Na Vuvale Lotu Vakarisito—ni Muria na iVakaraitaki I Jisu!
“Na Karisito . . . sa laiva vei kemudou nai vakarau, mo dou muria na we ni yavana.”—1 PITA 2:21.
1. (a) A vakaitavi vakacava na Luve ni Kalou ena veibuli? (b) E raici ira vakacava na kawatamata o Jisu?
NA GAUNA a bulia kina na Kalou na lomalagi kei na vuravura, a vukei koya na Luvena ulumatua “me matai daucakacaka.” A tokoni Tamana tale ga na Luve ni Kalou ena gauna a buli kina na veimataqali manumanu kei na kau e vuravura, qai vakarautaka na Parataisi me nodra itikotiko na kawatamata. A vakatokai na Luve ni Kalou me o Jisu, qai lomani ira vakalevu na kawatamata. E “daumarautaki ira na luve ni tamata.”—Vkai. 8:27-31; Vkte. 1:26, 27.
2. (a) Na cava e vakarautaka o Jiova vei keda na tamata ivalavala ca? (b) Na tiki ni noda bula cava e idusidusi vinaka kina na iVolatabu?
2 Ni rau valavala ca oti na imatai ni veiwatini, a nona inaki bibi o Jiova na nodra vakabulai na tamata ivalavala ca. E vakarautaka gona na isoro ni veivoli i Karisito mera vakabulai kina. (Roma 5:8) Kuria qori, e vakarautaka nona vosa na iVolatabu, me dusimaki keda me vakainaki kina noda bula dina nida kawa ivalavala ca. (Same 119:105) E vakarautaka nona Vosa na idusidusi me qaqaco qai marau kina na vuvale. E kaya na Vakatekivu me baleti ira na vakawati, ni tagane ena “kabita na watina: a rau na lewe dua ga.”—Vkte. 2:24.
3. (a) Na cava a vakavulica o Jisu me baleta na vakawati? (b) Na cava eda na dikeva ena ulutaga qo?
3 Ena gauna a cakacaka vakaitalatala voli kina e vuravura o Jisu, a vakabibitaka ni vakawati e dodonu me tudei. E vakatavulica na ivakavuvuli e yaga vei ira na lewenivuvale, ke ra bulataka era na levea na ivakarau kei na itovo ena vakaleqa na bula vakawati se na bula marau ni vuvale. (Maciu 5:27-37; 7:12) Ena veivosakitaki ena ulutaga qo eso na ivakavuvuli i Jisu kei na nona ivakaraitaki ni se tiko e vuravura, ena yaga vei ira na tagane vakawati, yalewa vakawati, itubutubu kei ira na gone.
Ena Dokai Watina Vakacava na Tagane Vakawati Lotu vaKarisito?
4. E tautauvata vakacava na itavi i Jisu kei na nodra itavi na tagane vakawati lotu vaKarisito?
4 E lesi vakalou na tagane vakawati me ulu ni vuvale, me vaka ga ni Ulu ni ivavakoso na Karisito. E kaya na yapositolo o Paula: “Ni sa ulu ni watina na tagane, me vaka sa ulu ni soqosoqo lewe ni lotu na Karisito, ia nai Vakabula talega ni yago ko koya. Oi kemudou na tagane vakawati, lomani ira na watimudou, me vaka sa lomana nai soqosoqo lewe ni lotu na Karisito, a sa soli koya e na vukuna.” (Efeso 5:23, 25) Na nona ivalavala o Jisu vei ira na nona imuri e ivakaraitaki vinaka vei ira na lotu vaKarisito tagane mera cakava vei watidra. Meda veivosakitaka mada e vica na sala e vakayagataka kina o Jisu na lewa e solia vua na Kalou.
5. E vakayagataka vakacava o Jisu nona lewa ni tiko kei ratou nona tisaipeli?
5 E dau “yalomalua ka yalomalumalumu” o Jisu. (Maciu 11:29) E turaga dau yavala. A sega vakadua ni dau vakawaletaka nona itavi. (Mari. 6:34; Joni 2:14-17) E dau vakasalataki ratou vakayalololoma nona tisaipeli, ena cakava vakavica ke gadrevi. (Maciu 20:21-28; Mari. 9:33-37; Luke 22:24-27) Ia, a sega ni cudruvi ratou se vakamadualaki ratou o Jisu, e dau lomani ratou ga qai raica me ratou cakava vinaka na veika e vakavulica. E dau vakacaucautaki ratou nona tisaipeli qai uqeti ratou tale ga. (Luke 10:17-21) Qori na vuna ratou dokai Jisu kina na nona tisaipeli!
