Na Ka a Vakavulica o Jisu me Baleta na Matanitu ni Kalou

“E lako . . . ina veikoro lelevu kei na veikoro lalai me lai vunautaka na itukutuku vinaka ni matanitu ni Kalou.”​—LUKE 8:1.

EDA dau via talanoataka na veika e bibi vei keda, na veika eda taleitaka. A tukuna o Jisu, “ni na cavuta ga na gusumudou na ka e sinai tu e lomamudou.” (Maciu 12:34) Eda rawa ni kaya ni a bibi dina vei Jisu na veika me baleta na Matanitu ni Kalou nida vakasamataka na veika a tukuna ena nona cakacaka vakaitalatala.

Na cava na Matanitu ni Kalou? Qo e dua dina na matanitu e liutaka e dua na tui. E tauyavutaka sara ga na Kalou. Ni cavuta wasoma o Jisu na Matanitu qori, e usutu sara ga ni itukutuku a kacivaka. E sivia na 110 na vanua ena va na Kosipeli e tukuni kina na Matanitu. Ia a sega ni veivakavulici ga o Jisu ena ka e tukuna. Na ka tale ga e vakayacora e kilai kina na veika me baleta na Matanitu kei na ka ena cakava.

O Cei na Kena Tui? Era sega ni digia na tamata na Tui ni Matanitu ni Kalou. Na iLiuliu qo e digitaka sara ga na Kalou. A vakaraitaka o Jisu ena nona veivakavulici ni Kalou e digitaki koya me Tui.

E kila ni parofisaitaki ena iVolatabu, ni Matanitu ena veiliutaki kina na Mesaia yalataki ena vakataudeitaki me tawamudu. (2 Samuela 7:​12-14; Taniela 7:​13, 14; Maciu 26:​63, 64) Eda rawa ni vakasamataka nona doudou o Jisu me tukuna ni o koya na Mesaia yalataki. Kena ibalebale a vakabauta dei ni o koya na Tui e digia o Jiova. (Joni 4:​25, 26) Sa rauta me cavuta vakavica vata o Jisu na vosa “noqu matanitu.”​—Joni 18:36.

A vakavuvulitaka tale ga ni so tale era na veiliutaki kei koya ena Matanitu. (Luke 22:​28-30) O ira qori e vakatoka na “qelenisipi lailai,” ni yalani na kedra iwiliwili. E tukuna me baleti ira: “Sa vakadonuya na Tamamudou me solia vei kemudou na matanitu.” (Luke 12:32) Na iotioti ni ivola ena iVolatabu e vakaraitaka nira le 144,000 era vakalougatataki mera veiliutaki vata kei Karisito.​—Vakatakila 5:​9, 10; 14:1.

E tiko e vei na Matanitu ni Kalou? A tukuna o Jisu vei Ponitio Pailato na iliuliu kei Roma: “E sega ni vakavuravura na noqu matanitu.” (Joni 18:36) Na Matanitu ni Kalou e kena Tui o Karisito e sega na kena mata e vuravura. E dau vakatoka o Jisu na Matanitu ni Kalou me “matanitu vakalomalagi.”a (Maciu 4:17; 5:​3, 10, 19, 20) Koya gona e tiko mai lomalagi na Matanitu ni Kalou.

Ni oti nona bula e vuravura, a namaka o Jisu me lesu tale i lomalagi. E tukuna ni na “lai vakarautaka e dua na tikina,” mera na tomani koya kina o ira era na veiliutaki kei koya.​—Joni 14:​2, 3.

Na cava ena cakava na Matanitu ni Kalou? A vakavulici ira na rogoci koya o Jisu mera kerea vua na Kalou: “Me yaco mai na nomuni matanitu. Me caka na lomamuni e vuravura me vaka e caka tiko mai lomalagi.” (Maciu 6:​9, 10) Sa vakayacori tiko na inaki ni Kalou e lomalagi. Me yaco tale ga qori e vuravura, ena vakayagataka gona na Kalou nona Matanitu. Na Matanitu qo ena vakayacora na veisau vakatubuqoroqoro e vuravura.

Cava ena cakava e vuravura? A vakavulica o Jisu ni Matanitu ni Kalou ena vakaotia na ca ena nodra vakawabokotaki o ira era dei tiko ga ni caka ca. (Maciu 25:​31-34, 46) Kena ibalebale ni sa na mudu na veidabui kei na ca kece. Era na tiko e vuravura na “yalomalua,” ivalavala dodonu, o ira na dau loloma, “yalosavasava,” kei ira na guta na bula veiyaloni me vaka a vakavulica o Jisu.​—Maciu 5:​5-9.

