Vorata na Veivakacalai i Setani
‘DOU kua ni vakaisini kemudou. Ena sega ni vukei kemudou na nomudou Kalou. Dou vakamalumalumu ga de dou na vakaleqai!’ Qo na itukutuku a lai tukuna o Rapisake, na italai nei Senakaripi na Tui Asiria, vei ira na Isireli. Era kabakorotaki Jutia nona mataivalu. E nona inaki na italai ya me vakayalolailaitaki ira na Isireli, qai vakarerei ira mera soro.—2 Tui 18:28-35.
Era kilai na kai Asiria ni vakadomobula qai veivakalolomataki nodra ivalavala. Era vakarerei ira nodra meca ena nodra tukuna na veika vakadomobula era dau cakava vei ira nodra bobula. E tukuna o Philip Taylor, dua na dauvolaitukutuku, nira dau “cakava eso na iwalewale ni veivakarerei salavata kei na itukutuku lasu, e kena inaki mera vakayalolailaitaki ira era sa vuaviritaka, qai vesumonataki ira eso era rawa ni veimecaki kei ira, ena so na itukutuku vakarisekete.” E dau veivakamuai na itukutuku veivakacalai. E tukuna o Taylor ni “rawa ni vakacaraka na vakasama.”
Na lotu vaKarisito dina ena “sega ni veivala wale ga kei ira era vakalewe ra qai vakadra, ia era veivala . . . kei ira na yalo ca tawarairai ena veiyasana vakalomalagi,” qo o ira na veika bula vakayalo era talaidredre vua na Kalou. (Efeso 6:12) E nodra iliuliu sara ga o Setani na Tevoro. E dau veivakarerei qai tukuna na itukutuku veivakacalai.
E tukuna o Setani ni rawa ni vakavuna noda tawayalodina. Ena nona gauna na peteriaki o Jope, a tukuna vua na Kalou o Jiova: “Na nona ka kecega ena solia na tamata me bula kina.” Kena ibalebale ga ya, ni rawa ni vakayalia e dua nona yalodina vua na Kalou ke vakatovolei. (Jope 2:4) E dina beka o Setani? E vakaiyalayala beka ga na ka eda rawa ni cakava meda yalodina kina—ena noda biuta na yavu ni noda vakabauta me rawa nida bula kina? E vinakata sara ga o Setani qo. Koya gona, e dau vakayagataka o koya na itukutuku veivakacalai meda rawa ni nanuma kina qori. Meda raica mada eso na iwalewale e dau vakayagataka o koya, meda rawa ni kila na sala meda vorati koya kina.
Nodra “Yavu na Kuvu-ni-soso”
A vakayagataki Elifasi o Setani, dua vei ratou na tolu na itokani i Jope ratou sikovi koya, me tukuna nida na sega ni rawa ni yalodina vua na Kalou. E okati keda meda vakai “ira sa tiko e na vale qele,” e tukuna kina o koya vei Jope: “A nodra yavu na kuvu-ni-soso, ka sa butuqaqi ira na sarasara? Era sa vurumemei tiko mai na mataka ka yacova na yakavi: era sa yali laivi tu ga ka sega e nanuma kina.”—Jope 4:19, 20.
Eda vakatauvatani ena tiki ni iVolatabu meda “saqa qele”—kuro e caka mai na qele qai kavoro rawarawa. (2 Kor. 4:7) Eda ka malumalumu baleta nida kawa ivalavala ca da qai sega ni uasivi. (Roma 5:12) Nida tu duadua e rawarawa nona rawai keda o Setani. Ia nida lotu vaKarisito, eda nuitaka nona veivuke o Jiova. Dina nida dau cala, ia eda se talei tiko ga vua. (Aisea 43:4) Kuria qo, ni dau solia nona yalo tabu o Jiova vei ira era kerea. (Luke 11:13) E rawa ni solia na “kaukaua e uasivia na kaukaua ni tamata” nona yalo tabu nida vosota kina na leqa cava ga e vakavuna o Setani. (2 Kor. 4:7; Fpai. 4:13) Ke da vorata na Tevoro, da qai “tudei,” eda na sega ni yavalati rawa, ena vakaukauataki keda tale ga na Kalou. (1 Pita 5:8-10) Koya gona, meda kua ni rerevaki Setani na Tevoro.
