Vakavulica na Luvemu
Na Ka Vuni o Rawa ni Tukuna Vei Ira Tale Eso
E DUA a bau tukuna vei iko e dua na ka vuni?—a Au na via tukuna vei iko e dua. E vakatoka na iVolatabu me “ka tabu a vunitaki tu ena dua na gauna balavu.” (Roma 16:25) Na “ka tabu” qo a kila duadua tiko ga na Kalou. Meda raica mada na sala e vakatakila kina o koya vei keda.
O kila na ibalebale ni vosa “tabu”?— E kena ibalebale e dua na ka e bibi se savasava. Na ka vuni qo e vakatokai gona me ka vuni tabu baleta ni vu vakalou, o koya e savasava. O cei o nanuma nira via kila tale ga na ka vuni qo?— O ira na agilosi. E kaya na iVolatabu: “Na veika sara ga qo era dau via kila na agilosi.” Io, era via kila na ka vuni tabu.—1 Pita 1:12.
A tukuna qai vakamacalataka tale ga na ka vuni qo o Jisu ena gauna a bula kina e vuravura. Ni vosa tiko vei ira na nona tisaipeli a tukuna: “E vakatarai vei kemuni moni kila na veika vuni ni matanitu ni Kalou.” (Marika 4:11) O taura rawa na cava na ka vuni oya?— Qo na Matanitu ni Kalou a vakavulica o Jisu meda masulaka!—Maciu 6:9, 10.
Meda raica mada na vuna e ka vuni tu kina na Matanitu ni Kalou “ena dua na gauna balavu,” me yacova ni mai bula e vuravura o Jisu qai vakamacalataka. Ni rau beca na lawa ni Kalou o Atama kei Ivi, erau vakatalai tani mai na were o Iteni, ia era kila na dauveiqaravi ni Kalou ni na vakalesuya tale na Kalou na vuravura me parataisi. (Vakatekivu 1:26-28; 2:8, 9; Aisea 45:18) Era volatukutukutaka gona na marau ena vakila na kawatamata e vuravura ni sa veiliutaki na Matanitu ni Kalou.—Same 37:11, 29; Aisea 11:6-9; 25:8; 33:24; 65:21-24.
Vakasamataka mada o cei ena liutaka na Matanitu ni Kalou. O bau kila se o cei e digitaka na Kalou me kena iLiuliu?— Na luvena o Jisu Karisito, na “Tui ni Sautu.” E kaya na iVolatabu ni na “vakatau kivei koya na lewa.” (Aisea 9:6, 7) E dodonu meda “kila [na veika] me baleta na ka vuni tabu ni Kalou, ya o Karisito.” (Kolosa 2:2) A tokitaka na Kalou ina katonigone i Meri na nona bula na imatai ni agilosi (luvena vakayalo) a bulia sara ga. E agilosi kaukaua na Luvena a tala mai vuravura na Kalou me cabora na nona bula ena vukuda meda rawata kina na bula tawamudu.—Maciu 20:28; Joni 3:16; 17:3.
Na ka vuni qo e sega ni okati ga kina na nona digitaki Jisu na Kalou me iLiuliu ni nona Matanitu. E oka tale ga kina na nodra vakaturi na tagane kei na yalewa mera bula vata kei Jisu i lomalagi. Era na veiliutaki tale ga kei koya!—Efeso 1:8-12.
Ena vinaka meda kila na yacadra eso era na veiliutaki kei Jisu mai lomalagi. A tukuna vei ira na nona yapositolo yalodina o Jisu ni na vakarautaka e dua na tikina me nodra. (Joni 14:2, 3) Ke da wilika na tikinivolatabu era toka qo, eda na kila kina na yacadra eso na tagane kei na yalewa era na veiliutaki vata kei Jisu ena Matanitu nei Tamana.—Maciu 10:2-4; Marika 15:39-41; Joni 19:25.
A sega ni kilai tu ena dua na gauna balavu na kedra iwiliwili na lai veiliutaki kei Jisu mai lomalagi mera lewe ni nona Matanitu. Ia sa kilai na kedra iwiliwili nikua. O kila era le vica?— E tukuna na iVolatabu nira le 144,000. Qo e okati tale ga ena ka vuni tabu.—Vakatakila 14:1, 4.
O nanuma ni ka marautaki me dua e kila na “veika vuni ni matanitu ni Kalou”?— Ke vaka kina meda saga sara meda kila vinaka na veika vuni qo, qai vakamacalataka vei ira e levu tale.
[iVakamacala e ra]
a Ke o wiliwili tiko kei na dua na gone, mo cegu ni o raica na itoqa balavu o qai uqeti gone me tukuna na nona nanuma.
TARO:
▪ Na cava na ka vuni a veivosakitaki? Na cava e vakatokai kina qori?
▪ Na cava na ka vuni qo, o cei a tekivu vakavulica?
▪ Na cava eso na ka o sa vulica me baleta na ka vuni qo?
▪ O na vakamacalataka vakacava vua na nomu itokani?
[iYaloyalo ena tabana e 31]
Na cava era via kila tiko na agilosi?