Toro Voleka Vua na Kalou

Gauna Era sa na Gone Tale Kina na Qase

O CEI e taleitaka na salulu ni yago, buawa ni mata, didivara, kei na yava ninini? Qori na ka e dau vakilai ni sa qase e dua. O na rairai lomatarotarotaka: ‘Na cava a buli keda kina na Kalou meda via gone tu ga da qai leqataka ena gauna vata qori na ka e salavata mai na bula vaqase?’ Eda marau nida kila ni qori e sega ni inaki ni Kalou. Ia ena nona loloma e nakita kina me sereki keda mai na bula vaqase! Raica mada na vosa a tukuni vua na peteriaki o Jope ena Jope 33:24, 25.

Vakasamataki Jope mada, na turaga yalodina e lomani koya o Jiova. A sega ni kila ni vakalewa tiko o Setani na nona yalodina, e kaya ni qarava tiko ga na Kalou o Jope me rawaka kina. Ni kila o Jiova ni tu vua na kaukaua me muduka na ca qai nuitaki Jope, a mani vakatara me vakatovolei koya o Setani. Sa qai “yaviti Jope e na vidikoso, mai na qeteqete ni yavana ka cavaraka na buradelana.” (Jope 2:7) E robota na viciko i Jope na ulo, e drakusi na kuliniyagona, e loaloa qai midra. (Jope 7:5; 30:17, 30) Vakasamataka mada na kena mosi. Ia a yalodina tiko ga o Jope, e kaya: “Au na sega ni biuta tani vei au na noqu yalododonu!”—Jope 27:5.

Ia e dua na cala levu a cakava o Jope. Ni nanuma sa voleka ni mate, a kauaitaka kina vakasivia na nona yalododonu, “sa vakadonui koya, ka sa sega ni vakadonuya na Kalou.” (Jope 32:2) A vakayagataki Ilaiu na Kalou me vakadodonutaki Jope. A tukuna tale ga e dua na itukutuku veivakacegui ni Kalou: “Me vakabulai mada ko koya, me kakua ni lako sobu ki nai bulubulu; Au sa kunea na kenai soro. Ena qai vinaka tale na lewena me vaka na lewe ni gone: Ena vuki me cauravou tale.” (Jope 33:24, 25) E rairai vakanuinui o Jope ena ka e tukuni qori. Ena sega ni rarawa voli ga me yacova na nona mate. Ke veivutuni o Jope, ena marau o Jiova me ciqoma e dua na ivoli ena sereki koya mai na nona rarawa.a

A yalomalumalumu o Jope me ciqoma na veivakadodonutaki, a veivutuni tale ga. (Jope 42:6) A vakadonuya o Jiova na isoro a cabo ena vuku i Jope, rawa kina me ubi na nona cala, me vakabulai koya na Kalou qai vakalougatataki. “Sa vakalougatataka vakalevu ko Jiova na veiyabaki i Jope sa muri, ka vakalailai eliu.” (Jope 42:12-17) Vakasamataka mada na vakacegu i Jope, ni dua mada ga na ka e vakalougatataki kina na nona vakabulai mai na kena mate vakasisila qai “vinaka tale na lewena me vaka na lewe ni gone”!

E vakaiyalayala na yaga ni ivoli a ciqoma na Kalou ena vuku i Jope, ni ivalavala ca tiko ga me yacova na mate. Ia e uasivi sara na ivoli e vakarautaki ena vukuda. Ena loloma i Jiova, e solia kina na Luvena o Jisu me keda ivoli. (Maciu 20:28; Joni 3:16) O ira kece era vakabauta na ivoli era rawa ni nuitaka na bula tawamudu ena parataisi e vuravura. Ena vuravura vou sa voleka, ena sereki ira na kawatamata yalodina na Kalou mai na bula vaqase. Vakacava mo vulica e levu tale na ka mo rawa ni bula mo raica ni sa na vinaka tale na lewedra na qase “me vaka na lewe ni gone.”

Wili iVolatabu e vakatututaki ena Epereli:

◼ Jope 16-37

[iVakamacala e ra]