Meda Marautaka na Cakacaka ni Veivakatisaipelitaki

“Dou lako yani ka qisi ira me ra noqu tisaipeli.”​—MACIU 28:19, VV.

1-3. (a) Na cava era vakila e levu me baleta na veivakavulici ena iVolatabu? (b) Na taro cava eda na veivosakitaka?

“SA SIVI qo e 11 na macawa noqu vuli iVolatabu tiko kei na dua na vuvale mai Pakistan,” a vola e dua na tacida yalewa e lewena na ivavakoso e qarava e dua na iwasewase ni vosa vakaIdia e Mereke. “Yaco na gauna,” e tomana, “me keitou sa veitokani vinaka sara. Au luluvu niu vakasamataka ni ratou sa na vakarau lesu i Pakistan. E sega wale ga niu rarawataka nodratou sa na lako, ia au marautaka tale ga niu a vakavulici ratou me baleti Jiova.”

² O dau vakila tale ga na marau qori ena nomu vakavulica e dua ena iVolatabu? A marautaka dina o Jisu kei ira nona tisaipeli na cakacaka ni veivakatisaipelitaki. E vuavuaivinaka nodra cakacaka na 70 na tisaipeli nira sa lesu yani vua, qai “reki” kina o koya. (Luke 10:17-21) Era marautaka tale ga e levu nikua na nodra cakacaka ni veivakatisaipelitaki. Ena 2007, e tautauvata ni ono veimama na milioni na vuli iVolatabu era vakayacora e veivula na dautukutuku gugumatua qai mamarau.

³ Era se sega ni vakila e so na dautukutuku na marau ni veivakavulici ena iVolatabu. So tale sa vakayabaki nodra sega ni vakavulica tu e dua. Na ka ni bolebole cava eda na vakila nida saga meda veivakavulici ena iVolatabu? Eda na walia vakacava? Eda na vakaicocovitaki vakacava nida saga ena noda igu kece meda muria tale ga na ivakaro i Jisu: “Dou lako yani ka qisi ira me ra noqu tisaipeli”?—Maciu 28:19, VV.

Ka ni Bolebole e Vakavu Rarawa

4, 5. (a) Na cava na nodra rai e levu e veiyasa i vuravura me baleta na vunau? (b) Na ka ni bolebole cava era vakila na dautukutuku ena so tale na vanua?

⁴ Ena so na vanua e vuravura, e levu era dau taleitaka na ivola e tabaka na isoqosoqo ra qai via vulica na iVolatabu. Erau vola e dua na veiwatini mai Ositerelia, rau a veiqaravi tu vakawawa mai Zambia: “E dina taucoko na veika keirau rogoca me baleti Zambia, ni dau vuavuaivinaka kina na vunau. E vakasakiti na vunau ena salatu! Era mai taroga na ivola na lewenivanua, so era taroga sara ga na itabataba era taleitaka.” Ena dua na yabaki tiko ga qo era vakavulica e sivia na 200,000 na vuli iVolatabu, na mataveitacini mai Zambia—ivakatautauvata ni dua na dautukutuku e vica vata nona vuli iVolatabu.

⁵ Ia ena so tale na vanua ena rairai dredre nodra solia na ivola na dautukutuku se mera veivakavulici ena iVolatabu. Na vuna? Levu na gauna era yali tu na itaukeinivale nira lako yani na dautukutuku, ia ke ra tiko, era na rairai sega ni via vakarorogo. De dua era a sega ni susugi ena vuvale lotu se ra cata na veivakaisini sa takalevu tu ena lotu lasu. Era sa mavoa tu vakayalo e levu, ra vakacacani, ra malumalumu qai biuti ira wale tu na nodra ivakatawanisipi dau lasulasu. (Maciu 9:36) Macala ga nira na sega ni taleitaka na veivosaki ena iVolatabu.

6. Na cava ena rairai yalani kina nodra cakacaka e so?

⁶ E so tale na dautukutuku yalodina era vakila na ka ni bolebole ena rawa ni vakavuna nodra rarawa. Era a dau gugumatua ena cakacaka ni veivakatisaipelitaki, ia e qai yalani ga ena vuku ni tauvimate kei na bula vaqase. Vakasamataka tale e so na ka eda dau nanuma tu me baleti keda. Kena ivakaraitaki, o nanuma beka ni sega ni ganiti iko mo veivakavulici ena iVolatabu? De o vakataki Mosese ena gauna e lesi koya kina o Jiova me vosa vei Fero. E kaya o Mosese: “Kemuni na noqu Turaga [Jiova], ka’u sa sega ni rawata na vosa, sa sega eliu, ka sega talega oqo.” (Lako 4:10) Ke sa tiko rawa ena noda vakasama nida sega ni maqosa ena veivakavulici, ena totolo sara ni basika na vakanananu nida na sega ni cakava vinaka noda itavi. De dua eda lomaleqataka ni na sega ni tisaipeli o koya eda vakatavulica baleta nida sega ni qasenivuli uasivi. Ke tiko na vakasama va qori, sa na dredre ga na veivakavulici ena iVolatabu. Ia eda na walia vakacava na leqa qori?

