Marau Tiko ga ena Gauna Dredre

“Me ra reki ga ko ira kece sa vakararavi vei kemuni [Jiova]: me ra sere vakadomoilevu ga ka sega ni mudu.”​—SAME 5:11.

1, 2. (a) Na cava eso na ka e vakavu rarawa vakalevu nikua? (b) Nida sotava tale ga na leqa e bikai vuravura tu, na ituvaki cava tale meda vosota na lotu vaKarisito dina?

ERA sotava tale ga na iVakadinadina i Jiova na leqa e vakila tu na kawatamata. Levu na dauveiqaravi ni Kalou era vakaleqai ena basulawa, ivalu kei na vuqa tale na ituvaki tawadodonu. E vakavu rarawa tale ga vakalevu na leqa tubukoso, bula dravudravua, tauvimate kei na mate. E veiganiti kina na ka e vola na yapositolo o Paula: “Eda kila nira vutugu ra qai rarawa tu na kabuli kece me yacova mai qo.” (Roma 8:22) Kuria oya, eda vakila tale ga na leqa e vu mai noda ivalavala ca. Eda na rairai tukuna me vakataki Tui Tevita: “Sa uasivia cake na uluqu na noqu caka ca: me vaka nai colacola bibi ka’u sa sega ni colata rawa.”​—Same 38:4.

² Nida sotava na leqa e bikai vuravura tu, ena vinakati vei keda na lotu vaKarisito dina meda colata noda kaunirarawa vakaivakatakarakara. (Luke 14:27) Me vakataki Jisu, era na cati qai vakacacani tale ga nona tisaipeli. (Maciu 10:22, 23; Joni 15:20; 16:2) Koya gona, noda muri Karisito ena vinakati kina na sasaga vakaukaua kei na vosota nida waraka tiko na vuravura vou kei na kena veivakalougatataki.​—Maciu 7:13, 14; Luke 13:24.

3. Eda kila vakacava ni sega ni vinakati mera rarawa na lotu vaKarisito mera vakamarautaka kina na Kalou?

³ Kena ibalebale beka qo, nira vakaliuca na lotu vaKarisito dina na bula e sega ni marautaki? E dodonu beka meda rarawa qai lolosi tu ga me yacova na ivakataotioti? E matata vakasigalevu ni vinakata o Jiova meda marau nida waraka tiko na kena vakayacori nona vosa ni yalayala. Dau tukuni vakalevu ena iVolatabu nira tamata mamarau o ira na dausokaloutaki Jiova. (Wilika Aisea 65:13, 14.) E kaya na Same 5:11: “Me ra reki ga ko ira kece sa vakararavi vei kemuni [Jiova]: me ra sere vakadomoilevu ga ka sega ni mudu.” Io, e rawa nida marau, me vakacegu noda vakasama da qai lomavakacegu ena gauna mada ga e vakilai kina na dredre. Meda dikeva mada na yaga ni iVolatabu nida sotava na ituvaki dredre, kei na sala eda na marau tiko ga kina.

Jiova—“Na Kalou Mamarau”

4. E tarai koya vakacava na Kalou na kena vakanadakui nona inaki?

⁴ Dikeva mada na ivakaraitaki i Jiova. E Kalou Kaukaua Duadua, e lewa na lomalagi kei na vuravura. E sega gona ni lekata e dua na ka, e sega tale ga ni gadreva e dua me vukei koya. E dina ni sega ni dua e tautauvata kei Jiova ena nona kaukaua, ia e rarawa sara ga ena gauna a veivorati kina e dua na luvena vakayalo a yaco me o Setani. E rairai rarawataka tale ga na nodra veitomani ena veivorati eso tale na agilosi. Vakasamataka na rarawa ni Kalou ni rau vakanadakui koya o Atama kei Ivi, na nona ibulibuli vakayago vakasakiti. Me tekivu mai na gauna ya, e bilioni vakacaca na nodrau kawa era vakanadakuya na veiliutaki i Jiova.​—Roma 3:23.

