Kauaitaka na Veika a Yaco Mai Iteni

E DUA na ka e kurabuitaki vakalevu nira kaya eso na vuku ni sega ni tokona na vo ni iVolatabu na italanoa me baleti Iteni. Me kena ivakaraitaki, a vola o Paul Morris na Parofesa ni veika vakalotu: “E sega tale ni bau tukuni na veika me baleti Iteni ena itukutuku a volai e muri ena iVolatabu.” De ra na duavata kina eso tale na “vuku,” ia e veibasai sara ga kei na itukutuku dina.

E tasereki ena iVolatabu na itukutuku me baleta na were o Iteni, Atama, Ivi, kei na gata.a E bibi sara na cala era cakava na iliuliu ni lotu kei ira na dauvakadiloya na iVolatabu ni vakatauvatani kei ira na vuku. Nodra vakacala gona na itukutuku me baleti Iteni ena Vakatekivu, era sa vakacala sara tiko ga na iVolatabu. Ena sala cava?

Meda kila na iVolatabu taucoko e bibi meda kila na ka a yaco ena were o Iteni. Me kena ivakaraitaki, e volai na Vosa ni Kalou me dusimaki keda meda kila na isaunitaro bibi duadua e taroga na kawatamata. Na isaunitaro qori ena iVolatabu eda na vakasamataka tale kina na veika a yaco ena were o Iteni. Meda raica mada eso na kena ivakaraitaki.

● Na cava eda qase kina da qai mate? Erau na bula tawamudu o Atama kei Ivi ke rau talairawarawa tiko ga vei Jiova. Ia ke rau talaidredre erau na mate. Rau mani mate ena siga erau talaidredre kina. (Vakatekivu 2:​16, 17; 3:​19) Erau sa sega gona ni uasivi, rau sa qai vakadewa ga na ivalavala ca vei ira na nodrau kawa. E vakamacalataka na iVolatabu: “Ena vuku ni dua ga na tamata e curu kina i vuravura na ivalavala ca kei na mate ena vuku ni ivalavala ca, mani dewa na mate vei ira na tamata kece ga ni sa valavala ca na tamata kece ga.”​—Roma 5:​12.

● Na cava e vakatara kina na veika ca na Kalou? A tukuna o Setani ena were o Iteni ni lasulasu na Kalou qai bureitaka na ka vinaka vei ira na nona ibulibuli. (Vakatekivu 3:​3-5) A vakalewa na dodonu ni veiliutaki i Jiova. Erau mani muri Setani o Atama kei Ivi; erau sega ni taleitaka na veiliutaki cecere i Jiova, erau vakaraitaka ni rawa vua na tamata me vakatulewataka na ka vinaka kei na ka ca. Ena nona lewadodonu kei na vuku e kila o Jiova ni na dua ga na sala ena saumi kina na veibeitaki oya​—me soli na gauna mera liutaki ira ga na tamata. Na veika ca a yaco ena nodrau muria na veivakamuai i Setani e vakatakila vinaka na ka dina qo: Ena guce na veiliutaki ni tamata ke sega na veivuke ni Kalou.​—Jeremaia 10:23.

● Na cava na inaki ni Kalou me baleta na vuravura? A tiko na ivakatagedegede totoka a kotora o Jiova me baleta na were o Iteni. A tukuna vei rau o Atama kei Ivi me rau vakaluveni, me rau vakatawai vuravura, rau qai “vakamalumalumutaka,” me rawati kina na veika vinaka kei na duavata e vuravura taucoko. (Vakatekivu 1:​28) Na inaki ni Kalou me parataisi na vuravura mera bula kina na kawa i Atama kei Ivi era taucoko ra qai duavata. E levu gona na itukutuku ena iVolatabu e baleta tiko na sala ena vakayacora kina na Kalou na nona inaki taumada.

