Na Cava Mera Vulica na Gone?

“E vakavuna na Kalou na volai ni iVolatabu kece, e yaga me veivakavulici, me veivunauci, me veivakadodonutaki, me veidusimaki ena ka e dodonu.”—2 TIMOCI 3:16.

E VINAKATI mera vakavulici na gone ena ka dina me baleta na Kalou. Era na vulica e vei na ka dina qori? Ena ivola e dokai vakalevu e vuravura, na iVolatabu.

Na iVolatabu e vaka e dua na ivola e vola vei keda na Kalou. E vakatakila kina na nona itovo kei na ivakavuvuli savasava meda muria kece na luvena, qase kei na gone. Qo eso ga na ivakavuvuli ena iVolatabu kei na lesoni e rawa nira vulica sara ga na gone.

Na cava e vinakata na Kalou meda kila me baleti koya?

◼ Ka e tukuna na iVolatabu: “Sai kemuni na yacamuni ga ko Jiova, sa Cecere sara duaduaga e vuravura taucoko.”—Same 83:18.

Lesoni: E bula dina tiko na Kalou, e tiko tale ga na yacana.

◼ Ka e tukuna na iVolatabu: “Sa vakatovolea na yalo kece ko Jiova, ka kila kece na nanuma ni lomada: kevaka ko na vakasaqarai koya, ko na kunei koya.”—1 Veigauna 28:9.

Lesoni: E kauaitaki keda kece na Kalou o Jiova, wili kina o ira na gone. (Same 10:14; 146:9) E vinakata meda vulica na veika me baleti koya.

◼ Ka e tukuna na iVolatabu: “Dou kakua ni vakararawataka e dua . . . sa sega ni vakatamani. Kevaka dou sa vakararawataka vakalailai, a ra sa tagi vakalailai ga vei au, ka’u na rogoca vakaidina na nodra tagi.”—Lako Yani 22:22-24.

Lesoni: E rogoca tale ga o Jiova na nodra masu na gone. E rawa nida masu wasoma vua na Kalou da qai talaucaka vua na lomada kei na noda nanuma.

◼ Ka e tukuna na iVolatabu: “Era sa vuki tani ka vakatovolei koya vakaca na Kalou, ka vakacudrui Koya na Yalosavasava ni Isireli.”—Same 78:41.

Lesoni: E tarai Jiova na ka eda tukuna kei na ka eda cakava, meda vakasama gona e liu ni bera nida vosa se cakava e dua na ka.

E dodonu meda veivakaduiduitaki?

◼ Ka e tukuna na iVolatabu: “[E] sega ni dau veivakaduiduitaki na Kalou, ia e vakadonui ira era dokai koya ra qai cakava na ka e vinakata mai na veivanua kece.”—Cakacaka 10:34, 35.

Lesoni: Ke vakadonui ira na matatamata kece na Kalou, e sega ni dodonu meda vakaduiduitaki ira e duidui na roka ni kuliniyagodra se na kedra irairai.

◼ Ka e tukuna na iVolatabu: “Moni qai vakarau tu ena gauna kece moni vakamacalataka nomuni inuinui vei ira kece era taroga, moni vakayacora qo ena yalomalua kei na veidokai dina.”—1 Pita 3:15.

Lesoni: Meda vosa ena nuidei nida vakaraitaka na noda nanuma me baleta na lotu, meda vosa tale ga vakayalovinaka. Meda dokai ira tale ga e duidui na nodra vakabauta vakalotu.

Me vakacava na noda ivalavala vei ira na noda lewenivuvale?

◼ Ka e tukuna na iVolatabu: “Kemuni na gone, ni talairawarawa vei ira na nomuni itubutubu ena ka kece, ni na marau sara ga kina na Turaga.”—Kolosa 3:20.

Lesoni: Na gone era dau talairawarawa vei ira na nodra itubutubu era vakaraitaka nira lomani ira, era via vakamarautaka tale ga na Kalou.

◼ Ka e tukuna na iVolatabu: “Moni dau yalorawarawa, ni dau veivosoti tale ga vakarawarawa ke dua e cudruvaka e dua na ka vua e dua tale. Moni dau veivosoti me vaka ga na nona vosoti kemuni vakarawarawa o Jiova.”—Kolosa 3:13.

Lesoni: Ena so na gauna era na vakacudrui keda eso tale, wili kina o ira na noda lewenivuvale. Ia ke da vinakata me vosoti keda na Kalou, meda dau veivosoti tale ga.—Maciu 6:14, 15.

Na cava meda daudina kina qai yalololoma?

◼ Ka e tukuna na iVolatabu: ‘Ni biuta tani na lasu, ni tukuna ga na ka dina vua na kainona.’—Efeso 4:25.

Lesoni: Eda vakatotomuria na Kalou, eda vakamarautaki koya tale ga nida tukuna na ka dina. Ke da dau lasu, eda sa vakataki koya na meca ni Kalou, na Tevoro na “tama ni lasu kece.”—Joni 8:44; Taito 1:2.

◼ Ka e tukuna na iVolatabu: “Cakava vei ira tale eso na ka o vinakata mera cakava vei iko.”—Maciu 7:12, “Contemporary English Version.”

Lesoni: Meda dau kauaitaka na nodra nanuma, na lomadra kei na veika era vinakata na noda vuvale kei ira tale eso ena itikotiko. Ke da dau ‘veikauaitaki,’ eda na kauaitaki tale ga.—1 Pita 3:8; Luke 6:38.

E laurai ena ivakaraitaki kece qori ni veika e vulici ena iVolatabu ena vukei ira na gone mera dau vakavinavinaka, veidokai ra qai dau veinanumi ena gauna era uabula kina. Ia o cei me vakavulica qori vei ira?