O Cata na iValavala e Beci Kina na Lawa?

“O [Jisu] cata na ivalavala e beci kina na lawa.”—IPER. 1:9.

1. Na cava a vakavulica o Jisu me baleta na loloma?

ME VAKAVULICA o Jisu na bibi ni loloma, a tukuna vei ratou na nona tisaipeli: “Au solia vei kemudou e dua na ivunau vou, mo dou veilomani; mo dou veilomani me vaka ga na noqu lomani kemudou. Na ka qo era na kila kece kina ni dou noqu tisaipeli, ke dou veilomani.” (Joni 13:34, 35) A vakaroti ratou na nona imuri o Jisu me ratou dui vakaraitaka na loloma vosota. Na loloma qori ena kedratou ivakatakilakila. A vakasalataki ratou tale ga: “Lomani ira tiko ga na kemuni meca, masulaki ira tale ga era vakacacani kemuni.”—Maciu 5:44.

2. Na cava mera cata na imuri i Karisito?

² Me ikuri ni nona vakavulici ratou na nona tisaipeli me baleta na loloma, a vakavulici ratou tale ga ena ka me ratou cata. A tukuni me baleti Jisu: “O vinakata na ivalavala dodonu, o cata na ivalavala e beci kina na lawa [na ka ca].” (Iper. 1:9; Same 45:7) E dusia qo nida na sega wale ga ni saga meda vinakata na ivalavala dodonu, ia eda na cata tale ga na ivalavala ca se na ivalavala e beci kina na lawa. E veiganiti kina na nona vakamatatataka na yapositolo o Joni: “O ira kece era valavala ca tiko era beca na lawa, o koya gona, na beci ni lawa e okati me ivalavala ca.”—1 Joni 3:4.

3. Na ituvaki cava ena veivosakitaki ena ulutaga qo ena kilai kina nida cata na ka ca?

³ Nida lotu vaKarisito, e vinaka meda taroga: ‘Au dau cata na ivalavala e beci kina na lawa?’ Meda raica mada qo e va na ituvaki eda rawa ni vakaraitaka kina nida cata na ka ca: (1) noda rai me baleta na gunu sivia, (2) vakatevoro, (3) itovo dukadukali, kei na (4) noda rai me baleti ira era taleitaka na ivalavala e beci kina na lawa.

Me Kua ni Lewai Iko na Gunu

4. Na cava a doudou kina o Jisu me veivakasalataki ena gunu sivia?

⁴ A gunu waini ena so na gauna o Jisu, e kila ni isolisoli ni Kalou qori. (Same 104:14, 15) Ia a sega vakadua ni vakatanitaka na isolisoli qori ena nona gunu sivia. (Vkai. 23:29-33) A doudou kina o Jisu me veivakasalataki me baleta na gunu sivia. (Wilika Luke 21:34.) Na gunu sivia ena rawa ni vakayacori kina eso tale na ivalavala ca bibi.a A vola kina na yapositolo o Paula: “Ni kua tale ga ni mateni ena waini, ni dau yaco kina na itovo velavela, ia moni vakasinaiti ga ena yalo tabu.”(Efeso 5:18) A vakaroti ira tale ga na kenamarama ena ivavakoso o Paula mera kua ni “bobula ena nodra dau gunu waini.”—Taito 2:3.

5. Na taro cava soti me tarogi ke da vakatulewataka meda gunu?

⁵ Ke o vakatulewataka mo gunu, e vinaka mo taroga: ‘Au vakatotomuria na rai i Jisu me baleta na gunu sivia? Ke vinakati meu vakasalataki ira na so me baleta na ivalavala qo, au rawa ni doudou ni cakava qori? Au dau gunu meu guilecava kina na noqu lomaleqa se seavu kina na noqu nuiqawaqawa? E vakacava na levu ni ka au gunuva ena dua na macawa? Na cava au dau cakava ni tukuna vei au e dua niu sa gunu sivia tiko? Au dau soli ulubale se cudru?’ Ke lewai keda na yaqona ni valagi se yaqona ni Viti, eda na sega ni vakasama vinaka se vakatulewa vakavuku. Eda na saga na imuri i Karisito meda taqomaka na noda vakasama.—Vkai. 3:21, 22.

Cata na Vakatevoro

6, 7. (a) Na cava a cakava o Jisu vei Setani kei ira na timoni? (b) Na cava e takalevu kina nikua na vakatevoro?

