“Lako Mai, Ka Muri Au”

“Kevaka e dua sa via muri au, me kakua ni muria na lomana, ia me colata ga na nona kauveilatai [“kaunirarawa,” NW] e na veisiga, ka muri au.”—LUKE 9:23.

1, 2. (a) Na cava na veisureti i Jisu? (b) E vakacava, o taleitaka na nona veisureti qori?

NI VAKARAU cava nona cakacaka vakaitalatala o Jisu, a vunau tiko e Peria, na yasana e toka ena tai kadua ni Joritani ena vuaicake kei Jutia. A tarogi koya e dua na cauravou ena ka me cakava me bula tawamudu kina. E kila o Jisu ni muria tiko na Lawa a soli vei Mosese na cauravou qo, mani tukuna vua e dua na veisureti bibi. E kaya: “Lako, mo volitaka na ka kecega sa tu vei iko, ka solia vei ira sa dravudravua, ko na qai vakaiyau mai lomalagi: ia mo lako mai, ka muri au.” (Mari. 10:21) Vakasamataka mada—na veisureti mo muri Jisu, na Luvena duabau ni Kalou Cecere Sara!

² A sega ni taleitaka na veisureti qori na cauravou ya, ia era a taleitaka e so. A tukuna taumada o Jisu vei Filipi: “Muri au.” (Joni 1:43) A taleitaka o Filipi, a qai dua tale ga na yapositolo. E tokaruataka na veisureti qori o Jisu vei Maciu, a taleitaka tale ga. (Maciu 9:9; 10:2-4) A sureti ira tale ga na taleitaka na ivalavala dodonu o Jisu ena nona kaya: “Kevaka e dua sa via muri au, me kakua ni muria na lomana, ia me colata ga na nona kauveilatai [“kaunirarawa,” NW] e na veisiga, ka muri au.” (Luke 9:23) Koya gona, eda rawa ni dua na imuri i Jisu kevaka eda vinakata dina. Vakacava e lomamu tiko beka qori? E levu vei keda e taleitaka na veisureti vakayalololoma i Jisu, da qai vakarogoya na veisureti qori ena cakacaka vakavunau.

3. Na cava meda cakava meda kua kina ni “yali” yani da qai sega ni muri Jisu tale tiko?

³ E ka ni rarawa ni so era dau taleitaka tu na ka dina vakaivolatabu era sa muduka nodra vuli. Sa ra sega ni gugumatua, kena itinitini era sa “yali” yani ra qai sega ni muri Jisu tale tiko. (Iper. 2:1) Na cava meda cakava me kua kina ni yacovi keda qori? De vinaka meda taroga: ‘Na cava au vakatulewataka kina meu muri Jisu? Au na muri koya vakacava?’ Noda vakasamataka na isau ni taro qori ena vaqaqacotaka noda inaki meda dei tiko ga ena veika vinaka eda sa vakatulewataka meda muria. Ena yaga tale ga qo ena noda uqeti ira e so tale mera muri Jisu.

Cava Meda Muri Jisu Kina?

4, 5. Na cava e ganiti Jisu vinaka kina me liutaki keda?

⁴ E kaya na parofita o Jeremaia: “Kemuni Jiova, au sa kila, ni sa sega ni vu mai vua na tamata na nona sala: sa sega ni vu mai vua na tamata sa lako tu me lewa na nonai lakolako.” (Jere. 10:23) Na veika e yaco ena veitabagauna sa oti e vakadinadinataka na vosa i Jeremaia. E matata vakasigalevu ni sega na kaukaua vei ira na tamata ivalavala ca mera liutaki ira vakavinaka. Eda taleitaka na veisureti meda muri Jisu nida kila ni ganiti koya me noda iLiuliu, na ka e sega ni cakava rawa e dua na tamata. Vakasamataka mada na vuna e ganiti Jisu kina me liutaki keda.

