O Dau Yalorawarawa me Vakatarogi Iko o Jiova?

NA IVOLATABU e lewena e drau vakacaca na taro ena tara sara ga na lomada. E dau vakayagataka na taro o Jiova me vakavulica kina na ka dina e bibi me kilai. Me kena ivakaraitaki, a vakayagataka e vica vata na taro me vakasalataki Keni kina me gole tani mai na sala cala a muria tiko. (Vkte. 4:​6, 7) Ena so tale na gauna, e dua mada ga nona taro e rawa ni uqeta sara ga e dua me cakava na veiveisau e gadrevi. Ni taroga o Jiova: “Ko cei me’u tala, ia ko cei ena lako e na vuku i keitou?” a sauma sara na parofita o Aisea: “Koi au oqo; mo ni talai au.”​—Aisea 6:8.

E dau laulau tale ga nona vakayagataka na taro na Qasenivuli Levu o Jisu. E volaitukutukutaki ena Kosipeli e sivia na 280 na taro a vakayagataka. Eso na gauna e dau taro me vagalui ira kina na dau vakalelewa, ia levu na gauna e dau kena inaki me tara na lomadra na vakarorogo, me uqeti ira mera vakasamataka na kedra ituvaki vakayalo. (Maciu 22:​41-46; Joni 14:​9, 10) A veirawai tale ga na taro e vakayagataka na yapositolo Paula, a vola e 14 na ivola ena iVolatabu vaKirisi vaKarisito. (Roma 10:​13-15) Kena ivakaraitaki, e levu sara na taro e volai ena nona ivola vei ira e Roma. Na taro qori e dau uqeti ira sara ga na dauwiliwili mera vulica ra qai vakamareqeta “na nona vuku kei na nona kilaka” na Kalou.​—Roma 11:33.

Eso na taro e dau vinakati me saumi, ia eso tale me vakavure vakasama ga. E volatukutukutaki ena Kosipeli nona dau vakayagataka vakalevu o Jisu na taro e vakavure vakasama. A vakasalataki ratou nona tisaipeli ena dua na gauna: “Dou qarauna nodra leveni na Farisi kei na nodra leveni na ito i Eroti,” ya na nodra veivakaisini kei na nodra ivakavuvuli lasu. (Mari. 8:15; Maciu 16:12) Nira sega ni kila na ibalebale ni vosa i Jisu na nona tisaipeli, ra mani veiba kina ni a guilecavi na madrai. Raica mada na nona taro o Jisu ena dua ga na veitalanoa lekaleka a caka. “E kaya vei iratou: ‘Na cava dou veivosakitaka tiko kina nomudou sega ni kau madrai mai? Dou sega tiko ga ni raica se kila na kena ibalebale? Se buawa tiko ga na lomamudou e dredre kina mo dou kila? “E tu e vei na matamudou, e tu e vei na daligamudou?” . . . Dou se sega tiko ga ni taura rawa na kena ibalebale?’ ” Na inaki ni taro i Jisu me vakavure vakasama, me uqeti ratou nona tisaipeli meratou vakasamataka na ibalebale dina ni nona vosa.​—Mari. 8:​16-21.

Meu ‘Vakatarogi Iko’ Mada

A vakayagataka o Jiova na taro me vakadodonutaka kina nona rai na nona dauveiqaravi o Jope. Levu vei ira na taro qori a kena inaki me vulica kina o Jope ni dua ga na ka somidi o koya ni vakatauvatani kei na Dauveibuli. (Jope, wase 38-41) A namaka beka o Jiova me saumi kece na nona taro? Kena irairai ni sega. Na nona taroga, “Ko a tiko maivei ni ka’u a tauyavutaki vuravura?” a kena inaki me vakasama kina o Jope, me uqeta na lomana. A voleka sara ga ni sega ni vosa rawa o Jope ni oti na veitarotarogi ya. Na ka ga e tukuna rawa: “A cava me’u kaya vei kemuni? Au sa tabonaka na gusuqu e na ligaqu.” (Jope 38:4; 40:4) A taura rawa o Jope na ka e via tukuna vua o Jiova qai vakamalumalumutaki koya. Ia a sega ni vakavulici Jope ga o Jiova me yalomalumalumu. A vakadodonutaka tale ga nona rai. Ena sala cava?

