Tuberi Ira na Qelenisipi Era sa Yali Tu

“Tou mai reki vata, ni’u sa kunea na noqu sipi ka yali.”​—LUKE 15:6.

1. E vakadinadinataka vakacava o Jisu ni ivakatawa dauloloma?

E VAKATOKAI me “nodrai Vakatawa levu na sipi” o Jisu Karisito, na Luvena duabau ga o Jiova. (Iper. 13:20) E parofisaitaka na iVolatabu nona na lako mai, qai vakaraitaka ni na dua na iVakatawa ni sipi talei ena nona vaqara na ‘sipi yali’ e Isireli. (Maciu 2:​1-6; 15:24) Kena ikuri, me vaka ga e dua na ivakatawanisipi dina ena solia nona bula me taqomaka kina nona sipi, a mate tale ga o Jisu me isoro ni veivoli ena vukudra na vaka na sipi, qai yaga vei ira na nona isoro.​—Joni 10:​11, 15; 1 Joni 2:​1, 2.

2. Na cava era malumalumu kina vakayalo e so na lotu vaKarisito?

² E rarawataki ni so sara ga era taleitaka na isoro ni veivoli Jisu ra qai yalataka nodra bula vua na Kalou, sa ra biuta na ivavakoso lotu vaKarisito. Rairai e vakavuna mera malumalumu vakayalo na yalolailai, tautauvimate, kei na so tale na ituvaki. Ia, kevaka era lewe ni qelenisipi ni Kalou era na lomavakacegu ra qai marautaka na veika e tukuna o Tevita ena ika23 ni Same. Kena ivakaraitaki, e lagata: “A noqui vakatawa ko Jiova; ena sega na ka me yali vei au.” (Same 23:1) Era na sega ni lekata e dua na ka vakayalo o ira na qelenisipi ni Kalou, ia e sega ni vakila qori na sipi era sa yali tu. O cei ena rawa ni tuberi ira? Era na dusimaki vakacava? Koya gona, na cava ena rawa ni caka mera lesu ina qelenisipi?

O Cei e Rawa ni Veituberi?

3. E vakaraitaka vakacava o Jisu ni bibi mera vakabulai na sipi ni Kalou era sa yali tu?

³ E bibi meda saga vagumatua mera vakabulai tale na sipi ni Kalou era sa yali tu. (Same 100:​3) E tukuna kina na vosa vakatautauvata qo o Jisu: “Kevaka e dua na tamata sa dua na drau na nona sipi, a sa yali e dua, ena sega beka ni biuta laivi tu na ciwasagavulu ka ciwa, ka lako ki na veiulu-ni-vanua me vakasaqarai koya ka yali? Ia kevaka sa kunea, au sa kaya vakaidina vei kemudou, ena reki vakalevu e na vuku ni sipi oqo, ka vakalailai ga e na vuku ni ciwasagavulu ka ciwa sa sega ni yali. Sa vaka talega oqo na Tamamudou sa tiko mai lomalagi, ni sa sega ni vinakata me yali e dua vei ira na lalai oqo.” (Maciu 18:​12-​14) O cei ena rawa ni tuberi ira na vaka na sipi sa ra yali tu mai na qelenisipi?

4, 5. Na rai cava me tiko vei ira na qase ni ivavakoso baleti ira na qelenisipi ni Kalou?

⁴ Ke ra via tuberi ira na sipi sa yali tu o ira na qase ni ivavakoso, mera nanuma tiko ni o ira na sipi ni Kalou era lewe ni ivavakoso era sa yalataki ira oti tu vei Jiova​—io, era vakamareqeti na ‘sipi ni nona vanua veico.’ (Same 79:13) Era vinakata tu na sipi va qo mera kauaitaki, kena ibalebale na ivakatawa yalololoma ena kauaitaki ira na sipi yadudua. Ena yaga sara vakalevu nodra veivakatawani. Nona veivakauqeti yalololoma na ivakatawa ena rawa ni vakaukauataki ira tale vakayalo qai uqeti ira mera lesu ina qelenisipi.​—1 Kor. 8:1.