⁶ A dei o Jisu me saqati Setani kei ira na timoni ena nona bula e vuravura. A sega ni vakamalumalumu o Jisu ena sasaga vakadodonu i Setani me tawayalodina. (Luke 4:1-13) A kidava rawa qai saqata tale ga na ivadi qaseqase i Setani me vakamua na nona vakasama kei na ka e cakava. (Maciu 16:21-23) O Jisu a vakabulai ira tale ga era gadreva mera galala mai na veivakalolomataki ni timoni.—Mari. 5:2, 8, 12-15; 9:20, 25-27.

⁷ Ni tekivu veiliutaki o Jisu ena 1914, a vakasavasavataki lomalagi ena veivakadukadukalitaki i Setani kei ira na timoni. Qori na vuna sa qai kaukaua ga kina na sasaga i Setani me ‘vakacala na vuravura taucoko.’ (Vkta. 12:9, 10) Eda sega gona ni kurabuitaka nira sa qai taleitaka ga e levu na vakatevoro, sa qai takalevu ga e veivanua. Eda na taqomaki keda vakacava?

8. Na cava meda taroga me baleta na ka ni veivakamarautaki eda digia?

⁸ E veivakasalataki vakadodonu na iVolatabu ena rerevaki ni vakatevoro. (Wilika Vakarua 18:10-12.) Nikua, o Setani kei ira na timoni era vakamua na noda rai nira vakayagataka na iyaloyalo, ivola, kei na qito ena vidio se kompiuta me uqeta na vakatevoro. Nida digia na ka ni veivakamarautaki, e bibi meda taroga: ‘Ena vica na vula sa oti, au digia beka na ka ni veivakamarautaki e vakaraitaki kina na ka vakatevoro me vaka na iyaloyalo, porokaramu ena tivi, qito ena vidio se kompiuta, ivola kei na komiki? Au kila ni bibi meu cata na ka vakatevoro, seu raica vakamamada na kena vakarerevaki? Au bau vakasamataka na rai i Jiova me baleta na ka ni veivakamarautaki au digia? Keu rawai ena veivakamuai i Setani, ena uqeti au beka na noqu lomani Jiova kei na noqu taleitaka na nona ivakavuvuli dodonu meu yavala totolo qai muduka?’—Caka. 19:19, 20.

Muria na iVakasala i Jisu me Baleta na iTovo Dukadukali

9. Ena rawa vakacava ni bucina e dua me vinakata na ka ca?

⁹ A tokona o Jisu na ivakatagedegede i Jiova me baleta na veiyacovi. E tukuna: “Oni sega beka ni wilika ni o koya e bulia na tamata mai na ivakatekivu e bulia na tagane kei na yalewa qai kaya, ‘Ena biuti tamana kina kei tinana o tagane me kabiti watina me rau sa na dua ga na yago’? Erau na sega ni lewe rua tiko, erau sa na dua ga na yago. O koya gona, na ka sa vauca vata na Kalou me kua ni tawasea na tamata.” (Maciu 19:4-6) A kila o Jisu ni ka eda raica ena tara na lomada. Ena nona iVunau ena Ulunivanua, a tukuna kina o Jisu: “Oni rogoca ni a tukuni, ‘Mo kua ni veibutakoci.’ Ia au kaya vei kemuni ni o koya e vakaraica tiko ga na yalewa ena nona garosa, e sa veibutakoci oti kei na yalewa ya e lomana.” (Maciu 5:27, 28) O ira gona na vakalecalecava na ivakasala i Jisu era sa bucina tiko mera vinakata na ka ca.

10. Tukuna na irogo me baleta na nona muduka e dua na sara iyaloyalo ca.

¹⁰ E uqeta o Setani na ivalavala dukadukali ni veiyacovi ena nona vakayagataka na iyaloyalo ca. E bini kasauru qori ena vuravura qo. O ira na sarava na iyaloyalo ca e dau dredre me taqusi mai na nodra vakasama na ka ca era raica. E rawa sara ga ni lewai ira na iyaloyalo ca. Raica mada na ka a yaco vua e dua na lotu vaKarisito. E tukuna: “Au dau sarava lo na iyaloyalo ca. Au dau tadra niu tu ena dua na vuravura e duidui mai na kena au qaravi Jiova tiko kina. Au kila ni cala oya, ia au tukuna lo ni se vakadonuya tiko na Kalou na noqu veiqaravi.” A qai veisau vakacava na nona rai? E tukuna: “Au lai tukuna vei ratou na qase ni ivavakoso na noqu leqa, ia qori e ka dredre duadua meu cakava.” A mani valuta rawa na tacida qo na ivalavala torosobu oya. A tusanaka: “Niu veisautaka na noqu bula, au vakila ni sa qai savasava dina na noqu lewaeloma.” O ira na cata na ka ca mera saga mera cata na iyaloyalo ca.

