Taro Na Dauwiliwili . . .

Era na lako kece i lomalagi na lotu vaKarisito yalodina?

▪ E levu era sa wilika na vosa veivakacegui i Jisu: “Na levu ni nona lomani vuravura na Kalou e solia kina na Luvena e duabau ga e bulia, mera kua ni rusa o ira era vakabauti koya, mera rawata ga na bula tawamudu.” (Joni 3:16) E vakaibalebaletaka tiko beka o Jisu ni o ira kece era yalodina ni qaravi Tamana na Kalou o Jiova, era na lako i lomalagi mera marautaka tawamudu kina na bula?

Raica mada na ka vakavure vakasama e tukuna o Jisu: “Se sega ni dua na tamata e lako cake i lomalagi, o koya ga e lako sobu mai lomalagi, na Luve ni tamata.” (Joni 3:13) Qori e dusia nira sega ni lako i lomalagi na tamata yalodina ena veigauna sa oti, me vakataki Noa, Eparama, Mosese, kei Tevita. (Cakacaka 2:34) Era lako kece ga i vei? Kena ivakamacala lekaleka ga: O ira na tamata yalodina ena gauna makawa era tu ena ibulubulu, era moce tu, era sega ni kila e dua na ka, era waraka tu na veivakaturi.—Dauvunau 9:5, 6; Cakacaka 24:15.

O Jisu sara ga e tukuna duadua e liu ni so era na lai bula i lomalagi ena gauna era mate kina. A tukuna vei ratou na nona yapositolo ni na lai vakarautaka e dua na tikina e lomalagi me nodratou. (Joni 14:2, 3) Qori e dua na itukutuku vou vei ira na tamata ni Kalou. A vakamacalataka e muri na yapositolo o Paula ni gauna e mate kina o Jisu qai vakaturi i lomalagi, a ‘tauyavutaka vei keda na sala vou e basika ina bula’—na sala e se sega ni bau lakova e dua na tamata.—Iperiu 10:19, 20.

Kena ibalebale qori ni tekivu mai na gauna oya era sa na lako kece i lomalagi o ira era yalodina? Sega, baleta na veivakaturi i lomalagi e baleti ira ga eso e tiko na ka mera lai cakava e kea. Ena iotioti ni bogi eratou tiko vata kina, a tukuna vei ratou na nona yapositolo o Jisu ni ratou na ‘dabe ena idabedabe vakatui me ratou lewa’ ena Matanitu vakalomalagi. E nodratou itavi gona me ratou lai veiliutaki kei Jisu e lomalagi.—Luke 22:28-30.

Me vakataki ratou na yapositolo, e soli tale ga na itavi totoka qori vei ira tale eso. A raivotutaka na yapositolo o Joni nira tu vata kei Jisu e dua na ilawalawa era vakaturi i lomalagi, e tukuni ‘nira tui ra bete mera liutaka na vuravura.’ (Vakatakila 3:21; 5:10) Era le vica? Me vaka ga na matanitu tale eso, e yalani ga na kedra iwiliwili na veiliutaki. E va tale ga qori na Matanitu vakalomalagi. O Jisu na Lami ni Kalou, ena veiliutaki kei ira na le 144,000 “era voli mai ena kedra maliwa na kawatamata.”—Vakatakila 14:1, 4, 5.

E macala ni iwiliwili lailai ga na 144,000, e levu sara na kedra iwiliwili na tamata yalodina ena gauna qo kei na veigauna sa oti. Ia e veiganiti qori ni o ira na le 144,000 era vakaturi i lomalagi mera lai cakava e dua na ilesilesi dokai. Kaya mada o via tara e dua na vale, o na vakacakacakataki ira kece na matai ena nomu yasayasa? Sega. Na iwiliwili ni matai o na vakacakacakataka ena veiganiti ga kei na ka me caka. Na Kalou tale ga e sega ni digi ira kece era yalodina ena itavi dokai ni veiliutaki kei Karisito e lomalagi.

Na Matanitu vakalomalagi qori ena vakayacora na inaki taumada ni Kalou me baleti keda. O Jisu kei ira na le 144,000 era na liutaka na cakacaka ni kena vukici na vuravura me parataisi, era na marautaka kina na bula tawamudu o ira na yalodina e sega ni yalani na kedra iwiliwili. (Aisea 45:18; Vakatakila 21:3, 4) Qori era wili kina o ira e nanumi ira na Kalou mera na vakaturi.—Joni 5:28, 29.

Na iloloma totoka ni bula tawamudu e rawa ni nodra kece na tamata yalodina i Jiova ena veigauna sa oti vaka kina nikua. (Roma 6:23) Eso ga era na lai bula i lomalagi ni tiko na nodra ilesilesi dokai, e dua na iwiliwili levu era na bula ena parataisi e vuravura.