iVola Mai Haiti

“Au Kalougata Dina”

A DREDRE sara ga meu sarava na itukutuku ni vakacaca ni oti na uneune mai Haiti ena 12 Janueri, 2010. Ia ena ika20 ni siga, keirau a veivosaki kei na noqu itokani dredre o Carmen qai vakatura me keirau bolecakacaka ena lakolako i Haiti. Keirau a veikiIai ena vica na yabaki sa oti ena neirau a bole me keirau lai nasi ena tara ni dua na Kingdom Hall. Tekivu mai kea keirau sa mai veitokani dredre sara qai keirau dau bolecakacaka ena so tale na vanua e gadrevi kina na veivuke.

Au tukuna vei Carmen ni rairai au na sega ni lai veivuke i Haiti baleta niu sega ni kaukaua vakayago qai tarai au vakalevu na ka e yaco mai kea. E kaya o koya ni vinaka me keirau cakacaka vata ga ni keirau dau veitokoni. A vakayaloqaqataki au nona vosa, au mani veitaratara sara kei na itikotiko liu ni iVakadinadina i Jiova mai Brooklyn e Niu Yoka, keirau a veivosaki kei koya e qarava tiko na tabana ni vakacoko e Mereke. Au a solia na yacaqu meu dua tale ga e bolecakacaka. Au a cavuti Carmen tale ga qai kerea ke rawa ni keirau cakacaka vata. E tukuni vei au ni sega ni dua na ka e vakadeitaki, keirau na vakadonui me keirau na cakacaka vata se na dua ga vei keirau ena vakadonui.

Au mani tomana tiko ga na noqu ituvatuva ni bula ni veisiga, niu sega ni vakabauta ni na vakadonui meu lako. Ni oti tale e va na siga ena Moniti 25 a qiriti au mai o Brooklyn, qai taroga seu na lako rawa i Haiti ena siga tarava! Au kidroataka dina. Au mani tukuna niu na qarava na noqu itavi ena noqu vinaka kece. Na imatai ni ka au cakava, au kerea na noqu livi mai valenicakacaka. Oti keirau mani veivosaki kei Carmen, qai tukuna o koya ni sega ni vakadonui me lako baleta e sega ni kila na vosa vakaVaranise. Au marau ni sa vakadonui meu lako, ia au via ririko tale ga. Niu sa rawata na noqu tikite ni waqavuka ena 28 Janueri, au biuti Niu Yoka meu lako i Santo Domingo ena Dominican Republic, e toka tikivi Haiti.

A mai waraki au ena raraniwaqavuka e dua na iVakadinadina itabagone qai kauti au sara ina valenitabana ni iVakadinadina i Jiova e Dominican Republic. Rau yaco tale ga mai ena siga oya e rua na nasi mai Mereke, keitou mani vakaicili vata ena bogi. Ena mataka tarava, keitou a kau sara ina valenitabana mai Haiti e Port-au-Prince, e vitu veimama na aua na neitou ilakolako.

Ni keitou takosova na iyalayala me keitou curu i Haiti, keitou raica na levu ni vakacaca. E drukataki dina na vakacaca e cakava na uneune e 35 na sekodi na kena dede ina vanua rairai vinaka qo. E vakamosi yalo na sarava ena tivi na vakacaca qo; sa qai mosimosi sara nida raica e matada. Levu na vale era vakacacani, okati kina na nona itikotiko na peresitedi, so tale era rusa vakadua. E levu na vale qori e nodra o ira era cakacaka vakaukaua ena nodra bula kece​—e mai yali ena vica ga na sekodi. Au mani vakasamataka kina ni sega ni ka bibi ena noda bula na veika vakayago.

A kidavaki keitou ena matadredredre qai mokoti keitou o koya e dau kidavaki ira na vulagi ena valenitabana ni keitou sa yaco yani. A vakavinavinakataka na neitou bole ena cakacaka qo dina ni tu tale ga na ka keitou via cakava ena neitou bula. Ni oti na vakasigalevu keitou a lako ina Assembly Hall e tiko voleka ga sa veisautaki me valenibula. Au a sotava e kea eso tale era bolecakacaka, wili kina e dua na veiwatini erau vuniwai ruarua mai Jamani, na nodrau ivukevuke, kei na dua na dauveivakasucumi mai Suwitisiladi.

Au a tekivu cakacaka ena bogi oya. Era le 18 era davo tu ena meteresi ena fuluo ni Assembly Hall mera qaravi, so era iVakadinadina so e sega. O ira kece qo era qaravi vakatautauvata vei ira na vakailesilesi ni tabana vakavuniwai era iVakadinadina, era kauaitaki qai sega ni saumi na nodra qaravi.

Ena bogi oya a mai takali e dua na kena turaga e yabaki 80. A toka e yasana o watina, o yau kei na noqu itokani keirau rumu vata. Oti qori a tagi ena vutugu e dua na yalewa o Ketly. A musu na ligana imatau ni a mavoa ena uneune. E toka e yasana na iVakadinadina e dau vakavulici koya ena iVolatabu. Ena moce toka e yasai Ketly ena veibogi ena Assembly Hall.

