Nomu Masu​—Na Cava e Tukuna me Baleti Iko?

“Oi kemuni sa daurogoca na masu, ena toro mai vei kemuni na tamata kecega.”​—SAME 65:2.

1, 2. Na cava era masu kina vei Jiova ena nuidei na nona dauveiqaravi?

E DAU rogoca o Jiova na nodra masu nona dauveiqaravi yalodina. Eda nuidei ni na rogoca tale ga noda masu. Ke ra masu mada ga e le vica na milioni na iVakadinadina i Jiova ena dua vata ga na gauna ena rogoca dina o Jiova nodra masu.

² A nuidei na daunisame o Tevita ni na rogoca na Kalou nona masu, a lagata kina: “Oi kemuni sa daurogoca na masu, ena toro mai vei kemuni na tamata kecega.” (Same 65:2) E rogoci na masu i Tevita ni dauveiqaravi yalodina i Jiova. Meda tarogi keda gona: ‘E vakaraitaka beka noqu qaqanimasu niu nuitaki Jiova, au qai vakaliuca na sokalou savasava? Na cava e tukuna me baleti au na noqu masu?’

Torovi Jiova ena Yalomalumalumu

3, 4. (a) Na itovo ni rai cava me tiko vei keda nida masu? (b) Na cava meda cakava ni ora na lomada se ‘vakaleqai na noda vakanananu’ ena ivalavala ca bibi?

³ Me rogoci noda masu, ena vinakati meda torova na Kalou ena yalomalumalumu. (Same 138:6) Meda kerei Jiova me dikevi keda, a cakava qori o Tevita ena nona kaya: “Mo ni dikevi au, na Kalou, mo ni kila na lomaqu: mo ni vakatovolei au, ka kila na nanuma ni lomaqu: ka raica se sa dua nai tovo ca vei au, ka tuberi au e na sala ni bula tawa mudu.” (Same 139:23, 24) Meda kua wale ga ni masu, ia meda yalorawarawa ni laiva vua na Kalou me dikevi keda salavata kei na noda muria na ivakasala ena nona Vosa. E tuberi keda o Jiova ina “sala ni bula tawa mudu,” e na vukei keda tale ga meda rawata na bula qori.

⁴ Vakacava ke ‘vakaleqai na noda vakanananu’ ena vuku ni dua na ivalavala ca bibi? (Wilika Same 32:1-5.) Ke da via kinoca na ora ni lomada ena vakamalumalumutaki keda ga, e tautauvata kei na vunikau sa sega na wai me bula kina. Ena vuku ni nona ivalavala ca o Tevita, a rarawataka qai rairai vakatauvimatetaki koya. Ia e lomavakacegu ena gauna a vakatusa kina nona ivalavala ca vua na Kalou! Vakasamataka mada na marau i Tevita ni sa ‘bokoca nona ivalavala ca’ o Jiova. Eda na lomavakacegu tale ga nida vakatusa vua na Kalou na noda cala. E yaga tale ga nodra veidusimaki na qase ni ivavakoso ena nona vakabulabulataki tale vakayalo o koya e cala.​—Vkai. 28:13; Jeme. 5:13-16.

Vakamamasu Qai Vakavinavinaka

5. Na cava e kena ibalebale meda kerekere vei Jiova?

⁵ Ke da lomaleqataka vakabibi e dua na ka, meda muria na ivakasala i Paula: “Dou kakua sara ni lomaocaoca; ia e na ka kecega me vakatakilai vua na Kalou na nomudou kerekere e na masu kei na dau cikecike kei na vakavinavinaka.” (Fpai. 4:6) Na “kerekere” e kena ibalebale meda “kerea e dua na ka ena yalomalumalumu.” Bibi dina meda kerea na veivuke i Jiova kei na nona veidusimaki nida sotava na ituvaki dredre se da tusaqati vakaca.

6, 7. Na cava e bibi kina meda vakavinavinaka tale ga nida masu?

⁶ Ke da masu ga ena gauna eda vinakata kina e dua na ka, na cava e vakaraitaka qo me baleta noda veiwekani kei Jiova? A tukuna o Paula meda dau kerekere vua na Kalou, da qai “vakavinavinaka” tale ga vua. E tiko na vuna meda duavata kina kei Tevita ena nona kaya: “I Jiova, ko ni sa cecere, sa nomuni ga na kaukauwa, kei na lagilagi, kei na gumatua, kei na ka vakaturaga: ni sa nomuni ga na ka kecega mai lomalagi, kei vuravura; sa nomuni na matanitu, kemuni Jiova, ia ko ni sa cecere cake me ulu ni ka kecega. . . . Neimami Kalou, keimami sa vakavinavinaka vei kemuni, ka seretaka na yacamuni sa vakarokorokotaki.”​—1 Vei. 29:11-13.

