu me na veisau tale ga na ivakarau ni noqu bula. Ena itekivu au sega ni nuidei, ia au lomaleqa sara vakalevu ni sa vakatulewataka me papitaiso me iVakadinadina i Jiova.”

E leqataka o Mark de na tini koso na nona bula vakawati ena vuku ni lotu vou nei watina. Mani nanuma me tarova na vuli iVolatabu nei watina kei na nona veimaliwai kei ira na iVakadinadina. Ia a sega ni cakava qori o Mark, a laiva me oti mada e dua na gauna. Na cava e yaco ena nona vakawati?

“Au marau” e kaya o Mark, “sa qai qaqaco ga na neirau vakawati ni vakatauvatani eliu. E vinaka cake tiko ga ena loma ni 15 na yabaki e papitaiso kina o watiqu me iVakadinadina i Jiova.” Na cava e dei tiko ga kina nomu vakawati? “Niu vakasamataka lesu,” e kaya o Mark, “baleta sara ga ni muria o watiqu na ivakasala vinaka ena iVolatabu. E dau saga me dokai au.”

Nodra iVakasala e So na Yalewa Vakawati e Veisau na Rai Nei Watidra

Ke o yalewa vakawati o sosoqoni tiko kei ira na iVakadinadina i Jiova, na cava o rawa ni cakava se tukuna me kua ni lomaleqa vakalevu kina o watimu? Vakasamataka mada na nodra ivakamacala na yalewa mai na so na yasa i vuravura.

O Sakiko, mai Japani: “Sa 31 na yabaki noqu vakamau, e tolu na luvequ. Sa oti qo e 22 na yabaki noqu iVakadinadina i Jiova. E dau dredre ena so na gauna ni duidui na neirau vakabauta kei watiqu. Ia au saga meu muria na ivakasala vakaivolatabu meu ‘vakarorogo, berabera ni vosa, berabera ni cudru.’ (Jemesa 1:19) Au saga tale ga meu dau yalovinaka, vakamalumalumu vei watiqu ena ka e vinakata ke sega ni veisaqasaqa kei na ivakavuvuli vakaivolatabu. Qo e vinaka kina neirau bula vakawati.”

O Nadezhda, mai Rusia: “E 28 na yabaki na dede ni noqu vakawati, sa 16 vakacaca na yabaki noqu papitaiso meu iVakadinadina. Niu bera ni vuli iVolatabu, au sega ni kila ni dodonu me ulunivuvale o watiqu. Levu na ka au dau via vakatulewataka ga. Ia ni toso na gauna au vakila ni na marau, ena vakacegu tale ga na vuvale ke muri na ivakavuvuli vakaivolatabu. (1 Korinica 11:3) Tekivu vakamalua meu sa vakamalumalumu, e raica rawa o watiqu na veisau qo.”

O Marli, mai Brazil: “E rua na luvequ, sa 21 na yabaki noqu vakawati. Au a papitaiso me iVakadinadina ena tinikaono na yabaki sa oti. Au vulica ni inaki ni Kalou o Jiova me rau kua ni veibiu na veiwatini. Au mani saga meu dua na radinivale vinaka, meu vakamarautaki Jiova kei watiqu ena ka au tukuna kei na ka au cakava.”

O Larisa, mai Rusia: “Niu mai iVakadinadina i Jiova rauta na 19 na yabaki sa oti, au kila ni bibi duadua meu veisautaka na ivakarau ni noqu bula. E raica rawa o watiqu na yaga ni iVolatabu ina noqu bula, rawa kina meu dua na radinivale vinaka, meu marautaka tale ga na vinaka nei watiqu. Taumada, keirau sega ni duavata ena nodratou vakavulici na gone, ia keirau walia na duidui qori. Mani vakadonuya o watiqu meratou lako kei au na gone ina noqu lotu baleta e kila niratou vulica kina na ka e yaga vei ratou.”

O Valquíria, mai Brazil: “Sa 19 na yabaki noqu vakawati, e dua na luvequ. Au mai iVakadinadina i Jiova ena tinikatolu na yabaki sa oti. Taumada, a sega ni vinakata o watiqu meu lako ena cakacaka vakavunau. Ia ena yalomalumalumu au vakamacalataka vua na ka e lomaleqataka qai vukei koya me raica na yaga ni iVolatabu ena noqu itovo. Tekivu vakamalua me raica o watiqu na kena bibi vei au na cakacaka vakavunau. Nikua, e tokoni au vakalevu ena cakacaka me baleta noqu vakabauta. Niu lai caka vuli iVolatabu ena taudaku ni siti, e dau kauti au ena motoka qai waraki au me yacova sara ni oti.”

