Mo Kila na iVolatabu
1. Kerea na Veivuke ni Kalou
“Ena dua na gauna au dau wili iVolatabu ni bera niu moce,” e kaya o Ninfa, e tiko mai Itali. “Au cakava ga qori baleta niu kila ni Vosa ni Kalou, dina niu sega sara ni taleitaka na wilika, au a via kila ga se cava e tukuna tu na Kalou ena iVolatabu. A noqu inaki meu wilika tasevu. E rawarawa ni se qai tekivu, ia ni yaco e loma sa dredre, au mani muduka na noqu wiliwili.”
BAU yacovi iko na ka vata ga e manati Ninfa? Levu era vakila qori. Me vaka ga eda sa dikeva ena ulutaga sa oti, o Jiova na Kalou e vakavuna na iVolatabu, e vinakata mo kila na nona Vosa. O na rawata vakacava na kila ka qori? Na imatai sara ga ni ka, mo kerea nona veivuke o koya a vakavuna na kena volai.
Ni ratou sega ni vuli ena nodra koronivuli na rapai na yapositolo i Jisu mani tukuni kina ni ratou ‘sega ni vuli vinaka eratou tauvanua ga.’ (Cakacaka 4:13, NW) Ia e vakadeitaka vei ratou o Jisu ni rawa ni ratou kila na ibalebale ni Vosa ni Kalou. Ena rawa vakacava? E vakamacalataka o Jisu: “Na Dauveivakacegui, na Yalo Tabu, ko koya ena tala mai ko Tamaqu e na yacaqu, ena vakavulici kemudou e na ka kecega.” (Joni 14:26) Na Kalou e vakayagataka nona yalo tabu se igu tawarairai ena buli ni vuravura kei na veika kece ga e tu kina. (Vakatekivu 1:2) E vakayagataka tale ga qori me uqeti ira na le 40 na dauvolaivola mera vola nona vakasama ena iVolatabu. (2 Pita 1:20, 21) Na yalo tabu vata ga qori e vakarautaki vei ira na vakasaqaqara mera kila na iVolatabu.
O na rawata vakacava na yalo tabu ni Kalou? Mo kerea ena vakabauta kei na cikecike. E kaya o Jisu “Dou kerekere, ka na soli vei kemudou . . . kevaka dou kila, . . . mo dou solia na ka vinaka vei ira na luvemudou; sa qai dina vakalevu cake, ni na solia na Yalo Tabu ko koya na Tamamudou vakalomalagi vei ira sa kerekere vua.” (Luke 11:9, 13) E tu vakarau o Jiova me solia nona yalo tabu vei ira era kerea vua mai vu ni lomadra. Ena vukei iko na igu kaukaua qo mo kila na ibalebale ni vosa era volai ena iVolatabu ena udolu na yabaki sa oti. Ena vakavukui iko tale ga mo bulataka na kena itukutuku.—Iperiu 4:12; Jemesa 1:5, 6.
Ena gauna kece o wili iVolatabu kina, masu vua na Kalou, kerea na veivuke ni nona yalo tabu mo kila kina na ibalebale ni nona Vosa.