⁷ A vakavinavinakataka na Kalou o Jisu ni dau vakarautaka na kakana, vaka kina na madrai kei na waini a vakayagataki ena iVakayakavi ni Turaga. (Maciu 15:36; Mari. 14:22, 23) Meda ‘vakavinavinakataki Jiova’ tale ga ena “nona cakacaka mana vei ira na luve ni tamata,” ena nona “lewa dodonu,” kei na nona vosa se itukutuku ena iVolatabu.​—Same 107:15; 119:62, 105.

Masulaki Ira Eso Tale

8, 9. Na cava meda masulaki ira kina na tacida lotu vaKarisito?

⁸ Eda na sega ni masulaka ga na veika e baleti keda, era na oka tale ga kina eso tale—ira mada ga na lotu vaKarisito eda sega ni kila na yacadra. A rairai sega ni kilai ira kece na lotu vaKarisito e Kolosa o Paula, a vola: “Keirau sa vakavinavinaka vua na Kalou na Tama i Jisu Karisito na noda Turaga, ka masulaki kemudou e na veisiga, ni keirau a rogoca na nomudou vakabauti Karisito Jisu, kei na nomudou loloma vei ira kecega era sa lotu.” (Kolo. 1:3, 4) A masulaki ira tale ga na lotu vaKarisito e Cesalonaika o Paula. (2 Ces. 1:11, 12) Na masu va ya e tukuni keda kei na ivakarau ni noda raici ira na tacida ena vakabauta.

⁹ Na noda masulaki ira na lotu vaKarisito lumuti kei ira na ‘so tani tale na sipi’ e ivakadinadina matata nida kauaitaka nona isoqosoqo o Jiova. (Joni 10:16) A vakadreti ira nona itokani ena vakabauta o Paula mera dau masu me rawa kina vua me ‘tukuna ena doudou na ka vuni ni itukutuku vinaka.’ (Efeso 6:17-20) Eda dau masulaki ira va qori na lotu vaKarisito?

10. Ena yaga vakacava vei keda noda masulaki ira na tacida?

¹⁰ Na noda masulaki ira eso tale ena rawa ni veisautaka na ivakarau ni noda raici ira. Nida masulaka e dua eda sega ni dau taleitaka, ena rawa ni veisau na ivakarau ni noda raici koya. (1 Joni 4:20, 21) Na masu va qori e veitaraicake qai vakaduavatataki keda kei ira na tacida. E vakaraitaka tale ga nida vakatotomuria na loloma i Karisito. (Joni 13:34, 35) Na itovo qori e umani ena vua ni yalo tabu. Eda dau masulaka beka na veidusimaki ni yalo tabu, noda kerei Jiova me vukei keda meda vuataka na itovo era umani tiko kina, ya na loloma, reki, vakacegu, vosota vakadede, yalomalua, yalololoma, vakabauta, ivalavala malua kei na lewai koya vinaka? (Luke 11:13; Kala. 5:22, 23) Ena kilai ena noda vosa kei na ka eda cakava nida lako voli ena yalo tabu.​—Wilika Kalatia 5:16, 25.

11. Na cava o tukuna kina ni ka vakayalomatua meda kerei ira eso mera masulaki keda?

¹¹ Ke da liaca nira temaki na luveda e koronivuli mera lawakitaka nodra veitarogi, e vinaka meda masulaki ira salavata kei na noda vukei ira ena ivakasala vakaivolatabu me rawa nira dau dina ra qai caka dodonu tiko ga. A tukuna o Paula vei ira na lotu vaKarisito e Korinica: “Keitou sa masu vua na Kalou, mo dou kakua sara ni valavala ca.” (2 Kor. 13:7) E vakamarautaki Jiova na masu va qori ni yavutaki ena yalomalumalumu qai vinaka kina na keda irogorogo. (Wilika Vosa Vakaibalebale 15:8.) Eda rawa tale ga ni kerei ira eso mera masulaki keda, me vaka ga a cakava na yapositolo o Paula. “Dou masulaki keitou: ni keitou sa dinata ni sa vinaka na neitou lewa-eloma, ka keitou sa vinakata mei valavala dodonu e na ka kecega.”​—Iper. 13:18.