⁵ Kena imatai, e lesi koya sara ga o Jiova me Mesaia, me iLiuliu. O cei e uasivia na Dauveibuli ena nona kila vinaka na iLiuliu e ganiti keda dina? Kena ikarua, eda qoroya na nona itovo da qai rawa ni vakatotomuri koya. (Wilika Aisea 11:2, 3.) E ivakaraitaki uasivi dina. (1 Pita 2:21) Kena ikatolu, e dau kauaitaki ira vakabibi na muri koya o Jisu, qai vakaraitaka qori ena nona mate ena vukudra. (Wilika Joni 10:14, 15.) E vakaraitaka tale ga ni ivakatawanisipi dauveikauaitaki ena nona dusimaki keda meda marautaka na bula nikua, eda na vakila kina na lagilagi e tawamudu ena gauna e se bera mai. (Joni 10:10, 11; Vkta. 7:16, 17) Ena vuku ni veika qori kei na so tale na ka, e ka vakayalomatua gona noda vakatulewataka meda muri koya. Ia na cava ena okati ena noda muri Jisu?

6. Na cava e okati ena noda muri Jisu?

⁶ Na noda muri Jisu e sega ni kena ibalebale noda vakatokai wale tu ga nida lotu vaKarisito. Sa rauta ni rua na bilioni nikua era tukuna tu nira lotu vaKarisito, ia era “daukitaka nai valavala ca.” (Wilika Maciu 7:21-23.) Ni dua e taleitaka me imuri i Jisu, eda na vakamacalataka vua ni o ira na lotu vaKarisito dina era bulataka ena veibasoga ni nodra bula e veisiga na nona ivakavuvuli kei na nona ivakaraitaki. Me matata na tikina qo, meda vakasamataka mada e so na ka eda kila me baleti Jisu.

Vakatotomuria Nona Vuku o Jisu

7, 8. (a) Na cava na vuku, na cava e laurai kina vakalevu vei Jisu? (b) E vakaraitaka vakacava na vuku o Jisu, eda na vakatotomuri koya vakacava?

⁷ E levu na ka e kilai tani kina o Jisu, ia eda na veivosakitaka ga e va: nona vuku, yalomalumalumu, gugumatua, kei na loloma. Vakasamataka mada nona vuku—nona vakayagataka vakamaqosa na kilaka kei na yalomatua e tu vua. E vola na yapositolo o Paula: “Sa bini tu vua [Jisu] nai yau kecega ni vuku kei na yalomatua.” (Kolo. 2:3) E vuku vakacava? E kaya: “Na ka ga sa vakatavulici au kina ko Tamaqu, sai koya ka’u sa vosataka.” (Joni 8:28) O Jiova ga e vakavukui koya, sa rauta me dau vakatulewa kina vakavuku.

⁸ Me kena ivakaraitaki, na nona vakatulewataka vakavinaka nona bula. E bula rawarawa, qai qarava ga vakatabakidua na caka ni loma ni Kalou. E vakayagataka vakavuku nona gauna kei na kaukaua me vakaliuca kina na veika e vauca na Matanitu ni Kalou. Eda vakatotomuria na ivakaraitaki i Jisu ena noda saga me ‘vinaka na matada’ meda kua ni vakaocai keda ena veika e sega ni yaga qai vakalusia noda kaukaua kei na gauna. (Maciu 6:22) Era sa vakarawarawataka nodra bula e levu na lotu vaKarisito mera vakaitavi kina vakalevu ena cakacaka vakaitalatala. So era veiqaravi sara vakapainia. Ke o cakava qori, o vakavinavinakataki kina vakalevu. O na marau qai lomavakacegu ni o “vakasaqara taumada na matanitu.”—Maciu 6:33.

Yalomalumalumu Vakataki Jisu

9, 10. E yalomalumalumu vakacava o Jisu?

