Taro na Dauwiliwili

Ke mate e dua na gone ni bera ni sucu, e tiko beka nona inuinui me na vakaturi?

Ena rairai dredre vei ira na sega ni sotava na ituvaki qo mera kila na ka era vakila o ira na mate na luvedra ni se bera ni sucu. Eso na itubutubu era rarawataka vakalevu na mate ni luvedra. Dua na tina a leqa e lima na luvena ni bera nira sucu. A kalougata ni a qai rua na luvena tagane bulabula. Ia, a nanuma vinaka na nodratou leqa na luvena. Ena nona bula taucoko, e kila vinaka sara tu ga na yabaki ni nodratou bula na luvena ke ratou a sega ni leqa. E dua beka na yavu e rawa kina vei ira na lotu vaKarisito qo mera nuitaka ni na vakaturi na luvedra?

Na kena isau rawarawa sara, oya nida sega ni kila. E sega ni tukuni ena iVolatabu na nodra vakaturi na gone era a mate ni bera nira sucu. Ia, e tiko na ivakavuvuli ena Vosa ni Kalou e veisemati kei na taro qo, qai rawa ni veivakacegui.

Meda dikeva mada e rua na taro. Kena imatai, mai na rai i Jiova, e tekivu ena gauna cava na bula ni tamata​—ena gauna e kunekunetaki kina se ni sa sucu? Kena ikarua, e raica vakacava o Jiova na gone e se bera ni sucu—dua na tamata se na sela era cokovata tu ena katonigone? E sauma vakamatata na rua na taro qo na ivakavuvuli ena iVolatabu.

A vakaraitaka vakamatata na Lawa a soli vei Mosese ni bula e sega ni tekivu ena gauna e sucu kina e dua, e tekivu ni bera oya. E vakaraitaka vakacava? E vakaraitaka ni nona vakamatei na gone e se bera ni sucu e rawa ni totogi mate kina e dua. Vakasamataka na lawa qo: “Ko na qai sauma na mate e na mate.”a (Lako 21:22, 23) O koya gona, e bula tiko na gone ena katonigone qai okati me dua na tamata. Nodra kila na ka dina qo e vica vata na milioni na lotu vaKarisito, e uqeti ira kina mera kua ni tokona na vakalutu, era raica ni qo e dua na cala bibi vua na Kalou.

Ia, e raica vakacava o Jiova na nona bula e dua na gone e se bera ni sucu? A vakaroti ena lawa sa cavuti oti ni na vakamatei na tamata e vakavuna nona mate e dua na gone e se bera ni sucu. E macala gona ni talei vua na Kalou na nona bula na gone e se bera ni sucu. Kena ikuri, e levu tale na tikinivolatabu e vakaraitaka ni o Jiova e raici ira na gone era se bera ni sucu mera dua na tamata. Me kena ivakaraitaki, e uqeti o Tui Tevita me kaya me baleti Jiova: “Ko ni a ubi au e na kete i tinaqu. . . . Ni’u sa vaka na vulovulo wale sa kunei au na matamuni, ia sa volai kece sara na tikiqu e na nomuni vola, me caka tiko e na veisiga.”​—Same 139:​13-​16; Jope 31:​14, 15.

E raica tale ga o Jiova na nodra itovo na gone era se bera ni sucu, ni rawa nira caka vinaka ena veisiga se bera mai. Ni se buketetaki rau tiko na drua o Repeka na wati i Aisake, a cavuta e dua na parofisai o Jiova me baleti rau na drua rau veivala tiko ena katonigone. E kila vinaka tu na nodrau itovo kei na kena qai vakavotui ena nodra bula e levu na tamata ena veisiga mai muri.​—Vkte. 25:22, 23; Roma 9:10-13.

Dua tale na ivakaraitaki o Joni na Dauveipapitaisotaki. E kaya na Kosipeli: “Ni sa rogoca ko Ilisapeci na vosa ni veikidavaki nei Meri, sa rika e ketena na gone, a sa vakasinaiti ko Ilisapeci e na Yalo Tabu.” (Luke 1:41) Ni vakamacalataka na ka a yaco qo, e vakayagataka na vuniwai o Luke na vosa vaKirisi e rawa ni kena ibalebale na gone e se bera ni sucu, se na gone sa sucu oti. A cavuta tale ga na vosa qori me dusia na gonedramidrami o Jisu ni davo koto ena ikanakana ni manumanu.​—Luke 2:12, VV, 16; 18:15.