O ira na tamata yalodina va qori era na bula beka ena vuravura e dukaveluvelu? Sega! A yalataka o Jisu ni na vakatubuqoroqoro na veisau ena cakava na Matanitu ni Kalou e vuravura. E tukuna na turaga a rube ena yasai Jisu: “Jisu, qai nanumi au ni oni sa tiko ena nomuni matanitu.” E kaya vua o Jisu: “Au tukuna vakadodonu vei iko nikua, daru na tiko vata mai Parataisi.” (Luke 23:​42, 43) Io, na Matanitu ni Kalou ena veisautaka na vuravura qo me parataisi​—me vaka na kena a tu ena were o Iteni.

Cava tale ena cakava ena vukuda? A sega ni yalataka wale ga o Jisu na veika ena cakava na Matanitu ni Kalou. A vakaraitaka tale ga na ka ena cakava. Na nona cakamana o Jisu e ivakaraitaki lailai ga ni veika lelevu ena qai cakava ena gauna sa na veiliutaki kina vakatui ena Matanitu ni Kalou. E tukuna me baleti Jisu na Kosipeli a uqeti vakalou: “E qai lakova o Jisu na yasayasa taucoko o Kalili me veivakavulici ena nodra valenilotu, me vunautaka na itukutuku vinaka ni matanitu ni Kalou, me vakabulai ira tale ga na lewenivanua ena veimataqali mate e tauvi ira kei na malumalumu kece.”​—Maciu 4:23.

E levu na mataqali mate a vakabula o Jisu. A “vakavuna me rai o koya e sucu mataboko.” (Joni 9:​1-7, 32, 33) E mate vakasisila na vukavuka, ia ni dodoka na ligana o Jisu qai tarai koya na turaga a tauva tu na mate ya mani bula vinaka tale. (Marika 1:​40-42) Nira kauta mai vua “e dua na didivara, e galu tale ga,” a vakaraitaka o Jisu ni rawa ni vakavuna “mera rogo na didivara, ra vosa tale ga na galu.”​—Marika 7:​31-37.

E tu tale ga na kaukaua vua na Tui digitaki ni Kalou me vakaturi ira na mate. E volaitukutukutaki e tolu na gauna a vakatura kina na mate o Jisu. Qori nona vakatura na luvena tagane duadua ga e dua na yada, e dua na goneyalewa yabaki 12, kei Lasarusa na nona itokani lomani.​—Luke 7:​11-15; 8:​41-55; Joni 11:​38-44.

A gusui Jisu na yapositolo o Joni ena veika totoka e waraki ira tu era na vakarurugi ena Matanitu ni Kalou: “Raica! E sa tiko vei ira na tamata na vale ni Kalou, ena tiko vata kei ira o koya, era na nona tamata. Na Kalou sara ga ena tiko vata kei ira. Ena qusia tale ga na wainimata kece mai na matadra, sa na sega tale na mate, na lolosi, na tagiyaso, kei na mosi. Sa sega na veika e dau yaco e liu.” (Vakatakila 1:1; 21:​3, 4) Vakasamataka mada na vuravura sa na sega kina na rarawa, na mosi kei na mate! Sa qai vakavatukana vakadua na masu a vakavulica o Jisu vei keda​—sa yaco dina na inaki ni Kalou e vuravura me vaka ga mai lomalagi.

Tekivu e naica na veiliutaki ni Matanitu ni Kalou? A vakavulica o Jisu ni nona veiliutaki vakatui ena veidonui kei na gauna duatani e vakatoka na nona “sa tiko.” A vakamacalataka vakamatailalai ena parofisai o Jisu na veika ena kilai kina ni sa tekivu veiliutaki vakatui. Na loma ni gauna qori ena vakatakilakilataki ena leqa e tarai vuravura taucoko, vaka kina na ivalu, leqa ni kakana, uneune, matedewa, kei na tubu ni ivalavala tawadodonu. (Maciu 24:​3, 7-12; Luke 21:​10, 11) Na ka qori kei na levu tale a parofisaitaka o Jisu era tekivu laurai mai na 1914, a yaco kina na iMatai ni iValu Levu. Sa veiliutaki tiko vakatui o Jisu ena gauna qo, sa voleka tale ga me vakayacora na inaki ni Kalou e vuravura na nona Matanitu.b

Ena yaga vakacava vei iko na veiliutaki ni Matanitu ni Kalou? Ena vakatau sara ga ena nomu ciqoma se sega na itukutuku a vunautaka o Jisu.

[iVakamacala e ra]