⁹ Na ikarua ni ka e kilai tani kina o Jisu eda na veivosakitaka, oya na nona yalomalumalumu. Nira veiliutaki na tamata ivalavala ca, era dau vakalevulevui ira. Ia e duidui sara o Jisu! E vakacolati ena itavi levu me vakayacora na loma ni Kalou, ia a sega ga ni viavialevu kina. Eda uqeti gona meda vakatotomuri koya. E vola na yapositolo o Paula: “Me tiko e na lomamudou na yalo oqo ka tiko talega vei Karisito Jisu: o koya, ni sai tovo vata kei na Kalou, sa sega ni vakasama ni sa butako ni sa vakatauvatani kei na Kalou: a sa vakadravudravuataki koya, ka kauta vua nai tovo ni tamata dauveiqaravi, a sa caka me tautauvata kei na tamata.” (Fpai. 2:5-7) Na cava e okati kina?

¹⁰ E lagilagi dina na bula i Jisu ena gauna a tiko kina kei Tamana mai lomalagi qai marautaka, ia a tu vakarau me “vakadravudravuataki koya.” A tokitaki na nona bula ina katonigone ni dua na goneyalewa savasava e Jiu qai tubu voli kina me vula ciwa, yacova ni sa sucu ena nona vuvale e dua na matai dravudravua. A tubu cake o Jisu me dua na gonetagane ena lomanivale i Josefa me yacova sara ni sa cauravou. E sega ni valavala ca. Ia, ena nona bula taucoko vakaitabagone a talairawarawa tiko ga vei rau na nona itubutubu erau sucu ivalavala ca. (Luke 2:51, 52) Sa dua dina na ivakaraitaki vinaka ni yalomalumalumu!

11. Eda na vakatotomuria vakacava na yalomalumalumu i Jisu?

¹¹ Eda na vakatotomuria nona yalomalumalumu o Jisu ena noda tu vakarau ni cakava na ilesilesi e dau nanumi tu ena so na gauna me lolovira. Kena ivakaraitaki, vakasamataka mada na noda ilesilesi meda vunautaka na itukutuku vinaka. De rairai lolovira tu na cakacaka qo, vakauasivi nida sega ni kauaitaki, da vakalialiai, se cati. Ia na noda gumatua tiko ga ena cakacaka vakavunau, eda na tuberi ira kina e so tale mera taleitaka na veisureti i Jisu mera muri koya. Nida cakava qori eda sa veivakabulai sara tiko ga kina. (Wilika 2 Timoci 4:1-5.) E dua tale na ivakaraitaki ni noda veitokoni, oya na kena qaravi na Kingdom Hall. E okati kina e so na itavi me vaka na sova benu, qua fuloa, kei na sava valelailai—e raici tu me itavi lolovira! Ia eda kila tiko ni tiki ni noda veiqaravi tabu na noda dau qarava vinaka na veika me baleta na Kingdom Hall—na vanua ni noda sokalou savasava ena noda itikotiko. Noda tu vakarau ni cakava na itavi e dau raici tu mera lolovira e vakaraitaka nida yalomalumalumu, da qai muria na ivakaraitaki i Karisito.

Meda Gumatua Vakataki Jisu

12, 13. (a) E gumatua vakacava o Jisu, na cava e uqeti koya? (b) Na cava ena uqeti keda meda gumatua ena cakacaka vakavunau?

¹² Vakasamataka mada na nona gumatua o Jisu ena cakacaka vakaitalatala. E levu sara na ka e cakava ena gauna a tiko kina e vuravura. A rairai cakacaka vakamatai kei na tamana a susugi koya, o Josefa. E dau cakamana, vakabulai ira na tauvimate qai vakaturi ira na mate ena gauna a cakacaka voli kina vakaitalatala. Ia, e nona cakacaka bibi duadua na vunautaka na itukutuku vinaka kei na nodra vakavulici o ira na vakarorogo vua. (Maciu 4:23) Nida nona imuri, eda na cakava tale ga na cakacaka qori. Eda vakatotomuria vakacava na nona ivakaraitaki? Kena imatai ena noda cakava na ka ena inaki vata ga a cakava kina o Jisu.

