Me Sauma na iVolatabu

O Cei o Jisu Karisito?

Ena veivosakitaki ena ulutaga qo eso na taro o rairai dau lomatarotarotaka tu, o na raica tale ga na tikinivolatabu mo wilika kina na kena isau. Era marau na iVakadinadina i Jiova mera veivosakitaka kei kemuni na kena isau.

1. O cei o Jisu Karisito?

E sega ni dua e vakataki Jisu ni a bula e liu mai lomalagi me dua na kabula vakayalo ni bera ni mai sucu e vuravura. (Joni 8:23) O koya na imatai ni ibulibuli ni Kalou, qai veivuke ena buli ni veika tale eso. O Jiova sara ga a buli koya, qai vakatoka me “luvena duabau.” E vakayagataki Jisu na Kalou me nona gusunivosa, e vakatokai tale ga “na Vosa.”—Joni 1:1-3, 14; wilika Vosa Vakaibalebale 8:22, 23, 30; Kolosa 1:15, 16.

2. Na cava a mai bula kina e vuravura o Jisu?

E tokitaka o Jiova na bula i Luvena mai lomalagi ena katonigone i Meri, e dua na Jiu e se goneyalewa voli. E sega ni vakaitavi e dua na tama vakayago ena nona kunekunetaki o Jisu. (Luke 1:30-35) A mai bula e vuravura (1) me vakavulica na ka dina me baleta na Kalou, (2) me vakaraitaka sara ga na kena vakayacori na loma ni Kalou, qai (3) cabora na nona bula uasivi me “ivoli.”—Wilika Maciu 20:28; Joni 18:37.

3. Na cava e gadrevi kina na ivoli?

Na ivoli e rawa ni vakaibalebaletaka na ilavo e soli me sereki kina e dua na bobula. A sega ni inaki taumada ni Kalou me baleta na kawatamata na mate kei na qase. Eda kila vakacava? A tukuna na Kalou vei Atama na imatai ni tamata ke talaidredre, oya na ka e vakatoka na iVolatabu me ivalavala ca, ena mate. Ni valavala ca gona o Atama, oya na vuna e mate kina. O Atama a qai mate ni oti tale e vica na senitiuri, ia a tekivu yaco qori ena siga e talaidredre kina vua na Kalou. (Vakatekivu 2:16, 17; 5:5) E vakadewa na ivalavala ca kei na mate o Atama vei keda kece na nona kawa. Mani “curu kina” i vuravura na mate ena vukuna. Qori na vuna e gadrevi kina na ivoli.—Wilika Roma 5:12; 6:23.

4. Na cava a mate kina o Jisu?

O cei e rawa ni sauma na ivoli me sereki keda mai na mate? Nida mate eda sauma kina na noda ivalavala ca. E sega gona ni dua na tamata ivalavala ca ena rawa ni sauma na ivoli me sereka na wekana.—Wilika Same 49:7-9.

Ni uasivi o Jisu, a sega gona ni mate ni ivalavala ca, a mate ga ena vukuda nida ivalavala ca. A solia na Luvena na Kalou me mai mate ena vukuda me ivakaraitaki ni nona lomani keda vakalevu na kawatamata. A vakaraitaka tale ga o Jisu na nona lomani keda ni talairawarawa vei Tamana qai cabora na nona bula ena vuku ni noda ivalavala ca.—Wilika Joni 3:16; Roma 5:18, 19.

5. Na cava sa cakava tiko ena gauna qo?

Ena nona vakabulai ira na tauvimate, vakaturi ira na mate, kei na nona vakacegui ira na rarawa, e vakaraitaka kina o Jisu na ka ena cakava vei ira era talairawarawa. (Luke 18:35-42; Joni 5:28, 29) Ni mate o Jisu a vakabulai koya na Kalou ena yago vakayalo. (1 Pita 3:18) A dabe vakawawa ena ligaimatau ni Kalou, yacova na gauna me dabe kina vakatui me lewa mai na vuravura taucoko. (Iperiu 10:12, 13) Sa veiliutaki tiko vakatui ena gauna qo o Jisu mai lomalagi ra qai kacivaka tiko o ira na nona imuri e vuravura na itukutuku vinaka.—Wilika Taniela 7:13, 14; Maciu 24:14.

Sa voleka sara me vakayagataka na nona lewa vakatui o Jisu me vakaotia kina na rarawa kece kei ira era vakavuna. O ira na milioni era vakabauti Jisu qai talairawarawa vua era na marautaka na bula ena parataisi e vuravura.—Wilika Same 37:9-11.

Me ikuri ni ivakamacala, raica na wase 4 ni ivola qo, Na Cava Sara Mada E KAYA NA IVOLATABU? tabaka na iVakadinadina i Jiova.

[iYaloyalo ena tabana e 17]

O ira na milioni era vakabauti Jisu qai talairawarawa vua era na marautaka na bula ena parataisi e vuravura