Taqomaki Iko Mai na Yalo Velavela

A SUSU o James ena dua na vanua yawa ena yanuyanu o Malaita, ena Yatu Solomoni. Ena gauna se gone kina a dau vakavulici me rokovi ira na yalo. E kaya, “Au sega ni via kerei ira na yalo mera sagai ira eso tale, ia au kila keu sega ni vakayagataka na rarafono, meu kerea nodra veitaqomaki na yalo, au na sega ni marau.”

Me vakataki ira e levu ena veivanua tale eso, era vakabauta na lewenivanua ena Yatu Solomoni ni o ira na yalo e rawa nira vukea e dua, e rawa tale ga nira vakaleqai koya. E levu ena vanua vakaMelanisia era sega ni rerevaka, ia era douvaka na yalo era kaya ni dauloloma.

Levu na sala e kilai kina na vakabauti ni nodra cakacaka na yalo velavela. Me kena ivakaraitaki, ena gauna se gone kina o James, ni rogoci na tagi ni manumanu vuka e vakatokai na korokoro, era dau totolo sara na marama ena nona koro mera kauti luvedra i lomanivale. Cava na vuna? Era vakabauta ni ya na ivakatakilakila ni dua na ka ca e vakarau yaco.

Ena so na koro e dau biu e dua na mataqali vatu vulavula ena nodra matanikatuba e cake. A cakava tale ga qo o James ena nona vakabauta ni na taqomaki koya mai na yalo velavela. E dau tawana ena taga na ivovo kece ni kena kakana mai na vanua ni cakacaka me qai biuta laivi vakamalua. E leqataka de na kunea na vovo ni kena kakana e dua na dau vakatevoro qai vakayagataka me vakatevorotaki koya me rawa ni tauvimate.

Ni kilai tale ga ena noda vanua na ivalavala ya, me vakataki James rairai eda via muria na itovo vakavanua e kerei kina nodra veitaqomaki na yalo velavela. O rairai vakabauta ni na yacovi iko na leqa ke o sega ni muria na ivalavala ya.

Ke o doka na iVolatabu, sa macala tu ga ni o na via kila na isaunitaro qo: (1) Ena vakaleqai iko vakacava na yalo velavela? (2) Ena rawa beka ni vakamuai iko na timoni ke o muria tiko eso na ivalavala vakavanua? (3) Ena rawa vakacava mo taqomaki mai na yalo velavela, qai marau?

Veivakaleqai na Yalo Velavela

E tukuna na iVolatabu ni yalo velavela e sega ni yalodra na sa mate. “[E]ra sa kila ko ira sa bula ni ra na mate,” e kaya na Vosa ni Kalou, “ia ko ira na mate era sa sega ni kila e dua na ka.” (Dauvunau 9:5) Koya gona o ira na agilosi talaidredre era tomani Setani ena nodra saga mera vakamua cala na kawatamata, era yalo velavela.​—Vakatakila 12:9.

E tukuna vakamatata na iVolatabu ni vinakati dina meda taqomaki mai na yalo velavela. E vola na yapositolo o Paula vei ira na lotu vaKarisito mai Efeso: “Ni da sa sega ni veivala walega kei ira na tamata, eda veivala talega . . . kei ira na veivavakoso yalo ca e na veiyasana vakalomalagi.” Na yapositolo o Pita e vakatauvatani Setani na Tevoro na nodra iliuliu na yalo velavela kece ina ‘laione e tagi, e vakasaqara eso me tiloma.’​—Efeso 6:12; 1 Pita 5:8.

E vakavu leqa o Setani ena nona vakamuai keda cala, dabui keda se temaki keda meda cakava na ka e vakacudruya na Kalou. Na iVolatabu e tukuna ni o Setani e “vukici koya me vaka e dua na agilosi ni rarama.” (2 Korinica 11:14, VV) E kaya o Setani ni o koya na yalo e dau veitaqomaki, ia e ca na nona inaki. E vakamatabokotaka na nodra vakasama eso tale mera kua ni kila na dina ni veika me baleti koya kei na ka dina me baleta na Kalou. (2 Korinica 4:4, VV) Na cava na inaki ni nona vakamuai keda cala?

E vinakata o Setani me sokaloutaki, e vinakati keda sara ga meda sokaloutaki koya, se da kila se sega. Ena gauna se bula kina e vuravura na Luve ni Kalou o Jisu, a vinakata o Setani me “cuva sobu ka vakarokoroko” vua. Ia e kaya o Jisu: ‘Lako tani, Setani, ni sa volai, mo qaravi Jiova duadua ga na nomu Kalou.’ (Maciu 4:9, 10) A sega ni via vakamalumalumu vei Setani o Jisu, e kila ke cakava qori, sa na sokalou tiko vua.

O Jiova na kabula vakayalo kaukaua duadua, ena sega tale ga ni laiva mera vakaleqai tawamudu o ira na talairawarawa vua. (Same 83:18; Roma 16:20) Meda vakamarautaka na Kalou o Jiova me vaka a cakava o Jisu, meda qarauna me kua nida cakava e dua na ka meda vakamalumalumu kina vei Setani se o ira nona timoni. Me kua nida cakava ya, e vinaka meda kila na itovo vakavanua ena rokovi kina na ivavakoso yalo velavela. Eda na kila vakacava?

Kilai na iTovo Vakavanua e Vakacudruya na Kalou

A vakaroti ira na nona tamata na Isireli na Kalou o Jiova, mera kua ni muria na nodra ivalavala na veimatanitu voleka. E kaya: “Me kakua ni kune vei kemuni e dua . . . na rairai, se dua sa daudigitaka na siga eso, se dua sa dauia na parofisai e na gata, se dua sa daucakai sausau.” O ira na muria na ivalavala ya, e kaya na iVolatabu: “[E]ra sa tamata vakasisila vei Jiova ko ira kecega era sa kitaka na veika oqo.”​—Vakarua 18:10-12.

