Vakavulica na Luvemu

Na Vuna a Sega ni Rere Kina o Tevita

O DAU rere beka?​—a So na gauna e dau yaco qori vei keda. Na cava o na cakava ke o rere?— Rawa mo lako vua e dua e levu cake vei iko qai kaukaua. De dua e rawa ni vukei iko o Tata se o Nana. E levu na ka eda vulica vei Tevita ena vanua meda qara kina na veivuke. A lagata vua na Kalou: ‘Au na vakararavi vei kemuni. Au sa vakararavi tiko vua na Kalou, au na sega ni rere.’—Same 56:3, 4.

E vulica beka vei cei o Tevita me kua ni dau rere? Vei rau na nona itubutubu?—E rairai vaka kina. Na turaga yalodina o Jese na tamai Tevita na tukai Jisu Karisito na “Tui ni Sautu” a yalataka na Kalou. (Aisea 9:6; 11:1-3, 10) E tamai Jese o Opeti na tukai Tevita. E dua na ivola ena iVolatabu e vakatokayacataki vei tinai Opeti. O kila na yacana?— Io, o Ruci na marama yalodina a wati Poasa.​—Ruci 4:21, 22.

Sa oti e vica vata na yabaki nodrau mate o Ruci kei Poasa, sa qai sucu o Tevita. De dua o kila na yaca i tinai Poasa na tubui Tevita vakarua. A vunitaka e so na yamata ni Isireli ena gauna a vakaitikotiko kina e Jeriko. A vakaliliga e dua na dali damudamu e katubaleka, mani bula kina na nona vuvale ni vakarusai o Jeriko. O cei na yacana?— O Reapi, a yaco emuri me dauveiqaravi i Jiova, na nona ivakaraitaki ni yaloqaqa mera vakatotomuria na lotu vaKarisito.​—Josua 2:1-21; 6:22-25; Iperiu 11:30, 31.

E rawa nida vakadeitaka ni rau a vakavulica vei Tevita na nona itubutubu na veika me baleti ira na tamata yalodina i Jiova, nira vakaroti na itubutubu mera vakavulica vei luvedra na veika qori. (Vakarua 6:4-9) O Samuela na parofita ni Kalou a qai lumuti Tevita na luvei Jese me tui e Isireli.​—1 Samuela 16:4-13.

Ena dua na siga a talai Tevita o Jese me kauta na kedratou kakana na tuakana eratou vala tiko kei ira na kai Filisitia era meca ni Kalou. Ni yaco yani o Tevita, e cici sara ina vanua ni ivalu qai rogoca ni vakalialia tiko o Koliaci “na nona mataivalu na Kalou bula.” Na tamata kece era rere na bolei koya. A kacivi Tevita o Tui Saula ni rogoca ni bolei Koliaci. Ia ni raici Tevita o Saula e kaya, ‘o iko se cauravou [“gone,” NW] ga.’

E vakamacalataka o Tevita vei Saula ni a vakamatea e dua na laioni kei na dua na pera rau via kania nodratou sipi. O Koliaci ena “vaka e dua vei rau,” e kaya o Tevita. “Mo lako, ia ena lako vata kei iko ko Jiova,” e sauma o Saula. E tomika o Tevita e lima na vatu yagoyagovinaka, tawana ena nona taga, taura nona irabo, lako yani me vala kei na tuwawa. Ni raici Tevita o Koliaci ni dua ga na gonetagane, e kailavaka: “Mo lako mai vei au, au na qai solia na lewemu ki na manumanu vuka.” E kaya o Tevita: “Ka’u sa lako mai vei iko e na yaca i Jiova . . . ka’u na yaviti [“vakamatei,” NW] iko.”

E cicivi Koliaci yani o Tevita, taura e dua na vatu mai na nona taga, biuta ena nona irabo qai rabotaka vakadodonu ena yadrei Koliaci. Era rere na kai Filisitia ra qai dro nira raica sa mate na nodra tuwawa. Era cemuri ira na kai Filisitia na Isireli, ra mani qaqa ena ivalu. Yalovinaka wilika vata kei na nomu vuvale na italanoa qo ena 1 Samuela 17:12-54.

Ni o itabagone, rairai so na gauna o rere na muria na ivakaro ni Kalou. A vakatale ga qori o Jeremaia ena imatai ni gauna, ia a tukuna vua na Kalou: ‘Mo kua ni rere, au sa tiko vata kei iko.’ A sasaga o Jeremaia me valuta na rere qai vunautaka na ka a vakarota vua na Kalou. Ke o nuitaki Jiova, o na vulica tale ga mo kua ni rere me vakataki Tevita kei Jeremaia.—Jeremaia 1:6-8.

[iVakamacala e ra]

Taro:

○ Na cava e cakava o Tevita ni vakalialia o Koliaci na mataivalu ni Kalou?

○ E vakamalumalumutaki Koliaci vakacava o Tevita?

○ Na cava meda cakava nikua meda kua kina ni dau rere?