11, 12. Eda na vakaraitaka vakacava nida cata na ka ca nida digia na ivakatagi meda rogoca?

¹¹ Na ivakatagi kei na qaqanisere e rawa ni uqeta vakalevu na lomada. E isolisoli ni Kalou na ivakatagi, sa dede tale ga na kena vakayagataki voli mai ena sokalou dina. (Lako 15:20, 21; Efeso 5:19) Ia na vuravura ca i Setani e vakayagataka na ivakatagi me uqeta na ivalavala dukadukali. (1 Joni 5:19) O na kila vakacava ke sa vakadukadukalitaki iko tiko se sega na ivakatagi o rogoca?

¹² O rawa ni taroga: ‘Au dau rogoca na sere e uqeta na laba, veibutakoci, veidauci kei na vosavakacaca? Keu wilika vua e dua eso na qaqanisere, ena raica niu cata na ka ca se na qaqanisere oya e vakaraitaka ni dukadukali na lomaqu?’ Eda sega ni rawa ni tukuna nida cata na ka ca da qai taleitaka tiko na kena sere. E tukuna o Jisu: “Ia na ka e lako tani mai na gusu e vu mai na loma ni tamata, qo ga e vakadukadukalitaki koya. Me kena ivakaraitaki, e vu mai na loma ni tamata na vakanananu ca, na laba, na veibutakoci, na veidauci, na butako, na lasu, na vosavakacaca.”—Maciu 15:18, 19; vakatauvatana Jemesa 3:10, 11.

Vakatotomuria na Rai i Jisu me Baleti Ira na Vinakata na ka Ca

13. A raici ira vakacava na via caka ca tiko ga o Jisu?

¹³ A tukuna o Jisu ni mai kacivi ira na ivalavala ca se o ira na beca na lawa mera veivutuni. (Luke 5:30-32) Ia a raici ira vakacava era via caka ca tiko ga? A veivakasalataki vakalevu o Jisu mera kua ni rawai keda o ira qori. (Maciu 23:15, 23-26) A vakamatatataka tale ga: “Era na sega ni curu kece ina matanitu vakalomalagi o ira era tukuna vei au, ‘Turaga, Turaga,’ o koya ga e cakava na loma i Tamaqu mai lomalagi. Levu era na tukuna vei au ena siga ya [ni tauca na Kalou na nona lewa], ‘Turaga, Turaga, keimami a sega beka ni parofisai ena yacamuni, se vakasavi ira na timoni ena yacamuni, keimami cakava tale ga e levu na cakacaka veivakurabuitaki ena yacamuni?’ ” Ia ena sega ni vakadonui ira era sega ni veivutunitaka na nodra dau caka ca ena nona tukuna: “Ni lako tani.” (Maciu 7:21-23) Na cava era na cudruvi kina va qori? Baleta era beca na Kalou ra qai vakaleqai ira eso tale ena nodra ivalavala ca.

14. Na cava mera biu tani kina mai na ivavakoso o ira na sega ni veivutunitaka na nodra cala?

¹⁴ E vakarota na Vosa ni Kalou mera biu tani mai na ivavakoso o ira era sega ni veivutunitaka na nodra cala. (Wilika 1 Korinica 5:9-13.) Qo e tolu mada ga na vuna e bibi kina qori: (1) me kua ni vakarogorogocataki na yaca i Jiova, (2) me savasava tiko ga na ivavakoso, (3) me vukei tale ga o koya e cala me veivutuni ke rawa.

15. Na taro bibi cava soti meda taroga ke da via yalodina tiko ga vei Jiova?

¹⁵ Eda vakatotomuria na rai i Jisu me baleti ira era via caka ca tiko ga? E bibi meda vakasamataka eso na taro qo: ‘Au na digia meu dau veimaliwai kei na dua e sa vakasivoi se sa biuta na ivavakoso vaKarisito? Vakacava ke weka voleka e sa sega ni tiko e vale?’ Ena rawa ni vakatovolei dina ena ituvaki va qori na noda vinakata na ivalavala dodonu kei na noda yalodina vua na Kalou.

16, 17. Na cava a sotava e dua na tina lotu vaKarisito, a vukei vakacava me yalodina ni muria na ituvatuva e vauca na nodra vakasivoi o ira era sega ni veivutunitaka na nodra cala?

¹⁶ Vakasamataka mada na ka e sotava e dua na tacida yalewa, a vakaraitaka ena dua na gauna o luvenatagane ni lomani Jiova. Ia ena dua na gauna e muri, a sega ni veivutunitaka na nona ivalavala ca, mani vakasivoi mai na ivavakoso. E lomani Jiova na tacida yalewa oya, ia e lomani luvena tale ga qai dredre dina vua me muria na ivakaro vakaivolatabu me kua ni veimaliwai kei luvena.

