Toro Voleka Vua na Kalou
Na iVakaraitaki Levu Duadua ni Loloma ni Kalou
E LOMANA na Kalou o Eparama. Na peteriaki yalodina qo e lomani Aisake tale ga na luvena a sucu ni sa kena turaga. Ia na nona vakatovolei ni tukuna vua na Kalou me cabora na luvena sa rairai yabaki 25, e dua na ka e sega ni bau tadra vakadua e dua na tama me cakava. A sega ni mate o Aisake, ni tala mai na Kalou e dua nona agilosi me tarovi Eparama ni vakarau vakamatei luvena. Ena Vakatekivu 22:1-18, eda kila kina na ivakaraitaki lailai vakaparofisai ni nona loloma levu na Kalou vei keda.
E tukuna na tikina e 1, “sa qai vakatovolei Eparaama na Kalou.” O Eparama e dua na turaga vakabauta, ia na veivakatovolei qo a sega ni se bau sotava. E kaya na Kalou: “Mo kauta mada na luvemu, na luvemu e dua bauga, ko Aisake ko sa lomana, . . . ka vakacabori koya . . . mei soro kama e na dua na ulu-ni-vanua ka’u na vakatakila vei iko.” (Tikina e 2) Na Kalou e laiva me vakarauta ga nodra vakatovolei nona tamata. Na veivakatovolei qo e laurai kina ni o Jiova e nuitaki Eparama.—1 Korinica 10:13.
A sega ni tu suka o Eparama. Eda wilika: “Sa sou e na mataka ko Eparaama, ka vauca nai vodovodo ki na nona asa, ka kauta vata kaya e le rua na nona cauravou, kei Aisake na luvena, ka taya na buka ni soro kama, . . . ka lako.” (Tikina e 3) A sega ni bau tukuna o Eparama vua e dua na veika matailalai me baleta na veivakatovolei.
Ni tolu na siga nodratou ilakolako, e gauna vinaka qori me vakasama kina vakatitobu o Eparama. Ia e sega ni bau veisau na lomana. E vakavotui nona vakabauta ena ka e tukuna. Ni raica tu yani na ulunivanua a vakatakilai vua, e tukuna vei rau na nona tamata: ‘Drau tiko ga eke, ia keirau na lako kei na gone ina yasana ya me soro, qai lako tale mai vei kemudrau.’ Ni taroga o Aisake na sipi cava ena cabori, e kaya o Eparama: “Ena vakarautaka na Kalou e dua na . . . lami.” (Tikina e 5, 8) E namaka o Eparama ni rau na lesu vata kei luvena. Cava na vuna? E ‘vakadinata ni rawarawa vua na Kalou me vakabulai koya [Aisake] tale mai na mate.’—Iperiu 11:19.
Ni “taura nai sele” o Eparama me ‘vakamatei luvena,’ a qai tarovi koya e dua na agilosi. A vakarautaka na Kalou e dua na sipi tagane e tacori ena kau na kena ileu me cabora o Eparama “mei sosomi kei luvena.” (Tikina e 10-13) Ena mata ni Kalou e vaka ga sa cabori o Aisake me isoro. (Iperiu 11:17) E vakamacalataka e dua na dauvakadidike ni iVolatabu, “Ena mata ni Kalou, e vaka ga sa cabori luvena o Eparama ena nona yalorawarawa.”
E vakadinadinataki nona nuitaki Eparama o Jiova. Nona nuitaki Jiova o Eparama e vakalougatataki kina, e vakalevutaka tale ga na Kalou nona veiyalayalati kei Eparama ena nona kaya nira na vakalougatataki na veimatanitu ena vuku ni nona kawa.—Tikina e 15-18.
A sega gona ni laiva na Kalou me cabori luvena o Eparama, ia na Kalou a qai cabora vakaisoro na luvena. Na nona yalorawarawa o Eparama me cabori Aisake e vakatayaloyalotaka na nona cabora na Kalou na Luvena duabauga o Jisu Karisito me bokoci kina noda ivalavala ca. (Joni 3:16) Na isoro i Karisito na ivakaraitaki levu duadua ni nona lomani keda na Kalou. Ni vakarautaka na Kalou na isoro ya ena vukuda, ena vinaka meda dui taroga, ‘Na isoro cava au na cabora me vakamarautaka na Kalou?’