Me Sauma na iVolatabu
Na Cava na iNuinui me Baleti Ira na Mate?
Ena veivosakitaki ena ulutaga qo eso na taro o rairai dau lomatarotarotaka tu, e tiko tale ga na tikinivolatabu mo wilika kina na kena isau. Era marau na iVakadinadina i Jiova mera veivosakitaka kei kemuni na kedra isau.
1. Na cava na inuinui me baleti ira na mate?
Ni yaco yani o Jisu e Pecani volekati Jerusalemi, sa oti e va na siga na mate i Lasarusa na nona itokani. A lako o Jisu ena ibulubulu rau qai tomani koya o Meri kei Marica na ganei Lasarusa. Era gole sara mai e dua na ilala levu. Vakasamataka mada na nodrau marau o Marica kei Meri ni sa vakaturi Lasarusa o Jisu. —Wilika Joni 11:20-24, 38-44.
A vakabauta o Marica nira na vakaturi na mate. Era sa kila makawa tu na tamata yalodina i Jiova nira na vakaturi na mate ena dua na gauna se bera mai mera na bula e vuravura.—Wilika Jope 14:14, 15.
2. Na cava na kedra ituvaki na mate?
Na igu ni bula e vakatokai me “icegu” e vakavuna meda bula tiko na tamata kei na manumanu, ia e sega ni tiko vei keda e dua na ka tawarairai e sega ni mate rawa. (Dauvunau 3:19; Vakatekivu 7:21, 22) E buli na tamata mai na kuvuniqele. (Vakatekivu 2:7; 3:19) Ni sa cegu na yavala ni noda mona, sa oti tale ga na ka eda vakananuma. Ni vakaturi oti gona o Lasarusa a sega ni talanoataka e dua na ka a yaco ena gauna a mate kina. O ira na mate era sa sega ni vakila e dua na ka.—Wilika Same 146:4; Dauvunau 9:5, 10.
E macala vakasigalevu nira sega ni rarawa tale tiko na mate. E lasu gona na ivakavuvuli ni vakararawataki ira na tamata na Kalou nira mate. Qori e vosavakacacataki kina na Kalou. E ka vakasisila vua na vakasama nira na vakararawataki ena bukawaqa na tamata.—Wilika Jeremaia 7:31.
3. E rawa nida veivosaki kei ira na mate?
Era sega ni rawa ni vosa na mate. (Same 115:17) Ia nira vosa vei ira na tamata na agilosi ca, e rawa nira lasutaka nira yalodra na sa mate. (2 Pita 2:4) E sega ni vinakata o Jiova meda saga meda veivosaki kei ira na mate.—Wilika Vakarua 18:10, 11.
4. O cei ena vakaturi?
E vica vata na milioni era tu ena ibulubulu era na vakaturi ena vuravura vou sa voleka. Era na vakaturi tale ga eso era dau vakayacora na veika ca nira sega ni kila na veika e vinakata o Jiova.—Wilika Luke 23:43; Cakacaka 24:15.
Ena soli na gauna vei ira na vakaturi mera vulica na ka dina me baleta na Kalou ra qai vakaraitaka nira vakabauti Jisu ena nodra talairawarawa vua. (Vakatakila 20:11-13) O ira era vakaturi ra qai cakava na veika vinaka era na rawa ni marautaka na bula tawamudu e vuravura. Ia eso era vakaturi era na cakava tiko ga na veika ca. O ira qori era na “vakaturi mera lewai.”—Wilika Joni 5:28, 29.
5. Na cava e vakaraitaka me baleti Jiova na veivakaturi?
E rawa na veivakaturi ni tala mai na Luvena na Kalou me solia na nona bula ena vukuda. Qori e ivakaraitaki ni loloma levu i Jiova kei na nona loloma soli wale.—Wilika Joni 3:16; Roma 6:23.
Me ikuri ni ivakamacala, raica na wase 6 kei na 7 ni ivola qo, Na Cava Sara Mada e Kaya na iVolatabu?, tabaka na iVakadinadina i Jiova.
[iYaloyalo ena tabana e 16]
A buli mai na kuvuniqele o Atama