Muria Tiko Ga na Bula Vinaka Duadua!

“Se da bula se da mate, eda nei Jiova.”​—ROMA 14:8.

1. Na cava a vakatavulica o Jisu me baleta na bula vinaka duadua?

E VINAKATA o Jiova meda marautaka na bula vinaka duadua. Eda rawa ni muria e levu na sala, ia e dua ga na sala e vinaka. Qo noda bulataka na Vosa ni Kalou da qai vuli vua na Luvena, o Jisu Karisito. A vakavulici ratou nona imuri o Jisu me ratou sokalou vakayalo vua na Kalou, me yavutaki tale ga ena dina qai vakaroti ratou me ratou veivakatisaipelitaki. (Maciu 28:​19, 20; Joni 4:24) Noda bulataka na ivakaro i Jisu, eda na vakamarautaki Jiova, da qai marautaka tale ga nona veivakalougatataki.

2. Na cava era cakava e levu ena imatai ni senitiuri me baleta na itukutuku ni Matanitu ni Kalou, qai cava e kena ibalebale ni dua e lewe ni ilawalawa e vakatokai “Na Sala”?

² Nodra mai vakabauta ra qai papitaiso na ‘yalomalumalumu era muria na sala ni bula tawamudu,’ e tiko na vuna vinaka meda tukuna kina vei ira “Muria tiko ga na bula vinaka duadua!” (Caka. 13:48) Ena imatai ni senitiuri S.K., e udolu mai na veimatanitu era mai ciqoma na ka dina, ra qai papitaiso mera vakaraitaka kina e matanalevu nodra lomana na Kalou. (Caka. 2:41) O ira na tisaipeli ena gauna ya, era lewe ni ilawalawa e vakatokai “Na Sala.” (Caka. 9:2; 19:23) E veiganiti na icavuti qo baleta o ira na imuri i Karisito, era bulataka e dua na bula e vakabibitaki kina nona vakabauti o Jisu Karisito kei na muri ni nona ivakaraitaki.​—1 Pita 2:21.

3. Na cava me papitaiso kina e dua e qaravi Jiova, e le vica ra tabadromuci ena tini na yabaki sa oti?

³ E vakatotolotaki sara ena gauna ni vakataotioti qo na veivakatisaipelitaki qai vakayacori tiko ena sivia na 230 na vanua. Ena loma ni tini na yabaki sa oti, e sivia na 2,700,000 era sa vakatulewataka mera qaravi Jiova ra qai papitaiso me ivakaraitaki ni nodra yalayala vua. E vakatautauvatataki qo me sivia e 5,000 era papitaiso e veimacawa! Na vakatulewataki ni papitaiso e yavutaki ena nodra lomana na Kalou, na kilaka mai na iVolatabu, kei na nodra vakabauta na ka era vakatavulica. Na papitaiso e dua na ikalawa vakasakiti duadua ena noda bula, ni qo e itekitekivu ni noda veiwekani voleka kei Jiova. E vakaraitaka tale ga qo noda vakanuinui ni na vukei keda o koya meda qaravi koya kina ena yalodina, me vaka ga nona vukei ira nona dauveiqaravi ena gauna e liu mera muria nona sala.​—Aisea 30:21.

Na Cava e Bibi Kina na Papitaiso?

4, 5. Tukuna eso na veivakalougatataki kei na yaga ni papitaiso.

⁴ De dua o sa mai kila na Kalou, veisautaka nomu bula, o qai dua sara na dautukutuku bera ni papitaiso. E marautaki dina na toso va qo. O sa yalataki iko oti beka vua na Kalou ena masu, qai nuitaka ni o na papitaiso? Nomu vulica na iVolatabu, o rairai vakadinata ena nomu bula ni dodonu me vakacaucautaki o Jiova, qai sega ni o nanumi iko ga se nomu qara iyau. (Wilika Same 148:​11-13; Luke 12:15) Koya gona, cava na yaga ni papitaiso kei na ka ni veivakalougatataki cava e rawati kina?

