Jisu​—iVakaraitaki Uasivi me Muri

O VINAKATA mo tamata vinaka cake qai mamarau? E vakamacalataka na yapositolo o Pita na sala me na rawati kina. E vola: “A vakararawataki tale ga na Karisito e na vukumuni, ka sa laiva tu vei kemuni na kena i vakaraitaki, mo ni muria na we ni yavana.” (1 Pita 2:21, VV) Ni duatani duadua na nona bula, e vuqa sara na ka eda vulica vei Jisu Karisito. Eda na tamata vinaka cake, da mamarau tale ga nida vulica na veika e baleta na bula i Jisu qai vakatotomuria. Meda dikeva mada qo na itovo e kilai tani kina na tamata rogo kei na kena yaga vei keda.

Veiraurau nona bula. Dina ni tukuna o Jisu ni ‘sega na tikina me kotora kina na uluna,’ e sega ga ni uqeta na bula vakaloloma. (Maciu 8:20) A tiko ena soqo ni marau. (Luke 5:29) Na imatai ni nona cakamana—nona vukica na wai me waini ena dua na kana magiti ni vakamau—e vakaraitaka ni sega ni cata na soqo se dau via tu duadua ga. (Joni 2:1-11) Ia e vakamatatataka ga o Jisu na ka e bibi duadua vua. E kaya: “A qau kakana me’u kitaka na loma i koya sa talai au mai; ka me’u vakaotia na nona cakacaka.”—Joni 4:34.

❑ O dau raica me veiraurau na veika vakayago kei na veika vakayalo ena nomu bula?

Torovi rawarawa. Na iVolatabu e vakaraitaka ni o Jisu e dau veikauaitaki qai yalovinaka. A sega ni cudru nira kauta yani nodra leqa na tamata se mera lai taroga vua e so na taro dredre. Ena dua na gauna era a soqovi koya yani e dua na ilawalawa, bau curu maliwai ira e dua na marama a turidrabalavu ena loma ni 12 na yabaki. Ena nona nuitaka ni na vakabulai a tara na isulu i Jisu. A sega ni cudruvi koya o Jisu, dina ga era nanuma kina e so ni siosio na marama qo ia a kauaitaki koya ga ni kaya: “Na luvequ-yalewa, sa vakabulai iko na nomu vakabauta.” (Marika 5:25-34) Era taleitaki koya tale ga na gone, era sega ni leqataka nira na sega ni kauaitaki. (Marika 10:13-16) E kilai ni dau tu vakarau me veitalanoa qai kauaitaki ratou nona tisaipeli. Eratou dau volekati koya sara.—Marika 6:30-32.

❑ O dau torovi rawarawa?

E dau veinanumi qai yalololoma. E dua na itovo vinaka duadua nei Jisu na nona dau biuti koya ena kedrai tuvaki na tamata, me vakila na dredre era sotava, qai vukei ira. E vakamacalataka na yapositolo o Joni na ka a cakava o Jisu ni raici Marica ni tagicaki Lasarusa na ganena, a “vutugu ko koya e na yalona, a sa rarawa na lomana” qai “tagi.” Era raica votu na vakararai tu ni kauaitaki ratou na vuvale ya o Jisu, a sega tale ni madualaka me vakaraitaka e matanalevu. Na loloma dina e uqeti koya me vakabula tale na nona itokani!—Joni 11:33-44.

Ena dua tale na gauna, e dua na turaga a tauvi vukavuka a lai bula duadua tu baleta ni mate lolovira, mani vakamasuti Jisu: “Na Turaga, kevaka ko ni sa vinakata, ko ni sa vakasavasavataki au rawa.” E veiuqeti dina na ka e cakava o Jisu: “sa dodoka na ligana . . . ka tarai koya, ka kaya, ‘Au sa vinakata; mo savasava mai.’” (Maciu 8:2, 3) O Jisu a sega ni veivakabulai me vakayacori ga kina na parofisai. A vinakata me tavoya laivi na wainimatadra. Na veika kece e cakava e yavutaki ena vosa guiguilecavi dredre a cavuta: “Me vaka dou sa vinakata me ra kitaka vei kemudou na tamata, dou kitaka vaka talega kina vei ira.”—Luke 6:31.