E “tamata yalododonu ka daucaka dodonu” o Jope, ia ena so na gauna e dau laurai ena ka e tukuna ni cala nona rai. A raica rawa qori o Ilaiu ena gauna a vunauci Jope kina ‘ena nona vakadonui koya ga, sa sega ni veivakadonui na Kalou.’ (Jope 1:8; 32:2; 33:​8-12) A vakadodonutaka tale ga o Jiova na veika sa kila rawa tu o Jope. A vosa vua mai na covulaca: “Ko cei oqo sa vakabutobutotaka na lewa e na vosa sa sega ni vuku? Mo vauca mada vakatagane na tolomu: ni’u na vakataroga vei iko, ia mo vakatakila mai vei au.” (Jope 38:​1-3) A vakayagataka na taro o Jiova me vakatakila kina na tawavakaiyalayala ni nona vuku kei na kaukaua me vaka e laurai ena nona cakacaka veivakurabuitaki. Sa qai nuitaka ga vakalevu o Jope na vakatulewa i Jiova kei na ka e dau cakava. E vakatubuqoroqoro dina na ka e sotava o Jope​—ni vakatarogi koya sara ga na Kalou Kaukaua Duadua!

Yalorawarawa me Vakatarogi Keda o Jiova

E yaga tale beka ga vei keda na taro era tu ena iVolatabu? Io! Eda na vutuniyau vakayalo ke da dau vakasamataka na taro qori. E dua na vuna e mana kina na Vosa ni Kalou ni veilauti na kena taro. Io, ‘na vosa ni Kalou e kaukaua qai vakavotuya na nanuma kei na inaki ni lomada.’ (Iper. 4:12) Ena yaga vakalevu ga na taro qori ke da tarogi keda kina, me vaka ga e vakatarogi keda tiko o Jiova. (Roma 15:4) Meda raica mada eso na kena ivakaraitaki.

“Ena sega li ni caka dodonu Ko Koya sa lewai vuravura kecega?” (Vkte. 18:25) A taroga qori o Eparama ena gauna a lewai Sotoma kei Komora kina o Jiova. A kila o Eparama ni sega ni rawa vei Jiova me cakacaka vakatawadodonu​—me vakamatei ira vata na yalododonu kei na tamata ca. E laurai gona ena taro i Eparama nona vakabauta dei ni dodonu na ivalavala i Jiova.

Eso nikua era na rairai vakilakila na ka e vauca na siga ni lewa i Jiova. Kena ivakaraitaki, o cei ena bula ena Amaketoni se o cei ena vakaturi. Me kua ni vakaleqa noda vakasama na rai va qori, meda nanuma tiko na taro i Eparama. Eda na sega kina ni vakalusi gauna ena nuiqawaqawa, vakatitiqa, se veileti tawayaga nida kila e dau yalovinaka na Tamada vakalomalagi o Jiova, eda nuitaka vakaoti tale ga nona lewadodonu kei na nona yalololoma me vakataki Eparama ga.

“O cei vei kemuni ena vuku ni nona lomaocaoca e rawa ni vakadedetaka tale vakalailai na nona bula?” (Maciu 6:27) A taroga qori o Jisu ni vosa tiko ena dua na ilala levu kei ratou na nona tisaipeli, me vakabibitaka kina ni dodonu mera vakararavi vei Jiova. E vakavu lomaocaoca vakalevu na ivakataotioti ni ituvaki ca qo, ia noda vakasamataka vakasivia ena sega ni vakadedetaka noda bula se vakavinakataka na kena ivakatagedegede.

Ke da dau lomaleqataka na veika me baleti keda se o ira na wekada lomani, nona taro o Jisu ena uqeti keda me donu tiko ga noda rai me baleta na ka eda lomaocaocataka. Eda na sega kina ni lomaleqa, ena kauta laivi tale ga na rai cala e rawa ni curuoso kina noda vakasama, vakaoca na yagoda, qai vusolo kina na lomada. E vakadeitaka vei keda o Jisu ni kila vinaka tu na ka eda gadreva na Tamada vakalomalagi e dau vakani ira na manumanuvuka qai vakasuluma na co ni veikau.​—Maciu 6:​26-34.

