“Vorata na Tevoro” me Vakataki Jisu

“Vorata na tevoro, ena dro tani kina vei kemudou ko koya.”​—JEME. 4:7.

1. Na veitusaqati cava e kila vinaka o Jisu ni na caka vua e vuravura, ena qai tini vakacava?

A KILA vinaka o Jisu Karisito ni na saqati koya na Tevoro. E macala qo ena vosa a tauca na Kalou vua na gata, ia e tau vakadodonu tiko vua na meca vakayalo e vakayagataka na gata me nona waqawaqa: “Ka’u na vakaveimecakitaki kemudrau kei na yalewa [na isoqosoqo vakalomalagi i Jiova], kei na nomu kawa kei na nona kawa; ena butuqaqia na ulumu ko koya [Jisu Karisito], ia ko na qaqia na bukubukuni-yavana.” (Vkte. 3:​14, 15; Vkta. 12:9) Ni vakamavoataki na bukubuku ni yava i Jisu e kena ibalebale ni na lekaleka wale ga nona na mate e vuravura, ia ena vakaturi koya o Jiova ina bula lagilagi i lomalagi. Ena yasana adua, nona butuqaqi na ulu ni gata e kena ibalebale ni na vakarusai vakadua na Tevoro.​—Wilika Cakacaka 2:​31, 32; Iperiu 2:​14.

2. Na cava e nuidei kina o Jiova ni na vorata dina na Tevoro o Jisu?

² A nuidei o Jiova ni na vakayacora vinaka o Jisu na nona itavi qai vorata na Tevoro e vuravura. Na cava e nuidei kina o Jiova? E kila ni na talairawarawa qai yalodina o Jisu baleta ni a buli koya mai lomalagi ena dua na gauna makawa sara, a dau vakadikevi koya, ni “matai daucakacaka” qai “ulumatua . . . ni veika buli kece.” (Vkai. 8:​22-​31; Kolo. 1:​15, NW) Ni talai gona mai vuravura o Jisu qai vakatarai na Tevoro me vakatovolei koya me yacova na mate, a nuidei na Kalou ni na qaqa na Luvena duabau ga ena nona vorata na Tevoro.​—Joni 3:​16.

Maroroi Ira Nona Dauveiqaravi o Jiova

3. Na cava e cakava tiko na Tevoro vei ira na dauveiqaravi i Jiova?

³ A kaya o Jisu ni “turaga ni vuravura oqo” na Tevoro qai vakadreti ira nona imuri nira na vakacacani, me vakataki koya ga. (Joni 12:31; 15:20) E cati ira na lotu vaKarisito dina na vuravura e lewa tu qo o Setani na Tevoro baleta nira qaravi Jiova, ra qai vunautaka na yalododonu. (Maciu 24:9; 1 Joni 5:​19) E taketetaki ira sara tiko ga na ivovo ni lumuti era na lai veiliutaki kei Karisito ena nona Matanitu vakalomalagi na Tevoro. E taketetaki ira tale ga na iVakadinadina i Jiova era nuitaka na bula tawamudu ena parataisi e vuravura. Vakadreti keda kina na Vosa ni Kalou: “Sa veilakoyaki voli na nomudou meca na tevoro, me vaka na laioni sa tagi, a sa vakasaqara eso me tiloma.”​—1 Pita 5:8.

4. Na ivakadinadina cava e dusia nira vorata rawa na Tevoro o ira na dauveiqaravi ni Kalou ena noda gauna?

⁴ Ni tokona tiko na isoqosoqo eda lewena na Kalou o Jiova, eda na vorati Setani rawa kina. Dikeva mada na itukutuku qo: Ena 100 na yabaki sa sivi, era saga e so na iliuliu voravora duadua mera vakawabokotaki ira na iVakadinadina i Jiova. Ia e tubu tiko ga na iwiliwili ni iVakadinadina, sa voleka qo nira le 7,000,000 era lewena e sivia ni 100,000 na ivavakoso e vuravura. Era sa vakawabokotaki ga na iliuliu voravora era a dau tusaqati ira na dauveiqaravi i Jiova!