⁵ E nodra itavi na ivakatawanisipi ni Kalou mera vaqara na sipi sa ra yali tu qai saga mera tuberi tale. E uqeti ira kina na qase lotu vaKarisito mai Efeso o Paula ena nodra itavi vakaivakatawa: “O koya ga mo dou vakaraici kemudou, kei ira kecega na qele-ni-sipi, sa lesi kemudou kina na Yalo Tabu mo dou nodrai vakatawa, mo dou vakania nai soqosoqo lewe ni lotu ni Kalou; ko ira sa volia ko koya, e na nona dra ga.” (Caka. 20:28) A uqeti ira tale ga va qori na lumuti tagane era sa itabaqase na yapositolo o Pita: “Dou vakania na qele-ni-sipi ni Kalou era sa tiko vei kemudou, ka dou vakatawana, kakua ga e na loma e vosota, e na loma ga e vinakata; kakua ga e na vuku ni yau vakasisila, e na loma ga e rekitaka; ia dou kakua ni valavala vakaturaga vei ira sa nomudoui tavi, ia mo dou nodrai vakarau ga na qele ni sipi.”​—1 Pita 5:​1-3.

6. Na cava e bibi kina ena gauna qo mera veikaroni na ivakatawanisipi?

⁶ Mera vakatotomuri Jisu “nai vakatawa vinaka” o ira na ivakatawa lotu vaKarisito. (Joni 10:11) E dau kauaitaki ira dina na sipi ni Kalou qai vakabibitaka na nodra karoni ena nona tukuna vei Saimoni Pita me ‘vakatawana na nona sipi.’ (Wilika Joni 21:​15-​17.) Vakauasivi ni vinakati mera vakatawani na sipi ena gauna qo, baleta ni saga tiko vakalevu na Tevoro mera kua ni yalodina vei Jiova o ira na nona dauveiqaravi yalayala. E vakayagataka o Setani noda malumalumu vakayago kei na veika e vakarautaka tu o vuravura mera bacani kina ena ivalavala dukadukali na dauveiqaravi i Jiova. (1 Joni 2:​15-​17; 5:​19) Ena rawarawa sara nodra rawai na malumalumu tu vakayalo, qori gona na vuna mera na tuberi kina mera ‘lako voli ena yalo tabu.’ (Kala. 5:​16-​21, 25) Noda tuberi ira na sipi va qo ena vinakati kina noda nuitaka na Kalou ena masu, veidusimaki ni yalona tabu, kei na maqosa ni kena vakayagataki na nona Vosa.​—Vkai. 3:​5, 6; Luke 11:13; Iper. 4:​12.

7. Na cava e bibi kina vei ira na qase nodra vakatawani na sipi era sa yali tu?

⁷ E dau vakayagataka na ititoko na ivakatawa ena gauna makawa e Isireli me dusimaki ira kina nona qelenisipi. Nira curu yani na sipi se nodra biuta na bai, era na ‘lako e ruku ni ititoko’ ena qai wiliki ira na ivakatawa. (Vunau 27:32; Maika 2:​12; 7:​14) E dodonu me va tale ga qori na ivakatawa lotu vaKarisito ena nona kila vinaka na kedra ituvaki na sipi ni Kalou. (Vakatauvatana Vosa Vakaibalebale 27:23.) Koya gona na veivakatawani e dua na itavi bibi era dau veivosakitaka na ilawalawa qase. Okati kina na kena tuvanaki mera tuberi tale na sipi era sa yali tu. A kaya sara ga o Jiova ni na vakasaqarai ira na nona sipi, ena lomani ira, ena vakarautaka tale ga vei ira na veika ra vinakata. (Isik. 34:11) E marautaka na Kalou ni raici ira na qase ni ivavakoso nira saga me lesu ina qelenisipi na sipi sa yali tu.

