Taro na Dauwiliwili

Na Cava e Sega ni Rogoci Kina Eso na Masu?

E torovi rawarawa na Kalou o Jiova. E tu vakarau tale ga me rogoca noda masu me vaka ga na nona vakarorogo e dua na tama nira vosa vua na luvena. Ena yasana adua vaka ga e dua na tama lomavuku, e tiko na vuna e sega ni ciqoma kina e so na kerekere na Kalou. E tawakilai beka na vuna e va kina oya na Kalou, se vakamatatataki tu ena iVolatabu?

E vakamacalataka na yapositolo o Joni: “Na ka oqo eda sa vakararavi kina vua, kevaka eda sa kerea e dua na ka me vaka na lomana, sa rogoci keda ko koya.” (1 Joni 5:14) Na noda kerekere me salavata kei na loma ni Kalou. E so e sega ni salavata kei na loma ni Kalou na ka era masulaka—me kena ivakaraitaki mera wini ena veimauilavo, se na beti. E so tale e duatani na inaki ni lomadra. A veivakaroti na tisaipeli o Jemesa ena kena vakayagataki cala na isolisoli ni masu: “Ko ni sa dau kerekere ka sega ni rawata, e baleta ni cala na i naki ni nomuni kerekere; ni ko ni via vakayagataka ga na ka ko ni kerea e na veigagadre ca ni yagomuni.”—Jemesa 4:3, VV.

Mo vakasamataka mada na nodrau masuta na ito ruarua ni soka me rau wini. Sa na bau ka dredre me rogoca na Kalou na mataqali masu va qo. E tautauvata sara ga kei na rua na mataivalu e rau masuta vagumatua me rau qaqa.

Ena maumau wale na nodra masu o ira na vakanadakuya na lawa ni Kalou. E tukuna o Jiova ena dua na gauna vei ira na qaravi koya ena veivakaisini: “Ni dou sa masu vakavuqa, ka’u na sega ni rogoca: a ligamudou sa lomoci e na dra.” (Aisea 1:15) Na iVolatabu e kaya: “O koya sa vaqara tani na daligana me kakua ni rogoca na vunau, ena ka vakasisila na nona masumasu.”—Vosa Vakaibalebale 28:9.

Ena rogoca ga o Jiova na nodra masu era qaravi koya ena lomadina qai salavata kei na lomana. E kena ibalebale beka qo ni dau solia na veika kece ga era kerea vua? E sega. Meda raica mada e rua na kena ivakaraitaki vakaivolatabu.

E rau a veiwekani veivolekati sara o Mosese kei na Kalou; ia a vinakati tale ga vei Mosese me kerekere me salavata kei ‘na loma’ ni [Kalou]. A vakamamasu o Mosese me curu ina vanua o Kenani, dina ga ni sega ni nona inaki na Kalou: “Me’u lako mada, ka raica na vanua vinaka, mai na tai kadua ni Joritani.” Ni bera na nona vakamamasu qo, a valavala ca o Mosese mani tukuni vua ni na sega ni curuma na vanua ya. Ia a sega ni vakadonui na nona kerekere o Mosese, a tukuna ga vua o Jiova: “Mo kua so; mo kakua ni vosa tale vei au e na ka oqo.”​—Vakarua 3:25, 26; 32:51.

A masuta o Paula me kau laivi vua na ‘votonikau sa vakalauti kina na lewena.’ (2 Korinica 12:7) E rairai “voto ni kau” na mate e vakaleqa tiko na matana se na nodra veivakasewasewani na dauveitusaqati kei ira na “veiwekani vakailasu.” (2 Korinica 11:26; Kalatia 4:14, 15) A vola o Paula: “[Au] a masu vakatolu vua na Turaga, me kau tani vei au.” Ia e kila vinaka na Kalou ke tomana tiko nona cakacaka vakaitalatala o Paula dina ga ni vakaleqai koya na “voto ni kau” e vakalauti koya tiko, ena laurai kina na kaukaua ni Kalou kei na nona nuitaki koya vakaoti o Paula. A sega gona ni vakayacora na nona kerekere na Kalou, a kaya ga vua: “Me ka taucoko na noqu kaukauwa e na vanua e tu kina na malumalumu.”—2 Korinica 12:8, 9, VV.

Io, na Kalou e kilai keda vinaka kei na ka e ganiti keda. O Jiova e dau cakava na ka meda vinaka kina, me salavata kei na nona inaki e virikotora ena iVolatabu.