❑ E laurai beka ena ka o cakava ni o dauloloma?

E dau veikauaitaki qai sega ni namaka vakasivia na ka. E dina ga ni tawacala, a sega ni namaka vakasivia o Jisu na ka se me vakaraitaka ni vinaka cake o koya, se tawaveinanumi. Ena dua na gauna, a vakaraitaka na nona vakabauta kei na nona vakavinavinaka e dua na yalewa i valavala ca ‘ena koro’ ni quaraka na yava i Jisu ena wainimatana. A vakatara qori o Jisu, ia niratou kurabuitaka na itaukeinivale eratou vakalewa sara vakaca na yalewa oya. Ni kila o Jisu e vu mai lomana na ka e cakava, a sega ni vakalewa na nona ivalavala ca. A kaya ga: “Sa vakabulai iko na nomu vakabauta; mo lako e na vakacegu.” A rairai vakavuna me vakanadakuya sara ga na ivakarau ni nona bula makawa na yalewa oya baleta ni a kauaitaki koya o Jisu.—Luke 7:37-50.

❑ O dau totolo beka na veivakacaucautaki qai berabera ni vakalelewa?

E sega ni veivakaduiduitaki qai dau veidokai. De dau kauaitaki Joni na nona tisaipeli vakalevu o Jisu ni tautauvata e so na nodrau itovo rau qai veiwekani vakadra.a E sega ga ni vakaduiduitaki koya se me lomani koya vakalevu cake ni vakatauvatani kei ratou na vo ni tisaipeli. (Joni 13:23) Ena gauna sara mada ga rau a kerea kina o Joni kei na tacina o Jemesa me soli vei rau na itutu lavotaki ena Matanitu ni Kalou, a sauma vei rau o Jisu: “Me tiko e na ligaqu i matau kei na ligaqu i mawi sa sega ni noqu me’u solia vakailoa.”—Marika 10:35-40.

E dau veidokai o Jisu. A sega ni duavata kei ira na dau veivakaduiduitaki ena nona gauna. Me kena ivakaraitaki, era lolovira na yalewa vei ira na tagane. Ia o Jisu e dokai ira na yalewa. Na imatai ni gauna e vakatakila kina ni Mesaia, a tukuna vua na marama ni Samaria e sega ni Jiu. Na ka e cakava qo o Jisu e okati me itovo lolovira vei ira na Jiu qai yawa sara na veikidavaki. (Joni 4:7-26) E ka dokai tale ga nodra vakadinadinataka e liu na marama nona vakaturi o Jisu.—Maciu 28:9, 10.

❑ O dau raici ira beka vakatautauvata na matatamata kece?

E dau nuitaki ena lomanivuvale. E kena irairai ni a mai takali o Josefa na tamana vakacabecabe o Jisu ena gauna e se gone kina. De dua a dau vukei tinana, ratou na tacina kei na ganena ena ka vakailavo ena nona cakacaka vakamatai. (Marika 6:3) Ena gauna lekaleka sa vo ni nona bula, a tataunaki tinana vei Joni na tisaipeli.—Joni 19:26, 27.

❑ Ena rawa beka ni o vakatotomuri Jisu mo nuitaki ena lomanivuvale?

iTokani dina. E kilai ni itokani uasivi o Jisu. Ena sala cava? A sega ni biuti ira nona itokani baleta wale ga na nodra cala, ke ra cala wasoma mada ga. Eratou a sega ni dau cakava tale ga na nona tisaipeli na ka e vinakata se taleitaka. E vakaraitaka tiko ga ni nodratou itokani dina ni dau raica ga na ka eratou vinaka kina mai na nona lomacataki ratou. (Marika 9:33-35; Luke 22:24-27) A sega ni dau usuraka na nona rai, ia e tu vakarau me vakarogoci ratou.—Maciu 16:13-15.

Na kena e uasivi sara, o Jisu e lomani ira nona itokani. (Joni 13:1) Ena sala cava? E kaya: “Sa sega na nona loloma e dua na tamata me uasivi cake e na ka oqo, me solia na nona bula e na vukudra na wekana.” (Joni 15:13) Ena rawa beka vua e dua me bolemate ena vukuna na nona itokani?