Vakarautaka na Lomamu

7. Na cava e uqeti Jisu ena nona cakacaka vakaitalatala?

⁷ Na imatai ni ka meda cakava oya meda vakarautaka na lomada. E kaya o Jisu: “Sa vosataka na gusuda na ka sa oso vakalevu kina na lomada.” (Luke 6:45) E dau veikauaitaki dina o Jisu, qai uqeti koya qori ena nona cakacaka vakaitalatala. Kena ivakaraitaki, ni raica na kedra ituvaki vakayalo na nona itokani, e “lomani ira” sara ga. E kaya vei ira nona tisaipeli: “Sa vakalewe na yabaki . . . dou masuti koya nai Taukei ni were, me tala yani eso nai vakatau-ni-were ki na nona were.”—Maciu 9:36-38.

8. (a) Na cava meda dau vakasamataka? (b) Na cava eda vulica ena ka e kaya e dua na vuli iVolatabu?

⁸ Nida veivakatisaipelitaki tiko, e vinaka meda dau vakasamataka na kena yaga tu vei keda na nona sasaga e dua me vakavulici keda ena iVolatabu. Vakasamataki ira tale ga eda na sotava ena cakacaka vakaitalatala, kei na kena yaga vei ira na itukutuku eda wasea yani. A volavola e dua na marama ina valenivolavola ni tabana ena vanua e tiko kina: “Au via vakavinavinakataki rau na iVakadinadina rau dau mai vakavulici au tiko e vale. Au kila ni rau sa na sosa ena levu ni noqu taro, rau qai dau mai dede. Ia erau dau vosovoso, rau qai taleitaka me rau vakavulica na veika erau a vulica. Au vakavinavinakataki Jiova kei Jisu niu mai kilai rau.”

9. Na cava e kauaitaka vakatabakidua o Jisu, eda na vakatotomuri koya vakacava?

⁹ Era sega ni taleitaka na tamata kece na nona via vakavulici ira o Jisu. (Maciu 23:37) So era muri koya vakalekaleka ga, oti ra “sega tale ni lako vata kaya” nira cata nona ivakavuvuli. (Joni 6:66) Ia nodra sega ni vakarorogo vei Jisu, e sega ni nanuma kina o koya ni sa tawayaga na nona itukutuku. Dina ni sega ni vua e levu na sorenikau e kaburaka o koya, ia a kauaitaka ga vakatabakidua na cakacaka vinaka e cakava tiko. Ni raica ni sa matua tu na were, a marautaka gona me vakaitavi ena kena tamusuki. (Wilika Joni 4:35, 36.) Vakacava meda kua ni vakaraica tiko ga na qele e sega ni vua mai kina e dua na ka, ia meda kauaitaka ga na ka eda rawa ni tamusuka ena yalava eda lesi kina? Meda veivosakitaka mada qo se na rawa ni donu tiko ga vakacava na noda rai.

Vunau me Tekivutaki Kina na Vuli iVolatabu

10, 11. Na cava o na rawa ni cakava mo marau tiko ga kina?

¹⁰ Na dauteitei e kaburaka na sorenikau, ena kila ni tiko na gauna me na tamusuka kina. Qori tale ga na inaki ni noda vunau, meda tekivutaka kina na vuli iVolatabu. Ia vakacava ke o dau vunau qai sega ni levu era tiko e vale, se o sega ni vosa rawa tale vei ira nomu veisikovi lesu? Ena rawa ni veivakayalolailaitaki dina qori. Kena ibalebale beka ya mo sa kua kina ni cakacaka vakavunau e veivale? Sega! Na vunau e veivale e dua na iwalewale sa vakayagataki makawa tu mai meda vosa kina vei ira e levu.

¹¹ Mo marautaka tiko ga na cakacaka qo, vakacava mo veisautaka na iwalewale ni nomu vunau? Kena ivakaraitaki, o sa bau tovolea na vunau ena salatu se na vanua ni cakacaka? Vakacava mo qiriti ira, se vola nodra naba ni talevoni o ira na rogoca na itukutuku vinaka ni Matanitu ni Kalou me rawa ni tomani tiko ga kina na veivosaki? Ke o dau vosota, o vakamatauni iko tale ga ena cakacaka vakaitalatala, o na marautaka nira taleitaka e so na itukutuku ni Matanitu.