⁵ Ena vakainaki sara noda bula nida lotu vaKarisito yalayala. O na marau baleta ni o vakayacora tiko na inaki ni Kalou. (Roma 12:​1, 2) Nona yalo tabu o Jiova ena uqeti iko mo bulataka eso na itovo vakalou me vaka na vakacegu kei na vakabauta. (Kala. 5:​22, 23) Ena rogoca nomu masu o Jiova qai vakalougatataka nomu sasaga mo talairawarawa ena nona Vosa. Ena rekitaki nomu cakacaka vakaitalatala, vaqaqacotaki tale ga nomu nuinui ni bula tawamudu ni o muria na bula e vinakata na Kalou. Kuria qo, nomu yalataki iko qai papitaiso sara, qo e vakaraitaka ni o via dua dina na iVakadindina i Jiova.​—Aisea 43:​10-12.

6. Na cava eda vakaraitaka nida papitaiso?

⁶ Noda yalataki keda vua na Kalou da qai papitaiso, eda vakaraitaka kina e matana levu ni taukeni keda o Jiova. E vola kina na yapositolo o Paula: “Sega ni dua vei keda e bula ena vukuna ga, e sega tale ga ni dua e mate ena vukuna ga; ke da bula, eda bula ena vuku i Jiova, ke da mate, eda mate ena vuku i Jiova. O koya gona, se da bula se da mate, eda nei Jiova.” (Roma 14:​7, 8) E vakamareqeti keda na Kalou ena nona solia na galala ni vakatulewa. Nida vakadeitaka meda muria na bula qo ena vuku ni noda lomana na Kalou, eda na vakamarautaki koya. (Vkai. 27:11) Noda papitaiso eda vakaraitaka kina e matanalevu nida yalataki keda vei Jiova qai noda iLiuliu tale ga o koya. E vakaraitaka tale ga nida totaki koya ena ile me baleta na dodonu ni nona veiliutaki. (Caka. 5:​29, 32) Nida cakava qori ena tokoni keda tale ga kina o Jiova. (Wilika Same 118:6.) Nida papitaiso, ena levu na ka ni veivakalougatataki vakayalo eda na rawata ena gauna qo kei na gauna se bera mai.

Vakalougatataki ena Dua na Mataveitacini Dauloloma

7-9. (a) Na cava a vakadeitaka o Jisu vei ira na vakuai ira, ra qai muri koya? (b) E vakayacori tiko vakacava na ka a yalataka o Jisu ena Marika 10:​29, 30?

⁷ E tukuna na yapositolo o Pita vei Jisu: “Raica! Keitou sa biuta na ka kece me keitou muri kemuni; na cava ena qai neitou?” (Maciu 19:27) A via kila sara ga o Pita kei ratou na vo ni tisaipeli i Jisu, se na vakacava na nodratou bula me baleta na gauna se bera mai. Eratou mani vakuai ratou ena so na ka, ena nodratou via vakaliuca vakatabakidua na vunautaki ni Matanitu ni Kalou. (Maciu 4:​18-22) Cava a qai vakadeitaka vei ratou o Jisu?

⁸ E vakadeitaka o Jisu ena ivolatukutuku i Marika, ni o ira na nona tisaipeli era na lewe ni dua na mataveitacini vakayalo. E tukuna: “E sega ni dua e biuta na vale se tacina se ganena se tamana se tinana se luvena se tikiniqele ena yacaqu kei na itukutuku vinaka me na sega ni soli vua e yadrau ena gauna qo na vale, na tacina, na ganena, na tinana, na luvena, na tikiniqele, vata kei na veivakararawataki, ena bula tawamudu tale ga ena gauna se bera mai.” (Mari. 10:​29, 30) Me vaka ga a yalataka o Jisu, eso na lotu vaKarisito ena matai ni senitiuri, me vakataki Litia, Akuila, Virisila, kei Keio era dau vakarautaka nodra vale ra qai dau okati ira era vakabauta vata mera ‘tacidra, ganedra qai tinadra.’​—Caka. 16:​14, 15; 18:​2-4; 3 Joni 1, 5-8.

