Na Ka a Vakavulica o Jisu me Baleti Koya

“E kila vinaka o Jisu na veika baleti koya, na vanua e lako mai kina, na vuna e lako mai kina i vuravura, kei na nona bula se bera mai.”​—DAUVOLAIVOLA O HERBERT LOCKYER.

MEDA kila mada eliu eso na ka me baleti Jisu, me rawa nida qai ciqoma, da vakabauta tale ga na ka a vakavulica. O cei sara mada o Jisu? E lako mai vei? Na cava na inaki ni nona bula? Eda na kila na kena isau ena vosa sara ga a cavuta ena Kosipeli ratou a vola​—o Maciu, Marika, Luke, kei Joni.

A bula tu eliu ni bera ni sucu e vuravura Ena dua na gauna a tukuna o Jisu: “Au a bula e liu qai muri sara o Eparama.” (Joni 8:58) Ni bera ni sucu o Jisu a sa bula voli o Eparama ni rauta e 2,000 na yabaki. Ia o Jisu a sa bula rawa tu ni bera ni sucu o Eparama na peteriaki yalodina. A bula tu mai vei o Jisu? E vakamacalataka, “Au . . . lako sobu mai lomalagi.”​—Joni 6:38.

Na Luve ni Kalou E levu na luvei Jiova agilosi, ia e duatani duadua o Jisu. E tukuna o Jisu ni o koya “na Luvena e duabau ga e bulia na Kalou.” (Joni 3:18) Na vosa ya e vakaraitaka ni o Jiova sara ga a buli Jisu. Ena vuku i Luvena duabau ga, e bulia kina o Jiova na veika tale eso.​—Kolosa 1:16.

“Na Luve ni tamata” Na matavosa “Luve ni tamata” a vakayagataka vakalevu duadua o Jisu me dusi koya. (Maciu 8:20) E vakaraitaka ya ni o koya e sega ni dua na agilosi a veisau me tamata se na Kalou a liatamata. Ia o koya a mai bula dina vakatamata. Ena nona yalo tabu a tokitaka kina na bula i Luvena mai lomalagi na Kalou i vuravura, me kunekunetaki ena nona katonigone e dua na goneyalewa se sega ni tara tagane. Mani sucu gona o Jisu me uasivi, sega ni ivalavala ca.​—Maciu 1:18; Luke 1:35; Joni 8:46.

Mesaia Yalataki A tukuna e dua na yalewa ni Samaria vei Jisu, “Au kila ni na lako mai na Mesaia.” E kaya vua o Jisu: “O koya sara ga qori e vosa tiko yani qo.” (Joni 4:​25, 26) Na vosa “Mesaia,” kei na “Karisito,” e kedrau ibalebale ruarua “na Lumuti.” A lumuti se digitaki Jisu na Kalou ina dua na itavi lavotaki ena kena vakayacori nona yalayala.

Cakacaka e Vakaliuca A tukuna ena dua na gauna o Jisu: “E dodonu meu tukuna tale ga na itukutuku vinaka ni matanitu ni Kalou ena veikoro tale eso, ni qo na ka au talai mai kina.” (Luke 4:43) E bibi duadua vua na vunautaki ni itukutuku vinaka ni Matanitu ni Kalou, mai na nona cakava na cakacaka vinaka vei ira eso. Ena qai vakamacalataki malua na veika a vakavulica o Jisu me baleta na Matanitu ni Kalou.

E macala ni o Jisu e sega ni dua ga na tamata wale.a Eda na raica ni nona a bula tu mai lomalagi e vakaibalebale vakalevu kina na ka e mai tukuna e vuravura. Meda kurabuitaka beka ni itukutuku e kacivaka ena veisautaka nodra bula e milioni?

[iVakamacala e ra]