6. (a) Na cava e vulica na tagane vakawati ena nona ivalavala o Jisu vei ratou nona tisaipeli? (b) E uqeti ira vakacava na tagane vakawati o Pita?
6 E vakavulici ira na tagane vakawati lotu vaKarisito na ivakaraitaki i Jisu mera kua ni vakasaurarataki watidra, ia mera veiliutaki ga ena yalololoma kei na veidokai. E uqeti ira na yapositolo o Pita mera muria na ivakaraitaki yalololoma i Jisu ena nodra ‘bula vata’ kei watidra, mera “doka na yalewa.” (Wilika 1 Pita 3:7.) Ena vakaraitaka vakacava na tagane vakawati na nona lewa lesi vakalou, ena gauna vata qori me dokai watina tale ga?
7. Na sala cava ena dokai watina kina na tagane vakawati? Vakamacalataka.
7 Dua na sala ena dokai watina kina o tagane oya na nona kauaitaka nona rai kei na lomana ni bera ni vakatulewataka na veika e vauca na vuvale. De dua ena vinakati me vakatulewataki me ratou toki, se veisau nona cakacaka, se na veika e baleta na nodratou bula ni veisiga me vaka na vanua me ratou gade kina, se na veisautaki ni wasewasei ni ilavo donuya na leqa vakailavo. Ni ratou vauci kece kina na lewenivale, ena yaga qai veinanumi gona vei tagane vakawati me kauaitaka na rai i watina, me veiraurau qai vinaka kina nona vakatulewa, ena vakarawarawataka tale ga vei watina me tokoni koya. (Vkai. 15:22) Nira dokai watidra na tagane, ena dokai ira tale ga qai lomani ira na watidra, ia o koya e bibi sara ni na vakadonui ira o Jiova.—Efeso 5:28, 29.
Ena Vakaraitaka Vakacava o Yalewa ni Dokai Watina
8. Na cava meda kua kina ni muria na ivakaraitaki i Ivi?
8 E ivakaraitaki uasivi o Jisu vei ira na yalewa vakawati ena nona yalomalumalumu ina lewa. Sa bau duidui dina na nona rai me baleta na veiliutaki kei na itovo a vakaraitaka na imatai ni yalewa vakawati! A sega ni ivakaraitaki vinaka o Ivi vei ira na yalewa vakawati. A tiko e dua e lesi vakalou me liutaki koya, ena tukuna vua na veidusimaki i Jiova. Ia, a sega ni doka o Ivi na ituvatuva qo. A sega ni muria na ivakaro a tukuna vua o Atama. (Vkte. 2:16, 17; 3:3; 1 Kor. 11:3) Dina ni a lawakitaki o Ivi, ia a dodonu ga me kerea na ivakasala i watina, oya me vakabauta se sega na domo a tukuna vua ni “kila na Kalou.” Ia, a sega ni vakarorogo vei watina, e siova na itutu ni veiliutaki ena nona lewai watina ena ka me cakava.—Vkte. 3:5, 6; 1 Tim. 2:14.
9. Na ivakaraitaki ni talairawarawa cava e laurai vei Jisu?
9 E duidui sara o Jisu, e ivakaraitaki uasivi ena nona talairawarawa vei koya e Uluna. E vakaraitaka na nona itovo kei na ivakarau ni nona bula ni sega “ni via koco itutu, ya me tautauvata kei na Kalou.” Ena yasana adua, “e vakadravudravuataki koya qai okati koya me vaka na bobula.” (Fpai. 2:5-7, NW) Nikua ni sa veiliutaki tiko vakatui o Jisu Karisito, e se dei toka ga vua na itovo qori. E dau talairawarawa vua na Tamana ena veika kece qai tokona nona veiliutaki.—Maciu 20:23; Joni 5:30; 1 Kor. 15:28.
10. Ena tokona vakacava na veiliutaki watina na yalewa vakawati?
10 Na yalewa vakawati lotu vaKarisito ena vakatotomuria na ivakaraitaki i Jisu ena nona tokona na veiliutaki i watina. (Wilika 1 Pita 2:21; 3:1, 2.) Vakasamataka mada na ituvaki ena vakaraitaka kina qo. E kerei koya o luvena tagane me vakaitavi ena dua na ka ena vinakati kina nodrau veivakadonui na itubutubu. Ni rau se bera ni veivosakitaka na itubutubu na ituvaki ya, ena rairai veiganiti me taroga o Tinana, “O sa bau tarogi Ta?” Ke kaya o luvena ni sega, me rau na veivosakitaka vata vakaveiwatini ni bera ni rau vakatulewa. Koya gona, na yalewa vakawati lotu vaKarisito ena sega ni saqati watina se me vakalewai koya nira tu na gone. Ke sega ni duavata kei watina ena dua na ka, erau na veivosakitaka taurua ga.—Efeso 6:4.
