Jisu Karisito—Nona iTukutuku kei na Kena Yaga
“Au lako mai mera rawata na bula, ia mera bula balavu.”—JONI 10:10.
A SEGA ni lako mai vuravura o Jisu Karisito me qaravi, me veiqaravi ga. A solia vei keda ena nona cakacaka vakaitalatala e dua na iloloma e sega ni voli rawa—na itukutuku dina me baleta na Kalou kei na nona inaki. O ira na ciqoma na itukutuku qori ena vinaka cake nodra bula nikua, me vaka ga era vakadinata e milioni vakacaca na lotu vaKarisito dina.a Ia e usutu bibi ni itukutuku a vunautaka o Jisu na iloloma talei duadua—nona cabora nona bula uasivi ena vukuda. Na ka eda cakava me baleta na usutu bibi duadua qori e vakatau kina noda bula tawamudu.
Na ka e solia na Kalou kei Karisito A kila o Jisu nira na vakararawataki koya na kena meca, lai tini sara ena nona mate. (Maciu 20:17-19) Ia e kaya ena nona vosa kilai levu ena Joni 3:16: “Na levu ni nona lomani vuravura na Kalou e solia kina na Luvena e duabau ga e bulia, mera kua ni rusa o ira era vakabauti koya, mera rawata ga na bula tawamudu.” A kaya tale ga o Jisu ni lako mai me “solia tale ga na nona bula me kedra ivoli e lewe levu.” (Maciu 20:28) Na cava e tukuna kina ni na solia nona bula, ia ena sega ni kau tani vua?
Na loloma e tawavakatauvatani rawa e uqeta na Kalou me vakarautaka na sala meda vakabulai kina mai na ivalavala ca eda sucukaya mai kei na kena revurevu—na bula e sega ni uasivi kei na mate. A vakayacora qori o Jiova ena nona tala mai na luvena duabau ga e bulia me mate vakaisoro. A yalorawarawa o Jisu me solia nona bula uasivi ena vukuda. Na isolisoli qori i Jiova e vakatokai me ivoli, e nona iloloma uasivi vei keda.b E rawa nida rawata kina na bula tawamudu.
Na ka mo cakava E rawa beka ni nomu iloloma tale ga na ivoli? Qori e vakatau sara ga vei iko. Kena ivakatautauvata: Kaya mada e dua e solia tiko vei iko e dua na iloloma e olo vinaka tu. E sega ni nomu na iloloma qori vakavo ke o dodoka yani na ligamu o taura. E va tale ga qori na ivoli e lolomataka vei keda o Jiova, ena sega ni nomu vakavo ke o dodoka na ligamu mo taura. Ena sala cava?
A kaya o Jisu ni o ira era “vakabauti koya” era na bula tawamudu. E okati ena vakabauta qori na nomu ivakarau ni bula. (Jemesa 2:26) Ni tukuni mo cakacakataka nomu vakabauti Jisu, e kena ibalebale mo moica nomu bula me salavata kei na ka e dau tukuna, e cakava tale ga. O na rawa ga ni cakava qori ke o kilai rau vinaka o Jisu kei Tamana. A kaya o Jisu: “Ena rawata na bula tawamudu o koya e vulica tiko ga na veika e baleti kemuni na Kalou dina duadua ga, kei Jisu Karisito oni tala mai.”—Joni 17:3.
A vunautaka o Jisu ena rauta na 2,000 na yabaki sa oti na itukutuku e veisautaka na nodra bula e milioni vakacaca e veiyasai vuravura. O via vakalevutaka na nomu kilaka me baleta na itukutuku qori kei na sala e rawa ni yaga kina vei iko kei ira na wekamu lomani ena gauna qo me tawamudu? Era na marau na iVakadinadina i Jiova mera vukei iko.
Ena tomani ena vica tale na ulutaga e tarava na nomu kilai Jisu Karisito, na turaga a vunautaka na itukutuku ena veisautaka nomu bula me tawamudu.
[iVakamacala e ra]
a Era sega ni imuri dina i Karisito o ira kece era kaya nira lotu vaKarisito. O ira na imuri dina i Jisu era saga mera bulataka na ka dina a vakavulica me baleta na Kalou kei na nona inaki.—Maciu 7:21-23.
b Me ikuri ni ivakamacala me baleta na ivakavuvuli vakaivolatabu ni ivoli, raica na ulutaga, “Na Keda iVoli—Na iLoloma Uasivi ni Kalou,” wase 5 ni ivola Na Cava Sara Mada e Kaya na iVolatabu? tabaka na iVakadinadina i Jiova.