¹³ Sega ni vakataratututaki ni lomana na Kalou o Jisu, qai uqeti koya qori me vunau qai veivakavulici. E taleitaka tale ga na ka dina a dau vakatavulica. E iyau talei duadua vua na ka dina, qai vinakata sara ga me wasea yani. Eda va tale ga qori nida qasenivuli se ‘dauveivakavulici.’ Vakasamataka mada e so na ka dina eda sa vulica ena Vosa ni Kalou! Eda kila vinaka na vakalewai ni nona veiliutaki e vuravura vaka kina e lomalagi, da qai kila na veika ena yaco me vakadinadinataki kina. Eda kila vinaka na veika e vakatavuvulitaka na iVolatabu me baleta na kedra ituvaki na mate kei na veivakalougatataki ni vuravura vou ni Kalou. Ke o mani vulica na veika dina qori ena dua na gauna makawa sara, se dua toka ga na gauna qo, e se talei tiko ga. Se mani makawa se vou, era iyau talei kece. (Wilika Maciu 13:52.) Na noda vunau mai vu ni lomada eda sa wasea sara tiko ga kina na ka dina eda taleitaka e vakatavuvulitaka o Jiova.

14. Eda na vakatotomuria vakacava na ivakarau ni nona veivakavulici o Jisu?

¹⁴ Vakasamataka tale ga na nona ivakarau ni veivakavulici o Jisu. E dau dusimaki ira na vakarorogo ina iVolatabu. E dau veivosakitaka na tikina bibi ena nona cavuta: “Sa volai.” (Maciu 4:4; 21:13) Ni dikevi na ivolatukutuku ni veika e dau tukuna, e laurai ni cavuqaqataka se vakamua na ka e cavuta ina sivia na veimama na ivola ena iVolatabu vakaIperiu. Eda vakataki Jisu ga ena noda nuitaka vakatabakidua na iVolatabu meda veivakavulici kina, da qai saga meda vakayagataka e veigauna. Eda na vakavulici ira kina na yalomalumalumu mera kila nida vakatavuvulitaka tiko na vakasama ni Kalou, sega ni noda ga. E dau vakavu marau dina ni dua e taleitaka me wilika na iVolatabu, me veivosakitaki na kena yaga kei na ibalebale ni Vosa ni Kalou! Ke ra qai taleitaka tale na veisureti mera imuri i Jisu, e sega ni tukuni rawa na noda marau.

Nida Muri Jisu Eda na Lomani Ira Kina e so Tale

15. Na itovo cava e kilaitani kina o Jisu, ena uqeti keda vakacava?

¹⁵ E veivakauqeti dina na ka e kilai tani kina o Jisu—ya na nona loloma. E vola na yapositolo o Paula: “Sa rawai keitou sara na loloma i Karisito.” (2 Kor. 5:14) Nida vakasamataka nona lomana na kawatamata kei na nona lomani keda yadudua o Jisu, ena uqeti keda sara ga meda muria na nona ivakaraitaki.

16, 17. E yalololoma vakacava o Jisu?

¹⁶ E lomani ira vakacava e so tale o Jisu? Na ivakaraitaki levu ga ni nona loloma oya na nona tu vakarau me mate ena vukuda. (Joni 15:13) Ia, ena nona cakacaka vakaitalatala, e dau vakaraitaka tale ga na nona loloma ena so tale na basoga. Kena ivakaraitaki, e lomani ira na rarawa voli. Ni raici Meri ni tagi tiko kei na so tale ni sa takali o Lasarusa, e mositi koya dina. Dina ni a vakarau vakaturi Lasarusa, a “tagi” tale ga ena levu ni nona rarawa.​—Joni 11:32-35.

¹⁷ Ni se qai tekivu cakacaka vakaitalatala o Jisu, a lako yani vua e dua na vukavuka qai kaya: “Kevaka ko ni sa vinakata, ko ni sa vakasavasavataki au rawa.” Na cava e cakava o Jisu? E tukuni: “Sa yalololoma ko Jisu.” E qai cakava e dua na ka veivakurabuitaki. A “dodoka na ligana, ka tarai koya, ka kaya vua, Au sa vinakata; mo savasava mai. . . . Sa takali vakasauri vua na vukavuka, a sa savasava mai.” E volai ena Lawa a soli vei Mosese nira sega ni savasava na vukavuka, qai rawa ni vakabulai koya o Jisu, ke sega mada ga ni tarai koya. Ia, a qai tarai koya o Jisu me vakabulai koya, kena irairai ni se qai tarai koya vakadua e dua tale na tamata ena vica vata na yabaki. E ivakaraitaki dina ni yalololoma o Jisu!​—Mari. 1:40-42.

