Na iVola Mai Bolivia

Au Marau Qai Nuidei, Dina Niu Dravudravua

AU VEIQARAVI tiko vakaulotu ena dua na matanitu se qai vakatorocaketaki tiko. E sega ni matau vei au na raici ira na sotava tiko na bula dredre kei na dravudravua. Au vinakata me yaco totolo mai na bula vakacegu. Ia au kila ni Matanitu duadua ga ni Kalou ena walia noda leqa. Au dau raica vakalevu ni o ira ga na muria tiko na Vosa ni Kalou era kunea na vakacegu, dina nira sotava e levu na ituvaki dredre. Dua vei ira o Sabina.

Ena vica na yabaki sa oti, a roqoti rau tiko na luvena ni ratou talaci tamadratou ni lai vaqara cakacaka saumi ena dua tale na vanua. Ratou waraki koya toka ni oti e vica vata na vula, lai vakayabaki sara. A sega ni lesu tale mai. Mai na gauna a biubiu kina o watina a sasaga o Sabina me vakarautaka na ka me bula kina kei rau na luvena yalewa, o Milena kei Ghelian.

Au a sotavi Sabina ena dua na yakavi ni qaravi ira na lai volivoli yani ena sitoa nei tacina. E rairai oca dina ni cakacaka tu ena dua na siga taucoko. Au mani sureti koya me ratou vuli iVolatabu vakaveitinani. E kaya, “au taleitaka qori, ia au sa rui osooso. E rawa ga ni rau vuli kei iko na luvequ yalewa.” Au mani vakadonuya. Niu vuli tiko kei rau na luvena, tekivu tale ga meu kilai Sabina vinaka kei na ituvaki dredre e sotava.

E dau tekivu cakacaka ena va na kaloko ena mataka. Ni rau se moce na luvena yalewa ena rumu ratou tiko kina, sa tekivu vakasaqa o Sabina. E vakasaqara na vakasoso ni mitpai (meat pie), e dau lai volitaka me rawata eso na ilavo me ratou bula kina. Ia na falawa ni mitpai sa dau vakarautaki rawa tu ena bogi.

A kerea o Sabina e dua na qiqi ni volivolitaki me vakavodoka kina na iyaya eratou na vakayagataka me vaka—⁠na ivakaruru, na sitovu, na taqe kasi, teveli, idabedabe, kuro, waiwai, na mateni, na falawa, kei na vica na qaloni wainimoli.

Ena ono ena mataka eratou vakavakarau vinaka me ratou lako. Ratou lokataka na katuba ni vale. Sega ni dua e vosa se dredre. Eratou vakanamata kece ena cakacaka me caka. Ena veimataka, niu rai mai ena katubaleka ni vale ni painia, au raica e levu era biubiu ra lai cakava tale ga na cakacaka vata ga oya. Io, o Sabina e dua ga vei ira na binibini marama e Bolivia era dau volitaki kakana se wainimoli ena salatu.

Ni se qai cadra na matanisiga ena veimama na ono, ratou sa tu ena nodratou kona ni volivolitaki o Sabina kei rau na luvena. Sega na veivosaki, ratou talaca nodratou iyaya mai na qiqi, ratou vakarautaka sara nodratou vale ni volivolitaki. E cacalidilidi na waiwai e loma ni tavuteke ni biu yani na mitpai, qai boi vinaka. Sega ni bera nodra tabili yani na lai volivoli.

“E vica oni vinakata?” e taroga o Sabina vua na imatai ni turaga e volivoli. Ni vucesa na vosa a mani dulaka ga e rua na qaqalo ni ligana, mani vakarautaka sara o Sabina e rua na mitpai katakata qai buta vinaka. Mani taura na kena isau e lailai sara. Ena caka tiko qori ena loma ni siga taucoko. Ni sa volitaki na iotioti ni mitpai, ratou soqona vinaka tale nodratou iyaya me ratou lesu i vale. E dina ni dadaga, ia e lai cakacaka tale ena sitoa nei tacina.

Na gauna au yaco yani kina ena sitoa me rau vuli na luvena yalewa, sa vakarautaki tu e rua na idabedabe lalai ena dua na kona. Ena gauna kece me rau vuli kina rau dau vakanamata qai vakavakarau vinaka o Milena e yabaki 9 kei Ghelian e yabaki 7. Toso na gauna keitou veitalanoa vinaka sara qai veivolekati kei rau na yalewa mamadua qo. Na ituvaki qo e tara sara ga na lomai Sabina. A mani vakatulewataka kina me keirau vuli, dina ni tu nona ituvatuva dau veivakaocataki oya.

Na levu ni ka e kila e vakatitobutaka tale ga nona lomana na Kalou o Jiova. Dua na mataqali marau vou e curumi koya! Sa seavu na rairai ni oca kei na mata rarawa vua na marama dau volivolitaki qo. Sa veisau na kena irairai, sega ni lako cuvacuva, e bulabula tale ga. “Dau matadredredre tu ga o Sabina,” a tukuna o tacina. “E liu e sega ni dau va ya.” Levu era raica tale ga na veisau levu e cakava o Sabina kei rau na luvena. Sa qai lomavakacegu ni mai kila na ka a vaqaqa voli tu mai ena dua na gauna balavu, ya na ka dina me baleta na Kalou.

A marautaka o Sabina na nona vuli, ia na nona ituvatuva ni cakacaka e vakadredretaka nona tiko ena soqoni vaKarisito. Mani vakadonuya noqu veisureti me tikova na soqoni ena Kingdom Hall. Ni oti oya sa sega ni dau calata na soqoni. E levu sara nona itokani vinaka ena ivavakoso. E vakila talega ni dau vakarautaka o Jiova na ka era gadreva na lomani koya kei ira na solia nodra gauna mera qaravi koya.​—Luke 12:22-24; 1 Timoci 6:8.

Na ka dina e vulica e uqeti koya me wasea vei ira tale eso. E tukuna, “sa dua na ka noqu rere niu vakasamataka meu lai vunau e matanalevu.” ‘Niu sega ni vuli vinaka, au mamadua, e rawa vakacava meu lai vakavulica e dua tale.’ Dina ni va ya nona rai, ia na yalololoma a vakaraitaki vua kei na veisau levu a vakila, e uqeti koya me lai vunau. Eratou gugumatua vakaveitinani.

Nikua sa sega ni qai ogaoga tale tiko ena cakacaka e sega kina na vakacegu. Nona rawaka se sega ni veisau, ia e veisau ga na ivakarau ni nona raica na bula. Ia qo ni dua na marama lotu vaKarisito papitaiso, e dau wasea vei ira na so na itukutuku vinaka ni Matanitu ni Kalou, na iwali tudei ga ni dravudravua kei na rarawa.​—Maciu 6:10.

Sa lima na kaloko, vakarau biubiu mai vale o Sabina. E sega ni lai volitaki mitpai, ia me sota kei ira na tacina lotu vaKarisito mera lai vunau e salatu. Ni solia nona gauna me cakacaka vata kei ira na mataveitacini e vakavu marau vakalevu vua. E lokataka na nona katuba, qai matadredredre ni taubale sobu yani e gaunisala. E sega ni biliga na qiqi, ia e taura ga e dua na beki, e tawa tu e loma na iVolatabu kei na ivola vakaivolatabu ena vakayagataka me wasei kina na itukutuku e veivakacegui vei ira na lewenivanua. Ena matadredredre kei na yalodei, e kaya o Sabina, “Au sega ni tadra niu na rawa ni tukuna vei ira tale eso na veika e tu ena iVolatabu.” E kuria, “Au marautaka dina!”