E Yaga ena Nomu Bula na Yalo Tabu

“NI KAKUA ni vakasevi au mai na matamuni; ka mo ni kakua ni kauta tani vei au na nomuni Yalo Tabu.” (Same 51:11) Qori na vakamamasu i Tui Tevita ena gauna a cala kina.

A dau vakila o Tevita na yaga ni yalo tabu ena nona bula. Ni se cauravou a rawa kina ni vakadrukai Koliaci na sotia rerevaki. (1 Samuela 17:45-50) A uqeti koya tale ga me bulia qai vola eso na same totoka. E kaya o Tevita, “Sa vosa e na gusuqu na Yalo i Jiova, Sa tiko e na yamequ talega na nona vosa.”​—2 Samuela 23:2.

A vakadeitaka o Jisu Karisito na veiuqeti ni yalo tabu ena bula i Tevita. Ena dua na gauna, a tukuna o Jisu vei ira na vakarorogo, ni ‘o Tevita mada ga a kaya ena kaukaua ni yalo tabu, sa kaya na Turaga [o Jiova] vua na noqu Turaga, mai dabe ena yasaqu imatau, me yacova niu sa vakatikori ira na nomu meca mera itutu ni yavamu.’ (Marika 12:36, VV; Same 110:1) A kila o Jisu ni a uqeti ena yalo tabu o Tevita me vola na same. Ena vukei keda tale ga na yalo tabu qori nikua?

“Dou Kerekere, Ka na Soli Vei Kemudou”

O na rairai sega ni vola e dua na same. Ia o na rairai sotava eso na dredre e veivakayalolailaitaki, e vaka na tuwawa o Koliaci. Kena ivakaraitaki, a biuti Ilisapeci o watina ni domona e dua na yalewa gone.a E binia tu mai e dua na uma dinau levu, qai sega ni solia e dua na ilavo me rau qaravi kina na luvena yalewa. E kaya o Ilisapeci: “Au beci, au dabuitaki ena nona ivakarau. Ia mai na gauna a biuti au kina, au vakila na veivuke ni yalo tabu ni Kalou.”

A namaka beka o Ilisapeci na veivuke ni yalo tabu, ke sega mada ga ni sasagataka? Sega, e dau masuta e veisiga na yalo tabu ni Kalou. E kila ni na gadreva qori me vakayaloqaqataki koya e veisiga, me qaravi rau vinaka kina na luvena, qai nuidei tale ga ena ka e cakava. E muria na ka e tukuna o Jisu: “Dou kerekere, ka na soli vei kemudou: dou vakasaqara, ka dou na kunea; dou tukituki, ka na dolavi vei kemudou.”​—Maciu 7:7.

A gadreva tale ga o Ropate na veidusimaki ni yalo tabu ni Kalou, ia ena dua tale na inaki. E sega ni cegu nona dau vakatavako kei na kana mariwana. Rua na yabaki nona saga toka me valuta qori, ia ena levu na gauna e sikalutu tale. E kaya o Ropate: “O na veilecayaki ni o biuta na wainimate gaga ni sa matau e yagomu.”

E tomana: “Au vakatulewataka meu veisautaka na ivakarau ni noqu bula me rawa niu qarava vinaka kina na Kalou. Au saga meu vakasamataka tale ga na ka vinaka mai na iVolatabu. Au masuta na Kalou e veisiga meu vakaukauataki meu veisautaka noqu bula. Au kila niu na sega ni rawa ni cakava duadua. E sauma votu o Jiova noqu masu, vakauasivi ena gauna au yalolailai kina niu a sikalutu tale. Au vakabauta ni yalo tabu ga ni Kalou e vakaukauataki au meu valuta rawa noqu leqa.”​—Filipai 4:6-8.

Cabe ‘Me Vaka na iKeli’

Me vakataki rau ga o Ilisapeci kei Ropate, era sa vakila tale tiko ga e vica vata na milioni na iVakadinadina i Jiova na yaga ni yalo tabu ena nodra bula. Na kaukaua i Jiova a vakayagataki ena buli ni lomalagi kei na vuravura, ena rawa tale ga ni vukei iko ke o vinakata. Ke o gumatua ni kerea, e vinakata na Kalou qai tu vakarau me solia. Ia meda vulica na ka dina baleti koya da qai saga vagumatua meda cakava na lomana.​—Aisea 55:6; Iperiu 11:6.

