Sa Rauta mo Kila ga na Yaca ni Kalou?

E dokai dina nida sureti meda kidavaka e dua e rogo da qai vakayagataka na yacana nida vosa vua. Era daukacivi na vakaitutu ena icavuti, me vaka na “Turaga na Peresitedi,” “Kemuni na Tui,” se “Kemuni na Turaganilewa.” Sega ni vakabekataki ni dokai dina ke dua na vakaitutu torocake e tukuna vei iko, “Au kerea mo kacivi au ga ena yacaqu.”

E TUKUNA vei keda ena nona Vosa na Kalou dina: “Koi au ko Jiova; sai koya oqo na yacaqu.” (Aisea 42:8) E levu tale na kena icavuti me vaka na “Dauveibuli,” “Kaukaua Duadua,” kei na “Turaga Cecere,” ia e rokovi ira nona tamata yalodina ni vakadonuya mera kacivi koya ena yacana.

Me kena ivakaraitaki, ena dua na gauna ni masuta na Kalou na parofita o Mosese, e kaya: “Kemuni Jiova.” (Lako Yani 4:​10, NW) Ena vakatabui ni valenisoro mai Jerusalemi, a tekivuna nona masu o Tui Solomoni ena vosa: “Kemuni Jiova.” (1 Tui 8:​22, 23) Ni vosa o Aisea vua na Kalou ena vukudra na Isireli, e kaya: “Sai kemuni Jiova, na tamai keimami.” (Aisea 63:16) E macala gona ni vinakata na Tamada vakalomalagi meda kacivi koya ena yacana.

E bibi meda kacivi Jiova ena yacana, ia meda kilai koya vinaka e okati kina eso tale na ka. E yalataka o Jiova vua e lomani koya, qai nuitaki koya: “Au na vakaceceretaki [“taqomaki,” NW] koya sara ni sa kila na yacaqu.” (Same 91:14) Kena ibalebale, e levu tale na ka e okati ena noda kila na yaca ni Kalou me na taqomaki keda kina o koya. Na cava gona ena vinakati mo kilai Jiova vinaka kina?