Ogaoga Tiko Ga ena iSoqosoqo i Jiova

Talanoataka o Vernon Zebko

AU SUSU ena dua na vanua ni iteitei e volekata na koro o Stenen, ena yasayasa o Saskatchewan e Kenada. Keitou le lima na gone, na ganequ e qase o Aurellia, o au kei ratou na taciqu o Alvin, Allegra, kei Daryl. Erau dau cakacaka vakaukaua na noqu itubutubu o Fred kei Adella me rau vakarautaka na veika e baleta na neitou bula vakayalo na veitacini, vakayago tale ga. Me yacova mai qo, keitou se vakavinavinakataki rau tiko ga na neitou itubutubu ni rau tuberi keitou ena dina.

O tata e dua na lumuti lotu vaKarisito, e daukaulotu yaloqaqa tale ga. A cakacaka vakaukaua me qarava na bula ni veisiga qai dau vakaraitaka sara ga ni dua na iVakadinadina. E dau wewe ni gusuna na ka dina. Au sega ni guilecava rawa na nona gugumatua kei na nona yaloqaqa. E dau tukuna wasoma vei au: “Ke o dau ogaoga ena isoqosoqo i Jiova, o na sega ni sotava e levu na leqa.”

Keimami dau vunau ena salatu e Stenen kei ira na itikotiko voleka. E sega ni rawarawa qori vei au nira tiko ena veitauni o ira na dau vakatotogani ira na gone, era dau vakalialiai keimami. Ena dua na siga niu se qai yabaki walu, au a duri tu ena dua na kona niu taura tu na Watchtower kei na Awake! ra qai mai wavokiti au eso na itabagone. Era luvata na noqu isala vou, ra qai vakataqara ena dua na duru e toka e yasaqu. Au vakavinavinaka ni a vakaraici au toka mai e dua na taciqu qase qai raica na ka e yaco. A toso sara mai qai taroga, “Vakacava, e dua na leqa Vern?” Era dui cerebu na cauravou. E rarawataki na ka e yaco oya, ia au vulica kina meu kua ni duri tu ga ena dua na vanua niu vunau e salatu. Niu tubu cake tiko, na ka au vulica ena gauna oya e vakayaloqaqataki au meu doudou na vunau e veivale.

Keirau papitaiso kei Alvin ena Me 1951 niu se qai yabaki 13 ga. Au se nanuma tiko na nona ivunau ni papitaiso o Brother Jack Nathan, a veiuqeti me keimami kua vakadua ni guilecava me keimami tukuni Jiova e veivula.a Keitou raica me cakacaka vinaka duadua ena neitou vuvale na cakacaka vakapainia. Ni oti na noqu vuli ena 1958, au a toki i Winnipeg, Manitoba, meu lai painia kina. Au dua na lumber planer (dau vakayagoyagovinakataka na kau) qai marautaka o tata na noqu dau cakacaka vata kei koya ena neitou bisinisi vakavuvale, ia rau uqeti au kei nana meu cakacaka vakatabakidua, rau tokona tale ga na noqu toki.

Vale Vou kei na iTokani Vou

A veisureti na valenivolavola ni tabana ena 1959 ke rawa nira toki eso i Quebec, e gadrevi vakalevu kina na vunau. Au lai painia e Montreal, qai dua na veisau levu vei au qori! E duidui sara mai na veika au sa matau kina, ni gadrevi meu vulica na vosa vakaVaranise meu qai vakamatauni au ena ivakarau ni vanua oya. E tukuna vei au na ivakatawa ni tabacakacaka: “Kua vakadua ni tukuna, ‘Qo na ka e dau caka mai na noqu vanua.’ ” E yaga dina na ivakasala oya.​—1 Kor. 9:​22, 23.

Niu toki i Quebec a se sega ni dua na noqu itokani painia. Ia au qai sotavi Shirley Turcotte, keirau se sota sara mai Winnipeg, a qai mai noqu itokani tudei ena siga keirau vakamau kina ena Feperueri 1961. Eratou lomani Jiova tale ga na nona vuvale. Ena gauna oya au se sega sara ni vakasamataka ni na vu ni veivakayaloqaqataki vei au o Shirley ena veiyabaki.