Vosota Tiko ga Nodra Sega ni Kauai

12. Na cava eda rawa ni cakava ke ra sega ni via vakarorogo na tiko ena noda yalava?

¹² Vakacava ke levu ena nomu yalava era sega ni via rogoca na veika me baleta na lotu? Rawa beka ni o veisautaka na iwalewale ni nomu vosa vei ira mera kauai kina? E vola na yapositolo o Paula vei ira na itokani vakabauta e Korinica: “Ka’u sa yaco me’u vaka e dua na Jiu vei ira na Jiu, . . . vei ira sa sega kina na vunau, me’u vaka e dua sa sega vua na vunau, me’u rawai ira kina sa sega vei ira na vunau, ia ka sa sega ni yali vei au na vunau ni Kalou.” Na cava na inaki i Paula? “Au sa yaco me’u ka kecega vei ira kecega na tamata,” e kaya, “me’u vakabula eso e na ka kecega.” (1 Kor. 9:20-22) Era tiko beka ena noda yalava e so e tautauvata noda rai? E levu era sega ni lotu, ia era via vakavinakataka nodra bula veimaliwai vakavuvale. De dua era via kila tale ga na inaki ni bula. Eda rawa beka ni wasea na itukutuku ni Matanitu vei ira qori ena kena iwalewale era na taleitaka?

13, 14. Eda na rawa vakacava ni vakalevutaka noda marautaka na cakacaka ni veivakatisaipelitaki?

¹³ Era sa marautaka tiko e levu na dautukutuku na nodra veivakatisaipelitaki ena vanua mada ga era sega ni dau vakarorogo kina e levu. E rawa vakacava qori? Ena nodra vulica e dua tale na vosa. Rau a qai kila e dua na veiwatini erau sa yabaki 60 vakacaca nira tiko ena yalava e lesi ina ivavakoso e levu na gonevuli ni Jaina kei na nodra vuvale. “E uqeti keirau qori me keirau vulica na vosa vakaJaina,” e tukuna o tagane. “E dua na iwase ni gauna ena vulici tiko kina na vosa qori e veisiga,” e tomana, “ia e yaga sara nira vulica kina na iVolatabu e levu era cavutu mai Jaina ena neitou yalava.”

¹⁴ Kevaka mada ga o sega ni vulica rawa e duatani na vosa, o se rawa tiko ga ni vakayagataka na ivola Good News for People of All Nations ni o sotavi ira e duatani na nodra vosa. Ke o sotava tale ga e so e duidui na nodra vosa, o rawa ni kauta vei ira na ivola e volai ena nodra vosa. Ena vinakati dina na gauna kei na igu ena noda saga meda vosa vei ira na duikaikai. Ia me nanumi tiko ga na ivakavuvuli ena Vosa ni Kalou: “Ko koya sa kaburaka vakalevu, ena tamusuka talega vakalevu.”—2 Kor. 9:6.

Veitokoni na Lewe Kece ni iVavakoso

15, 16. (a) Era veitokoni vakacava na lewe ni ivavakoso kece ena cakacaka ni veivakatisaipelitaki? (b) Era veitokoni vakacava na itabaqase?

¹⁵ E sega ni cakacaka ga ni le dua na veivakatisaipelitaki. Qo e nodra itavi kece na lewe ni ivavakoso. Na vuna? E kaya o Jisu: “A ka oqo era na kila kina na tamata kecega ni dou sa noqu tisaipeli, kevaka dou sa veilomani.” (Joni 13:35) Koya gona, nira mai soqoni na vuli iVolatabu, era dau qoroya na ivakarau ni noda veilomani. E kaya e dua na vuli iVolatabu: “Au dau taleitaka na tiko ena soqoni. Era dau veikauaitaki dina!” E kaya o Jisu nira na rawa ni tusaqati o ira na nona imuri ena loma sara ga ni nodra vuvale. (Wilika Maciu 10:35-37.) Ia e yalataka ni na levu tale na ‘tacidra, ganedra, tinadra, kei na luvedra’ vakayalo ena loma ni ivavakoso.—Mari. 10:30.

¹⁶ E bibi tale ga na nodra veitokoni na tacida vakayalo era sa itabaqase ena nodra toso vakayalo na vuli iVolatabu. E rawa vakacava qori? Kevaka mada ga era sega ni veivakavulici ena iVolatabu, na nodra ivakamacala ena soqoni e dau veitarai cake qai vaqaqacotaka nodra vakabauta na vakarorogo. Na nodra muria tu mai vakadede na “sala ni valavala dodonu” e iukuuku dina ena ivavakoso qai uqeti ira na yalomalumalumu ina isoqosoqo ni Kalou.​—Vkai. 16:31.