5. Na cava e dau vakararawataki Jiova vakalevu?

⁵ E sega ni cegu o Setani ena nona veivorati. Sa rauta ni 6,000 na yabaki nona raica tu o Jiova na qaravi matakau, itovo voravora, laba, kei na veiyacovi vakasisila. (Vkte. 6:5, 6, 11, 12) E rogoca tale ga o koya na lasu kei na vosavakacaca. Ena so mada ga na gauna, era vakararawataki koya nona dauveiqaravi. E vakamacalataka na iVolatabu e dua na ituvaki qori: “A ka tani na nodra talaidredre vua mai na veikau, ka vakararawataki koya mai lekutu! Io, era sa vuki tani ka vakatovolei koya vakaca na Kalou, ka vakacudrui Koya na Yalosavasava ni Isireli.” (Same 78:40, 41) E dau rarawa vakalevu o Jiova nira vakanadakui koya nona tamata. (Jere. 3:1-10) E macala ni dau yaco na veika ca, e dau rarawa gona vakalevu o Jiova nira yaco na ituvaki qori.​—Wilika Aisea 63:9, 10.

6. E dau raica vakacava na Kalou na ituvaki dredre?

⁶ E sega ni vakamalumalumutaki koya nona rarawa kei na nona yalolailai. Ni basika na ituvaki dredre, e dau yavala totolo o Jiova me vakalailaitaka na veika ca e vu mai kina. E dau cakava o koya na ka me yaga ena veigauna mai muri, me rawa ni yaco kina nona inaki. Ena vuku ni veika a cakava qo, e vakanamata kina ena marau o Jiova ena kena vakacerecerei nona veiliutaki kei na nodra vakalougatataki nona dauveiqaravi yalodina. (Same 104:31) Io, dina ni vakararawataki, e se “Kalou mamarau” tiko ga o koya.​—1 Tim. 1:11; Same 16:11.

7, 8. Ni basika na leqa, eda na vakatotomuri Jiova vakacava?

⁷ Eda sega ni rawa ni vakatauvatani keda kei Jiova ena noda walia na leqa. Ia, eda rawa ni vakatotomuri Jiova nida donuya na ituvaki dredre. E macala nida rarawataka na kena yaco na ituvaki dredre, ia eda na sega ni rarawataka tiko ga. Nida buli meda ucui Jiova, eda rawa gona ni vakayagataka na vuku kei na yalomatua e tu vei keda meda vakalewa kina na leqa qai walia vakavinaka.

⁸ E dua na tikina bibi me nanumi ena kena wali na leqa, oya ni tiko eso na ka eda sega ni lewa rawa. Noda kauaitaka vakalevu na leqa ena vakavuna ga na vuturi, eda na sega ni marautaka kina na veika e vauci ena sokalou dina. Nida solia noda vinaka meda walia e dua na leqa, e vinaka meda kua ni vakasamataka vakalevu na leqa qori da qai vakaogai keda ena so na cakacaka yaga. Ena vakamatatataka na tikina qo e vica na itukutuku ena iVolatabu.

Bibi Mo Yalorawarawa

9. A yalorawarawa vakacava o Ana?

⁹ Vakasamataka mada na ivakaraitaki i Ana, a yaco e muri me tinai Samuela na parofita. E rarawataka o Ana nona sega ni vakaluveni. E vakalialiai sara ga kina. So na gauna, e dau tagi qai sega ni kana ena levu ni nona rarawa. (1 Sam. 1:2-7) Ni gole ina valenisoro i Jiova ena dua na gauna, e ‘rarawa na yalona, e masu vei Jiova, qai tagi vakalevu.’ (1 Sam. 1:10) Ni talaucaka oti na lomana vei Jiova, e torovi koya o Ilai na bete levu qai kaya: “Mo lako e na vakacegu: ia me solia vei iko na Kalou ni Isireli na ka ko sa kerea vua.” (1 Sam. 1:17) A kila o Ana ni sa cakava na ka kece a rawa ni cakava, a kila tale ga ni na sega ni caka rawa e dua na ka me baleta nona sega ni vakaluveni. E yalorawarawa o Ana, mani ‘lako ena nona ilakolako, a kana, a sega tale ga ni vakaveveku mata.’​—1 Sam. 1:18.

10. Na rai donu cava a tiko vei Paula ni sotava e dua na leqa a sega ni walia rawa?

¹⁰ A va tale ga qori nona rai na yapositolo o Paula ena gauna e vakatovolei kina. E dau vakararawataki koya e dua nona malumalumu. E tukuna ni vaka ‘e votoki koya voli e dua na votonikau.’ (2 Kor. 12:7) Se mani cava na malumalumu qori, e cakava o Paula na ka kece a rawa ni cakava me valuta kina na ituvaki qori, ya nona masuta na veivakacegui i Jiova. A masuti Jiova vakavica me baleta na leqa qo? Vakatolu sara ga. Ni oti na ikatolu ni gauna, a tukuna na Kalou ni na sega ni kau tani vakacakamana na ‘votonikau e votoki koya tiko.’ A ciqoma o Paula na vosa qori, mani gumatua ga ni qaravi Jiova.​—Wilika 2 Korinica 12:8-10.