8. Na sala cava ena kauaitaki ira kina na sipi na qase ni ivavakoso?

⁸ Ni tauvimate e dua eda vakabauta vata, ena vu ni veivakaukauataki qai marautaki vua na nona veisiko na ivakatawa ni qelenisipi ni Kalou. E tautauvata sara ga qori ke kauaitaki e dua na sipi e tauvimate tu vakayalo. Ena rairai wilika na qase ya e so na tikinivolatabu, railesuva e dua na ulutaga, vakamacalataka e so na veitikina bibi mai na soqoni, masu kei koya e malumalumu tu vakayalo se cakava e so tale na ka na qase ni ivavakoso. Rawa ni tukuna nira na marautaka na lewe ni ivavakoso mera raici koya tale ena soqoni vaKarisito. (2 Kor. 1:​3-7; Jeme. 5:​13-​15) Ena uqeti ira sara vakalevu noda veisiko, qiri, se volavola vei ira! Ena vu ni marau vua na ivakatawa vaKarisito yalololoma nona tubera e dua na sipi a yali tu.

Me Veitokonitaki

9, 10. Na cava e tukuni kina ni sega ni yalani wale ga vei ira na qase na nodra kauaitaki na sipi era yali tu?

⁹ Eda bula tu qo ena gauna osooso qai lewalewai dredre, ena rawa nida sega ni kidava nona sa yali tiko e dua na noda itokani vakabauta mai na ivavakoso. (Iper. 2:1) Ia, era talei ena matai Jiova o ira na nona sipi. Era yaga kece vua, me vakataka ga na veitiki ni yagoda. Koya gona, e dodonu meda kauaitaki ira na tacida da qai lomani ira. (1 Kor. 12:25) E tiko beka vei iko na itovo qori?

¹⁰ E dina ni nodra itavi na qase mera vakaliuliu ena nodra vaqarai kei na nodra tuberi na sipi era yali tu, ia e sega ni yalani ga vei ira. Rawa tale ga nira veitokoni e so tale. Eda rawa sara ga ni veiuqeti qai dusimaki ira na tacida era vinakata mera lesu mai ina qelenisipi. Eda na veitokoni vakacava?

11, 12. Na itavi dokai cava o na lesi kina ni o tubera e dua e vinakata na veivukei vakayalo?

¹¹ Ena so na ituvaki, era na rairai lesia na qase e dua na dautukutuku matua me tubera ena iVolatabu e dua e malumalumu tu vakayalo e vinakata me lesu mai. Na kena inaki mera tuberi tale mera kua ni ‘biuta na loloma ka tu vei ira e liu.’ (Vkta. 2:​1, 4) Era na rawa sara ga ni vakaukauataki ra qai uqeti vakayalo ena nodra railesuva e so na itukutuku era sega ni rogoca se kila ena gauna ra yali tu kina ena ivavakoso.

¹² Ke ra kerei iko na qase mo vuli kei na dua e vinakata me tuberi tale vakayalo, masuta na veidusimaki i Jiova me vakalougatataka na nomu sasaga. Io, “mo vakalaiva vei Jiova na nomu cakacaka, ena vakataudeitaki kina na nanuma ni lomamu.” (Vkai. 16:3) Vakasamataka vakatitobu e so na tikinivolatabu kei na so na veitikina bibi e veivauqeti mo veivosakitaka kei ira na vinakata na veivukei vakayalo. Vakasamataka na ivakaraitaki vinaka ni yapositolo o Paula. (Wilika Roma 1:​11, 12.) A vinakata o Paula me raici ira na lotu vaKarisito e Roma me solia vei ira e so na isolisoli vakayalo mera vakataudeitaki kina. A vakanamata tale ga mera veivakayaloqaqataki. Sega li ni dodonu me tiko vei keda na itovo ni rai qori, nida saga tiko ga me tubera e dua na sipi sa yali mai na qelenisipi ni Kalou?

