O Dau Vakaitavi me Veiuqeti na Soqoni?

“Ni oni soqoni vata, . . . me caka na ka kece moni veivakayaloqaqataki kina.”​—1 KOR. 14:26.

1. Ena 1 Korinica wase 14, na cava na inaki levu ni soqoni vaKarisito?

‘E VEIUQETI dina na soqoni oya!’ O dau tukuna tale ga qori ni oti e dua na soqoni? E sega ni vakabekataki ni o dau tukuna! E veiuqeti na soqoni vakaivavakoso, ia qori e sega ni kurabuitaki. Me vakataki ira ga na lotu vaKarisito taumada, na inaki levu ni noda soqoni nikua meda vakayaloqaqataki kece vakayalo na tiko kina. Raica mada na nona vakabibitaka o Paula na inaki ni soqoni vakaivavakoso ena imatai ni nona ivola vei ira e Korinica. Ena wase 14 taucoko, e tukuna kina vakavica ni tautauvata na inaki ni itavi kece ena soqoni vakaivavakoso, oya me ‘vakayaloqaqataki kina na ivavakoso.’​—Wilika 1 Korinica 14:​3, 12, 26.a

2. (a) E rawa vakacava ni veiuqeti na soqoni? (b) Na taro cava eda na veivosakitaka?

² E veiuqeti se veivakabulabulataki na soqoni ni veidusimaki kina na yalo tabu ni Kalou. Oya na vuna e tekivutaki kina na noda soqoni vakaivavakoso ena masu, eda kerea kina na Tamada vakalomalagi me vakalougatataka na noda soqoni ni vakayagataka na yalona tabu. Eda kila nida rawa ni veivakayaloqaqataki kece na lewe ni ivavakoso. Koya gona, na cava eda rawa ni cakava yadua me veiuqeti me veivakabulabulataki tale ga kina vakayalo na soqoni e veimacawa?

3. Na cava meda raica kina vakabibi na soqoni vaKarisito?

³ Me rawa ni saumi qori, eda na veivosakitaka eso na ka mera nanuma tiko o ira na liutaka na soqoni. Eda na raica tale ga na sala e rawa ni veitokoni kece kina na ivavakoso me rawa ni veiuqeti na soqoni vei keda kece na tiko kina. Meda raica vakabibi na ulutaga qo baleta o Jiova e raica vakabibi na soqoni. E tiki bibi gona ni noda sokalou vei Jiova na noda tiko ena soqoni kei na noda vakaitavi.​—Same 26:12; 111:1; Aisea 66:​22, 23.

E Vulici na iVolatabu ena Soqoni

4, 5. Na cava na inaki ni vuli Vale ni Vakatawa?

⁴ Eda vinakata kece me yaga na noda vulica e veimacawa Na Vale ni Vakatawa. Me rawa nida kila vinaka na inaki bibi ni soqoni qori, meda raica lesu mada eso na veiveisau a vakayacori ena Vale ni Vakatawa kei na ulutaga ni vuli.

⁵ Me tekivu ena imatai ni ulutaga ni vuli ena Vale ni Vakatawa 15 Janueri, 2008, eso na itukutuku era sa volai ena imatai ni tabana. O sa bau raica? Raica vinaka mada na imatai ni tabana ni mekesini o taura tiko qori. O na raica ni dola tu na iVolatabu ena ruku ni tawa (tower). Na iyaloyalo qori e dusia na inaki ni vuli Vale ni Vakatawa, qori me vulici kina na iVolatabu ni vakayagataki na mekesini qo. Io, e “vakamacalataki” na Vosa ni Kalou ena vuli Vale ni Vakatawa e veimacawa, e ‘tukuni vinaka na kena ibalebale’ me vaka ga ena gauna i Niemaia.​—Niem. 8:8; Aisea 54:13.

6. (a) Na veisau cava a caka ena vuli Vale ni Vakatawa? (b) Na cava meda nanuma tiko me baleta na veitikinivolatabu e tukuni meda “wilika”?