¹⁷ Na ivakasala cava o na rawa ni vukei koya kina? A vukei koya e dua na qase ni ivavakoso me nanuma tiko ni kila o Jiova na nona rarawa. A vukei koya me vakasamataka na rarawa a rairai vakila o Jiova nira talaidredre eso na luvena vakayalo. A vakaraitaka vua na qase ni ivavakoso ni kila o Jiova na vakamosiyalo ni ituvaki e tu kina, ia e vinakata ga mera vakasivoi o ira era sega ni veivutunitaka na nodra ivalavala ca. A ciqoma o tacida yalewa na veika e tukuni vua qai yalodina ni muria na ituvatuva e vauca na veivakasivoi.b E vakamarautaki Jiova dina na ivakaraitaki ni yalodina va qori.—Vkai. 27:11.

18, 19. (a) Nida tagutuva na noda veimaliwai kei na dua e caka ca tiko ga, na cava e vakaraitaka oya? (b) Na cava ena rawa ni yaco ke da yalodina vua na Kalou kei na nona ituvatuva?

¹⁸ Ke o sotava tiko na ituvaki va qori, nanuma tiko o Jiova e kila na rarawa o vakila tu. Ni o tagutuva na nomu veimaliwai kei na dua e vakasivoi se biuta na ivavakoso, o sa vakaraitaka tiko ni o cata na ivakarau ni rai kei na itovo e vakavuna me yaco qori. O vakaraitaka tale ga ni o lomani koya e cala, o via cakava kina na ka ena vinaka ga vua. Na nomu yalodina vei Jiova ena rairai vakarawarawataka na nona veivutuni o koya e vakasivoi me lesu vei Jiova.

¹⁹ A vola e dua a vakasivoi qai vakalesui tale mai: “Au marau ni lomani ira na nona dauveiqaravi o Jiova, e vakadeitaka kina me savasava tiko ga na nona isoqosoqo. Eso na ka e caka ena rairai tawaloloma vei ira na sega ni qaravi Jiova, ia e veiganiti vei keda qai ivakaraitaki ni loloma.” O nanuma ni na rawa ni tukuna qori ke dau veimaliwai kei ira na lewe ni ivavakoso kei na nona vuvale ena gauna a vakasivoi tu kina? Na noda tokona na ituvatuva vakaivolatabu ni veivakasivoi e vakadinadinataka nida vinakata na ivalavala dodonu da qai kila ni tu vei Jiova na dodonu me lewa na ivakatagedegede ni itovo me muri.

“Cata na ka Ca”

20, 21. Na cava e bibi kina meda vulica meda cata na ka ca?

²⁰ E veivakasalataki na yapositolo o Pita: “Moni yalomatua, ni yadra tiko.” Na cava na vuna? Ni “veilakoyaki voli na kemuni meca, na Tevoro, me vaka na laione e tagi, e vakasaqara e dua me basuraka.” (1 Pita 5:8) Ena basuraki iko tale ga? E vakatau vakalevu qori ena vinaka ni nomu vulica mo cata na ka ca.

²¹ E sega ni rawarawa na nomu sasaga mo cata na ka ca. Eda sucu ivalavala ca da qai bula tu ena vuravura e uqeta meda vakaceguya na noda gagadre vakayago. (1 Joni 2:15-17) Eda rawa ni cata na ka ca ke da vakatotomuri Jisu Karisito da qai saga me titobu na noda lomani Jiova. Meda vakadeitaka gona meda “cata na ka ca,” da qai nuidei ni o Jiova ena ‘maroroi ira na nona tamata yalododonu qai vakabulai ira mai na ligadra na tamata ca.’—Same 97:10.

[iVakamacala e ra]

O na Sauma Vakacava?

• Eda na kila vakacava na noda rai me baleta na gunu?

• Eda na taqomaki keda vakacava mai na vakatevoro?

• Na cava e rerevaki kina na iyaloyalo ca?

• Eda na vakaraitaka vakacava nida cata na ka ca ni vakasivoi e dua na wekada voleka?

[iYaloyalo ena tabana e 29]

Ke o vakatulewataka mo gunu, na cava mo nanuma tiko?

[iYaloyalo ena tabana e 30]

Qarauna na veivakamuai i Setani ena ka ni veivakamarautaki

[iYaloyalo ena tabana e 31]

Na cava sa bucina tiko e dua e dau sara iyaloyalo ca?