⁹ Na veika a tukuna o Jisu sa yaco sara tiko ga nikua. Na kena cavuti tiko na “tikiniqele” ratou a biuta na nona imuri, e vakaibalebaletaki ena bula era sa biuta eso ena nodra vakuai ira ena vuku ni kena vakatetei na itukutuku vinaka ni Matanitu ni Kalou ena levu tale na vanua, me vakataki ira na daukaulotu, lewe ni matavuvale i Peceli, ira na dauveiqaravi raraba (international servants), kei ira tale eso. E levu na tacida vakayalo era sa biuta nodra itikotiko mera bula rawarawa ga. Eda marau tale ga nida rogoca nodra vakasavuirogorogo ni karoni ira o Jiova kei na nodra marautaka nodra veiqaravi vua. (Caka. 20:35) Kuria qo, era rawa ni marautaka kece na dauveiqaravi papitaiso i Jiova, na veivakalougatataki ni kena ‘vakaliuci tiko ga na matanitu ni Kalou kei na nona yalododonu [na Kalou]’ mera lewe ni dua na mataveitacini vaKarisito e vuravura raraba.​—Maciu 6:33.

Taqomaki ena “Yasana Vuni”

10, 11. Na cava na “yasana vuni nei Koya sa Cecere sara,” e rawa vakacava nida tiko kina?

¹⁰ Dua tale na ka ni veivakalougatataki ni noda yalayala kei na papitaiso​—ya noda rawa ni lai tiko ena “yasana vuni nei Koya sa Cecere sara.” (Wilika Same 91:1.) Qo e vakatakarakarataka tiko e dua na vanua eda na taqomaki kina mai na veivakacacani vakayalo. E “yasana vuni” baleta era sega ni kila o ira era lekata na kilaka vakayalo ra qai sega ni nuitaka na Kalou. Noda bulataka na ka eda yalataka da qai nuitaki Jiova dina, e vaka sara ga eda tukuna tiko vua: ‘O noqui drodro kei noqu bai ni valu: noqu Kalou; au na vakararavi vei iko.’ (Same 91:2) E noda itataqomaki sara ga na Kalou o Jiova. (Same 91:9) E sega ni dua tale na vanua eda rawa ni taqomaki kina, vei koya duadua ga.

¹¹ Noda rawa ni lai tiko ena “yasana vuni” i Jiova, e vakaraitaka tale ga nida vakalougatataki ena dua na veiwekani talei kei koya. Qo e tekivu sara ga ena yalayala kei na papitaiso. Tarava noda vakavinakataka cake noda veiwekani kei koya, noda torovi koya voleka ena vulici ni iVolatabu, noda masu mai vu ni lomada, kei na noda talairawarawa vua. (Jeme. 4:8) E sega ni dua tale e veivolekati kei Jiova me vakataki Jisu, oya ni sega ni lomalomarua ena nona dau nuitaka na Dauveibuli. (Joni 8:29) Koya gona meda kua mada ga ni dau vakatitiqataka nona rawa ni vukei keda o Jiova meda vakayacora kina na ka eda a yalataka. (Dauv. 5:4) Na veika vakayalo e vakarautaka na Kalou vei ira nona tamata, e ivakaraitaki vakasakiti ni nona lomani keda, e vinakata meda qaravi koya tiko ga.

Vakamareqeta Noda Parataisi Vakayalo

12, 13. (a) Na cava na parataisi vakayalo? (b) Eda na vukei ira rawa vakacava na ka vovou?

¹² Na yalayala kei na papitaiso e sala ni noda vakalougatataki ena parataisi vakayalo. Qo e dua na vanua vakayalo duatani duadua, ra veimaliwai kina na vakabauta vata, ra veiyaloni vakataki ira, ra veiyaloni tale ga kei Jiova. (Same 29:11; Aisea 54:13) Noda parataisi vakayalo e sega ni tautauvata kei vuravura. E dau laurai qo ena soqo cokovata ni veimatanitu, ena nodra veimaliwai ra qai duavata na mataveitacini mai na veimatanitu, dui vosavosa, kei na veimatamata, era mai duavata ena dua na vanua e vakilai kina na vakacegu, veiyaloni kei na veilomani vakamataveitacini.