Kena Yaga

Kua ni leqataka nomu vakawati ke vuli iVolatabu tiko o watimu kei ira na iVakadinadina i Jiova. E levu na veiwatini e vuravura raraba era vakadinata na yaga ni iVolatabu ena bula vakawati.

E kaya e dua na tagane sega ni iVakadinadina i Jiova: “Ena itekitekivu, au rarawataka ni sa taleitaka o watiqu na nodra vakabauta na iVakadinadina i Jiova, ia qo au vakila ni yaga dina nona veisau.” Dua tale e tukuna me baleti watina yalewa: “Ena nona yalodina, gugumatua kei na yalodei, au dokai ira vakalevu kina na iVakadinadina i Jiova. Na nona vakabauta e yaga vakalevu ena neirau bula vakawati. Keirau dau veirogorogoci qai saga me dei neirau vakawati me yacova na mate.”

[Kato/iYaloyalo ena tabana e 30]

Na Cava Nodra Rai na iVakadinadina i Jiova me Baleta na Vakawati?

Era kila na iVakadinadina i Jiova ni iVolatabu e Vosa uqeti ni Kalou. Era taura gona vakabibi na ka e kaya me baleta na vakawati. Raica mada na ka e kaya na iVolatabu ena isaunitaro e toka qori:

▪ Era uqeti beka na iVakadinadina i Jiova mera biuti watidra ke duidui nodra lotu? Sega. E tukuna na yapositolo o Paula: “Kevaka e dua na wekada [“tacida,” NW], sa sega ni lotu na watina, a sa via tiko vata kaya na watina, me kakua ni biuta tani. Kevaka sa loma ni tagane tawa lotu me rau tiko vata kei na watina, me kakua ni drotaki koya na yalewa.” (1 Korinica 7:12, 13) Era muria na ivakaro qori na iVakadinadina i Jiova.

▪ E uqeti beka e dua na yalewa vakawati iVakadinadina i Jiova me kua ni rogoci watina ke rau sega ni lotu vata? Sega. E kaya na yapositolo o Pita: “Oi kemudou . . . na yalewa, dou vakamalumalumutaki kemudou vei ira na watimudou; me rawai ira na watidra ko ira na yalewa e na nodrai valavala, ka segai e na vunau, kevaka sa so sa sega ni talairawarawa ki na vunau; ni ra sa raica na nomudoui valavala savasava kei na nomudou rere [“veidokai,” NW].”​—1 Pita 3:1, 2.

▪ Era vakavulica beka na iVakadinadina i Jiova ni cecere duadua na lewa i tagane vakawati? Sega. Na yapositolo o Paula e kaya: “Ka’u sa vinakata mo dou kila ni sa ulu ni tamata yadua na Karisito; ia na ulu ni yalewa na tagane; kei na ulu i Karisito na Kalou.” (1 Korinica 11:3) Ena rokovi watina na yalewa vakawati lotu vaKarisito ni ulunivuvale. Ia na nona lewa e vakaiyalayala ga. Ena saumitaro vua na Kalou kei Karisito. Kevaka gona e vakarota me cakava o watina e dua na ka e beci kina na lawa ni Kalou, na yalewa vakawati lotu vaKarisito ena “talairawarawa vua na Kalou, me kakua ga vei ira na tamata.”​—Cakacaka 5:29.

▪ Era vakavulica beka na iVakadinadina i Jiova ni tabu na veisere? Sega. O Jisu Karisito e kaya: “Au sa kaya vei kemudou, o koya sa veisere kei na watina, kevaka e sega ni vuna na dautagane [“veidauci,” NW], ka la’ki veiwatini kei na dua tale, sa dauyalewa [“veibutakoci,” NW].” (Maciu 19:9, VV) Era vakabauta gona na iVakadinadina i Jiova na rai i Jisu ni yavu duadua ga ni veisere na veidauci. Ia era vakabauta tale ga ni sega ni dodonu me tini koso na vakawati ena so na yavu e sega na betena. Era uqeti ira na vakabauta vata mera muria na vosa i Jisu: “Ena biuti tamana kei na tinana na tagane, ka kabita na watina: a rau na lewe dua . . . ia na ka sa vauca vata na Kalou, me kakua ni tawasea rua na tamata.”​—Maciu 19:5, 6.