Nida dikeva na itovo vakavanua kilai levu ena noda vanua, ena vinaka meda vakasamataka na taro qo: Na ivalavala vakavanua qo e uqeta beka mera vakabauti na daurairai? E nuitaki beka kina na veitaqomaki ni veika mate? E okati beka kina na vakadraunikau? Ena oka beka kina na vakamalumalumu ina dua tale na kabula vakayalo, sega ni o Jiova se na nona mata digitaki o Jisu?​—Roma 14:11; Filipai 2:9, 10.

E bibi mo cata na itovo vakavanua e uqeta na ivalavala era sa cavuti oti. Cava na vuna? A uqeti na yapositolo o Paula me vola: “Dou sa sega ni kana rawa ‘e na tepeli ni Turaga [Jiova],’ kei na nodra tepeli talega na tevoro.” E tukuna ke dua e via vakamarautaka na Kalou, e via vakamarautaki ira tale ga na timoni, sa “vakacudruya na Turaga [Jiova].” (1 Korinica 10:20-22) Na Kalou o Jiova e vakarota me vakayacori duadua ga vua na sokalou.​—Lako Yani 20:4, 5.

Vakasamataka tale ga na taro qo: E uqeta beka na itovo vakavanua qo na vakasama nida na sega ni saumitaro ena veika eda dui cakava? Kena ivakaraitaki, na veidauci kei na veiyacovi ni bera na vakamau e sega ni taleitaki ena levu na itikotiko qai vakacala tale ga na iVolatabu. (1 Korinica 6:9, 10) Ia ena so na itovo vakavanua ena Pasifika e dau ciqomi ke dua na goneyalewa e kaya ni ”vakadraunikautaki” me veiyacovi.a

Ia e kaya na iVolatabu ni o keda kece eda na dui vakatusai keda ena ka eda cakava. (Roma 14:12; Kalatia 6:7) Na kena ivakaraitaki na imatai ni yalewa o Ivi, e nanuma ni vecei koya o Setani me talaidredre vua na Kalou, e kaya: ‘A vosa vaqaseqase vei au na gata au qai kana.’ Na ka a cakava o Ivi e saumitaro ga kina vei Jiova. (Vakatekivu 3:13, 16, 19) O keda tale ga eda na vakatusa vua na noda ivalavala.​—Iperiu 4:13.

Na Cava mo Cakava?

Mo vakatulewa sara ga qo ke o via vakamarautaka na Kalou, qai muria na ivakavuvuli vakaivolatabu. Era ivakaraitaki vinaka ena tikina qo eso na yalomalumalumu era vakaitikotiko e Efeso ena imatai ni senitiuri. Mera galala mai na nodra veivakamuai na yalo velavela, era kumuna na nodra ivola kece me baleta na vakatevoro ra qai “vakama e na matadra kece ga.”​—Cakacaka 19:19, VV.

Ni bera nira vakama na ivola, era dau lako na tamata yalomalumalumu qo mera ‘vakatusa, ra vakaraitaka e matana levu na veika era dau cakava e liu.’ (Cakacaka 19:18) Na ka e vakavulica o Paula me baleti Karisito e tara sara ga na lomadra, e uqeti ira mera vakama na nodra ivola me baleta na vakatevoro, ra veisautaka tale ga nodra rai me baleta na nodra itovo vakavanua.

Ena rairai dredre meda biuta noda itovo vakavanua. A va tale ga qori o James a cavuti ena itekivu ni ulutaga. E marautaka na veika e vulica mai na iVolatabu kei ira na iVakadinadina i Jiova, ia e tomana tiko ga nona vakayagataka na rarafono. Nona vakasamataka na ivalavala qo, e vakabauta na yalayala i Jiova me baleta na gauna se bera mai, ia e kabita tiko ga na ivalavala vakavanua ya ni vinakata me taqomaki ena gauna qo mai na ka e veivakaleqai.

Na cava e veisau kina na rai i James? E kaya: “Au kerea na veitaqomaki i Jiova kei na nona veivuke meu dau nuitaki koya. Au biuta tale ga na noqu ivalavala vakavanua.” E yaco beka vua na leqa? “Sega,” e kaya o James. “Au vulica ga meu dau nuitaki Jiova. Au vakila ni o Jiova e vaka e dua na itokani niu toro voleka vua.” Sa oti qo e vitu na yabaki nona cakacaka vakaitalatala vakatabakidua o James ena nona vakavulica eso tale mera kila na ka e kaya na iVolatabu.

Vakacava mo muria na ivakaraitaki i James? Vakadikeva na ivakarau e muri vakalevu ena vanua o vakaitikotiko kina qai “yalomatua” ni vakalewa se salavata kei na “inaki ni Kalou.” (Roma 12:1, 2, NW) Mo yaloqaqa ni lako tani mai na vakatevoro. Ke o cakava qo, mo nuidei ni na ‘ciqomi iko’ qai taqomaki iko o Jiova. (2 Korinica 6:16-18, VV) Me vakataki James, o na vakila tale ga na dina ni yalayala ena iVolatabu: “Na yaca i Jiova sa vale-cecere kaukauwa: sa dro kina na yalododonu, ka sa bula.”​—Vosa Vakaibalebale 18:10.

[iVakamacala e ra]

[iYaloyalo ena tabana e 19]

“Korokoro”

[Credit Line]

Courtesy of Dr. Bakshi Jehangir

[iYaloyalo ena tabana e 19]

Kumuna tiko e dua na goneyalewa na ivovo ni kakana de na vakayagataki me vakatevorotaki kina