11. E yaga vakacava na masu kei na kerekere ena noda vosota na ituvaki rarawataki?

¹¹ E sega ni tukuna tiko na ivakaraitaki kece qo meda kua ni masuti Jiova nida sotava eso na ituvaki rarawataki. (Same 86:7) E uqeti keda ga na Vosa ni Kalou: “Moni kua ni lomaocaocataka e dua na ka, ia na ka kece me vakaraitaki vua na Kalou ena masu kei na kerekere salavata kei na vakavinavinaka.” Ena sauma vakacava o Jiova na masu kei na kerekere va qori? E tomana na iVolatabu: “Ena qai taqomaka na lomamuni kei na nomuni vakasama na vakacegu ni Kalou e uasivia na vakasama kece, ena vuku i Karisito Jisu.” (Fpai. 4:6, 7) Io, ena rairai sega ni kauta tani na noda leqa o Jiova, ia ena sauma na noda masu ena nona taqomaka noda vakasama. Nida masulaka oti e dua na ka, eda rairai liaca na kena vakarerevaki na nuiqawaqawa.

Marau ni o Cakava na Loma ni Kalou

12. Na cava e veivakaleqai kina na yalolailai?

¹² E kaya na Vosa Vakaibalebale 24:10: “Kevaka ko sa gu ca e na siga ni rarawa, sa lailai na nomu kaukauwa.” E kaya e dua tale na vosa vakaibalebale: “Ni sa rarawa na lomana, sa ramusu kina na yalona.” (Vkai. 15:13) Eso na lotu vaKarisito, ena levu ni nodra yalolailai era sa sega ni tomana nodra wili iVolatabu, ra sega tale ga ni vakasamataka vakabibi na veika era wilika. Sa dau caka ga me rawa nodra masu, ra qai yawaki ira na mataveitacini. E macala gona ni rawa ni veivakaleqai na rarawa vakadede.​—Vkai. 18:1, 14.

13. Na cava eso na ka e rawa ni valuta na yalolailai, me rawa nida marau tale ga?

¹³ Ena yasana adua, ena yaga vakalevu na rai donu, nida na vakasamataka kina eso na ituvaki ena noda bula eda rawa ni marau kina. E vola o Tevita: “Au sa reki me’u kitaka na ka ko ni sa vinakata, noqu Kalou.” (Same 40:8) Nida donuya eso na ituvaki dredre, meda kua mada ga ni tagutuva noda ituvatuva vinaka ni sokalou. Dua na sala eda na vorata kina na yalolailai oya meda vakaitavi ena cakacaka e vakavumarau. E tukuna vei keda o Jiova nida na marau ke da wilika nona Vosa da qai dikeva wasoma. (Same 1:1, 2; Jeme. 1:25) Noda rogoca na “vosa vinaka” mai na iVolatabu kei na soqoni vaKarisito, ena uqeti keda qai vakamarautaki keda tale ga.​—Vkai. 12:25; 16:24.

14. Na veivakadeitaki cava i Jiova e vakavu marau ena gauna qo?

¹⁴ E levu na ka e vakarautaka na Kalou meda marau kina. E vakavumarau nona vosa ni yalayala me baleta noda vakabulai. (Same 13:5) Eda kila se cava ga eda sotava tiko ena gauna qo, o Jiova ena vakalougatataki ira na gumatua ni vakaliuci koya. (Wilika Dauvunau 8:12.) E vakamacalataka vakamatata na tikina qo na parofita o Apakuki, ena nona vola: “Ke sa sega ni seraki na lolo, ka sega ni vua mai na veivaini, ke sa yali na vua ni olive, ka sa sega talega ni tubura na kakana na veiwere; ke muduki tani mai na bai na qele ni sipi, ka sega na pulumokau e na loma ni bai: ke’u na rekitaki Jiova ga, ka’u na marautaki koya na Kalou, na noqui vakabula.”​—Apak. 3:17, 18.

“Sa Kalougata na Tamata sa Nodra Kalou ko Jiova!”