5. E dina vakacava na Aisea 54:17 vei ira na dauveiqaravi i Jiova?

⁵ A yalataka na Kalou vei ira na Isireli makawa, e vaka na “yalewa” e taukena: “Nai yaragi kecega sa caka me kemu ena sega ga ni yaco; kei na yame kecega ena mai veilewai kei iko ko na vakacala ga. Oqo na nodrai votavota na tamata i Jiova, kei na nodra veivakadonui maivei au.” (Aisea 54:​11, NW, 17) E dina na vosa ni yalayala qori vei ira na tamata i Jiova e veiyasa i vuravura ena “iotioti ni veisiga” qo. (2 Tim. 3:​1, NW, 2-5, 13) Eda na tomana tiko ga noda vorata na Tevoro baleta ni totaki keda tiko o Jiova, ena sega tale ga ni yaco na iyaragi cava ga e taurivaka me vakawabokotaki ira kina na tamata ni Kalou.​—Same 118:​6, 7.

6. Na cava eda vulica me baleta na veiliutaki ni Tevoro ena parofisai i Taniela?

⁶ Ni sa roro voleka mai na itinitini ni ituvaki ca kei vuravura, ena qai vakarusai kece na ivakarau ni veiliutaki i Setani. E uqeti vakalou na parofita o Taniela me parofisaitaka: “E na nodra gauna na tui ko ya [veiliutaki ena noda gauna] ena qai vakatura na Kalou ni lomalagi e dua na matanitu [mai lomalagi], ena sega sara ni vakarusai rawa: ia na matanitu ko ya ena sega ni biu tu me nodra na tamata tani, ia ena vurumemeataka ga ka vakaotia na veimatanitu oqori [veiliutaki tiko qo], ka na tu ga ka sega ni mudu.” (Tani. 2:​44) Ni yaco qori, sa na sega tale ni veiliutaki o Setani kei ira na tamata ivalavala ca. Ena rusa vakadua na veika vakavuravura kece ni Tevoro, ena qai veiliutaki duadua ga na Matanitu ni Kalou e vuravura.​—Wilika 2 Pita 3:​7, 13.

7. Eda kila vakacava nida rawa ni vorata na Tevoro na dauveiqaravi i Jiova?

⁷ E sega ni vakataratututaki ni na taqomaki na isoqosoqo i Jiova qai vutuniyau vakayalo ena veivakalougatataki ni Kalou. (Wilika Same 125:​1, 2.) Vakacava o keda? E kaya na iVolatabu nida rawa ni vorata na Tevoro me vakataki Jisu ga. Dina ni na veitusaqati o Setani, ia e vakaraitaka na parofisai e tukuna o Jisu vua na yapositolo o Joni ni na vakabulai e “dua nai soqosoqo levu sara” era nuitaka na bula e vuravura ni sa rusa na ituvaki kei vuravura qo. E volai ena iVolatabu nira kaci ena domoilevu: “A vu ni bula na noda Kalou, o koya sa tiko e nai tikotiko-vakaturaga, vua na Lami [Jisu Karisito ] talega.” (Vkta. 7:​9-​14) E tukuni nira na vakamalumalumutaki Setani o ira na lumuti, kei na nodra itokani na ‘so tani tale na sipi’ era na vorati koya tale ga. (Joni 10:16; Vkta. 12:​10, 11) Ia, ena gadrevi na cakacaka vakaukaua kei na masu vagumatua meda ‘vakabulai mai vua na vunica.’​—Maciu 6:​13, NW.