⁶ Ni yavutaki ena iVolatabu na noda vuli, a caka kina e dua na veisau ena vuli Vale ni Vakatawa. Eso na tikinivolatabu e lavetaki ena ulutaga ni vuli e tukuni meda “wilika.” Eda uqeti kece meda muria na wiliki ni tikinivolatabu qo ena soqoni, nida vakayagataka sara ga na noda iVolatabu. (Caka. 17:11) Na cava na vuna? Ena uqeti keda vakalevu na noda raica sara ga ena iVolatabu na veidusimaki ni Kalou. (Iper. 4:12) Ni bera gona ni wiliki na tikinivolatabu ena ivavakoso, me waraka vakalailai o koya e taura na vuli mera cega na tikinivolatabu o ira kece na tiko ena soqoni me rawa nira vakamuria na kena wiliki.

Levu na Gauna Meda Vakamacalataka Kina na Noda Vakabauta

7. Na cava e rawa nida vakamacalataka ena vuli Vale ni Vakatawa?

⁷ E dua tale na veisau e laurai ena ulutaga ni vuli ena Vale ni Vakatawa oya e baleta tiko na kena balavu. Sa vakalekalekataki ena vica na yabaki sa oti, ena sega gona ni taura vakalevu na gauna na wiliki ni parakaravu, ia ena levu na gauna ni vakamacala. Sa rawa nida vakamacalataka e matanalevu na noda vakabauta nida sauma na taro e tarogi ena parakaravu, vakamacalataka na yaga ni tikinivolatabu, tukuna vakalekaleka e dua na ivakaraitaki ena yaga ni kena muri na ivakavuvuli vakaivolatabu se so tale na sala meda vakamacalataka kina na noda vakabauta. Me tiko tale ga na gauna me veivosakitaki kina na iyaloyalo.​—Wilika Same 22:22; 35:18; 40:9.

8, 9. Na cava e nona itavi o koya e taura na vuli Vale ni Vakatawa?

⁸ Ia ena rawa ga nira vakamacala e levu ke saumitaro ga vakalekaleka o koya e digitaki me vakamacala, e sega tale ga ni vakamacala vakalevu o koya e taura na vuli Vale ni Vakatawa. Koya gona, na cava e rawa ni cakava o koya e taura na vuli me veiraurau kina na nona ivakamacala kei na nodra ivakamacala na lewe ni ivavakoso, me veiuqeti kina na soqoni?

⁹ Me saumi qori, raica mada e dua na vosa vakatautauvata qo. Na Vuli Vale ni Vakatawa e caka vinaka e vaka e dua na vutu senikau rairai totoka. Me vaka ga na veimataqali senikau ena dua na vutu senikau, e duidui tale ga na ivakarau ni saumitaro ena vuli Vale ni Vakatawa. E duidui na kedra balavu kei na kedra roka na senikau ena dua na vutu senikau, na duidui tale ga ni vakamacala ena soqoni ena vakatau ena balavu kei na ivakarau ni saumitaro. Na cava na nona itavi o koya e taura na vuli? Na nona vakamacala vagauna e vaka ga na lailai ni draunikau ena dua na vutu senikau. E sega ni dau biu vakasivia na draunikau, e biu ga e vica me vakarairaivinakataka qai vakataucokotaka na vutu senikau. Me nanuma tale tiko ga o koya e taura na vuli me kua ni sivia na nona ivakamacala, me veiraurautaka ga kei na nodra ivakamacala na lewe ni ivavakoso. Io, ni maqosataki na nodra duidui ivakamacala na ivavakoso qai vakamacala ena gauna veiganiti o koya e taura na vuli, eda na matalau na vakarorogo ena soqoni.

