Na Cava Era Cata Kina na Mesaia?

NI BULA voli e vuravura o Jisu era marautaka na lewenivanua na veika a tukuna ra qai drukataka na nona cakamana. “Era vakabauti koya” kina e levu me Mesaia yalataki se Karisito. Era kaya: “Ni yaco mai na Karisito, ena levu beka na nona cakamana ni vakatauvatani kei na tagane qo?”​—Joni 7:31.

E vuqa tu na ivakadinadina e tokona ni o Jisu na Mesaia, ia e levu era raica na ka e cakava kei na ka e tukuna era sega ga ni vakabauti koya. E rarawataki ni so sara mada ga era a vakabauti koya era goletani. Na cava era cati Jisu kina na Mesaia nira sa raica tu na kena ivakadinadina? Meda raica mada na vuna, da qai taroga, ‘Au na vakacalai tale ga me vakataki ira oya?’

Sega ni Yaco na Ka Era Nanuma

Ena gauna e sucu kina o Jisu, era namaka e levu na Jiu na basika ni Mesaia. Ni kau yani ina valenisoro o Jisu ni se gonedramidrami, era tavaki koya o ira era “waraka tiko na vakabulai nei Jerusalemi” vua na Mesaia yalataki. (Luke 2:38) E levu era raica na cakacaka i Joni na Dauveipapitaisotaki era taroga: “O koya beka qo na Karisito?” (Luke 3:15) Na cava mada era a namaka na Jiu ena imatai ni senitiuri me cakava na Mesaia?

O ira na Jiu ena gauna oya era vakabauta ni nona lako mai na Mesaia ena sereki ira mai na veivakalolomataki ni matanitu o Roma qai vakasuka tale mai na matanitu o Isireli. Ni bera ni tekivuna na nona cakacaka vakaitalatala o Jisu, era veivakamuai eso na iliuliu ra qai tokona na saqati ni matanitu e veiliutaki tiko ena gauna oya. Na ka era cakava e rairai vakavuna me cala na nodra rai na lewenivanua me baleta na Mesaia.

A duidui sara o Jisu vei ira na Mesaia vakailasu. A sega ni uqeta na ivalavala kaukaua, ia a vakavulici ira ga na rogoci koya mera lomani ira na kedra meca, mera vakamalumalumu tale ga ina veiliutaki. (Maciu 5:​41-44) A sega ni taleitaka o Jisu nira saga na lewenivanua mera buli koya me tui. Ia a vakavulica ga ni nona matanitu e “sega ni vakavuravura.” (Joni 6:15; 18:36) Na rai cala me baleta na Mesaia a vakamuai ira vakalevu na lewenivanua.

A raica qai rogoca o Joni na Dauveipapitaisotaki na ivakadinadina mana ni o Jisu na Luve ni Kalou. Ni tu e valeniveivesu a talai ira na nona tisaipeli mera tarogi Jisu: “O kemuni beka o koya ena lako mai, se me keimami waraka e dua tale?” (Maciu 11:3) A rairai vakasamataka o Joni ni o Jisu na Dauveivakabulai e yalataki era nuitaka tu na Jiu me na vakabulai ira.

Era sega ni ciqoma na yapositolo i Jisu ni na vakamatei o koya qai vakaturi. Ni vakamacalataka tiko ena dua na gauna o Jisu ni na vakararawataki qai vakamatei, “e kauti koya vakatikitiki o Pita qai vunauca.” (Marika 8:​31, 32) A sega ni taura rawa o Pita se sema vakacava na mate i Jisu kei na nona vakayacora na nona itavi vakaMesaia.

Ni curu yani i Jerusalemi ni bera na Lakosivia ena 33 S.K., era tavaki Jisu e dua na ilala levu era kacivaka tiko ni o koya na Tui. (Joni 12:​12, 13) Ia a veisau vakasauri na ituvaki qo! Ena macawa tiko ga oya a vesu o Jisu qai vakamatei. Erau kaya e rua na nona tisaipeli na gauna sa mate kina: “Keimami a nuitaka ni na vakabulai Isireli o koya.” (Luke 24:21) Ni vakaturi oti o Jisu qai rairai vei ira na nona tisaipeli, era se nanuma tiko ga ni na tauyavutaka na Mesaia e dua na matanitu e vuravura. Era taroga: “Turaga, oni na vakalesuya tale na matanitu o Isireli ena gauna qo?” O koya gona na rai cala me baleta na Mesaia sa dei tu e lomadra kei na nodra vakasama na rogoci Jisu.​—Cakacaka 1:6.