Au lako vei Ketly, meu saga meu vakacegui koya ena nona mosi, ia e sega wale ga ni mosi na ligana, e mosi tale ga na lomana. E tukuna ni a tiko ena vale nei nona itokani ni yaco na uneune. Erau sega ni kila na ka e yaco. Rau veitauriliga ni rau cici ena varada, a baleti rau na lalaga qai buluti rau. E kacivi nona itokani, ia e sega ni bau rogo. E kila sara ga ni sa mate. A davo tikivi Ketly toka ga na yagoi nona itokani ena gauna era yaco yani kina na veivuke ni oti tale e va na aua. E musu na ligai Ketly imatau me yaco sara i tabana.

Ena imatai ni bogi ni noqu cakacaka, ena gauna kece e via moce kina o Ketly a raica lesu tale tiko na ka a yaco. A tukuna ena mamakeukeu: “Au kila na ka e kaya na iVolatabu me baleta na iotioti ni veisiga kei na uneune. Na inuinui marautaki ena gauna se bera mai. Au kila tale ga ni dodonu meu vakavinavinakataka niu bula. Vakasamataka mada ke yaco vei iko qo. Ena dua na gauna e totoka sara tu na bula, vakasauri ga sa mai va qo tu.” Au sega ni cakava rawa vei Ketly e dua na ka, au mokoti koya, au qai tekivu tagi. Keirau veitagicaki toka ga me yacova ni moce.

Ena talai e veisiga e dua na vuniwai kei na rua na nasi ena vanua e gadrevi kina na veiqaravi vakavuniwai. Au a talai i Petit Goave, e rauta ni rua na aua mai Port-au-Prince ke o draiva. Au salavata kei na rua tale na bolecakacaka​—e dua na nasi mai Florida kei na dua na vuniwai mai Varanise. Keitou yaco yani ena Kingdom Hall e kea ena veimama ni ciwa ena mataka, keitou kauta sara kina na neitou iyaya ni cakacaka. Era sa waraki keitou tiko mai kina eso era kila na neitou lako yani.

Keitou tekivu cakacaka sara. E katakata na draki, ra lako tiko ga mai e levu mera qaravi. Sa qai rawa ga ni keitou vakacegu vakalekaleka ni rauta na tolu na kaloko ena yakavi. Ena siga oya keitou culai ira kina e 114 qai vakasalataki ira e 105. Sa dua na ka na noqu wawale ia au a marau ni qaravi ira era vakaleqai.

E sivia e rua na macawa na noqu veiqaravi voli e Haiti. Voleka ni veibogi au na cakacaka me 12 na aua ena Assembly Hall. Sa bau cakacaka levu dina, au se sega vakadua ni bau cakava. Ia e ka dokai, au kalougata tale ga niu vakaitavi kina. Au marau niu rawa ni vukei ira qai vakacegui ira na kai Haiti era vakaleqai vakaca.

E levu sara na ka keimami vulica. Me kena ivakaraitaki, o Eliser na gonetagane yabaki 15 au a qarava, a musu e dua na yavana. Au dau raica ni vakavoca na kena kakana me kei Jimmy e dau mai yadravi koya ena bogi. A tukuna vei au ni dau lako mai o Jimmy ena veibogi ni se bera ni kana. Au vulica vei Eliser ni se rawa ga nida wasea na ka, ke da mani dravudravua se vakaleqai na ituvaki ni yagoda.

E laurai tale ga na yalo vata oya vei ratou keitou cakacaka vata. E dua vei keitou a sega ni bula vinaka, e dua tale a mosi na dakuna. Ia erau vosota me rau vakaliuca ga na veika me baleti ira na vakaleqai. E vakayaloqaqataki au qo meu tomana tiko ga na noqu veiqaravi. Ena so na gauna keimami dau wawale, oca na neimami vakasama, keimami luluvu tale ga, ia keimami dau veitokoni me toso vinaka tiko ga kina na veiqaravi. E tawaguilecavi na veika oya! Au marau niu lewena e dua na isoqosoqo lotu vaKarisito era yalovinaka, dauloloma ra qai vakuai ira.

Ni bera niu biuti Haiti, erau vola e rua a musu na ligadrau imatau na nodrau ivola ni vakavinavinaka rau qai tukuna meu wilika ga niu sa vodo ena waqavuka. Au mani cakava vakakina. E tarai au sara ga na ka erau vola, au qai sega ni tarova rawa na noqu tagi.

Niu sa tiko tale ena noqu vanua keimami se veitaratara tiko ga kei ira na noqu itokani vou mai Haiti. Na itokani dina e dau kune qai vakatovolei ena gauna ni leqa. Au vakabauta na veitokani qo ena dei ni vakatovolei ena dua na gauna mai muri. Au kalougata dina.