iVakavuvuli Dina kei na iVakavuvuli Lasu—Ka Dina me Baleti Jisu
CAVA O NANUMA? E DINA SE LASU NA IVAKAVUVULI QO?
A sucu o Jisu ena 25 Tiseba.
Ratou sikovi Jisu e tolu na turaga vuku ena gauna a sucu kina.
E sega ni dua na taci Jisu.
O Jisu na Kalou a liatamata.
A sega ni turaga vinaka wale ga o Jisu.
E LEVU era na tukuna ni dina na itukutuku qori. Eso tale era na kaya ni dredre me vakabauti se sega ni kilai na kena itukutuku matata. De dua era na tukuna ni bibi ga meda vakabauti Jisu, e sega so ni yaga me kilai na kena itukutuku dina.
Ia e duatani na ka e tukuna na iVolatabu. E uqeti keda meda “kila na ka dina me baleta na noda Turaga o Jisu Karisito.” (2 Pita 1:8) Eda na rawata na kilaka qori nida vulica na Kosipeli. E sereka na itukutuku dina me baleti Jisu me rawa nida vakaduiduitaka na ivakavuvuli dina mai na ivakavuvuli lasu. Meda raica mada na ka e tukuna na Kosipeli me baleta na vakabauta sa cavuti oti.
IVAKAVUVULI: A sucu o Jisu ena 25 Tiseba.
DINA SE LASU: LASU.
E sega ni tukuni ena iVolatabu na vula se na tikinisiga a sucu kina o Jisu. Ia e vu mai vei na ivakavuvuli ni a sucu ena 25 Tiseba? E kaya na Encyclopædia Britannica, ni so era tukuna nira lotu vaKarisito “era vinakata me lakolako vata na siganisucu i Jisu kei na solevu vakaRoma . . . na soqo ni vulaililiwa e dau tekivu ni sa na balavu tale na siga qai veisau tale ga na itutu ni matanisiga me suka tale ena kena ikotokoto dodonu e lomalagi.” E kuria na ivakamacala qori ni levu na solevu ni Kirisimasi e tauyavu mai na “nodra solevu butobuto na dauteitei e dau caka ena vulaililiwa.”
Ena marautaka beka o Jisu me solevutaki nona siganisucu ena 25 ni Tiseba? Vakasamataka mada qo: E sega ni kilai na siga a sucu kina o Jisu. Na iVolatabu e sega ni tukuna meda solevutaka na nona siganisucu, e sega tale ga na ivakadinadina nira cakava qori na nona imuri. Ena yasana adua, e tukuna ga na iVolatabu na siga a mate kina o Jisu, qai vakaroti ira nona imuri mera vakananuma.a (Luke 22:19) A vinakata sara ga o Jisu me vakabibitaki na yaga ni nona mate vakaisoro, sega ni nona sucu.—Maciu 20:28.
IVAKAVUVULI: Eratou sikovi Jisu ena siga ni nona sucu e tolu na tamata vuku (so era vakabauta ni ratou tui).
DINA SE LASU: LASU.
De dua o sa raica eso na itaba se so na ivakatakarakara ni nona davo tu o Jisu ena valenimanumanu, ratou sikovi koya yani e tolu na tamata vuku me ratou soli iloloma. Na ivakatakarakara qori e italanoa buli ga, e sega ni itukutuku dina.
E macala nira sikovi Jisu eso mai na Isi era dauraikalokalo. (Maciu 2:1) Era raici Jisu beka ni davo tu ena vale ni manumanu? Sega; era sikovi koya ga ena dua na vale ni oti e vica na vula nona sucu o Jisu.—Maciu 2:9-11.
Vakacava na levu ni vulagi, rua, tolu, tolusagavulu? E sega ni tukuna na iVolatabu. Na vakasama ni le tolu e rairai vu mai na levu ni loloma e soli.b (Maciu 2:11) So era tukuna ni o ira na tamata vuku qo era matataka na dui matatamata. Ia e sega ni tukuni ena iVolatabu na vakasama qori. E tukuna ga e dua na daunivakamacala ni Kosipeli, ni itukutuku buli qo e nona vakasama ga e dua na “dauvolaitukutuku makawa ena ikawalu ni senitiuri.”
IVAKAVUVULI: A sega na taci Jisu.
DINA SE LASU: LASU.
E vakamatatataki sara tu ga ena Kosipeli ni a so tale na taci Jisu. Na Kosipeli i Luke e vakatokai Jisu me “ulumatua” i Meri, qo e vakaraitaka ni so tale na luve i Meri.c (Luke 2:7) Ena Kosipeli i Marika era tukuna eso na kai Nasareci ni o Jisu a tautauvata ga kei ratou na tacina, e sega ni dua me dokai. Era taroga: ‘Sega li ni matai o koya qo, na luvei Meri, kei na tuakai Jemesa, kei Josese, kei Juta, kei Saimoni? kei na ganena, eratou sa sega li ni tiko vata kei keda?’—Marika 6:3, Ai Vola Tabu; Maciu 12:46; Joni 7:5.
E matata vinaka na ka e tukuna na Kosipeli, ia se ra nanuma ga e levu na daunicioloji ni o Jisu duadua ga na luvedrau o Josefa kei Meri. So era tukuna ni ratou tavalei Jisu na veitacini eratou vakamacalataki e cake.d So tale era nanuma nira luvei Meri vakacabecabe. Ia vakasamataka mada, ke luvei Meri duadua ga o Jisu, era na cavuta beka na vosa ya na kai Nasareci? Ena yasana adua, eso era a raica sara ga na nona bukete voli o Meri. Era kila tale ga ni o Jisu a dua ga vei iratou na vica na luvei Meri.
