Me Sauma Na Ivolatabu

O Cei na Kalou?

Ena veivosakitaki ena ulutaga qo eso na taro o rairai dau lomatarotarotaka tu, e tiko tale ga na tikinivolatabu mo wilika kina na kena isau. Era marau na iVakadinadina i Jiova mera veivosakitaka kei kemuni na kedra isau.

1. O cei na Kalou?

E bulia na Kalou dina na ka kece. E vakatokai koya na iVolatabu me “Tui ni gauna tawamudu,” e kena ibalebale ni sega na nona itekitekivu, sega tale ga na nona ivakataotioti. (Vakatakila 15:3) Ni iVurevure ni bula e dodonu gona meda sokaloutaki koya vakatabakidua.​—Wilika Vakatakila 4:​11.

2. E Kalou vakacava?

E yalo na Kalou, e sega ni dua e raici koya rawa. Kena ibalebale ni o koya e cecere sara vei ira na ka buli era tu e vuravura. (Joni 1:​18; 4:​24) E vakavotui na nona itovo ena ka e bulia. Kena ivakaraitaki, nida raica na veimataqali kauvuata kei na senikau duiroka eda kila rawa kina na nona loloma kei na nona vuku. Eda kila tale ga na nona kaukaua ena vakatubuqoroqoro ni lomalagi kei na vuravura.​—Wilika Roma 1:​20.

Na iVolatabu e sereka e levu tale na itovo ni Kalou. Me vaka na ka e taleitaka, na ka e cata, na veika e cakava vei keda, kei na ivakarau ni lomana ena duidui ituvaki.​—Wilika Same 103:​7-​10.

3. O cei na yacana?

A kaya o Jisu: “Tamai keimami mai lomalagi, me dokai na yacamuni.” (Maciu 6:9) E levu na icavuti ni Kalou, ia e dua ga na yacana qai duidui na kena icavucavuti ena dui vanua. Na yacana ena vosa vakaViti “Jiova.”​—Wilika Same 83:18.

Ena levu na iVolatabu sa sosomitaki na yaca ni Kalou ena icavuti Turaga se Kalou. Ia e voleka ni basika vaka7,000 na yaca ni Kalou ena iVolatabu. A cavuta sara ga o Jisu na yaca ni Kalou ni vakamacalataka tiko na iVolatabu vei ira na rogoci koya. E vukei ira tale ga mera kila vinaka sara na Kalou.​—Wilika Joni 17:26.

4. E kauaitaki keda o Jiova?

E ivakaraitaki ni nona kauaitaki keda ni daurogoca noda masu. (Same 65:2) E levu na leqa e dau tarai keda, kena ibalebale beka qo ni sega ni kauaitaki keda na Kalou? Eso era kaya ni vakavuna na Kalou na noda rarawa meda vakatovolei kina, ia e sega ni vaka kina. Ni kaya na iVolatabu: E “yawa vua na Kalou, me caka ca.”​—Jope 34:10; wilika Jemesa 1:​13.

Ena nona veikauaitaki e solia kina vei keda na Kalou na galala ni vakatulewa. Eda vakavinavinakataka beka ni solia na Kalou na galala meda digia kina meda qaravi koya? (Josua 24:15) Na levu ni rarawa e tarai keda tu nikua e vu mai na nodra digia e levu mera caka ca vei ira tale eso. E rarawa o Jiova ni raica na levu ni ivakarau ca.​—Wilika Vakatekivu 6:​5, 6.

Sa voleka sara na gauna me vakayagataki Jisu kina o Jiova me vakaotia vakadua na leqa kei ira era vakavuna tiko. E tiko na vuna vinaka e vakatara tiko kina na rarawa o Jiova, ia ena lekaleka ga. Eda na raica ena dua tale na itabataba ni mekesini qo na vuna e vakatara tiko kina na rarawa na Kalou.​—Wilika Aisea 11:​4.

5. Na cava e vinakata na Kalou meda cakava?

E buli keda o Jiova meda rawa ni kilai koya, da lomani koya tale ga. E vinakata sara ga meda vulica na veika dina me baleti koya. (1 Timoci 2:4) Nida vulica na iVolatabu eda na kila na Kalou me vaka e dua na iTokani.​—Wilika Vosa Vakaibalebale 2:​4, 5.

Ni ivurevure ni noda bula o Jiova, eda na lomani koya vakalevu cake mai na noda lomana e dua tale. Eda na cakava qori nida masu vua da qai muria na ka e tukuna. (Vosa Vakaibalebale 15:8) E tukuna gona o Jiova meda veilomani.​—Wilika Marika 12:​29, 30; 1 Joni 5:3.

Me ikuri ni ivakamacala, raica na wase 1 ni ivola qo e tabaka na iVakadinadina i Jiova. Na Cava Sara Mada e Kaya na iVolatabu?

[iYaloyalo ena tabana e 17]

E tiko beka na vuna vinaka e vakatara kina vakalekaleka na rarawa o Jiova?