E Dua “Sa Daugunuva na Ca”
A taroga o Elifasi, “A cava na tamata, me sa savasava ko koya? Kei koya sa sucu mai vua na yalewa, me yalododonu ko koya?” Sa qai sauma tale: “Raica, sa sega ni vakadinati ira na nona era yalosavasava [na Kalou]; ia sa sega ni savasava e matana na lomalagi. Ka sa vakaevei na kena vakasisila kei na kena dukadukali na tamata, ko koya sa daugunuva na ca me vaka na wai?” (Jope 15:14-16) A tukuna tiko o Elifasi vei Jope ni sega ni dua e yalododonu ena mata i Jiova. E dau vakayagataka tale ga na Tevoro na nanuma cala. E vinakata meda leqataka noda malumalumu makawa, da vakalewai keda vakasivia, meda nanuma nida na sega ni vakabulai rawa. E vinakata tale ga meda nanuma ni o Jiova e namaka e levu na ka, qai sega sara ni dau yalololoma, veivosoti, se via tokoni keda ena vosoti ni noda malumalumu.
Eda “ivalavala ca kece, eda sega ni yacova rawa tale ga na lagilagi ni Kalou.” E sega gona ni dua e rawa ni yacova na ivakatagedegede uasivi i Jiova. (Roma 3:23; 7:21-23) Ia e sega ni kena ibalebale qo nida tawayaga vua. E kila o Jiova ni o koya “na gata makawa, e vakatokai na Tevoro se o Setani,” e taketetaki keda sara tiko ga ena noda ivalavala ca. (Vkta. 12:9, 10) E kila o Jiova “ni da sa kuvu-ni-soso” qai sega ni “ia tikoga na veivunauci.”—Same 103: 8, 9, 14.
Ena “veivosoti vakalevu” o Jiova ke da biuta na ivakarau ca da qai torovi koya ena veivutuni. (Aisea 55:7, NW; Same 51:17) E tukuna na iVolatabu ke “vaka na ka kulakula na nomudoui valavala ca, sa na vulavula me vaka na uca-vulavula.” (Aisea 1:18) Meda kua gona ni soro koso ni vakayacora na loma ni Kalou.
Me vaka nida ivalavala ca, eda na sega ni yalododonu tiko ga vua na Kalou. Rau vakayalia o Atama kei Ivi na bula uasivi kei na bula tawamudu, sega ga ena vuku drau, ena vukudra tale ga na kawatamata. (Roma 6:23) Ena vuku ni loloma levu i Jiova, e vakarautaka na sala me vosota kina noda ivalavala ca ke da vakabauta na isoro i Jisu Karisito na Luvena. (Maciu 20:28; Joni 3:16) Sa dua dina na ivakaraitaki uasivi ni “loloma soli wale”! (Taito 2:11) E rawa ni vosoti noda ivalavala ca! Koya gona, cava tale meda vakalaivi Setani kina meda nanuma nida na sega ni vosoti rawa?
“Tara na Suina kei na Lewena”
E tukuna o Setani ni na sega ni yalodina o Jope ke tauvi koya e dua na mate. Nona bolei Jiova na Tevoro, a tukuna kina: “Tara na suina kei na lewena, ena qai vosavakacacataki kemuni ki matamuni.” (Jope 2:5) Ena marau vakalevu na Meca ni Kalou ke rawa ni vakacalai keda meda nanuma nida tawayaga ke da tautauvimate.
