Kemuni na Tagane Vakawati, ni Vakatotomuria na Loloma i Karisito!

ENA iotioti ni nona bogi e vuravura o Jisu, a kaya vei ratou na nona yapositolo yalodina: “E dua na vunau vou ka’u sa solia vei kemudou, Mo dou veilomani; me vaka ka’u sa lomani kemudou, mo dou veilomani talega vakakina. A ka oqo era na kila kina na tamata kecega ni dou sa noqu tisaipeli, kevaka dou sa veilomani.” (Joni 13:34, 35) Io, mera dau veilomani na lotu vaKarisito dina.

A vosa sara tiko ga vei ira na tagane vakawati lotu vaKarisito na yapositolo o Paula ena nona vola: “Kemuni na tagane, ni lomani ira tiko ga na watimuni me vaka ga nona lomana na ivavakoso na Karisito qai solia kina nona bula.” (Efeso 5:25, NW) Ena muria vakacava na tagane vakawati lotu vaKarisito na veivakadreti qo mai na iVolatabu, vakauasivi ni dua na dauveiqaravi yalayala ni Kalou o watina?

Karona o Karisito na iVavakoso

“E kilikili kei ira na tagane me ra lomani ira vakakina na watidra, me vaka na yagodra dina,” e kaya na iVolatabu. “O koya sa lomana na watina sa lomani koya vakai koya. Ni sa sega e dua sa cata na yagona dina; ia sa vakania ka maroroya [“karona,” NW], me vaka sa ia talega ko Karisito ki nai soqosoqo lewe ni lotu.” (Efeso 5:28, 29) E vakamareqeti ira na nona tisaipeli o Jisu, e lomani ira qai karoni ira. Dina ni ratou tamata ivalavala ca, e yalovinaka ga vei ratou. Ena nona vinakata me ‘vakarairaitaka vei koya na isoqosoqo lewe ni lotu me serau sara,’ a kauaitaka kina na nodratou itovo vinaka na nona tisaipeli.​—Efeso 5:27.

Me vaka ga nona lomana na ivavakoso o Karisito, me lomani watina tale ga na tagane vakawati ena ka e tukuna kei na ka e cakava. Ni cakava qori o tagane ena vakila na yalewa vakawati ni lomani, ena marau tale ga. Ena yasana adua, na yalewa vakawati e tu kece ena nona vale na iyaya me bula vakacegu kina ena rarawa toka ke sega ni kauaitaki koya o watina.

Ena vakaraitaka vakacava na tagane vakawati nona karoni watina? Ni rau veimaliwai kei ira tale eso, ena veikilaitaki koya ena veidokai qai vakacaucautaka na nona veitokoni. Ena sega ni tu suka me tukuna ni a vukei koya vakalevu o watina ena nona rawaka. Ni rau tiko taurua, ena vakila o yalewa ni lomani koya o watina. Ena rairai ka lailai na nona tarai koya, matadredredre vua, mokoti koya kei na nona vakacaucautaki koya, ia ena guiguilecavi dredre qo vei yalewa.

‘E Sega ni Madua me Vakatokai Ira Mera Tacina’

A ‘sega ni madua’ o Jisu Karisito “me vakatokai ira [nona imuri lumuti] me ra tacina.” (Iper. 2:11, 12, 17) Ke o tagane vakawati lotu vaKarisito, nanuma tiko ni o watimu e tacimu vakayalo tale ga. Se a papitaiso ni bera ni drau vakamau se qai papitaiso ni drau sa vakamau oti, ena bibi cake na nona vosa ni yalayala vei Jiova mai na nona vosa ni yalayala vei iko. Ni digitaki o watimu me saumitaro ena ivavakoso, ena kaya o koya e vakaitavi tiko ena soqoni “Sister.” E tacimu vakayalo tale ga ena Kingdom Hall vaka kina e vale. E bibi mo dokai koya qai yalovinaka vua e vale, me vaka ga o dau cakava ena Kingdom Hall.

