Taro na Dauwiliwili

E rawa nida tukuna na iwiliwili dina ni parofisai vakaMesaia ena iVolatabu vakaIperiu?

Nida vulica vinaka na iVolatabu vakaIperiu, eda na kila kina e levu na parofisai a vakayacori vei Jisu Karisito. A vakamatatataki ena parofisai qori na vuvale ena basika mai kina na Mesaia, na gauna ena yaco kina me Mesaia, na veika ena cakava, na veika era na cakava vua eso tale, kei na veika e vinakata o Jiova me cakava. E vakasakiti na nodra biu vata na parofisai kece qori me rawa nida kila kina ni o Jisu na Mesaia. Ia meda qaqarauni ke da via lai kila sara na iwiliwili dina ni parofisai vakaMesaia ena iVolatabu vakaIperiu.

E duidui kece na ka e vakabauti me baleta na ka e okati me parofisai vakaMesaia kei na kena e sega. Ena nona ivola The Life and Times of Jesus the Messiah, a tukuna kina o Alfred Edersheim ni nodra ivola makawa na rapai e okata me parofisai vakaMesaia e 456 na tikinivolatabu ena iVolatabu vakaIperiu, ia e levu na tikinivolatabu qori e sega sara ga ni cavuti kina na Mesaia. Ni dikevi vinaka na 456 na tikinivolatabu, e lomatarotarotaki kina ke baleti Jisu Karisito eso na parofisai qori. Kena ivakaraitaki, e tukuna o Edersheim nira kaya na Jiu ni Vakatekivu 8:11 e baleti koya na Mesaia. Era nanuma ni “drau ni olive a kauta mai na ruve, a kau mai na Ulunivanua ni Mesaia.” A cavuta tale o Edersheim na Lako Yani 12:42. Ni vakamacalataka na cala ni nodra nanuma na Jiu ena tikinivolatabu qori, a vola kina: “Me vaka ga na nona basika mai na vanualiwa o Mosese, ena basika tale ga mai Roma na Mesaia.” Ena dredre dina vei ira e levu na vuku kei na so tale mera vakamacalataka na rua na tikinivolatabu e cake kei na rai cala me baleti Jisu Karisito.

Ke da kauai mada ga ena parofisai a vakayacori dina vei Jisu Karisito, ena dredre ga meda duavata ena kena iwiliwili dina. Kena ivakaraitaki na Aisea wase 53 e levu kina na parofisai me baleta na Mesaia. E parofisaitaki ena Aisea 53:2-7: “Sa sega ni vatukai vinaka na yagona . . . Sa beci koya ka biuta ko ira na tamata . . . E dina sa colata ko koya na noda rarawa . . . Sa vakamavoataki ko koya e na vuku ni noda talaidredre . . . Me vaka na lami sa tuberi me vakamatei.” Me okati beka me dua ga na parofisai vakaMesaia na vakasama taucoko qori ena Aisea 53, se mera wili me dua na parofisai na ivakamacala yadua?

Raica mada na ka e tukuni tale ga ena Aisea 11:1: “Ia ena tubu mai e dua na Coke mai na dulumi i Jese, ka na tubu cake mai na wakana e dua na Tabana.” E cavuti tale ena tikina e 10 na parofisai qori qai tautauvata na vosa e vakayagataki kina. Vakacava me okati na rua na tikinivolatabu qori me rua na parofisai, se dua ga na parofisai e tokaruataki? Na ka e macala me baleta na Aisea wase 53 kei na Aisea wase 11 ena lai vakilai ena iwiliwili kece ni parofisai vakaMesaia.

E vinaka meda kua ni kauaitaka vakabibi na iwiliwili dina ni parofisai vakaMesaia ena iVolatabu vakaIperiu. E tabaka na isoqosoqo i Jiova na ivola e vakamacalataka e levu na parofisai me baleti Jisu kei na kena vakayacori.a Na ivola qori ena vukei keda qai vakayaloqaqataki keda ena noda vuli vakataki keda, vuli vakavuvale vaka kina na noda cakacaka vakaitalatala. Se mani cava na iwiliwili ni parofisai vakaMesaia, na levu ni parofisai qori e vakadeitaka ga vei keda ni o Jisu e Karisito se Mesaia.

[iVakamacala e ra]