Gumatuataka Qai Marautaka Nomu Qarava na Kalou

E VINAKATA o Jiova mo marau. (Same 100:2) Ni o dua na dauveiqaravi ni Kalou, o na rairai ogaoga sara tiko ga ena gauna qo. De dua o sega sara ni gumatua va qori ena gauna o yalataki iko kina vua na Kalou. Ia ena gauna qo, e vaka me ikuri ni icolacola na nomu gumatua ena nomu qaravi itavi vakayago kei na itavi vakayalo. O na rairai yalolailai ke o sega ni vakaotia na ka o lalawataka tu. Koya gona, o na veiraurautaka vakacava na ka, mo rawa ni “marautaki Jiova” tiko ga kina?​—Niem. 8:10.

Eda bula tu ena gauna dredre, qai levu na ka eda na sotava, ena vinakati gona meda dau tuvatuvanaki. E yaga dina nona ivakasala na yapositolo o Paula ena tikina qo: “Ni qarauna na nomuni ilakolako, ni kua ni vakataki ira na lialia, ni vakataki ira ga na vuku, ni volia na gauna me nomuni, nida sa bula tu ena veisiga ca.”​—Efeso 5:15, 16.

Ni o vakasamataka na ivakasala vakayalomatua qori, o na cakava vakacava na ka e vinaka duadua, o na qai veiraurautaka vata kei na nomu vuli vakataki iko, na qaravi ni nomu vuvale, cakacaka vakaitalatala, cakacaka saumi, kei na so tale na itavi?

O se nanuma tiko na marau o vakila ni o yalataka nomu bula vua na Kalou, kei na nomu papitaiso? E vakavu marau nomu vulica na veika e baleti Jiova kei na nona inaki. A rairai taura toka e vica vata na vula na kena vulici vagumatua na iVolatabu me rawati kina na kilaka qori kei na marau. A yaga dina na sasaga qori, qai veisautaka sara ga na nomu bula.

Mo rawa ni marau, ena vinakati mo kana tiko ga vakayalo. Ke dredre nomu wasewasea na gauna mo wilika se vulica kina na iVolatabu, e vinaka mo na dikeva tale na nomu ituvatuva. Ke vica mada ga na miniti nomu vuli, o qai vakasamataka vakatitobu, ena vakavolekati iko vei Jiova, qai vakamarautaki iko tale ga.

E rawa nira volia na gauna na dauveiqaravi ni Kalou, nira vakayagataka na gauna e dau caka kina na ka e sega ni bibi, me caka kina na ka e bibi cake. Tarogi iko mada, ‘E vakacava mada na levu ni gauna au dau wilika kina eso na mekesini se niusiveva, sara tivi, rogo ivakatagi, se vakaogai au ena so na ka au dau taleitaka?’ Ena rawa ni marautaki na ka kece qori, ke o veiraurautaka. (1 Tim. 4:⁠8) Ke o raica ni dredre toka nomu wasewasea na gauna, ena vinaka mo na veiveisautaka nomu ituvatuva.

E vakamacalataka o Adam e dua na tama, e tolu na luvena, e qase tale ga ni ivavakoso na ka a cakava: “Au saga meu bula rawarawa. Au vakuai au ena so na ka au dau taleitaka, kei na ka e kania vakalevu noqu gauna. Sega ni kena ibalebale ya, ni sega sara ga niu dau marau.”

Ni o vakasamataka vakatitobu na vinaka ni nomu vakatulewa, o na marau, ena donu tiko ga kina nomu rai. O Mariusz, e qase ni ivavakoso, e tolu na luvena. E kaya: “Au sa qai nuidei ena gauna au vulica kina na iVolatabu, e donu tale ga noqu rai me baleta na gauna e se bera mai. Au sotava na veika dredre ena so na gauna, levu vei ira qori e kila ga o Jiova. Ia au vakavinavinakataka nona veitokoni, au qai vakanamata ina gauna se bera mai.”

Me vaka ga ena ivakaraitaki i Mariusz, na rai dodonu ena sega ni walia na nuiqawaqawa kece. Ia o na lomavakacegu ke donu nomu rai, o na rawa ni vosota kina na ka dredre e dau basika. Eda wilika: “Sa ka ca na nodra siga kecega era rarawa tiko: ia ko koya sa reki na lomana, sa kana magiti tikoga.” (Vkai. 15:15) Mo vakasamataka tale ga vakatitobu na nona lomani iko na Kalou ena gauna sa oti. Ni o cakava qori ena titobu nomu lomani koya, o na marau tale ga.​—Maciu 22:37.

E ratou na marau vakalevu na lewe ni vuvale ni ratou vakaliuci Jiova kei na nona inaki. Na bulataki ni itovo vaKarisito ena vakaseavutaka na duiyaloyalo, ratou na veimaliwai vinaka tale ga kina na lewe ni vuvale. Koya gona ena yaco nomu itikotiko me vanua e kune kina na vakacegu ra qai veiyaloni na lewe ni vuvale kece.​—Same 133:1.

E vakavu marau tale ga nida vakaitavi vakavuvale ena veika vakayalo. E tukuna o Mariusz: “Au dau raica me ka talei na gauna keitou vakayagataka vakavuvale. E dau veitokoni sara vakalevu o watiqu. Levu na gauna keirau dau salavata ena cakacaka vakavunau, samaki ni vanua e caka kina na soqo lelevu, vaka kina niu lai vunau ena so tale na ivavakoso. E dau veiuqeti sara ga vakalevu na gauna va qo.”

