O Bau Kila?
E tiko beka na vuna me rerevaki Sisa kina o Ponitio Pailato?
Era kaya na iliuliu vakaJiu ena nodra cikevi Pailato na Kovana ni Roma me vakamatei o Jisu: “Kevaka ko sa sereki koya oqo, ko sa sega ni totaki Sisa.” (Joni 19:12) Na “Sisa” e cavuti tiko e ke, o Tiperiu na Empara ni Roma. E tiko beka na vuna me rerevaki Sisa kina o Pailato?
E turaga vakacava o Tiperiu Sisa? Ena vica na yabaki ni bera na veilewai i Jisu, sa dau kilai tu o Tiperiu “ni turaga e kauaitaka ga na ka e vinakata kei na sala e saga me rawata kina,” e kaya na New Encyclopædia Britannica. Ena nona dau kasami, e vakararawataki qai vakamatei ira e nanuma nira tawayalodina. Na ivola vata qori e kaya, “Era vakabauta na dauvolaitukutuku era bula donui Tiperiu ni dau taleitaka na ka ni veivakamarautaki e veivakalolomataki kei na ivalavala tawakilikili. E vakadomobula nona dau veivakamatei, ni cakava ena gauna ga e vinakata, o cei ga e via vakamatea.”
De dua, ya na vuna e vakamalumalumu kina o Pailato vei ira na iliuliu vakaJiu qai vakarota me vakamatei o Jisu.—Joni 19:13-16.
Na cava e vuya kina o Jisu na yavadratou nona yapositolo?
E Isireli makawa, levu na tauvanua era sega ni vakaivava nira cakacaka e veisiga. Na ivava a daramaki ena gauna ya e vakawa qai vesu mai na yava me yaco ina qurulasawa. Ni kuvu qai soso na gaunisala kei na iteitei, e dau duka na yava.
Ni bera ni dua e curu i vale, e dau kena ivakarau me luva e tautuba na ivava. O koya e veivakacegui ena vuya na yavadra na vulagi. Qo ena cakava o itaukeinivale se dua na dauveiqaravi. E vica na vanua ena iVolatabu e vakamacalataki kina na ivalavala kilai levu qo. Kena ivakaraitaki, e kaya o Eparama vei ratou na vulagi yani ena nona valelaca: “Me kau mada mai e dua na wai lailai, mo dou vuya mada na yavamudou, ka vakacegu e na rugurugua ni kau: ia ka’u na kauta mai e dua na tiki ni madrai, ia dou vakaceguya mada na lomamudou.”—Vakatekivu 18:4, 5; 24:32; 1 Samuela 25:41; Luke 7:37, 38, 44.
Eda kila ena itukutuku qori na vuna a vuya kina o Jisu na yavadratou na nona tisaipeli ena iotioti ni nodratou kanavata ni Lakosivia. A sega ni dua na itaukeinivale se dauveiqaravi me vuya na yava, sega tale ga ni dua na tisaipeli a bole me cakava. Mani taura o Jisu e dua na beseni wai kei na tauwelu, a vuya, vakamamacataka na yavadratou na nona tisaipeli me vakavulici ratou ena loloma kei na yalomalumalumu.—Joni 13:5-17.