13. Na cava o na rairai veivosakitaka kei koya e malumalumu tu vakayalo?

¹³ Ena gauna drau vuli tiko kina, o na rairai taroga, “O vulica vakacava na ka dina?” Uqeti ira mera nanuma lesu na marau era vakila ena gauna era a gumatua tiko kina na qaravi Jiova, mera talanoataka na veika ra dau raica ena soqoni, cakacaka vakavunau, kei na soqo ni tikina. Tukuna na veigauna drau a rairai marautaka vata ena veiqaravi vei Jiova. Tukuna na marau o vakila ni o toro voleka vei Jiova. (Jeme. 4:8) Vakaraitaka nomu taleitaka na sala e dau kauaitaki keda kina nona dauveiqaravi o Jiova​—vakauasivi ni vakacegui keda qai vakayaloqaqataki keda ena gauna eda vakatovolei kina.​—Roma 15:4; 2 Kor. 1:​3, 4.

14, 15. Na veivakalougatataki cava ena yaga meda uqeti ira na sa malumalumu tu vakayalo mera nanuma lesu?

¹⁴ Ena rairai yaga sara vakalevu nomu uqeti koya e malumalumu tu vakayalo me nanuma lesu e so na ka ni veivakalougatataki a marautaka voli ena gauna a dau veimaliwai voli kina kei ira na lewe ni ivavakoso. Kena ivakaraitaki, na nona vakalougatataki ena levu ni ka e kila me baleta na Vosa ni Kalou kei na nona inaki. (Vkai. 4:​18) Ni a ‘lako voli ena yalo tabu,’ a vorata rawa kina na veitemaki me valavala ca. (Kala. 5:​22-​26) Ni a savasava nona lewaeloma a rawa kina ni torovi Jiova ena masu qai marautaka ‘na vakacegu ni Kalou, sa uasivia na ka kece ga e kilai rawa, e vakataudeitaka tale ga na yaloda kei na lomada.’ (Fpai. 4:​6, 7) Nanuma sara tiko na veitikina bibi qo, vakaraitaka nomu kauai dina, qai saga vagumatua sara mo uqeti koya na tacida lotu vaKarisito ya me lesu ina qelenisipi.​—Wilika Filipai 2:4.

¹⁵ Ke o dua na qase, o qai veivakatawani tiko vua e dua na veiwatini sa malumalumu tu vakayalo, o na rairai uqeti rau me rau vakasamataka na imatai ni gauna rau vulica kina na ka dina ena Vosa ni Kalou. Dua na ka na kena totoka na ka dina, e vakainaki, e veivakacegui, qai sereki keda vakayalo! (Joni 8:​32) Sega ni vakabekataki ni rau dau taleitaka na veika rau vulica me baleti Jiova, nona loloma, kei na nona inaki totoka! (Vakatauvatana Luke 24:32.) Uqeti rau me rau nanuma lesu na nodra marautaka na lotu vaKarisito yalodina na isolisoli totoka ni masu kei na nodra veiwekani voleka kei Jiova. Meda gumatua sara na uqeti ira na malumalumu tu vakayalo mera taleitaka tale “nai tukutuku-vinaka vakaidina nei koya na Kalou daumaka [“mamarau,” NW],” o Jiova.​—1 Tim. 1:​11.

Lomani Ira Tiko Ga

16. Tukuna e dua na ivakaraitaki ni yaga vakalevu noda veituberi vakayalo.

¹⁶ Era yaga beka na vakatutu qori? Io. Kena ivakaraitaki, a dautukutuku e dua na itabagone ena gauna se yabaki 12 kina, ia a qai malumalumu vakayalo ni sa yabaki 15. A kaukaua tale vakayalo, qai sivia qo e 30 na yabaki nona cakacaka tiko vakatabakidua. A veivuke sara vakalevu vua e dua na qase ni ivavakoso me veisau. Dua na ka nona vakavinavinakataka na veivuke a dolei vua!