Kilai Eso Tale na Ka Baleti Keda ena Noda Masu

12. Na cava me usutu ni noda masu?

¹² E vakaraitaka beka noda masu nida dua na iVakadinadina marau da qai gumatua na qaravi Jiova? Eda vakabibitaka beka ena noda masu na vakayacori ni inaki ni Kalou, na vunautaki ni Matanitu ni Kalou, na dodonu ni nona veiliutaki, kei na vakacerecerei ni yacana? Qori me usutu ni noda masu, me vaka ga a cakava o Jisu. A tekivuna nona masu: “Tama i keimami mai lomalagi, me vakarokorokotaki na yacamuni. Me yaco na nomuni lewa. Me caka na lomamuni e vuravura me vaka sa caka mai lomalagi.”—Maciu 6:9, 10.

13, 14. Na cava e tukuna na noda masu me baleti keda?

¹³ Na noda masu ena kilai kina na inaki dina ni lomada, ka eda dau taleitaka kei na noda gagadre. E kilai keda vinaka o Jiova. Tukuna na Vosa Vakaibalebale 17:3: “A kuro sa yaga me vakatovolei kina na siliva, kei na lovo me vakatovolei kina na koula: ia sa vakatovolea na yalo ko Jiova.” E raica o Jiova na ka e tu e lomada. (1 Sam. 16:7) E kila vinaka na noda rai me baleta na soqoni, cakacaka vakaitalatala, kei ira na tacida vakayalo. E kila na noda rai me baleti ira na ‘taci’ Karisito. (Maciu 25:40, VV) E kila vinaka na masu e vu dina mai lomada kei na masu e cavuqaqataki wale tu ga. E kaya o Jisu: “Ni dou sa masu, kakua ni vosa balabalavu walega, me vakataki ira na tawa lotu; ni ra sa nanuma era na rogoci ni ra sa vosa balabalavu.”​—Maciu. 6:7.

¹⁴ Na noda masu e vakaraitaka tale ga na levu ni noda nuitaki Jiova. A masuta o Tevita: “Kemuni [Jiova] sa noqui vakaruru eliu, na noqu koro kaukauwa, mai vua na meca. Au na tiko ga e na nomuni vale ka sega ni mudu: au na vakararavi e na ruku ni tabamuni.” (Same 61:3, 4) Ni dolava vakaivakatakarakara o Jiova ‘nona vale’ vei keda, eda lomavakacegu da qai taqomaki. (Vkta. 7:15) E veivakacegui dina noda torovi koya ena masu nida vakabauta dei ni na ‘totaki keda’ ena gauna e vakatovolei kina noda vakabauta!​—Wilika Same 118:5-9.

15, 16. E yaga vakacava na masu ena kena kilai na inaki ni lomada me baleta na tadolovi ni isausau ni veiqaravi?

¹⁵ Nida talaucaka vakadodonu na lomada vei Jiova eda na rawa ni kila kina na ka dina me baleta na lomada. Kena ivakaraitaki, noda vinakata meda vakacolati ena itavi ni veiliutaki ena ivavakoso. E noda inaki beka meda cakava noda vinaka kece meda veivuke ena veika e baleta na Matanitu ni Kalou? Se da vinakata qori meda “viavialiu” se meda “lewai ira” kina eso tale? E sega ni dodonu me laurai qori vei ira na dauveiqaravi i Jiova. (Wilika 3 Joni 9, 10; Luke 22:24-27.) Nida talaucaka vakadodonu na lomada vei Jiova ena vakavotui kina na gagadre ca, e rawa nida cavuraka ni bera ni vakawakana e lomada.

¹⁶ De ra vinakata na yalewa lotu vaKarisito me dauveiqaravi ni ivavakoso o watidra, ra qai ivakatawa se qase ni ivavakoso sara. Era na saga kina na yalewa lotu vaKarisito qori mera ivakaraitaki vinaka ena nodra itovo me salasalavata kei na ka era masulaka. Na nodra raici koya na tagane lotu vaKarisito na ivavakoso ena vakatau sara tiko ga ena nodratou ivakarau ni vosa kei na itovo na lewe ni nona vuvale.

Masu ena Vukudra Tale Eso

17. Na cava e bibi kina meda tiko taudua nida masu?

¹⁷ Ni tiko maliwai ira na lewenivanua o Jisu, e dau vakatikitikitaki koya me masu vua na Tamana. (Maciu 14:13; Luke 5:16; 6:12) Bibi dina meda tikica na gauna meda masu taudua kina. E gauna vinaka qori baleta ni tu vinaka kina na ivakarau ni noda vakasama, rawa tale ga nida vakatulewataka na ka ena vakamarautaki Jiova qai vaqaqacotaka noda qaravi koya. A masu tale ga ena matanalevu o Jisu, e vinakati kina meda vakalewa vinaka na kena caka vakamatau na tikina qo.