Cakacaka Vakavunau ena Gaspé

Keirau lesi me keirau lai painia lavotaki e Rimouski, e Quebec ni oti ga e rua na yabaki na neirau vakamau. Ena vula itubutubu e tarava, a kerei keirau na valenivolavola ni tabana me keirau lai cakacaka vakavunau ena vanua kece na Gaspé Peninsula, ena tokalau kei Kenada. Keirau lesi me keirau kaburaka na sore ni ka dina ena kena levu duadua e rawa. (Dauv. 11:6) Ni na vula dua na neirau ilakolako qo, keirau mani usana ena neirau motoka e 1,000 na mekesini, rauta e 400 na ivola, eso tale ga na kakana kei na isulu. Keirau vunau ena koro lalai kece ena Gaspé. A kaburaka na vale ni walesi ena vanua oya nira sa lako tiko yani na iVakadinadina, mera kua ni taura na ivola. Ia ra mani taura na ivola e levu nira taura cala na itukutuku, era nanuma ni kacivaki tiko mera taura na ivola.

E ka vou ena veiyabaki oya na kena vakadonui na cakacaka vakavunau ena so na vanua e Quebec, e sega ni ka vou kina na nodra tataro na ovisa. A yaco qori ena dua na siti keirau voleka ni solia kina na ivola ena vale kece. A kerea e dua na ovisa me keirau lako vata kei koya ena siteseni ni ovisa, keirau mani vakadonuya. Au qai kila e muri ni a vakarota e dua na loya ni siti oya me keirau kua tale ni vunau. A yali tu na turaga ni ovisa, au mani solia vua na loya na ivola mai na valenivolavola ni tabana e Toronto, e vakamatatataki sara tu ga kina na neirau dodonu me keirau vunau. Ni wilika oti na ivola, e sega ni bera na nona tukuna na loya: “Raica, au sega ni vinakata me yaco e dua na leqa. Na bete ga a tukuna vei au meu tarovi kemudrau.” Keirau vinakata mera kila na tiko ena yalava ni sega ni vakatabui na neirau cakacaka, keirau mani lesu totolo ena vanua a tarova kina na ovisa na neirau vunau.

Keirau lai raici turaga ni ovisa ena siga tarava, a rarawataka ni rogoca ni keirau a tarovi. Mo rogoca mada ga na nona vosa vua na loya ena talevoni! A tukuna vei keirau na ovisa me keirau qiriti koya ke dua na neirau leqa, ena qai raica na ka me cakava kina. Keirau vulagi ena vanua qo qai lailai ga na vosa vakaVaranise keirau kila, ia keirau raica nira yalovinaka ra qai dau veiciqomi na lewenivanua. Keirau dau vaqaqa: ‘Era na ciqoma na ka dina?’ A saumi na neirau taro ena vica na yabaki e muri ni keirau lesu me lai tara na Kingdom Hall ena vanua kece ena Gaspé. Keirau raica nira sa mai tacida vakayalo e levu ena vanua keirau a vunau kina. Io, o Jiova ga e vakatubura.​—1 Kor. 3:​6, 7.

Dua na Neirau iSolisoli

A sucu na luvei keirau yalewa o Lisa ena 1970. Na isolisoli qo i Jiova e vakamarautaki keirau vakalevu. Erau dau tokoni au vakaveitinani ena levu na vanua ni tara Kingdom Hall. Ni oti na nona vuli o Lisa, a kaya: “I nana kei tata, au a kauti kemudrau tani vakalekaleka mai na veiqaravi vakatabakidua, ia qo au sa na painia meu sosomitaka kina na gauna qori.” Ni oti e 20 na yabaki, e se painia tiko ga o Lisa. Ia qo erau sa painia vata tiko kei na watina o Sylvain. Erau marautaka na nodrau cakacaka vata ena kena tara e vica vata na valenisoqoni e vanuatani. E neitou isausau vakavuvale me rawarawa ga na neitou bula, me keitou tu vakarau tale ga ni soli keitou ena veiqaravi vei Jiova. Au sega ni guilecava na ka e tukuna o Lisa ena gauna a tekivu painia kina. O koya ga a uqeti au meu veiqaravi tale vakatabakidua ena 2001, au se painia tiko ga me yacova mai qo. E vakavulici au na painia meu nuitaki Jiova ena ka kece au cakava, me rawarawa ga na noqu bula, ia au vakacegu qai mamarau.

