Taro na Dauwiliwili . . .

E Dua na iTekitekivu ni Kalou?

▪ E tukuna na iVolatabu ni sega na nona itekitekivu na Kalou ni a bula tu ga. Ke mani dredre mada ga meda kila na ka kece e vauca na tawamudu ni nona bula, e sega ga ni dodonu meda vakalecalecava vakadua.

E dodonu meda namaka meda kila na cakacaka kece ni Kalou? A tukuna na yapositolo o Paula: “Sa uasivi dina ga na veivakalougatataki ni Kalou, na nona vuku kei na nona kilaka! E sega ni katumi rawa na titobu ni ka e vakananuma, e dredre tale ga ni kilai na nona sala kece!” (Roma 11:33) Eda na sega ni kila na titobu ni nona vakanananu kei na vuku ni Kalou me vaka ga na nona sega ni kilai nona itubutubu vinaka e dua na gonedramidrami. Na nona ivola uqeti vakalou na yapositolo o Paula e baleta tiko na uasivi ni nona vuku kei na nona yalololoma na Kalou. Ia e vakamacalataka tale ga eso na ka titobu me baleta na Kalou o Jiova kei na nona cakacaka eda sega ni katuma rawa. E dua vei ira qori na vakasama ni sega na nona itekitekivu na Kalou. Ia eda rawa ni nuitaka na ka e tukuna na iVolatabu me baleta na Kalou. A tukuna o Jisu Karisito me baleta na iVolatabu: “E dina na nomuni vosa.”​—Joni 17:17.

A cavuta ena nona qaqanimasu vei Jiova o Mosese: “O kemuni na Kalou sa bula tu ga, ena bula tu ga me tawamudu.” (Same 90:​2, The Holy Bible, New Century Version) E rua tiko na ibalebale ni ka e tukuna o Mosese. Dua e vakaibalebale ena veigauna se bera mai. E “tawamudu na nona bula” o Jiova. (Vakatakila 4:10) Koya gona ena bula tu ga na Kalou ena veigauna se bera mai. Na ikarua ni kena ibalebale e baleta na veigauna sa oti. Se dua tale na kena itukutukuni, a sega ni buli na Kalou se basika vakacalaka. A bula tu mai ena veigauna sa oti ni sega na nona itekitekivu.

E dau dredre meda kila eso na ka e vakamacalataki raraba tu ga. So na gauna eda dau vakayagataka eso na fika vereverea me vaka na naba cere (positive number) kei na naba siro (negative number). E sega ni yalani na noda wiliwili se mani da wiliwili sobu se wiliwili cake. Eda rawa ni tukuna tale ga qori ena dede ni nona bula na Dauveibuli?

E veiganiti gona me vakatokai na Kalou ena icavuti “Tui ni veitabagauna kece.” (1 Timoci 1:17) Vakasamataka mada qo: O Jisu Karisito, o ira na oba vakaoba na agilosi mai lomalagi, kei na kawatamata e tiko na kedra itekitekivu nira buli. (Kolosa 1:​15, 16) Na Kalou ga a sega ni buli. Na vakasama ni buli na Kalou e rawa ni vakavuna mera vakalusi gauna kina eso ena kena vaqaqai se o cei a buli koya. Sega, o Jiova e “sega ni tubu ka sega ni mudu.” (Same 90:2) E rawa ni tukuni tale ga ni a bula tu mai “ena veigauna sa oti, ena gauna qo, kei na veigauna se bera mai.”​—Juta 25.

Nanuma tiko, na tawamudu ni nona bula na Kalou e sega ni kena ibalebale nida na sega ni kila na veika me baleti koya. Eda dikeva ena masu i Mosese ni tawamudu ni Kalou e vakadeitaka na nona yalayala vei keda me baleta na bula tawamudu. Ni vakatauvatani kei na lekaleka ni noda bula, e kilai na Kalou me ‘itikotiko ena itabatamata kece ga.’ Ni Tama dauloloma o Jiova, a veitokoni ena veigauna sa oti, ena tokoni ira nona tamata ena gauna qo, kei na veigauna se bera mai. Me vakacegui iko mada ga na itukutuku dina qori!​—Same 90:1.