iVakaraitaki Uasivi me Vorati Kina na Tevoro

8. Na cava na imatai ni veitemaki a bacani Jisu kina na Tevoro ena vanualiwa? A sauma vakacava o Jisu?

⁸ A saga na Tevoro me tawayalodina o Jisu. A temaki koya ena vanualiwa me talaidredre vei Jiova. Ia, a qai biuta e dua na ivakaraitaki uasivi o Jisu me vorata kina na Tevoro. Ni lolo oti me 40 na siga kei na 40 na bogi, a macala ni na viakana sara ga o Jisu. “Kevaka ko sa Luve ni Kalou,” e kaya o Setani, “mo kaya mada me vuki mei buli madrai na veivatu oqo.” Ia a sega ni vinakata o Jisu me vakayagataka vakatani nona kaukaua soli vakalou. E sauma o Jisu: “Sa volai, Ena sega ni bula na tamata e na madrai duaduaga, sa bula ga e na vosa kecega sa lako mai na gusu ni Kalou.”​—Maciu 4:​1-4; Vkru. 8:3.

9. Na cava meda vorata kina na veitemaki ni Tevoro ni uqeta meda vakayagataka cala noda gagadre vakayago?

⁹ Nikua, e uqeta na Tevoro na gagadre vakayago eda sucukaya mai me temaki keda kina na dausokalou i Jiova. Meda tudei gona na vorata na veitemaki ni gagadre ca ni veiyacovi, ni sa takalevu tu na ivakarau ca qo e vuravura. E tukuna vakadodonu na Vosa ni Kalou: “Dou sa sega beka ni kila, ni na sega ni rawata na matanitu ni Kalou ko ira sa sega ni yalododonu? Dou kakua ni vakaisini kemudou: o ira na daudara, kei ira na dausoro ki na matakau, kei ira na dauyalewa, kei ira na viavia vaka na yalewa, kei ira na veimoceri vakatagane, . . . era na sega ni rawata na matanitu ni Kalou.” (1 Kor. 6:​9, 10) E matata gona ni o ira na vakayacora tiko na ivalavala tawakilikili ra qai sega ni veisau era na sega ni bula ena vuravura vou ni Kalou.

10. Me vaka e volai ena Maciu 4:​5, 6, na cava e dua tale na veitemaki a vakayagataka o Setani me na tawayalodina kina o Jisu?

¹⁰ Ena dua tale na nona temaki o Jisu ena vanualiwa, e vakamacalataka na iVolatabu: “Sa qai kauti koya na tevoro ki na koro tabu, ka vakatikori koya ki dela ni vale ni soro, a sa kaya vua, Kevaka ko sa Luve ni Kalou, mo rika sobu: ni sa volai, Ena vakaroti ira na nona agilose ko koya e na vukumu: Ia era na keveti iko e na ligadra, de dua na siga sa tavutu kina na yavamu ki na vatu.” (Maciu 4:​5, 6) Kena irairai, ni na vakadinadinataki kina ena sala veivakurabuitaki ni Mesaia o Jisu. Ia, na kena dina, ni sega ni kilikili qai vakaraitaka na dokadoka e sega ni vakadonuya se tokona na Kalou. E vakaraitaka tale o Jisu nona yalodina vei Jiova qai sauma ena nona cavuqaqataka e dua na tikinivolatabu. E kaya: “Sa volai talega, Mo kakua ni vakatovolei Jiova na nomu Kalou.”​—Maciu 4:7; Vkru. 6:​16.

11. Ena temaki keda vakacava o Setani, ena tini vakacava?

¹¹ Ena rawa ni temaki keda o Setani ena so na sala meda qara kina na rogo. Rawa ni uqeti keda meda vakatotomuria na ivakarau ni isulusulu kei na isasauni sa takalevu tu e vuravura se meda vakaitavi ena ka ni veivakamarautaki tawakilikili. Ia, kevaka eda vakalecalecava na ivakasala ni iVolatabu da qai muria ga na ivakarau ni vuravura, meda namaka beka mera taqomaki keda na agilosi mai na leqa eda na vakila kina? Dina ni a veivutuni o Tui Tevita ena nona valavala ca kei Pacisepa, ia a vakila kina na kena ca. (2 Sam. 12:​9-​12) Meda kua ni vakatovolei Jiova ena sala va qo, de dua ena noda veivinakati kei na vuravura.​—Wilika Jemesa 4:4; 1 Joni 2:​15-​17.