IVAKAVUVULI: O Jisu na Kalou a liatamata.
DINA SE LASU: LASU.
Sa oti qo e dua na gauna balavu na kena nanumi tu ni a liatamata mai vuravura na Kalou me o Jisu, e tiki bibi sara ga ni ivakavuvuli ni Le Tolu Vakalou—ia a sega ni basika na vakasama qori ena gauna i Jisu. E tukuna na Encyclopædia Britannica: “Ni sega ni basika ena Veiyalayalati Vou na vosa na Le Tolu Vakalou se na kena ivakamacala . . . E basika vakamalua ni oti e vicavata na senitiuri qai veiletitaki vakalevu.”
E vakarogocataki Jisu sara ga na lotu ni vakatavulica ni o koya na Kalou a bula vakatamata.e Ena vuku ni cava? Raica mada na ivakatautauvata qo. Eso na tamata cakacaka era vola e dua na ivola ni kerekere vei supavaisa, ia e tukuna o koya ni sega vua na lewa me cakava na ka era kerea. Ke dina qori, e vakaraitaka sara ga na supavaisa ni vakaiyalayala nona lewa. Ke sega ni dina qai rawa ni vakadonuya na kerekere, mani sega ni cakava—sa lasu.
Na cava e cakava o Jisu ena gauna rau kerea kina e rua nona yapositolo na itutu? E tukuna vei rau: “Au sega ni lewa se o cei me dabe ena yasaqu imatau se yasaqu imawi, sa tiko ga o ira e vakarautaki me nodra me vaka sa lewa o Tamaqu.” (Maciu 20:23) Kevaka a Kalou ga o Jisu, sega li ni sa lasu ke tukuna qori? Ia ni vakaliuci Koya e tu vua na lewa, e vakaraitaki vinaka o Jisu ena nona yalomalumalumu—e vakaraitaka tale ga ni sega ni tautauvata kei na Kalou.
IVAKAVUVULI: E sega ni tamata vinaka wale ga o Jisu.
DINA SE LASU: DINA.
E vakaraitaka sara ga o Jisu ni sega ni turaga vinaka wale ga. E kaya: O ‘au na Luve ni Kalou.’ (Joni 10:36) E rawa ni dua ga e tukuna ni Luve ni Kalou. Ia kevaka e lasu na ka e tukuna o Jisu, na cava e tukuna qori baleti koya? E sega dina ni tamata vinaka, e dau veidabui!
Na ivakadinadina matata e lako sara ga mai vua na Kalou. E tukuna vakarua me baleti Jisu: “Qo na Luvequ lomani.” (Maciu 3:17; 17:5) Vakasamataka mada: E tukuna na iVolatabu ni vica ga na gauna e rogoci kina na domo ni Kalou e vuravura—ia e rogoci vakarua nona tukuna ni o Jisu na Luvena! Qo e ivakadinadina vinaka duadua ni nona tukuna o Jisu ni Luve ni Kalou.
E vakavotui beka ena ulutaga qo eso na ka dina o sega tu ni kila me baleti Jisu? Ke vaka kina ena vinaka mo vulica tale mada na Kosipeli. Ena marautaki qai yaga na vuli va qori. E tukuna sara ga o Jisu ni na “rawata na bula tawamudu” o koya e vulica na kilaka dina me baleti koya kei Tamana.—Joni 17:3.
[iVakamacala e ra]
a A mate o Jisu ena ika 14 ni Naisani na siga ni Lakosivia, ena nodra ivola ni vula na Jiu.—Maciu 26:2.
b A volaitukutukutaka o Maciu ni ratou ‘tauca [na vulagi] na nodratou iloloma’ vei Jisu, ya na koula, na ka boivinaka, kei na mura. E yaga na iloloma saulevu qori ni a dravudravua na vuvale i Jisu—ratou vakaroti tale ga me ratou dro i Ijipita.—Maciu 2:11-15.
c A sucu vakacakamana o Jisu, o ratou na tacina ratou kunekunetaki ga me vakataki ira na vo ni gone, e tamadratou o Josefa.—Maciu 1:25.
d Na vakasama qo i Jerome ena 383 S.K., sa takalevu tu vei ira na vakabauta ni a sega ni tara tagane o Meri. A vakatitiqataka qori o Jerome, ia na vakasama qori sa tu vei ira e levu—kei ira na iliuliu ni lotu Katolika.
e Me ikuri ni ivakamacala me baleta na vakavuvuli ni Le Tolu Vakalou, raica na ivola Should You Believe in the Trinity? tabaka na iVakadinadina i Jiova.
[Kato/iYaloyalo ena tabana 14]
iKuri ni Vakamacala o na Rairai Kurabui Kina
A vakacava sara mada na ivakarau ni bula i Jisu e vuravura? E yalodredre, nanumi koya ga, qai sega ni veimaliwai kei ira na tauvanua? Era na rairai vakaiotaka qori eso. Ia era na rairai kurabui nira kila ni o Jisu a . . .
• tiko ena soqo ni vakamau.—Joni 2:1-11.
• veivakacaucautaki.—Marika 14:6-9.
• marau ni maliwai ira na lalai.—Marika 10:13, 14.
• tagi e matanalevu.—Joni 11:35.
• tuburi koya na loloma.—Marika 1:40, 41.