Ke tiko tale eso nomu itavi ena ivavakoso, ena rairai dredre ena so na gauna mo qarava ruarua na itavi ni ivavakoso kei na nomu itavi i vuvale. Na nodratou veitokonitaka na itavi na qase kei ira na dauveiqaravi vaka kina na kena wasewasei vinaka na itavi, ena rawa kina ni levu na gauna mo vakayagataka vua na tacimu vakayalo e bibi duadua vei iko—na watimu. Nanuma ni tiko tale eso na tagane e rawa nira qarava na itavi ni ivavakoso e lesi vei iko, ia o iko ga o duavata kei watimu ena ivau ni vakamau.

Kena ikuri, o na liutaki watimu. E kaya na iVolatabu: “Sa ulu ni tamata yadua na Karisito; ia na ulu ni yalewa na tagane.” (1 Kor. 11:3) O na qarava vakacava na itavi qo? Ena yalololoma, o na sega ni cavuta tiko ga na tikinivolatabu qo, mo vakarota mo dokai kina. O na qarava vinaka na itavi qo ena nomu vakatotomuri Karisito ena nomu veimaliwai kei watimu.​—1 Pita 2:21.

“Dou Noqu iTokani”

A vakatokai ratou nona tisaipeli o Jisu me nona itokani, e kaya: “Au sa sega ni qai okati kemudou mo dou bobula, baleta na bobula e sega ni kila na ka e cakava na nona turaga. Ia au sa okati kemudou mo dou noqu itokani, baleta na ka kece au rogoca vei Tamaqu au vakatakila vei kemudou.” (Joni 15:14, 15, NW) E ratou dau veimaliwai vinaka o Jisu kei na nona tisaipeli. Ratou dau cakava vata tale ga na ka. A sureti o “Jisu, kei iratou talega na nona tisaipeli” ena dua na soqo ni vakamau e Kalili. (Joni 2:2) A tiko na vanua ratou dau gade kina, me vaka na were o Kecisemani. E kaya na iVolatabu ni “sa lako wasoma kina ko Jisu kei ira na nona tisaipeli.”​—Joni 18:2.

Me kila o yalewa vakawati ni nona itokani voleka duadua o watina. E bibi gona vei kemuni na veiwatini moni marautaka vata na nomuni bula! Moni qarava vata na Kalou. Moni marautaka na vulica vata na iVolatabu. Me tiko na gauna mo drau taubale vata kina, drau veivosaki, drau kana vata tale ga. Mo kua ni dua na isa vinaka wale ga, mo itokani vinaka tale ga.

‘A Lomani Ira me Yacova na iOtioti’

‘A lomani ira na nona tisaipeli’ o Jisu ‘me yacova na iotioti.’ (Joni 13:1) Eso na tagane vakawati era sega ni vakatotomuri Jisu ena tikina qo. Era na rairai biuti ‘watidra ena gauna ni nodra cauravou,’ mera taura tale e dua e gone toka.​—Mala. 2:14, 15.

Ia eso me vakataki Willi, era vakatotomuri Karisito. E dau tautauvimate na wati Willi qai vinakati me qaravi vakatabakidua me vica vata na yabaki. E raica vaka cava qo o Willi? E kaya: “Au dau raici watiqu me isolisoli ni Kalou vei au, qori na vuna au dau vakamareqeti koya kina. Au a yalataka ena 60 na yabaki sa oti niu na karoni koya ena gauna vinaka kei na gauna ca. Au na sega vakadua ni guilecava noqu yalayala qori.”

Kemuni na tagane vakawati lotu vaKarisito, ni vakatotomuria na loloma i Karisito. Mo karona na watimu qaravi Kalou​—na tacimu vakayalo kei na nomu itokani.

[iYaloyalo ena tabana e 20]

E nomu itokani voleka duadua beka na watimu?

[iYaloyalo ena tabana e 20]

“Ni lomani ira tiko ga na watimuni”