E vakaroti ira na lotu vaKarisito na iVolatabu, mera vakarautaka na ka me bula kina na nodra vuvale. (1 Tim. 5:8) Ena dua tale na yasana, o na sega ni marautaka nomu qarava na Kalou, ke kania vakalevu na gauna kei na kaukaua na nomu cakacaka saumi. Bibi gona mo masulaka vei Jiova. (Same 55:22) Eso era vakaliuca na Matanitu ni Kalou nira veisautaka na nodra cakacaka. Me kua gona ni vakalaiva na lotu vaKarisito me vakaleqai koya na cakacaka saulevu, me lai vakawalena kina na ka bibi vakayalo.​—Vkai. 22:3.

De dua ena vinaka mo na vola na ka kece e vinaka se ca kina na nomu cakacaka saumi ena gauna qo, se na cakacaka o vakasamataka tiko. E dau taleitaki dina na cakacaka saulevu kei na cakacaka vinaka. Koya gona, vakacava nomu cakacaka ena gauna qo, e yaga ena nodratou bula vakayalo nomu vuvale? Mo vakalewa vinaka na ituvaki, qai vakatulewataka na ka ena vinaka tiko ga kina nomu veiwekani kei Jiova.

Ke o kila ni vakaleqa tiko nomu toso vakayalo nomu cakacaka, ena vinaka mo veisautaka. Levu na lotu vaKarisito era vakayacora na veiveisau me levu kina nodra gauna ena veika vakayalo. E tukuna e dua na tacida mai Poladi: “Na ka ga meu cakava ya, meu biuta na kabani au cakacaka tiko kina, ni dau levu na gauna au gole tu ena ilakolako vakacakacaka. E lailai na gauna meu qarava vinaka kina noqu itavi vakayalo se ratou na noqu vuvale.” Ena gauna qo, sa cakava tiko o koya na cakacaka e sega ni kania vakalevu nona gauna kei na nona kaukaua.

Marautaka Nomu Vukea eso Tale

E kaya o Jisu ni “marau vakalevu o koya e solia na ka, vakalailai o koya e taura na ka.” (Caka. 20:35) Levu na sala eda rawa ni solika kina na lotu vaKarisito. So na gauna nomu matadredredre, lululu se noda vakavinavinakataka e dua ena nona qarava vinaka nona itavi vakayalo, ena vakavu marau vei kemudrau.

E vakauqeti ira nona itokani lotu vaKarisito na yapositolo o Paula: “Vosa vakayalovinaka vei ira na yalolailai, vukei ira na malumalumu.” (1 Ces. 5:14) De dua era nanuma na yalolailai nira na sega ni walia rawa nodra leqa ena nodra kaukaua ga. Vakacava, eda rawa ni vukei ira? Ke da kila e dua na tacida e sa sega ni marautaka nona qaravi Jiova, meda saga gona meda vakayaloqaqataki koya. Nida cakava qori, macala ga nida na uqeti tale ga. Eda sega ni walia rawa eso na leqa. Ia eda rawa ni vakaraitaka noda veinanumi, nida uqeti ira na tacida mera nuitaka na veitokoni i Jiova e sega ni mudu. Era na sega vakadua nira vakamaduataki o ira na cakava qori.​—Same 27:10; Aisea 59:1.

Dua tale na ka o rawa ni vakayacora, ya mo sureti koya na tacimu e sa sega ni marautaka tiko na qaravi Kalou, me tomani iko ena cakacaka vakaitalatala. Ni talai ira na 70 na tisaipeli o Jisu, e lesi ira mera lako “yarua.” (Luke 10:1) Sega li ni o vakabauta ni cakava ya o Jisu meda dau veivakayaloqaqataki kina! Vakacava, o rawa ni muria na iwalewale qori mo vakayaloqaqataka e dua me marautaka tale nona veiqaravi ena gauna qo?

E levu na ka eda leqataka ena gauna qo. Ia e uqeti keda o Paula: “Moni marau tiko ga ena vuku ni Turaga. Au kaya tale moni marau!” (Fpai. 4:4) Ena vakainaki nomu bula ni o lomana na Kalou, talairawarawa vua, o qai gumatua ena itavi e lesia vei iko. Ena vakamarautaki iko qori. Kena ikuri, ena vukei iko o Jiova mo walia na lomaocaoca kei na leqa o dau sotava.​—Roma 2:6, 7.

Ni tu vei keda na vakabauta eda kila ni sa tu qo e matada na vuravura vou e yalataka o Jiova. Sa na wacava noda kalougata kei na marau ena gauna ya! (Same 37:34) Meda kua gona ni rarawa, meda kua tale ga ni lecava na veivakalougatataki i Jiova eda vakila tiko ena gauna qo. Io eda rawa ni “qaravi Jiova e na marau.”​—Same 100:2.

[iTaba ni droini ena tabana e 8]

(Raica tale na ivola)

Bibi mo wasewasea vinaka nomu gauna mo rawa ni marau tiko ga kina

KA NI VEIVAKAMARAUTAKI kei na KA NI VEIVAKALASAI

VALE kei na QARAVI NI VUVALE

CAKACAKA

SOQONI VAKARISITO

VULI VAKATAKI IKO

AKACAKA VAKAITALATALA

iYaloyalo ena tabana e 10]

Vakacava, o rawa ni vakayaloqaqataka e dua me marautaka tale nona veiqaravi?