Taro na Dauwiliwili

Na cava meda kila me baleta na fika ena ripote ni cakacaka ni isoqosoqo e veiyabaki?

Eda dau vakanamata e veiyabaki ena ripote ni yabaki ni cakacaka ni isoqosoqo ena Yearbook. E vakasakiti dina meda raica na veika eda rawata vakailawalawa na tamata i Jiova e veiyasa i vuravura ena vunau kei na veivakavulici. Ia me yaga vei keda na ripote, e bibi me donu na ka eda kila me baleta na ka era vakaraitaka na fika. Raica mada e vica na kena ivakaraitaki.

Yabaki ni cakacaka ni isoqosoqo. Qori e tekivu mai na vula o Seviteba ena dua na yabaki me lai yacova na Okosita ena yabaki tarava. E dau volai ena Yearbook na ripote ni yabaki ni cakacaka ni isoqosoqo sa oti. E tiko ena Yearbook ni 2011 na ripote ni yabaki ni cakacaka ni isoqosoqo ni 2010, qori mai na 1 Seviteba 2009 ina 31 Okosita 2010.

Levu ni dautukutuku kei na ivakatautauvata ni dautukutuku. Na “dautukutuku” era okati kina o ira sa papitaiso mera iVakadinadina i Jiova kei ira na dautukutuku bera ni papitaiso. Na “levu ni dautukutuku,” qori na iwiliwili levu duadua era ripote ena vula cava ga ni yabaki ni cakacaka ni isoqosoqo, e rawa ni okati tale ga kina na ripote e soli bera qai sega ni wili ena ripote ni vula sa oti. Ke yaco qori, era rawa ni wili vakarua eso na dautukutuku. Na iwiliwili levu duadua qori era sega ni okati kina na dautukutuku era vakaitavi ena cakacaka vakaitalatala, ia era sega ni solia na nodra ripote. Qori e vakaraitaka na bibi ni noda dau solia totolo e veivula na dautukutuku kece na noda ripote. Na “vakatautauvata ni dautukutuku,” qori na iwiliwili ni dautukutuku era ripotetaka na nodra cakacaka vakaitalatala e veivula.

iSoqoni ni aua. E laurai ena Yearbook ni 2011 nida vakayagataka na iVakadinadina i Jiova e sivia na 1.6 na bilioni na aua ena cakacaka vakaitalatala. Na iwiliwili qori e sega ni levu kece ni aua eda vakayagataka ena noda sokalou, ni sega ni wili kina na gauna e dau vakayagataki ena veivakatawani, noda tiko ena soqoni, vulica vakataki keda na iVolatabu kei na noda vakasama vakatitobu.

iLavo e vakayagataki. Ena yabaki ni cakacaka ni isoqosoqo ni 2010, e vakayagataka na iVakadinadina i Jiova e sivia e $155 na milioni mera qaravi kina na painia lavotaki, na daukaulotu, kei na ivakatawa dauveilakoyaki ena nodra ilesilesi ni cakacaka vakavunau. E sega ni wili ena fika qori na ilavo e vakayagataki ena kena tabaki na ivola vakaivolatabu; e sega ni wili tale ga kina na ilavo e vakayagataki ena nodra qaravi na sivia e le 20,000 na veiqaravi e Peceli ena valenivolavola ni tabana e veiyasa i vuravura.

O ira na vakayagataka na waini kei na madrai ena iVakananumi. Qori na kedra iwiliwili na lotu vaKarisito papitaiso era vakayagataka na waini kei na madrai ena iVakananumi e veiyasa i vuravura. Vakacava, qori na kedra iwiliwili na lumuti era se bula tiko e vuravura? E sega ni vakadeitaki qori. Eso na ka e rawa ni vakavuna na nodra nanuma cala eso ni nodra inuinui na bula e lomalagi, qori e wili kina na nodra vakabauta makawa vakalotu, se rairai veilecayaki na nodra vakasama se ivakarau ni lomadra. Eda sega gona ni kila na kedra iwiliwili dina na lumuti era se bula tiko e vuravura; e sega ni gadrevi meda kila. E sega ni maroroya na iLawalawa Dauvakatulewa na lisi ni yacadra kece era vakayagataka na madrai kei na waini ena iVakananumi.a

Na ka ga eda kila nira na tiko e vuravura eso na lumuti era “dauveiqaravi ni noda Kalou,” ena gauna ena liwa kina na cagi ni veivakarusai ena veivakararawataki levu. (Vkta. 7:1-3) Me yacova na gauna qori, era na liutaka tiko na lumuti na vunau kei na veivakavulici levu duadua me bau vakayacori ena ivolatukutuku ni kawatamata me vaka e vakadinadinataki ena noda ripote ni cakacaka ni isoqosoqo e veiyabaki.

[iVakamacala e ra]