18. Eda na dau “veinanumi” vakacava?

¹⁸ Nida imuri i Jisu Karisito, e vinakati meda dau vakaraitaka na noda loloma ena noda dau “veinanumi.” (1 Pita 3:8, VV) Dau dredre meda kila na bibi ni nona tauvimate e dua se na nona lomabibi, vakauasivi ke se sega ni yacovi keda qori. Ia a nanumi ira na tauvimate o Jisu, dina ni sega ni bau tauvimate o koya. Eda na vakatotomuri koya vakacava? Qori ena noda dau vakarogoci ira vinaka na tauvimate nira talaucaka tiko na lomadra. Eda rawa ni taroga, ‘Keu tauvimate tale ga va qo, ena vakacava tu mada na kequ ituvaki?’ Ke da dau kauaitaka vakalevu na lomadra e so tale, eda na rawa kina ni “vakacegui ira era sa yalolailai.” (1 Ces. 5:14) Eda na vakatotomuria kina na ivakaraitaki i Jisu.

19. E uqeti keda vakacava na nona ivakaraitaki o Jisu?

¹⁹ Sa dua dina na ka ni vuli vinaka na ivakaraitaki i Jisu Karisito ena ka e tukuna kei na ka e cakava! Na levu ga ni noda vulica na veika me baleti koya, na levu ni noda via muri koya—eda na via uqeti ira tale ga kina e so. Koya gona, meda marautaka mada ga noda muria tiko na Tui o koya na Mesaia ena gauna qo kei na gauna tawamudu mai muri!

Vakamacalataka Mada

• Eda na vakaraitaka vakacava na vuku, me vakataki Jisu?

• Meda na yalomalumalumu vakacava?

• Eda na gugumatua vakacava ena cakacaka vakaitalatala?

• Eda na vakatotomuri Jisu vakacava ena noda dau loloma?

[Kato/iYaloyalo ena tabana e 5]

NA IVOLA E UQETI KEDA MEDA VAKATOTOMURI KARISITO

A sevutaki e dua na ivola vou ena soqo ni tikina ni 2007. E 192 na tabana qai kena ulutaga “Come Be My Follower.” E vakarautaki na ivola qo mera kila vinaka kina na lotu vaKarisito na bula i Jisu, vakauasivi na nona itovo kei na ka e dau cakava. Na imatai ni rua na wase e baleta tiko na ikau ni ivola, sa qai vakamacalataki ena imatai ni wasewase e so na ka e kilaitani kina o Jisu—nona yalomalumalumu, nona yalodoudou, vuku, talairawarawa kei na vosota.

E qai vakamacalataki tarava na cakacaka i Jisu ni qasenivuli qai dauvunautaka na itukutuku vinaka, vaka kina na nona vakaraitaka nona loloma levu ena basoga e so. E vulici ena ivola qo na itukutuku e yaga vei keda na lotu vaKarisito meda vakatotomuri Jisu.

Nuitaki ni na uqeti keda kece na ivola qo meda dikevi keda, da qai taroga: ‘Au sa muri Jisu dina tiko? Au na muri koya voleka vakacava?’ Era na uqeti tale ga “ko ira kece era sa vakarau tu me vinakata na bula tawa mudu” mera muri Karisito.​—Caka. 13:48.

[iYaloyalo ena tabana e 4]

E vakadonuya o Jisu me mai sucu vakatamata e vuravura. Na itovo cava ena vinakati vua?

[iYaloyalo ena tabana e 6]

Na cava ena uqeti keda meda gugumatua ena cakacaka vakaitalatala?