¹³ E duidui sara na parataisi vakayalo eda marautaka tiko ni vakatauvatani kei na vuravura e sinai kina na itovo ca. (Wilika Aisea 65:​13, 14.) Noda lai vunautaka na itukutuku ni Matanitu ni Kalou, eda vakaitavi sara tiko ga ena dua na itavi dokai ena noda sureti ira tale eso mera mai lewe ni parataisi vakayalo. E ka ni veivakalougatataki na nodra vukei o ira na ka vou era tekivu sosoqoni tiko ena ivavakoso, e yaga tale ga nodra vakatavulici ena cakacaka vakaitalatala. Ena nodra veidusimaki na qase, e rawa nida lesi ena itavi dokai ena noda vukei ira eso na ka vovou, me vakataki Akuila ga kei Virisila ena nodrau ‘vakamacalataka vakadodonu na sala ni Kalou’ vei Apolosa.​—Caka. 18:​24-26.

Vuli Tiko ga Vei Jisu

14, 15. Na cava e vinaka kina meda vuli tiko ga vei Jisu?

¹⁴ E tiko na vuna vinaka meda vuli tiko ga kina vei Jisu. Ni bera nona mai bula vakatamata, a dau cakacaka tu vakalevu me vica vata na udolu na yabaki kei Tamana. (Vkai. 8:​22, 30) E kila o koya ni bula vinaka duadua nona qarava na Kalou kei na kena vunautaki na ka dina. (Joni 18:37) E matata sara tu ga vei Jisu, ni ivakarau ni bula tale eso e rawa ni yaco ga kina na dui nanumi koya ga kei na qiqo ni rai. E kila ni na vakatovolei sara vakaca, qai vakamatei tale ga. (Maciu 20:​18, 19; Iper. 4:15) Ni noda iVakaraitaki, a vakavulici keda kina na sala meda yalodina tiko ga kina.

¹⁵ Ni oti ga vakalailai nona papitaiso o Jisu, a temaki koya sara o Setani me vakanadakuya na bula vinaka duadua​—ia a dreve na sasaga qo. (Maciu 4:​1-11) Qo e ka ni vuli vei keda ni veitalia na sasaga i Setani, eda se rawa ni yalodina tiko ga. Ena rairai vakasagai ira tale ga na nakinaki tiko mera papitaiso kei ira tale ga na se qai papitaiso. (1 Pita 5:8) E rawa nira tusaqati keda o ira na lewe ni vuvale era rairai nanuma nira vukei keda tiko, ia era vakacalai ena so na keda itukutuku. Ia eso na veivakatovolei va qo e rawa nida vakaraitaka kina na itovo vinaka vaKarisito, me vaka na veidokai kei na maqosataki ni noda sauma na taro nida vunau. (1 Pita 3:15) Na ivakaraitaki va qo e rawa ni yaga sara vei ira na vakarogoci keda.​—1 Tim. 4:16.

Dei Tiko ga ena Bula Vinaka Duadua!

16, 17. (a) Cava na tolu na yavu e rawati kina na bula e kune ena Vakarua 30:​19, 20? (b) Eratou tokona vakacava o Jisu, Joni kei Paula na veika a vola o Mosese?

¹⁶ A uqeti ira na Isireli o Mosese mera digia na bula vinaka duadua, qo rauta e 1,500 na yabaki ni bera ni mai bula e vuravura o Jisu. E tukuna o koya: “Au sa cavuti lomalagi kei vuravura edaidai me kila, ni’u sa tauca e matamuni na bula kei na mate, na veivakalougatataki kei na veicudruvi: ia mo ni digitaka mada na bula, mo ni bula kina, koi kemuni kei na nomuni kawa: mo ni lomani Jiova na nomuni Kalou, mo ni vakarorogo ki na nona vosa, mo ni kabiti koya talega.” (Vkru. 30:​19, 20) A sega ni qai yalodina o Isireli vua na Kalou, ia e sega ni veisau na tolu na yavu a vola o Mosese ena rawati kina na bula. Ratou cavuta tale na tikina qo o Jisu kei na so tale.