12. Na veitemaki cava e volaitukutukutaki ena Maciu 4:​8, 9? Na cava e tukuna kina na Luve ni Kalou?

¹² Dua tale na veitemaki i Setani ena vanualiwa oya nona via solia na kaukaua vakapolitiki vei Jisu. A vakaraitaka vei Jisu na veimatanitu kece e vuravura kei na kedra lagilagi qai kaya: “A ka kecega oqori ka’u na solia vei iko, kevaka ko na cuva sobu ka vakarokoroko vei au.” (Maciu 4:​8, 9) Sa bau lolovira dina nona saga me vakayacori vua na sokalou e nona ga o Jiova, kei na nona saga me tawayalodina o Jisu vua na Kalou! Nona vinakata tiko ga me sokaloutaki, a veisau kina na agilosi a dau yalodina qo me ivalavala ca, kocokoco, qai vunica me o Setani na Tevoro. (Jeme. 1:​14, 15) Ia na kena veibasai o Jisu, a nakita dei me yalodina vua na Tamana vakalomalagi, e tukuna kina: “Mo lako tani, Setani, ni sa volai, Mo vakarokoroko vei Jiova na nomu Kalou, ia mo qaravi koya duaduaga.” Sa bau matata dina nona vorati Setani o Jisu, e dei tale ga kina. Sega sara ga ni vinakata e dua na tiki ni vuravura i Setani na Luve ni Kalou qai sega ni vinakata me sokaloutaka na vunica oya!​—Maciu 4:10; Vkru. 6:​13; 10:20.

“Vorata na Tevoro, ena Dro Tani Kina Vei Kemudou ko Koya”

13, 14. (a) Na cava sa solia tiko na Tevoro vei Jisu ena gauna e vakaraitaka kina vua na matanitu kece e vuravura? (b) Dau saga vakacava o Setani me vakadukadukalitaki keda?

¹³ Ni vakaraitaka na Tevoro vei Jisu na matanitu kece e vuravura, a solia sara tiko ga vua na kaukaua levu e se sega ni bau soli vua e dua na tamata. A nuitaka o Setani ni na dreta na matai Jisu na veika e raica, me na raica tale ga ni rawa ni iliuliu vakapolitiki kaukaua duadua e vuravura. Nikua, e sega ni solia vei keda o Setani na veimatanitu, ia e saga me vakadukadukalitaka na lomada ena ka eda raica, rogoca se vakasamataka.

¹⁴ E lewa tu na vuravura qo na Tevoro. O koya gona, e lewa tale ga na tabana ni vakauitukutuku. Sega ni kurabuitaki kina na kena sa sinai tu ena vuravura qo na ivalavala tawakilikili kei na itovo kaukaua ena veika e saravi, rogoci, qai volai. E uqeti keda na itukutuku ni veivoli meda vinakata na iyaya e sega ni bibi meda taukena. Ena sala qo, e temaki keda tiko kina na Tevoro ena veika vakayago meda na taleitaka na raica, rogoca, se meda dau vakasamataka. Ia nida sega ni sarava, rogoca, se wilika na veika e veisaqasaqa kei na iVolatabu, eda sa kaya sara tiko ga: “Mo lako tani, Setani”! Eda sa vakatotomuri Jisu tiko ena noda sega ni lomalomarua tale na vakanadakuya na vuravura dukadukali i Setani. Na noda sega ni tiki ni vuravura i Setani e vakadinadinataki tale ga ena noda doudou ni tukuna nida iVakadinadina i Jiova, nida imuri i Jisu tale ga ena vanua ni cakacaka, e koronivuli, na vanua eda tiko kina, vei ira tale ga na wekada.​—Wilika Marika 8:​38.