iVakaraitaki Vei Ira na iTubutubu o Jisu
11. Na ivakaraitaki cava i Jisu e rawa nira vuli kina na itubutubu?
11 Dina ni a sega ni vakawati se vakaluveni o Jisu, ia e ivakaraitaki vinaka vei ira na itubutubu lotu vaKarisito. Ena vuku ni cava? E vakavulici ira nona tisaipeli ena yalololoma kei na vosota, e laurai qo ena veika e tukuna kei na nona ivakaraitaki. E vakaraitaka vei ira na sala mera cakava kina na ilesilesi a vakaroti vei ira. (Luke 8:1) Na nona ivakaraitaki o Jisu kei na nona itovo e vakaraitaka na sala mera veilomani kina na nona tisaipeli.—Wilika Joni 13:14-17.
12, 13. Na cava ena vinakati ke ra vinakata na itubutubu mera tubera na luvedra mera rerevaka na Kalou?
12 Era dau vakatotomuri ira na itubutubu na gone, ena veika vinaka se ca. Koya gona, kemuni na itubutubu ni taroga mada: ‘Na cava era vulica na gone nira raica na levu ni gauna keirau vakayagataka ena sara tivi kei na ka ni veivakamarautaki, kei na gauna keirau vakayagataka ena vuli iVolatabu kei na cakacaka vakavunau? Na cava mada keitou vakaliuca tiko vakavuvale? Keirau ivakaraitaki vinaka beka ena kena vakaliuci na sokalou dina?’ Me tiko taumada ena loma itubutubu na lawa ni Kalou ni bera nira vakavulici luvedra mera rerevaka na Kalou.—Vkru. 6:6.
13 Ke ra saga na itubutubu mera bulataka ena veisiga na ivakavuvuli ena iVolatabu, era na sega ni guilecava rawa qori na luvedra. Ena uqeti ira na gone na veika ra tukuna nodra itubutubu kei na veika era vakavulica. Ia, ke ra raica na gone ni rua tu na ivakarau ni nodra bula na itubutubu, era na rairai nanuma ni ivakavuvuli ena iVolatabu e sega soti ni bibi se me bulataki. Kena itinitini, ena rairai temaki totolo na gone ena veika e dulaka tu mai o vuravura.
14, 15. Na itovo ni rai cava mera uqeta na itubutubu vei luvedra? Na sala cava e rawa nira cakava kina qo?
14 Era kila na itubutubu lotu vaKarisito ni nodra tuberi na gone e sega ni okati ga kina nodra qaravi vakayago. E sega gona ni ka vakayalomatua mera vakavulici na gone mera sauva na isausau ena yaga vakalevu ena nodra bula vakayago. (Dauv. 7:12) E vakavulici ira nona tisaipeli o Jisu mera vakaliuca na Matanitu ni Kalou kei na nona yalododonu. (Maciu 6:33) Koya gona nira vakatotomuri Jisu, mera saga sara na itubutubu lotu vaKarisito mera uqeti luvedra mera sauva na isausau vakayalo.
15 Dua na sala e rawa nira cakava kina qori na itubutubu, oya mera saga me dau veimaliwai vakalevu na luvedra kei ira na cakacaka vakatabakidua. Vakasamataka mada na nodra rawa ni uqeti na itabagone nira veivosaki kei ira na painia se na ivakatawa ni tabacakacaka kei na watina. Era dau marautaka na daukaulotu, lewe ni vuvale e Peceli, kei ira na tara Kingdom Hall e vanuatani mera tukuna nodra marautaka nodra qaravi Jiova. O ira na vulagi va qo ena levu sara na italanoa mera talanoataka. Na nodra ivakaraitaki ni soli ira ena veiqaravi vakatabakidua ena rairai uqeti ira na gone mera vakatulewa vakayalomatua, tekia na isausau e yaga, ra qai saga na vuli veiganiti me tokona nodra cakacaka vakatabakidua.
Ra iTabagone—Na Cava ena Uqeti Kemuni Moni Muria na iVakaraitaki i Jisu?