Valuta na Rere

17. Eda na valuta vakacava na vakasama ni sega ni ganiti keda meda veivakavulici ena iVolatabu?

¹⁷ Vakacava ke o nanuma ni sega ni ganiti iko mo veivakavulici ena iVolatabu? Mo nanuma lesu nona vakarautaka o Jiova na yalo tabu vei Mosese, kei na dua nona ivukevuke, na tacina o Eroni. (Lako 4:10-17) E yalataka o Jisu ni na tokona noda cakacaka vakavunau na yalo tabu ni Kalou. (Caka. 1:8) E lesi ira yarua tale ga na nona imuri mera lai vunau. (Luke 10:1) Koya gona, ke o nanuma ni sega ni ganiti iko mo vakavulica e dua ena iVolatabu, masuta na yalo tabu ni Kalou me vakavukui iko, saga mo drau veitomani ena cakacaka vakavunau kei na dua ena vakayaloqaqataki iko, o na rawa ni vuli vua. E veivakayaloqaqataki dina noda kila ni digitaki ira na tauvanua o Jiova—“na veika sa malumalumu e vuravura”—mera cakava na cakacaka vakaitamera qo.​—1 Kor. 1:26-29.

18. Eda na walia vakacava noda lomaleqataka noda na sega ni tubera rawa e dua me tisaipeli?

¹⁸ Na cava na iwali ni noda lomaleqataka noda sega ni vakavulica rawa e dua me qaravi Jiova? Meda nanuma tiko na noda tubera e dua me tisaipeli e sega ni vaka na vakasaqa, ni na vakatau na kana vinaka se na kana ca ni kakana vua ga e vakasaqa. Eda na sega ni cakava rawa ena noda kaukaua duadua ga na cakacaka ni veivakatisaipelitaki. Na cakacaka bibi e nei Jiova, ena nona vakayarayarataki ira mai na tamata vua. (Joni 6:44) Eda na qai gugumatua kei ira na lewe ni ivavakoso ena nodra vakavulici mera toso vakayalo na vuli iVolatabu. (Wilika 2 Timoci 2:15.) Ena vinakati me bulataka sara ga o gonevuli na veika e sa vulica qori. (Maciu 7:24-27) E rawa ni veivakayalolailaitaki nona vakatulewataka e dua na gonevuli me muduka nona vuli iVolatabu. Eda nuitaka nira na dau vakatulewa dodonu, ia eda na dui “vakatusai keda kecega vua na Kalou.”—Roma 14:12.

Na Cava na Kena iCovi?

19-21. (a) Na cava na yaga ni veivakavulici ena iVolatabu? (b) Na cava na rai i Jiova me baleti ira kece na cakacaka vakavunau tiko?

¹⁹ Na noda veivakavulici ena iVolatabu eda sa vakaliuca tiko kina na Matanitu ni Kalou. Ena vakadeitaka na dina ni Vosa ni Kalou ena noda vakasama kei na lomada. Na vuna? A vakamacalataka e dua na painia o Barak: “Ni o veivakavulici ena iVolatabu o na dua na gonevuli maqosa ni Vosa ni Kalou. Au vakila ni dodonu meu vakadeitaki au mada ena ka au vakabauta, meu qai rawa ni vakavulica e dua tale.”

²⁰ Ke o sega ni vakavulica tiko e dua ena iVolatabu, sa kena ibalebale beka ya ni tawayaga nomu veiqaravi vua na Kalou? E sega! E taleitaka vakalevu o Jiova na noda sasaga kece meda vakacaucautaki koya. O ira kece na vakaitavi ena cakacaka vakavunau era “daucakacaka vata kei koya na Kalou.” Ia, ena marautaki sara vakalevu na noda veivakavulici ena iVolatabu ni vakatubura na Kalou na sorenikau eda a tea. (1 Kor. 3:6, 9) “Ni o raica nona toso e dua na vuli iVolatabu,” e kaya e dua na painia o Amy, “o vakavinavinaka vei Jiova ni vakayagataki iko mo tubera e dua me kilai koya, me rawata tale ga kina na bula tawamudu.”

²¹ Nida saga ena noda igu kece meda veivakavulici ena iVolatabu eda na vakaliuca kina na qarava na Kalou nikua, ena qai vaqaqacotaka na noda inuinui meda bula yani ina vuravura vou. Ena veitokoni i Jiova, eda na tuberi ira tale ga kina na vakarorogo mera bula. (Wilika 1 Timoci 4:16.) Sa bau vakavu marau dina!

O se Nanuma Tiko?

Na ka ni bolebole cava ena yalana nodra veivakavulici e so ena iVolatabu?

• Na cava eda rawa ni cakava ke ra sega ni via vakarorogo e levu ena noda yalava?

• Na cava na icovi ni noda veivakavulici ena iVolatabu?

[iYaloyalo ena tabana e 9]

O dau veisautaka na iwalewale ni nomu vunau mo vosa kina vei ira na yalomalumalumu?