“Cabora Tiko ga Vua na Kalou na iSoro ni Veivakacaucautaki”

10. Era raica vakacava na soqoni vakaivavakoso na lotu vaKarisito taumada?

¹⁰ Ni vakamacalataka o Paula na soqoni vaKarisito ena 1 Korinica 14:​26-33, eda kila vinaka kina na sala e vakayacori kina na soqoni ena imatai ni senitiuri. A vola kina e dua na vuku ni iVolatabu me baleta na tikinivolatabu qori: “E dua na ka e kilai me baleta na Lotu taumada oya nira rairai kila kece na lewenilotu ni ka dokai, e dodonu tale ga mera vakaitavi. Ena sega ni mai vakarorogo wale ga e dua, ia ena vakaitavi tale ga.” Era raica gona na lotu vaKarisito taumada ni soqoni vakaivavakoso e gauna vinaka mera vakamacalataka kina na nodra vakabauta.​—Roma 10:10.

11. (a) Ena vakayaloqaqataki vakacava na ivavakoso, na cava na vuna? (b) Ena vakavinakataki vakacava na noda ivakamacala ena soqoni? (Raica na ivakamacala e ra.)

¹¹ Na noda vakamacalataka na noda vakabauta ena soqoni ena ‘vakayaloqaqataki kina na ivavakoso.’ Eda vakadinadinataka se mani vica na yabaki eda tiko kina ena soqoni, eda se marau tiko ga ni rogoca na nodra ivakamacala na tacida kei na ganeda. E tarai keda na nodra ivakamacala mai vu ni lomadra na tacida itabaqase, e dau veiuqeti na nodra veidusimaki na qase ni ivavakoso dauloloma. Eda sega ni kinoca rawa tale ga na noda marautaka na nodra laveliga vakasauri na gone mera vakamacala mera vakaraitaka nodra lomani Jiova dina. Macala gona ni veiuqeti na soqoni nida vakamacala kece.b

12. (a) Na cava eda vulica ena nodrau ivakaraitaki o Mosese kei Jeremaia? (b) E yaga vakacava na masu ena noda saumitaro?

¹² O ira na dau mamadua, ena dredre toka mera vakamacala ena soqoni. Ke o dua vei ira, nanuma tiko ni levu tale era dau mamadua. O ira mada ga na dauveiqaravi yalodina ni Kalou me vakataki Mosese kei Jeremaia a dredre mera vosa e matanalevu. (Lako 4:10; Jere. 1:6) Me vaka ga na nona vukei ira na nona dauveiqaravi ena veigauna sa oti o Jiova me rawa nira vakalagilagi koya e matanalevu, ena vukei iko tale ga mo cabora na isoro ni veivakacaucautaki. (Wilika Iperiu 13:15.) Na cava mo cakava me vukei iko kina o Jiova mo valuta na nomu mamadua? Vakavakarau vinaka ena soqoni. Oti oya, ni bera ni o gole ina Kingdom Hall, masuti Jiova me vakadoudoutaki iko mo saumitaro. (Fpai. 4:6) O kerea tiko qori e dua na ka e salavata “kei na nona inaki,” mo nuidei gona ni na rogoca o Jiova na nomu masu.​—1 Joni 5:14; Vkai. 15:29.

Soqoni e Kena iNaki me ‘Veivakayaloqaqataki, Veiuqeti, Qai Veivakacegui’

13. (a) Na cava na inaki ni soqoni vakaivavakoso? (b) Na taro cava e bibi mera vakasamataka na qase ni ivavakoso?

¹³ A tukuna o Paula na inaki bibi ni soqoni vakaivavakoso, qori me ‘veivakayaloqaqataki, veiuqeti, qai veivakacegui’ vei ira na tiko kina.c (1 Kor. 14:3) Era na vakadeitaka vakacava na qase ni ivavakoso ni veiuqeti na nodra itavi ena soqoni qai vakacegui ira na mataveitacini? Me saumi qori, meda raica mada na soqoni a tuvanaka o Jisu ni vakaturi oti ga.

14. (a) Na cava a yaco ni bera na soqoni a tuvanaka o Jisu? (b) Na cava eratou lomavakacegu kina na tisaipeli ni ‘toso yani o Jisu me vosa vei ratou’?