15. Na cava meda yadrayadravaki tiko kina nida vorati Setani tiko?

¹⁵ Ni oti na ikatolu ni veitemaki i Setani me tawayalodina o Jisu vua na Kalou, “sa qai biuti koya na tevoro.” (Maciu 4:​11) Ia, a sega ni cegu o Setani ena nona temaki Jisu tiko: “Ni sa vakaotia kecega na dauvere [ena vanualiwa] na tevoro, sa lako tani vua ka yacova e dua na gauna [“veiganiti,” NW].” (Luke 4:​13) Nida sa vorata rawa na Tevoro, meda vakavinavinakataki Jiova kina. Ia meda kerea tiko ga nona veidusimaki na Kalou, ni na temaki keda na Tevoro ena gauna e ganiti koya​—sega ni gauna eda nanamaki tiko kina. O koya gona, meda yadrayadravaki tiko ena veigauna, meda na tu vakarau na vosota na ituvaki dredre nida qaravi Jiova tiko.

16. Na igu kaukaua cava e vakarautaka vei keda o Jiova, na cava meda masuta kina?

¹⁶ Meda vorata rawa na Tevoro, e bibi meda masuta na igu kaukaua duadua e vuravura kei lomalagi​—na yalo tabu ni Kalou. Eda nuidei ni na vakarautaka vei keda o Jiova. Eda na cakava rawa na ka eda na sega ni cakava ga vakataki keda. A vakadeitaka o Jisu vei ira nona imuri ni na vakarautaki na yalo tabu ena nona kaya: “Kevaka dou kila, koi kemudou sa tamata ca, mo dou solia na ka vinaka vei ira na luvemudou; sa qai dina vakalevu cake, ni na solia na Yalo Tabu ko koya na Tamamudou vakalomalagi vei ira sa kerekere vua.” (Luke 11:13) Meda kerei Jiova tiko ga me solia vei keda nona yalo tabu. Ni tomani keda tiko na igu kaukaua duadua meda vorata rawa na Tevoro, e sega ni vakabekataki nida na qaqa. Nida masu vagumatua qai vakawasoma, e bibi tale ga meda tokara na iyaragi kece vakayalo ni Kalou meda na ‘tudei qai vorata na ilawaki ni tevoro.’​—Efeso 6:​11-18.

17. Na marau cava a vakaukauataki Jisu me vorata na Tevoro?

¹⁷ Dua tale na ka a vakaukauataki Jisu me vorata na Tevoro, ena rawa ni vakaukauataki keda tale ga. E kaya na iVolatabu: “E na vuku ni marau sa viritu e matana [Jisu], sa vosota na kauveilatai [“kaunirarawa,” NW], ka sa sega ni madua ni sa vakalialiai kina, a sa qai tiko sobu ko koya e na liga i matau ni tikotiko-vakaturaga ni Kalou.” (Iper. 12:2) Eda na marau tale ga va qori nida tokona nona veiliutaki cecere o Jiova, nida doka na yacana tabu, kei na noda nanuma dei tiko na inuinui ni bula tawamudu e tu e matada. Eda na marau dina nida raica ni sa na vakarusai vakadua o Setani kei na veika e cakava, ra qai ‘taukena na vuravura o ira na yalomalumalumu, ra qai marau tiko ena veivakacegui vakaidina’! (Same 37:11) O koya gona, meda vorata tiko ga na Tevoro, me vaka ga a cakava o Jisu.​—Wilika Jemesa 4:​7, 8.

O na Sauma Vakacava?

• Na ivakadinadina cava e vakaraitaka ni dau taqomaki ira nona dauveiqaravi o Jiova?

• Na ivakarau cava a vakaraitaka o Jisu ni vorati Setani tiko?

• Sala cava soti eda na vorata kina na Tevoro?

[iYaloyalo ena tabana e 29]

Na veivinakati kei na vuravura eda na veimecaki kina kei na Kalou

[iYaloyalo ena tabana e 31]

A sega ni vinakata o Jisu na matanitu kece a vakaraitaka vua o Setani