Bibi na Loloma, na Dina, kei na Yalodina ena Tara Valenisoqoni

E vakavulici au o Jiova ke da dau yalorawarawa da qai ciqoma na itavi cava ga e soli vei keda, eda na vakalougatataki vakalevu. Au marautaka dina na noqu veiqaravi ena Komiti ni Taravale ena Duidui Vanua, qai cakacaka vata kei ira na taciqu vakayalo ena levu na vanua ni tara valenisoqoni, e Quebec kei na so tale na vanua.

E sega soti ni maqosa na nodra vunau ena buturara eso era bole cakacaka, ia e maqosa dina na nodra cakacaka ena tara Kingdom Hall. O ira na tacida lomani qo era solia na nodra vinaka kece ena nodra cakacaka, qai vakavotui kina na nodra taledi. E tara rawa kina e dua na vale totoka me sokaloutaki kina o Jiova.

Au a tarogi: “Na cava e bibi duadua me cakava e dua e bole me veivuke ena tara Kingdom Hall?” Ena ka au kila, na imatai sara ga ni ka ena vinakati oya me lomani Jiova, na Luvena, kei ira na mataveitacini. (1 Kor. 16:14) Kena ikarua, ena gadrevi na dina kei na yalodina. E dau caka eso na ka e sega ni donu vei keda​—ia o koya e yalodina ena muria tiko ga na veidusimaki ni isoqosoqo. Ena uqeti koya na nona yalodina me soli koya me veivuke ena kena tara na vo ni valenisoqoni.

Vakavinavinaka vei Jiova

A takali ena 1985 o tamaqu, ia au sega ni guilecava vakadua na nona ivakasala meu ogaoga tiko ga ena isoqosoqo i Jiova. E sega ni vakatitiqataki ni ogaoga tale tiko ga o koya, me vakataki ira ga era sa rawata na nodra icovi ena isoqosoqo vakalomalagi i Jiova. (Vkta. 14:13) Sa yabaki 97 ena gauna qo o nana. Ni a strouk, sa sega ni vinaka sara na nona vosa me vaka e liu, ia e se kila vinaka tu ga na iVolatabu. E dau lavetaka eso na tikinivolatabu ni dau volavola mai, qai dau vakayaloqaqataki keitou me keitou yalodina tiko ga ni qaravi Jiova. Keitou vakavinavinaka vakaveitacini vei rau na neitou itubutubu dau loloma!

Au vakavinavinakataki Jiova ena vuku i Shirley, na watiqu yalodina qai noqu itokani. E dau vakamareqeta na ivakasala e solia vua o tinana: “Ena levu na itavi e vakaogai koya kina o Vern, mo vulica mo dau soli koya me qaravi ira tale na so.” Sa oti qo e 49 na yabaki na neirau vakamau, ke keirau mani yacova na bula vaqase keirau nakita dei me keirau qaravi Jiova vata tiko ga. Ke keirau bula ena icavacava ni ituvaki qo, keirau sa na gonegone tale qai tomani na neirau veiqaravi me tawa mudu. Io, keirau a “vakaitavi vakalevu ena cakacaka ni Turaga.” (1 Kor. 15:58) A karoni keirau dina o Jiova qai sega ni bureitaka vei keirau e dua na ka vinaka.

[iVakamacala e ra]

[iYaloyalo ena tabana e 31]

“E neitou isausau vakavuvale me rawarawa ga na neitou bula, me keitou tu vakarau tale ga ni soli keitou ena veiqaravi vei Jiova”