Ni sa vakaturi o Jisu i lomalagi, sovaraki na yalo tabu, sa qai matata vei ira na nona tisaipeli ni na veiliutaki vakatui mai lomalagi na Mesaia. (Cakacaka 2:​1-4, 32-36) Erau doudou na yapositolo o Pita kei Joni me rau vunautaka na nona vakaturi o Jisu, qai vakadinadinataki ena nodrau cakamana ni tokoni rau na Kalou. (Cakacaka 3:​1-9, 13-15) Nira rogoca na ka erau tukuna era lai vakabauta kina e udolu era tiko e Jerusalemi. Na ka e yaco oya e votivoti sara ga vei ira na iliuliu ni lotu vakaJiu. Nira cati Jisu era cati tale ga na nona yapositolo kei ira na nona tisaipeli. Na cava era sa rui cati Jisu kina?

Cati Koya na iLiuliu ni Lotu

Ni mai bula e vuravura o Jisu, na nodra vakasama kei na nodra ivakavuvuli na iliuliu ni lotu vakaJiu sa veicalati sara kei na ka e vakatavuvulitaka na iVolatabu. O ira na iliuliu ni lotu ena gauna oya na Setoki, Farisi kei ira na vunivola, era vakabibitaka na lawa era bulia ga, sega ni Vosa ni Kalou. Era beitaki Jisu vakavica ni beca na Lawa ena nona veivakabulai vakacakamana ena siga ni vakacecegu. A tukuna vakadodonu o Jisu ni sega ni vakaivolatabu na nodra ivakavuvuli ena nona vakacala na ivakarau ni nodra veiliutaki kei na nodra nanuma ni vakadonui ira na Kalou. E duidui sara o Jisu ni susu mai ena vuvale dravudravua a sega tale ga ni vuli ena nodra koronivuli ni lotu na Jiu. Sa rauta me dredre vei ira na turaga dokadoka oya mera ciqoma ni o Jisu na Mesaia! Na ka e tukuna o Jisu a vakacudrui ira sara ga “ra qai bosea mera vakamatei koya.”​—Maciu 12:​1-8, 14; 15:​1-9.

Era vakamacalataka vakacava na iliuliu ni lotu na kaukaua a cakamana kina o Jisu? Era sega ni vakacala ni a yaco dina. Ia era saga me kua ni vakabauti nira tukuna na nona cakamana e rawa ga ena kaukaua i Setani, era kaya: “O ka qo e vakasavi ira na timoni ena kaukaua i Pielisipupi, na nodra iliuliu na timoni.”​—Maciu 12:24.

E tiko tale ga na vuna levu era sega ni ciqomi Jisu kina na iliuliu ni lotu ni Mesaia. Ni vakaturi Lasarusa o Jisu, era bosevata na iliuliu ni lotu ra qai tukuna: “Sa levu nona cakamana na tamata qo, cava meda cakava? Ke da vakalaivi koya tiko va qo era na vakabauti koya kece. Era na lako mai na kai Roma ra qai taura noda vanua ni sokalou kei na noda matanitu.” Nira leqataka ni na kau tani na nodra lewa kei na nodra itutu, era mani bosea vata na iliuliu ni lotu mera vakamatei Jisu kei Lasarusa!​—Joni 11:​45-53; 12:​9-11.

Veivakaduiduitaki kei na Veivakacacani

Na nodra rai na iliuliu ni lotu vakaJiu ena imatai ni senitiuri era uqeta na nodra dau saqati o ira era vakabauta ni o Jisu na Mesaia. Nira dokadokataka na nodra itutu, e daubeci kina e dua e vakabauti Jisu, era kaya: “E sa vakabauti koya beka e dua vei ira na iliuliu se Farisi?” (Joni 7:​13, 48) Eso na Jiu era kilailevu me vakataki Nikotimo kei Josefa na kai Arimacea, era tisaipeli i Jisu ia era sega ni vinakata me kilai na nodra vakabauta. (Joni 3:​1, 2; 12:42; 19:​38, 39) Era lewa na iliuliu ni lotu vakaJiu “me vakatalai tani mai na nodra valenilotu o koya e vakabauta ni o Jisu na Karisito.” (Joni 9:22) O ira qo era cati ra qai vosa vakacacataki mera kaitani.