Ni laurai na iVolatabu, e dua beka na yavu e tiko me nanumi kina ni duidui vakalevu na gone ena katonigone kei na gone e sucu vou? Kena irairai ni sega. Qo e salavata tale ga kei na ka era dikeva na daunisaenisi. Me kena ivakaraitaki, era raica na dauvakadidike ni gone e tiko ena katonigone e rawa ni vakila na ka, okati kina na veika e yaco tiko e tautuba. O koya gona, e sega ni kurabuitaki ni rau na veivolekati sara na tina kei na luvena sa tubu tiko ena katonigone.

Ena gauna e sucu kina na gone, sa na oti toka e dua na gauna nona tubu tiko ena katonigone. Vakasamataka mada na ivakaraitaki qo: E dua na tina e vakasucu dole, qai mate na gone ni oti ga e vica na siga. E dua tale na tina e yacova sara na vula ciwa, ia a mate na luvena ni bera ni sucu. Vakacava, ena kalougata beka na imatai ni tina ni tiko na inuinui ni na vakaturi na luvena baleta ga ni a sucu dole, ia e sega ni tiko na inuinui qori vua na ikarua ni tina?

Meda taleva na ka eda veivosakitaka mai. E vakamatatataka na iVolatabu ni tekivu na bula ni dua na tamata ena gauna e kunekunetaki kina, qai raica o Jiova na gone e se bera ni sucu me dua na tamata lomani. Ena vuku ni ka dina qo vakaivolatabu, so era kaya ni na veisaqasaqa na kena tukuni ni sega na inuinui vua na gone e mate ni bera ni sucu. Io, era na rairai kaya ni na lomatarotarotaki kina na noda vakabauta vakaivolatabu nida sega ni tokona na vakalutu, ni yavutaki sara ga ena ka e tukuni qo ena iVolatabu.

Ena veigauna sa oti, e dau volai ena ivola qo eso na taro me baleta na sala era na vakaturi mai kina na gone era se bera ni sucu, qo e vakavuna kina na kena lomalomaruataki na nodra na vakaturi. Me kena ivakaraitaki, ena biuta beka na Kalou e dua na gone e se qai tekivu tubu tiko ina katonigone ni dua na marama ena Parataisi? Ia, ni vakekeli tale na iLawalawa Dauvakatulewa salavata kei na kena vakasamataki vinaka, kei na masu, e nanuma kina ni sega ni bibi na veika qo ena inuinui ni veivakaturi. E kaya o Jisu: “Sa rawarawa vua na Kalou na ka kecega.” (Mari. 10:27) E vakadinadinataki na dina ni ka e tukuna o Jisu ena ka a yaco vua; a tokitaki na nona bula mai lomalagi ina katonigone ni dua na goneyalewa—sa bau ka dredre dina mai na rai vakatamata.

Kena ibalebale beka qo, ni vakavulica na iVolatabu nira na vakaturi o ira kece na gone era mate ni bera nira sucu? Me nanumi tiko ni iVolatabu e sega ni sauma vakadodonu na taro qo, o koya gona e sega na yavu me tukuni kina nira na vakaturi. Na ulutaga qo ena vakavurea e levu sara na taro. Ena vinaka meda kua ni vakilakila na ka e rawa ni yaco. Na ka eda kila rawa qo: Ena lewa kina na Kalou o Jiova, e dauyalovinaka qai yalololoma. (Same 86:15) E nona inaki me kauta tani na ca e vakavuna o mate ena kena vakayacori na veivakaturi. (Jope 14:14, 15) Eda nuidei ni daucakadodonu o koya. Ena vakacegui keda mai na levu ni rarawa e tarai keda tu ena ituvaki ca qo, ena qai dusimaki Luvena me “vaqeavutaka na cakacaka ni tevoro.”​—1 Joni 3:8.

[iVakamacala e ra]

[iYaloyalo ena tabana e 13]

Ena vakacegui keda o Jiova ena nona vakaotia na noda rarawa kece