15, 16. Tukuna eso na isolisoli i Jiova eda rawa ni marautaka nida waraka tiko na veivakalougatataki e se bera mai.

¹⁵ Nida waraka tiko na bula totoka e se bera mai, e vinakata o Jiova meda marautaka na veika vinaka e vakarautaka tu. E kaya na iVolatabu: “Au sa kila ni sa sega tale na ka vinaka cake kina, ka me reki ga na tamata, ka caka vinaka ni sa bula tiko: Ia me kana talega ka gunu na tamata yadua, ka kunea na kena vinaka ni nona cakacaka kecega, sai koya oqo nai solisoli ga ni Kalou.” (Dauv. 3:12, 13) Na “caka vinaka” e okati kina na noda cakava na veika vinaka vei ira tale eso. A tukuna o Jisu ni levu cake na marau nida solika mai na noda taura na ka. Eda lomavakacegu nida caka vinaka vei ira na watida, luveda, itubutubu, kei ira na wekada. (Vkai. 3:27) E vakavumarau tale ga noda dau yalololoma, veikauaitaki, kei na noda dau vosoti ira na tacida, e taleitaka na ka kece qo o Jiova. (Kala. 6:10; Kolo. 3:12-14; 1 Pita 4:8, 9) Kena ikuri, e yaga tale ga na noda vakaraitaka na yalo ni vakuai keda ena cakacaka vakaitalatala.

¹⁶ Na vosa e cavuti ena Dauvunau e vakamacalataka na ka eda marautaka e veisiga, me vaka na kana kei na gunu. Io, ena gauna dredre mada ga, se rawa nida marautaka na isolisoli vakayago e vakarautaka o Jiova. Kena ikuri, e sega ni saumi noda sarava na totoka ni dromu ni matanisiga, na drokadroka ni vanua, nodra ivukivuki lasa na luve ni manumanu, kei na veika vakasakiti ni veika buli soli wale, era vakatubuqoroqoro qai vakavumarau. Nida vakasamataka na veika qo, eda lomani Jiova kina vakalevu, ni o koya e dau solia na ka vinaka kece.

17. Na cava ena vakacegui keda dina mai na noda rarawa, ia ena gauna mada ga qo na cava eda lomavakacegu kina?

¹⁷ Nida lomana na Kalou, talairawarawa ina nona ivakaro kei na noda vakabauta na isoro ni veivoli, eda na galala kina vakadua mai na ituvaki dredre da qai marau tawamudu. (1 Joni 5:3) Ia ena gauna mada ga qo, eda lomavakacegu ni kila vinaka tu o Jiova na veika kece e dau vakararawataki keda. A vola o Tevita: “Au na reki ka marau e na nomuni yalololoma; kemuni sa vakananuma na noqu rarawa; kemuni a kila na kena veivakararawataki ni yaloqu.” (Same 31:7) Ni lomani keda o Jiova, ena vakabulai keda mai na noda rarawa.​—Same 34:19.

18. Na cava mera marau kina vakalevu na tamata ni Kalou?

¹⁸ Nida waraka tiko na vakayacori ni nona vosa ni iyalayala, meda vakatotomuri Jiova mada ga, na Kalou mamarau. Meda kua ni vakalaiva na rai cala me tarova na noda qarava na Kalou. Ni basika na leqa, me dusimaki keda na lomavuku kei na yalomatua. Ena vukei keda o Jiova meda lewa matau, me rawa nida cakava eso na ka me vakalailaitaka kina na revurevu ni dua na ituvaki dredre. Meda marautaka tiko mada ga na isolisoli vinaka e vu mai vua vakayago, vakayalo tale ga. Nida volekata gona na Kalou, eda na marau ni na “kalougata na tamata sa nodra Kalou ko Jiova!” ​—Same 144:15.

Na Cava o sa Vulica?

• Eda na vakatotomuri Jiova vakacava nida vosota tiko na ituvaki dredre?

• Ena yaga vakacava na yalorawarawa nida vosota na ituvaki dredre?

• Ena gauna ni leqa, eda na marau vakacava na cakava tiko na loma ni Kalou?

[iYaloyalo ena tabana e 16]

E vakararawataki Jiova na veika ca era yaco tiko

[Credit Line]

© G.M.B. Akash/Panos Pictures

[iYaloyalo ena tabana e 18]

E vakarautaka o Jiova na veika meda marau kina