¹⁴ Raica mada na ka e yaco ni bera na soqoni. Ni voleka toka ga ni vakamatei o Jisu, eratou “biuti koya kece na tisaipeli, ratou dro,” me vaka ga e parofisaitaki eratou ‘dui se ina nodratou vale.’ (Mari. 14:50; Joni 16:32) Ni vakaturi oti o Jisu, a sureti ratou nona tisaipeli e vusolo tu na lomadratou ena dua na soqoni lavotaki.d Eratou ciqoma na veisureti oya, “eratou lako ga i Kalili na tinikadua na tisaipeli me ratou sota kei Jisu ena ulunivanua a lokuca me ratou sota kina.” Ni ratou yaco yani, ‘e toso yani o Jisu me vosa vei ratou.’ (Maciu 28:​10, 16, 18) Vakasamataka mada na nodratou lomavakacegu na tisaipeli ni vakaliuliu o Jisu me vosa vei ratou! Na cava e tukuna?

15. (a) Na cava a tukuna o Jisu vei ratou na nona tisaipeli, na cava a sega ni cakava? (b) E tarai ratou vakacava na yapositolo na soqoni eratou tiko kina?

¹⁵ A tekivu ena nona tukuna o Jisu: “Sa soli vei au na lewa kece.” E qai lesia vei ratou e dua na itavi: “O koya gona, ni lako moni vakavulici ira na lewe ni veivanua kece ga mera noqu tisaipeli.” Oti, sa qai vakadeitaka vakayalololoma vei ratou: “Au na tiko vata kei kemuni.” (Maciu 28:​18-20) Ia o raica rawa na ka e sega ni cakava o Jisu? A sega ni vosataki ratou nona yapositolo; a sega tale ga ni vakayagataka na soqoni a tuvanaka me taroga kina nodratou inaki, se me kuria nodratou rarawa ni vakavotuya na lailai ni nodratou vakabauta ena gauna sa oti. Ia a vakadeitaka ga o Jisu ni lomani ratou, e lomani ratou tale ga o Tamana, mani lesia vei ratou e dua na itavi bibi. E tarai ratou vakacava na yapositolo na ka e cakava qori o Jisu? E veivakayaloqaqataki, veiuqeti qai veivakacegui vei ratou. Ni oti na soqoni oya, eratou tomana “nodratou veivakavulici kei na nodratou vunautaka na itukutuku vinaka.”​—Caka. 5:42.

16. Era na vakatotomuria vakacava na qase ni ivavakoso nikua na ivakaraitaki i Jisu me veivakabulabulataki kina na soqoni?

¹⁶ Nira vakatotomuri Jisu na qase ni ivavakoso nikua, era na raica na soqoni me sala e vakadeitaki kina vei ira na lewe ni ivavakoso ni tawamudu na nona lomani ira kece nona dauveiqaravi o Jiova. (Roma 8:​38, 39) Koya gona nira vakaitavi ena soqoni na qase ni ivavakoso, mera kauaitaka ga na ka era vinaka kina na tacidra, sega ni nodra malumalumu. Era sega ni dau taroga na inaki ni nodra cakava na ka. Ia ena ka era tukuna na qase ni ivavakoso, era na vakaraitaka kina na nodra rai me baleti ira na tacidra ena vakabauta, oya nira lomani Jiova ra via cakava tale ga na ka dodonu. (1 Ces. 4:​1, 9-12) Ena tiko eso na gauna era na veivakasalataki kina na qase vei ira na lewe ni ivavakoso kece, ia ke vinakati mera vakadodonutaki ga eso, e vinaka mera vakasalataki lo ga. (Kala. 6:1; 2 Tim. 2:​24-26) Nira vosa ena ivavakoso, mera saga na qase mera dau vakavinavinakataki ira na mataveitacini. (Aisea 32:2) Era na saga mera maqosataka na nodra vosa, me rawa nira vakabulabulataki ra qai vakayaloqaqataki o ira kece na tiko ena soqoni.​—Maciu 11:28; Caka. 15:32.

iVakavakacegu na Soqoni

17. (a) Na cava e sa qai bibi ga kina me veivakacegui noda soqoni? (b) Na cava o rawa ni cakava me veiuqeti kina na soqoni? (Raica na kato “Tini na Sala me Veiuqeti Kina Vei Iko na Soqoni kei Ira Tale na So.”)