18. Na cava eso na ka mera nanuma tiko na tacida tagane nira masu tiko ena vukudra na lewe ni ivavakoso?

¹⁸ Ena soqoni vaKarisito era masu na tagane yalodina ena vukudra na lewe ni ivavakoso. (1 Tim. 2:8) Era na cavuta na “emeni” na mataveitacini ni sa tini na masu, e kena ibalebale “me yaco vaka kina.” Era na qai tukuna ga qori nira duavata kei na ka e cavuti ena masu. Sega ni vakavu lomatarotaro se veivakatarabetaki na masu i Jisu. (Luke 11:2-4) A sega ni cavuta vakamatailalai na ka era vinakata se na nodra leqa na lewenivanua era vakarorogo tiko. Na leqa e vakila tiko e dua e nona ga qai sega ni tukuni ena masu e matanalevu. Koya gona, nida masu e matanalevu meda kua ni cavuta na veika e nona ga e dua, e sega ni vinakati me kilai levu.

19. Me vakacava noda ivalavala ni caka tiko na masu e matanalevu?

¹⁹ Ni dua e masu tiko ena vukuda e matanalevu meda vakaraitaka nida “rerevaka na Kalou.” (1 Pita 2:17) Eso na ka ena rairai tiko na gauna me dau caka kina, ia e sega ni ka vakayalomatua me caka ena gauna ni soqoni vaKarisito. (Dauv. 3:1) Kena ivakaraitaki, ena vakatura e dua mera veitauriliga eso ena gauna ni masu. Ena rairai vakatarabetaki ira eso, se ra lai kauai sara kina na vulagi eda sega ni vakabauta vata. Eso na veiwatini era na rairai veitauriliga, ia ke ra veimokomoko ni caka tiko na masu e matanalevu, e levu era na tarabe tale ga kina. De dua era na nanuma ni rau kauaitaka na veiwatini nodrau veimositi rau qai sega ni dokai Jiova. Eda doka vakalevu na Kalou nida ‘kitaka na ka kece ga me vakarokorokotaki kina,’ da qai qarauna na ivalavala e vakavu kauai, era na kidroa kina eso, qai veivakatarabetaki.​—1 Kor. 10:31, 32; 2 Kor. 6:3.

Na Ka me Masulaki

20. O na vakamacalataka vakacava na Roma 8:26, 27?

²⁰ Ena so na gauna, eda na sega ni kila na ka meda cavuta ena noda masu vakataki keda. E vola o Paula: “Ni da sa sega ni kila na ka e kilikili kei keda meda kerea: a sa masulaki keda na Yalo Tabu e na vutugu e sega ni cavuti rawa. Ia ko koya sa daudikeva na yaloda sa kila na loma ni Yalo Tabu.” (Roma 8:26, 27) A vakavuna o Jiova me volai e levu na masu ena iVolatabu. E rogoca na kerekere kece qori me vaka ga e rogoca noda masu qai sauma. E kilai keda vinaka na Kalou kei na ibalebale ni ka e tukuna, ena nona vakayagataka na yalo tabu me uqeti ira na dauvolaivolatabu mera vola. E sauma o Jiova noda masu ni ‘vakamamasu’ ena vukuda na yalo tabu. Ni toso noda kila vinaka na Vosa ni Kalou, eda sa na kila vinaka na ka eda masulaka.

21. Na cava ena veivosakitaki ena ulutaga e tarava?

²¹ Me vaka sa tukuni oti, e tukuni keda na noda masu. Me kena ivakaraitaki, e vakaraitaka na noda veivolekati kei Jiova kei na noda kila vinaka nona Vosa. (Jeme. 4:8) Ena ulutaga tarava, eda na veivosakitaka eso na masu kei na ivakarau ni masu e volatukutukutaki ena iVolatabu. Ena yaga vakacava na noda vulica na iVolatabu nida torova na Kalou ena masu?

O na Sauma Vakacava?

• Na itovo ni rai cava me tiko vei keda nida masu vei Jiova?

• Na cava meda masulaki ira kina na tacida ena vakabauta?

• Na cava e tukuna noda masu me baleti keda kei na noda inaki?

• Me vakacava noda ivalavala ni caka tiko na masu e matanalevu?

[iYaloyalo ena tabana e 4]

O dau vakavinavinakataki Jiova qai vakacaucautaki koya vakawasoma?

[iYaloyalo ena tabana e 6]

Me vakacaucautaki mada ga o Jiova ena ivakarau ni noda masu e matanalevu