17, 18. Na itovo cava e dodonu mo bulataka ni o tubera tiko e dua e sa yali tu mai na qelenisipi ni Kalou?

¹⁷ Na loloma ena uqeti ira na lotu vaKarisito mera tuberi ira na malumalumu vakayalo mera suka ina ivavakoso. Ni vosa tiko vei ira nona imuri, e kaya o Jisu: “E dua na vunau vou ka’u sa solia vei kemudou, Mo dou veilomani; me vaka ka’u sa lomani kemudou, mo dou veilomani talega vakakina. A ka oqo era na kila kina na tamata kecega ni dou sa noqu tisaipeli, kevaka dou sa veilomani.” (Joni 13:​34, 35) Io, na loloma e ivakatakilakila ni lotu vaKarisito dina. Sega li ni dodonu me vakaraitaki na loloma ya vei ira na lotu vaKarisito papitaiso era sa malumalumu tu vakayalo? E dodonu sara ga! Koya gona nida tuberi ira tiko, e dodonu meda vakaraitaka na itovo vakalou.

¹⁸ Na itovo cava mo bulataka ke o vinakata mo veivukei ena nona lesu mai e dua sa yali tu mai na qelenisipi ni Kalou? Meda vakaraitaka na yalololoma, yalovinaka, yalomalua, kei na vosota vakadede, me ikuri ni noda vakaraitaka na loloma. Ena vinakati tale ga meda dau veivosoti ena so na ituvaki. E vola o Paula: “Mo dou qai vakaisulu me vaka dou sa nona digitaki na Kalou, oi kemudou sa yalosavasava qai daulomani, ena yalo dauloloma, ena yalovinaka, ena yalomalumalumu, ena yalomalua, ena dauvosota vakadede: dou veivosoti vakataki kemudou, dou kua ni veicudruvi, ke sa dua na ka sa rarawa kina e dua: me vaka sa vosoti kemudou o Jiova, mo dou vaka tale ga kina. Ia me liu ena ka kecega oqo na dauloloma, o koya sa ivau vinaka sara.”​—Kolo. 3:​12-​14, NW.

19. Na cava ena yaga kina na sasaga mera tuberi na vaka na sipi mera lesu ina isoqosoqo vaKarisito?

¹⁹ Ena veivosakitaki ena ulutaga e tarava na vuna era yali kina e so mai na qelenisipi ni Kalou kei na nodra na marautaki tale o ira na lesu mai. Nida vulica na ulutaga e tarava kei na noda vakasamataka na kena qo, e vakadeitaka ni yaga dina na veituberi eda cakava da qai nuitaka nira na uqeti kina na vaka na sipi mera lesu mai ina isoqosoqo vaKarisito. Ena ituvaki kei vuravura qo, levu era vakayagataka nodra bula ena qarai ni iyau, ia na nona bula e dua e talei sara vakalevu mai na ilavo kece e tu e vuravura. A vakabibitaka qo o Jisu ena vosa vakatautauvata ni sipi a yali tu. (Maciu 18:​12-​14) Meda nanuma deivaki na tikina qo nida saga vagumatua meda tuberi ira na sipi nei Jiova era sa yali mera lesu mai ina nona qelenisipi.

O na Sauma Vakacava?

• Na itavi cava ra lesi kina na ivakatawa lotu vaKarisito ena vukudra na vaka na sipi era yali mai na qelenisipi?

• O na tuberi ira vakacava era sa biuta na ivavakoso ena gauna qo?

• Na itovo cava e so ena uqeti iko mo tuberi ira na yali tu mai ena qelenisipi?

[iYaloyalo ena tabana e 10]

Era dau saga vagumatua na ivakatawa lotu vaKarisito mera tuberi ira vakayalololoma na sa yali tu mera lesu ina qelenisipi ni Kalou