“Me mokota li e dua na tagane na buka waqa ki lomaserena, Ka sega ni kama kina na nonai sulu?” (Vkai. 6:27) Na imatai ni ciwa na wase ena Vosa Vakaibalebale e volai kina nona ivakasala vuku e dua na tama vua na luvena. Na taro e toka e cake e dusia na rarawa e vu mai na veibutakoci. (Vkai. 6:29) Ke da siqema ni laurai tiko vei keda eso na ivukivuki ni wede se da vakabulabulataka tiko na gagadre ca ni veiyacovi, na taro e cake me vakayadrata noda vakasama ena rerevaki ni ka eda cakava tiko. Ia e sega ni yalani ga na taro qori ena ka e baleta na veiyacovi, e kovuti kina na ituvaki kece eda rawa ni temaki kina meda caka ca. E matata vinaka kina na ivakavuvuli bibi qo ena iVolatabu: ‘O na tamusuka ga na ka o kaburaka’!​—Kala. 6:7.

“O cei o iko mo vakalewa na nona dauveiqaravi e dua tale?” (Roma 14:4) Ena nona ivola vei ira e Roma, a vakamacalataka kina o Paula na leqa a basika ena ivavakoso ena imatai ni senitiuri. E duidui na itovo vakavanua, ia era se vakalewa ga eso na lotu vaKarisito nodra vakatulewa kei na ka era cakava na tacidra vakayalo. A uqeti ira gona na taro i Paula mera veiciqomi ga, ra laiva vei Jiova me vakatulewa.

Ena gauna tale ga qo, eda dui cavutu mai na duidui vanua na tamata i Jiova, e duidui tale ga noda isususu. Ia e talei dina nona vakaduavatataki keda o Jiova. Eda sasagataka tiko na duavata? Ke dau totolo noda vakacala e dua na tacida ena nona vakatulewa sa vakasamataka oti vakavinaka, e ka vakayalomatua meda tarogi keda ena taro i Paula e cake!

Vakavolekati Keda Vei Jiova na Taro

E vica na ivakaraitaki sa cavuti oti mai e dusia ni taro ena Vosa ni Kalou e rawa ni uqeta e dua me liaci koya. Noda raica na veitikina e yavolita na taro ena uqeti keda meda vakasamataka na ituvaki e rawa nida muria kina na kena ivakavuvuli. Eda na raica e levu tale na taro yaga nida wilika na iVolatabu.​—Raica na kato ena tabana e 14.

Noda yalorawarawa me tara na lomada na taro ena Vosa ni Kalou, ena moica noda vakasama kei na lomada me salasalavata kei na ivakatagedegede savasava i Jiova. Ni vakatarogi koya oti o Jiova, a kaya o Jope: “Ka’u a rogoci kemuni e na daligaqu walega; ia sa qai raici kemuni na mataqu.” (Jope 42:5) Io, sa qai vakabauta dei ga o Jope ni bula dina tiko o Jiova, me vaka e raici koya sara tiko ga. A qai vakamacalataka emuri na tisaipeli o Jemesa ena nona tukuna: “Toro voleka yani vua na Kalou ena qai toro voleka mai vei kemuni.” (Jeme. 4:8) Meda yalorawarawa mada ga me uqeti keda na iVolatabu kei na kena taro, meda toso kina vakayalo, da qai “raici” Jiova vinaka sara!

[Kato ena tabana e 14]

Ena yaga vakacava nomu taroga eso na taro qo mo vakatotomuria kina na rai i Jiova?

▪ “ Sa vinakata li ko Jiova nai soro kama kei nai madrali, me vaka sa vinakata ko koya na talairawarawa ki na vosa i Jiova?”​—1 Sam. 15:22.

▪ “ O koya sa bulia na matada, ena sega beka ni rai rawa?”​—Same 94:9.

▪ “ Ko sa kunea li na tamata sa nanumi koya ga me vuku?”​—Vkai. 26:12.

▪ “ E vinaka beka vei iko mo cudru?”​—Jona 4:4.

▪ “ Ena yaga vakacava vua e dua ke rawati vuravura taucoko, ia e qai vakayalia na nona bula?”​—Maciu 16:26.

▪ “ O cei me na tawasei keda mai na loloma i Karisito?”​—Roma 8:35.

▪ “ Na cava e tu vei iko a sega ni soli vei iko?”​—1 Kor. 4:7.

▪ “ Rau tautauvata vakacava na rarama kei na butobuto?”​—2 Kor. 6:14.

[iYaloyalo ena tabana e 15]

Na cava a vulica o Jope ena nona vakatarogi koya o Jiova?