¹⁷ E sa qai ca ga vakalevu na vuravura i Setani, meda vakadeitaka gona me ivakavakacegu na soqoni vaKarisito​—me veivakacegui vei keda kece. (1 Ces. 5:11) A tukuna e dua na tacida yalewa erau vosota vakaveiwatini e dua na ituvaki dredre ena dua na gauna sa oti: “Keirau vakila na yalololoma i Jiova ni keirau tiko ena Kingdom Hall, e vaka sara ga e roqoti keirau tu o Jiova. Ena vica na aua keirau tiko kina ekea, keirau veimaliwai voli kei ira na mataveitacini, keirau vakila ni keirau biuta vei Jiova na neirau icolacola, keirau vakila na lomavakacegu.” (Same 55:22) Koya gona, me veiuqeti qai veivakacegui mada ga na soqoni vei keda kece na tiko kina. Ena rawa ga qori ke da vakaitavi me veiuqeti na soqoni vaKarisito.

[iVakamacala e ra]

O na Sauma Vakacava?

• Na cava meda raica kina vakabibi na soqoni vaKarisito?

• Na cava e ‘vakayaloqaqataki kina na ivavakoso’ ena noda dau vakamacala ena soqoni?

• Na cava eda vulica ena soqoni a liutaka o Jisu eratou tiko kina nona imuri?

[Kato/​iYaloyalo ena tabana e 22]

TINI NA SALA ME VEIUQETI KINA VEI IKO NA SOQONI KEI IRA TALE NA SO

Vakavakarau. Ni o vulica rawa na ulutaga ena vulici ena soqoni, o na marautaka vakalevu qai yaga tale ga vakalevu vei iko.

Soqoni wasoma. E dau veiuqeti nira tiko e levu ena soqoni, ena veiuqeti sara ke o tiko sara ga.

Kua ni bera. Ke o tiko ni bera ni tekivu na soqoni, o na duavata kei ira na mataveitacini ena laga ni imatai ni sere, o tiko tale ga ena gauna ni masu, qori e tiki ni noda sokalou vei Jiova.

Me tiko kece na nomu iyaya ni soqoni. Kauta nomu iVolatabu kei na ivola vakaivolatabu ena vulici, o na muria vinaka kina na ka e caka ena soqoni, o na kila vinaka tale ga na ka e veivosakitaki tiko.

Qarauna na ka e dau veivakawelei. Kena ivakaraitaki, kua ni wilika na itukutuku (text) ena nomu mobail ni vakacagau tiko na soqoni, qai wilika ni sa oti. Ni o cakava qo, o na vakaliuca tiko ga kina na veika bibi.

Vakaitavi. Nira vakamacala e levu, era na vakayaloqaqataki ra uqeti tale ga e levu ena duidui sala e vakamacalataki kina na nodra vakabauta.

Me lekaleka nomu ivakamacala. Ni o cakava qo, era na rawa ni vakamacala e levu tale.

Qarava nomu itavi. Ni o gonevuli ena Koronivuli ni Vuli Vunau se o vakaitavi ena Soqoni ni Cakacaka, vakavakarau vinaka, vakatovotovo ni se vo levu tu na gauna, saga ena nomu vinaka kece mo kua ni vakadaroya na itavi e soli vei iko.

Vakavinavinakataki ira na vakaitavi. Tukuna vei ira na vakaitavi kei ira na vakamacala ena soqoni ni o marautaka na nodra itavi.

Veimaliwai. Ke o dau vakabula vei ira na tacimu qai veiuqeti na nomu veitalanoa kei ira ni bera na soqoni kei na gauna e cava kina, ena yaga vakalevu vei iko na soqoni o na marautaka tale ga.