Ia ena sega ni biuti keda o Jiova ke da sega ni cakava rawa na ka eda dau cakava tu e liu ena noda sokalou. Vakacava ke vakasagai qai vakamavoataki e dua noda itokani voleka? Eda sa na vakawaleni koya beka ena nona sega ni cakava rawa vei keda e levu na ka me vaka ga e dau cakava e liu? Sega! Eda na lomani koya da qai kauaitaki koya tiko ga—vakabibi ke a mavoa ena vukuda. Sega li ni dodonu meda raici Jiova tale ga va qo? E tukuna na iVolatabu “Ni sega ni tawayalododonu na Kalou me guilecava na nomuni cakacaka kei na nomuni kauaitaka dina na yacana.”—Iper. 6:10.
E talanoataki ena iVolatabu “e dua na yada dravudravua,” ena nona dau tokona na veiqaravi vua na Kalou me vica na yabaki. Ena gauna a raica kina o Jisu nona biuta “e rua na ilavo lailai sara” ena kato ni ilavo ena dua na vale ni soro, e okata beka na yada kei na nona cau me tawayaga? Kena veibasai sara, a vakacaucautaki koya ena nona solia nona vinaka kece ena ituvaki a tu kina, me tokona na sokalou dina.—Luke 21:1-4.
Ke da yalodina tiko ga, eda kila ni na dei noda veiwekani kei Jiova, veitalia na ituvaki dredre eda vakila ena vuku ni ivalavala ca, me vaka na qase kei na tautauvimate. Ena sega ni biuti ira era yalodina na Kalou ena vuku wale ga ni so na ituvaki e vakadredretaka nodra veiqaravi.—Same 71:9, 17, 18.
Moni Taura Matua “na iSala ni Bula”
Eda na taqomaki keda vakacava mai na veivakacalai i Setani? E vola na yapositolo o Paula: “Moni vakaukauataki tiko ga ena nona cecere na Turaga kei na nona qaqa. Ni vakaiyaragi ena iyaragi kece ni Kalou moni vorata kina na ivadi ni Tevoro.” Dua na iyaragi vakayalo “na isala ni bula.” (Efeso 6:10, 11, 17) Ena vuku ni nona dau veivakacalai o Setani ena vinakati meda taura matua na isala ya da qai daramaka. Na isala e taqomaka na ulu ni sotia. Na noda “inuinui ni bula”—noda nuidei ena kena vakayacori na yalayala ni Kalou me baleta na vuravura vou—ena taqomaki keda mai na veivakacalai i Setani. (1 Ces. 5:8) E dodonu me dina da qai vakabauta dei na nuinui qori, ena noda vulica vakataki keda na iVolatabu.
E vosota o Jope eso na ituvaki warumisa qai veivakacudrui i Setani. Ni dei nona vakabauta na nuinui ni veivakaturi, a sega ni vakayalolailaitaki koya mada ga o mate. Ia a tukuna ga vei Jiova: “Ko ni na kaci mai, ka’u na rogo yani vei kemuni: ko ni na vinakata na cakacaka ni ligamuni.” (Jope 14:15) Ke mate mada ga o Jope ena vuku ni nona yalodina, e vakabauta ni nona lomani ira nona dauveiqaravi yalodina na Kalou, ena uqeti koya me vakaturi ira tale mai na mate.
Me va mada ga qori noda vakabauta na Kalou dina. E rawa ni kauta laivi o Jiova na ka kece e vakavuna mai o Setani se o ira na nona ilawalawa meda saqati kina. Nanuma tale ga ni vakadeitaka vei keda o Paula: “Ia e dau dina na Kalou ena nona vosa, oya ni na sega ni vakalaiva moni sotava na ka ni veivakatovolei oni na sega ni taqea rawa. Ena vakarautaka tale ga na sala moni vosota rawa kina.”—1 Kor. 10:13.
[iYaloyalo ena tabana e 20]
E raica vakabibi o Jiova na nomu veiqaravi ena yalodina
[iYaloyalo ena tabana e 21]
Moni taura matua na isala ni bula, dara tiko ga