Ena vakayaloqaqataki iko na yalo tabu mo qarava vinaka na Kalou, mo vosota tale ga na ituvaki dredre o na rairai sotava. E vakadeitaka na iVolatabu: “Sa dausolia na kaukauwa [o Jiova] vei ira era sa malumalumu: ia ena vakalevutaka na kaukauwa vei ira era sa sega ni gumatua rawa. . . . ko ira era sa waraki Jiova era na vakaukauwataki tale; era na cabe cake me vaka era vakatabana vakaikeli; era na cici, ka sega ni oca, era na lako tu, ka sega ni malumalumu.”​—Aisea 40:28-31.

[iVakamcala e ra]

[Tikina bibi ena tabana e 9]

‘Au masuta na Kalou meu vakaukauataki me rawa niu veisautaka noqu bula. Au kila niu na sega ni rawa ni cakava duadua. E sauma votu o Jiova noqu masu’

[Kato/​iYaloyalo ena tabana e 7]

NA CAKACAKA NI YALO TABU

Na Kalou a vakayagataka na yalo tabu ena buli ni vuravura kei na lomalagi. “I Jiova, sa ka levu vakaidina na nomuni cakacaka! Ka sa caka vakavuku kecega: Sa roboti vuravura na nomuni yau,” e kaya na daunisame. “O ni sa tala yani na Yalomuni, era sa buli.”​—Same 104:24, 30; Vakatekivu 1:2; Jope 33:4.

Na yalo tabu e uqeti ira eso na tagane mera vola na iVolatabu. E vola na yapositolo o Paula: “Sa ceguva na i vola Tabu kece ga na Kalou ka sa yaga.” (2 Timoci 3:16, VV) Na icegu se yalo tabu i Jiova e dusimaki ira na vola na ‘Vosa ni Kalou.’​—1 Cesalonaika 2:13.

E vakaukauataki ira na dauveiqaravi ni Kalou mera tukuna vakadodonu na veika se bera ni yaco. E vakamacalataka na yapositolo o Pita: “Ni sa sega na parofisai e nai Vola Tabu, sa vu ena kena kilai eliu na kenai balebale; ni sa sega ni vu na parofisai e na gauna eliu . . . [e]na lewa ni tamata: sa vosa ga na tamata yalosavasava ni Kalou me vaka sa vakauti ira na Yalo Tabu.”​—2 Pita 1:20, 21; Joeli 2:28.

A vukei Jisu kei na so tale na tagane vakabauta mera vunautaka na itukutuku vinaka ni Matanitu ni Kalou ra qai cakamana tale ga. E kaya o Jisu: “Sa tu vei au na Yalo i Jiova, Ni sa lumuti au ko koya me’u vunautaka nai tukutuku-vinaka vei ira era sa dravudravua; Me’u vunautaka na sereki vei ira na bobula, Kei na rai tale vei ira era sa mataboko.”​—Luke 4:18; Maciu 12:28.

[Kato/​iYaloyalo ena tabana e 9]

SALA ENA VEIVUKE KINA NA YALO TABU

Ena vakaukauataki iko mo valuta na veitemaki kei na ivakarau ca. E kaya na yapositolo o Paula: “Sa yalo dina na Kalou, ka na sega ni laiva me sivia na nomuni kaukauwa na ka ko ni vakatovolei kina; e na solia ko koya e na gauna ni veivakatovolei na sala mo ni dro bula rawa kina kei na kaukauwa mo ni vosota kina.”​—1 Korinica 10:13, VV.

Ena uqeti iko mo bulataka na itovo vakalou. “Na vua ni Yalo Tabu na loloma, na reki, na vakacegu, na vosota vakadede, na yalomalua, na yalololoma, na vakabauta, na yalomalumalumu, nai valavala malua [lewai koya vinaka, NW].”​—Kalatia 5:22, 23.

Ena vakaukauataki iko mo vosota na veivakatovolei. “Au sa rawata na ka kecega e na vuku i . . . koya sa vakaukauwataki au.”​—Filipai 4:13.