16. E dokai rau vakacava nona itubutubu e vuravura o Jisu kei na Tamana vakalomalagi?
16 Ra itabagone, e vakarautaka o Jisu e dua na ivakaraitaki uasivi vei kemuni. Erau a tuberi Jisu o Josefa kei Meri, qai dau talairawarawa o koya vei rau. (Wilika Luke 2:51.) E kila vinaka ni rau sega ni uasivi na nona itubutubu, ia e nuitaki rau na Kalou qai lesi rau me rau karoni koya. E dodonu kina me dokai rau o Jisu. (Vkru. 5:16; Maciu 15:4) E dau cakava o Jisu na ka e vakamarautaki Tamana ena gauna se cauravou kina. Oya nona dau vorata na veivakatovolei. (Maciu 4:1-10) Rairai oni na vakatovolei ena so na gauna moni talaidredre vei rau nomu itubutubu. Na cava gona ena uqeti kemuni moni muria na ivakaraitaki i Jisu?
17, 18. (a) Na ka ni veivakatovolei cava era sotava na itabagone e koronivuli? (b) Na cava mera nanuma na itabagone mera vorata kina na veivakatovolei?
17 Rairai, era sega ni kauaitaka na ivakatagedegede ni iVolatabu e levu oni vuli vata. Era na rairai uqeti kemuni moni vakaitavi ena so na ka e sega ni dodonu, ra qai vakalialiai kemuni ena gauna oni bese kina. Era dau kacivi kemuni beka ena yaca veibeci baleta ni oni bese ni vakaitavi kei ira ena so na ka e sega ni dodonu? Ke va qori, na cava oni na cakava? Oni kila vinaka ke oni vakamalumalumu moni rawai qai tokoni ira, oni na sega ni vakamarautaka na nomuni itubutubu vaka kina o Jiova. Na cava ena yacovi kemuni ke oni dau muri ira nomu itokani e koronivuli? De dua oni sa vakasamataka tiko eso na isausau vakayalo, me vaka na painia se dauveiqaravi ni ivavakoso, veiqaravi ena vanua e vinakati kina vakalevu na dautukutuku ni Matanitu ni Kalou, se lewe ni vuvale e Peceli. Oni na rawata beka nomuni isausau ke oni dau veimaliwai kei ira nomuni itokani e koronivuli?
18 Kemuni na itabagone ena ivavakoso lotu vaKarisito, e dau vakatovolei beka nomuni vakabauta ena so na gauna? Na cava oni dau cakava? Nanuma na ivakaraitaki uasivi i Jisu. A sega ni vakamalumalumu ina veitemaki qai dei tiko ga ena ka e kila ni dodonu. Na noda nanuma na veika qori ena uqeti keda meda tukuna vakamatata vei ira na noda itokani na vuna eda sega ni duavata kina kei ira ena noda cakava na ka e sega ni dodonu. Me vakataki Jisu, meda raica dei tiko mada ga na inuinui ni marau tawamudu eda na vakila ena noda veiqaravi kei na noda talairawarawa vei Jiova.—Iper. 12:2.
Na Yavu ni Vuvale Mamarau
19. Na cava e vu ni bula marau?
19 E vinakata o Jiova kei Jisu na ka vinaka duadua vei keda na kawatamata. Nida tamata ivalavala ca, se rawa tiko ga nida vakila na marau dina. (Aisea 48:17, 18; Maciu 5:3) E vakatavulica o Jisu na ka dina e yavu ni marau vua na kawatamata, ia e sega ni yala ga e kea nona vakavulici ira nona tisaipeli. A vakavulica tale ga na sala vinaka duadua meda bula kina. Kuria qori, e ivakaraitaki vinaka ni veiraurau na nona bula kei na nona itovo. O keda kece, se mani cava noda itavi ena vuvale, ena yaga vei keda na nona ivakaraitaki. Koya gona, kemuni na tagane vakawati, yalewa vakawati, itubutubu, kei na gone, ni muria na ivakaraitaki i Jisu! Ena vakilai na vakacegu dina kei na marau ena vuvale nida muria na ivakavuvuli i Jisu kei na nona ivakaraitaki.
O na Sauma Vakacava?
• Era na vakaraitaka vakacava na tagane vakawati na lewa vakalou e soli vei ira?
• Ena muria vakacava na yalewa vakawati na ivakaraitaki i Jisu?
• Na cava era vulica na itubutubu vei Jisu ena nona ivalavala vei ratou nona tisaipeli?
• Na cava era vulica na itabagone ena ivakaraitaki i Jisu?
[iYaloyalo ena tabana e 8]
Na cava ena cakava na tagane vakawati dauloloma ni bera ni vakatulewataka e dua na ka ena matavuvale?
[iYaloyalo ena tabana e 9]
Na ituvaki cava e rawa ni tokoni watina kina na yalewa vakawati ena nona veiliutaki?
[iYaloyalo ena tabana e 10]
Era muria na gone na nodra ivakaraitaki vinaka na nodra itubutubu