❑ O na dua tiko ga na itokani ke o vakacudrui se dua na ka mosimosi e caka vei iko?

E turaga yaloqaqa. E duatani sara o Jisu mai na irairai gogo era dau boroya tu na dau droini me baleti koya. Na Kosipeli e vakamacalataki koya ni turaga yaloqaqa qai gugumatua. A vakasavi ira vakarua na dauveivoli o Jisu kei na nodra iyaya mai na valenisoro. (Marika 11:15-17; Joni 2:14-17) Nira mai vesuki “Jisu na kai Nasareci,” a sega ni rere me vakatakilai koya yani qai karoni ratou na nona tisaipeli ena nona kaya ena yalodei: “Sa i au sara ga. . . . kevaka sa i au ko ni vakasaqara tiko ni laivi iratou oqo me ratou lako.” (Joni 18:4-9, VV) Sa rauta me tukuna o Ponitio Pailato ni o Jisu e ivakaraitaki vakasakiti ni yaloqaqa ena gauna a raica kina na nona vesuki kei na nona mokulaki.—Joni 19:4, 5.

❑ O dau dei ena nomu vakatulewa qai yaloqaqa?

Na itovo qo kei na so tale e kilai kina o Jisu e ivakaraitaki uasivi meda vakatotomuria. Ke laurai vei keda nona itovo, eda na tamata vinaka cake eda na mamarau tale ga. Qori na vuna e uqeti keda kina na lotu vaKarisito na yapositolo o Pita meda muria vakavoleka sara na weniyava i Jisu. O dau saga mo muria vakavoleka sara na weniyava i Jisu ena kena vinaka duadua o rawata?

Sega ni Muri ga na Nona iVakaraitaki

E sega ni nona ivakaraitaki vinaka wale ga o Jisu meda muria. E kaya: “Oi au na sala, kei na vu-ni-dina, kei na vu-ni-bula; sa sega ni torovi Tamaqu walega e dua na tamata, e na vukuqu ga.” (Joni 14:6) E sega ni tukuna ga na ka dina me baleta na Kalou, ia e dusimaki keda ina sala meda toro voleka kina vua, e vakarautaka tale ga o Jisu na sala vei ira na yalodina mera rawata kina na bula tawamudu.—Joni 3:16.

Me baleta na inaki ni nona mai bula e vuravura, e kaya o Jisu: “Sa sega ni lako mai na Luve ni tamata me qaravi, ka me dauveiqaravi ga, ka me solia na nona bula me kedrai voli e lewe vuqa.” (Maciu 20:28) Ni cabora na nona bula me isoro, a laiva na yavu o Jisu me marautaka kina na kawatamata na bula tawamudu. Na cava meda cakava yadua me yaga vei keda na isolisoli qo? O Jisu e vakamacalataka: “Ia sai koya oqo na bula tawa mudu, me ra kilai kemuni na Kalou dina duaduaga, kei Jisu Karisito ko koya ko ni a tala mai.”—Joni 17:3.

Io, na noda kilai Jisu, vakatotomuri koya, da qai vakabauta na nona mate vakaisoro, na ivakatagedegede meda rawata kina na bula tawamudu. Oni sureti moni vulica na iVolatabu, qai bulataka sara na ka e tukuna me vakataki Jisu ga.b

Na nona ivakaraitaki o Jisu e vakavulica vei keda na ivakarau ni bula meda muria. E rawa ni sereki keda mai na ivalavala ca kei na mate na nona mate vakaisoro. (Roma 6:23) Ena ka vakaloloma dina ke sega ni yaga vei keda na nona bula o Jisu Karisito! Kua ni vakalaiva na osooso kei na lomaocaoca ni bula me tarova nomu muria voleka sara na nona ivakaraitaki na tamata rogo duadua a bau bula—o Jisu Karisito.

[iVakamacala e ra]

[Kato/​iYaloyalo ena tabana e 7]

◼ E sega ni veivakaduiduitaki qai dau veidokai

◼ E itokani dina me yacova sara nona mate

◼ E yaloqaqa

O dau saga mo muria voleka sara na weniyava i Jisu?

[iYaloyalo ena tabana e 5]

Veiraurau na bula i Jisu . . .

torovi rawarawa . . .

yalololoma