● Na cava a mai bula kina e vuravura o Jisu? Na talaidredre ena were o Iteni erau mate kina o Atama kei Ivi, vaka kina o ira kece na nodrau kawa, ia e vakarautaka na Kalou dauloloma na inuinui. A tala mai na Luvena i vuravura me vakarautaka na ivoli. (Maciu 20:28) Na cava e kena ibalebale? O Jisu na “iotioti ni Atama”; a rawata na ka a lekata o Atama. A taucoko na nona bula ni talairawarawa tiko ga vei Jiova. A lomasavu me solia na nona bula me isoro se ivoli, me rawa kina ni vosoti na nodra ivalavala ca o ira kece na yalodina, mera rawata tale ga na bula rau a marautaka o Atama kei Ivi e Iteni ni bera ni rau valavala ca. (1 Korinica 15:​22, 45; Joni 3:​16) A vakadeitaka gona o Jisu ni na yaco dina na inaki i Jiova ena kena vukici na vuravura qo me vaka tale na parataisi mai Iteni.b

E matata vinaka tu na inaki ni Kalou, e sega ni vaka na ivakavuvuli vakalotu e sega na kena yavu. Ena yaco dina. Me vaka ga ni a dua dina na were o Iteni ena vuravura qo, era bula kina na tamata kei na manumanu, ena yaco dina tale ga na inaki ni Kalou sa tu qo e matada. O na bula kina mo raica na kena vakayacori? E toka sara ga qori ena qeteqete ni ligamu. E vinakata na Kalou meda bula kece kina, o ira sara mada ga era butusevata.​—1 Timoci 2:​3, 4.

Ni vakarau mate o Jisu a vosa vua e dua na turaga a butusevata. Na turaga qo e daubasulawa; e kila ni dodonu ga me vakamatei. Ia a vakanuinui vei Jisu qai kerea na nona veivakacegui. Na cava a kaya vua o Jisu? “Daru na tiko vata mai Parataisi.” (Luke 23:43) Ke vinakata gona o Jisu me raica tale na daubasulawa oya​—vakaturi qai vakalougatataki me rawa ni bula tawamudu ena parataisi me vakataki Iteni​—e sega beka ni vinakata tale ga na veivakalougatataki oya vei iko? E vaka kina! Qori tale ga na ka e vinakata o Tamana! Ke o via bula kina, mo gumatua ni vulica na veika me baleta na Kalou a teivaka na were o Iteni.

[iVakamacala e ra]

[Kato/​iYaloyalo ena tabana e 10]

NA PAROFISAI E ISEMA NI IVOLATABU TAUCOKO

“Ka’u na vakaveimecakitaki kemudrau kei na yalewa, kei na nomu kawa kei na nona kawa; ena butuqaqia na ulumu ko koya, ia ko na qaqia na bukubukuni-yavana.”​—Vakatekivu 3:​15.

Oya na imatai ni parofisai ena iVolatabu a cavuta na Kalou mai Iteni. O cei o ratou na le va: na yalewa, nona kawa, na gata, kei na nona kawa? Eratou na “veimecaki” vakacava?

NA GATA

Setani na Tevoro.​—Vakatakila 12:9.

NA YALEWA

Na isoqosoqo i Jiova era lewena na ibulibuli vakayalo e lomalagi. (Kalatia 4:​26, 27) A parofisaitaka o Aisea me baleta na yalewa ena vakasucuma e dua na matanitu vakayalo ena gauna se bera mai.​—Aisea 54:​1, 66:8.

NA KAWA NI GATA

O ira era digia mera cakava na inaki i Setani.​—Joni 8:​44.

NA KAWA NI YALEWA

Qo o Jisu Karisito, e lako mai na isoqosoqo vakalomalagi i Jiova. Era okati tale ga ena “kawa” na taci Karisito vakayalo era na veiliutaki vata e lomalagi. O ira na lotu vaKarisito lumuti e tauyavu kina na matanitu vakayalo, “na Isireli ni Kalou.”​—Kalatia 3:16, 29; 6:​16; Vakatekivu 22:18.

BUKUBUKU NI YAVA E VAKAMAVOATAKI

A mosimosi dina na ka a yaco vua na Mesaia, ia a sega ni vakaleqai koya vakadua. A yaco na lomai Setani ena nona vakamatei o Jisu. Ia a qai vakaturi.

NA ULU E BUTUQAQI

Na ibutu ena vakaleqai Setani vakadua. Ena vakawabokotaki Setani o Jisu. Ni bera oya ena vaqeavutaka na caka ca i Setani a tekivu mai Iteni.​—1 Joni 3:8; Vakatakila 20:10.

Na ivakamacala lekaleka me baleta na usutu bibi ni iVolatabu, raica na brochure The Bible​—What Is Its Message? tabaka na iVakadinadina i Jiova.

[Yaloyalo ena tabana e 11]

A sauti Atama kei Ivi na nodrau valavala ca