¹⁷ Kena imatai, ‘meda lomani Jiova na noda Kalou.’ Eda vakaraitaka noda lomana na Kalou, ena noda muria nona ivalavala dodonu. (Maciu 22:37) Kena ikarua, ‘meda vakarorogo vei Jiova’ ena noda vulica na Vosa ni Kalou da qai talairawarawa ena nona ivakaro. (1 Joni 5:3) Qo e vinakati kina noda tiko vakawasoma ena soqoni vaKarisito, na vanua e dau veivosakitaki kina na iVolatabu. (Iper. 10:​23-25) Kena ikatolu, ‘meda kabiti Jiova.’ Se mani ituvaki cava eda sotava, meda vakabauta tiko ga na Kalou da qai muri Luvena.​—2 Kor. 4:​16-18.

18. (a) E vakamacalataka vakacava na Watch Tower na ka dina ena yabaki 1914? (b) Meda raica vakacava na rarama ni ka dina nikua?

¹⁸ E ka ni veivakalougatataki dina ni salavata na iVolatabu na noda bula! Ena 1914, a tabaki kina na itukutuku bibi qo ena Watch Tower: “Eda sega li ni kalougata qai mamarau? E sega li ni yalodina noda Kalou? Ke dua e kila vinaka e dua na ka, me muria sara. Ke o ni kunea e dua na ka e vinaka sara, keitou nuitaka ni o ni na tukuna vei keitou. E sega tale ni dua na ka vinaka keitou kunea e vaka na Vosa ni Kalou. . . . E sega ni vakamelei rawa na vakacegu, na reki kei na veivakalougatataki keitou vakila, ni keitou kila na Kalou dina. E vakaceguya noda vakasama kei na lomada na iTalanoa me baleta na Vuku ni Kalou, nona Lewadodonu kei na nona Loloma. Keitou sa sega ni qai via vaqaqara tale. E sega tale ni dua na ka e gadrevi, ia eda gadreva ga me levu na ka meda kila me baleti koya na noda Kalou.” (The Watch Tower, 15 Tiseba, 1914, tabana e 377-378) E sega ni veisau na noda vakavinavinakataka na rarama vakayalo kei na ka dina. E tiko na vuna vinaka meda reki kina baleta nida “lako voli tu e na rarama i Jiova.”​—Aisea 2:5; Same 43:3; Vkai. 4:18.

19. Na cava mera kua kina ni lokuyara o ira era se bera ni papitaiso?

¹⁹ Ke o vinakata mo ‘lako voli ena rarama i Jiova’ ia o se bera ni yalayala qai lotu vaKarisito papitaiso, kua ni o lokuyara tale tiko. Muria sara na ivakatagedegede vakaivolatabu mo rawa ni papitaiso kina​—qo na sala vinaka duadua eda vakaraitaka kina noda vakavinavinakataka na veika rau sa cakava vei keda na Kalou kei Karisito. Solia vei Jiova na ka e bibi duadua vei iko​—nomu bula. Mo vakaraitaka ni o na vakayacora na inaki ni Kalou ena nomu vakadamurimuri Luvena. (2 Kor. 5:​14, 15) E sega ni vakataratututaki ni qo na bula vinaka duadua!

O na Sauma Vakacava?

• Na cava e vakaibalebaletaka noda papitaiso?

• Na veivakalougatataki cava e rawati ena noda yalayala vua na Kalou kei na papitaiso?

• Na cava e bibi kina noda vuli vei Jisu?

• Na cava ena uqeti keda meda muria tiko ga na bula vinaka duadua?

[iYaloyalo ena tabana e 25]

Nomu papitaiso e vakaraitaka ni o vinakata na bula vinaka duadua

[iYaloyalo ena tabana e 26]

O sa taqomaki beka ena “yasana vuni”?