Na nodra tusaqati na yapositolo kei ira na tisaipeli i Jisu e lai tini sara ena nodra vakararawataki. Nira doudou tiko ga na vunau era vakararawataki na yapositolo ena nodra mataveilewai levu na Jiu, na Sanadrini. (Cakacaka 5:40) Era beitaka vakailasu na dauveitusaqati ni a vosa vakacacataka na Kalou na tisaipeli o Sitiveni. Era mani vakarota kina na lewe ni Sanadrini me vakaviriki me mate. A “levu sara kina na veivakacacani vei ira na lewe ni ivavakoso e Jerusalemi. Era dui se na tisaipeli kece ina veivanua e Jutia kei Samaria.” (Cakacaka 6:​8-14; 7:54–8:1) A vakaitavi tale ga kina o Saula, sa qai kilai emuri me yapositolo o Paula ena nodra vakararawataki na lotu vaKarisito ena nodra veiuqeti na bete levu kei “ira na qase era lewe ni matabose.”​—Cakacaka 9:​1, 2; 22:​4, 5.

Ena gauna ni veivakacacani qori, e tubu totolo na kedra iwiliwili na lotu vaKarisito ni sa oti e vica na yabaki na mate i Jisu. Ia nira sa mai vakabauta e le udolu, era lewe lailai ga na lotu vaKarisito mai Palesitaina ena imatai ni senitiuri. Ni dua e tukuna e matanalevu ni lotu vaKarisito ena vakamadualaki qai vakararawataki.

Na Ka Eda Vulica Vei Ira Era Cati Jisu

Eda sa raica oti mai na rai cala, veivakamuai vakailawalawa, kei na veivakararawataki era sega ni vakabauti Jisu kina e levu ena imatai ni senitiuri. Nikua tale ga e vakavu veilecayaki na rai cala me baleti Jisu kei na nona ivakavuvuli. Me kena ivakaraitaki, levu era vakabauta ni Matanitu ni Kalou e tiko e lomadra se na yaco mai ena sasaga ni tamata. Eso tale era nuitaka na kilaka vakasaenisi me walia na leqa ni kawatamata, e sega ni gadrevi kina me vakabauti na Mesaia. Na nodra kaya e levu na dauvakalelewa nikua ni sega ni dina na itukutuku vakaivolatabu ni cakacaka vakaitalatala i Jisu, era sega ni vakabauta kina ni o koya na Mesaia.

Na itukutuku kei na vakasama sa tu rawa e vakavuna ga na nodra veilecayaki e levu me baleta na nona itavi na Mesaia se ra sega ni kauaitaka mera kila. Ia vei ira era via kila na kena dina, sa tu e levu na ivakadinadina nikua ni o Jisu na Mesaia ni vakatauvatani kei na imatai ni senitiuri. E tu ena iVolatabu vakaIperiu taucoko na parofisai kece me baleta na ka ena cakava na Mesaia vaka kina na va na Kosipeli ena iVolatabu e volaitukutukutaka ni mai vakayacora o Jisu na parofisai kece oya.a

E levu tu na ivakadinadina me vukei keda yadua meda vakatulewa kina me baleta na ulutaga qo. E bibi meda vakatulewa sara ga qo. Na vuna? Ni vakatakila na iVolatabu na Tui ni Matanitu ni Kalou na Mesaia o Jisu, sa na vakarau vakawabokotaki ira era vakarusai vuravura tiko qai vakalesuya mai na veiliutaki dodonu ena parataisi e vuravura mera bula tawamudu kina o ira era talairawarawa. (Taniela 2:44; Vakatakila 11:​15, 18; 21:​3-5) O rawa tale ga ni nuitaka na bula totoka qo ke o vulica na veika me baleti Jisu qai vakabauti koya. Taura vakabibi na vosa i Jisu: “Na levu ni nona lomani vuravura na Kalou e solia kina na Luvena e duabau ga e bulia, mera kua ni rusa o ira era vakabauti koya, mera rawata ga na bula tawamudu.”​—Joni 3:16.

[iVakamacala e ra]

[Tikina bibi ena tabana e 20]

Ke o bula ena gauna i Jisu, o na vakabauta na Mesaia?

[iYaloyalo ena tabana e 21]

Na rai cala me kua ni vakalatia na nomu via kila na ka dina me baleti Jisu