O se Nanuma Tiko?
O taleitaka na ka o wilika ena itabataba ni Vale ni Vakatawa era se qai tabaki oti ga? Raica mada ke o rawa ni sauma e vica na taro qo:
• Na cava e tolu na ka bibi ena uqeti keda meda daudina?
(1) Meda rerevaka na Kalou. (1 Pita 3:12) (2) Me vakavulici ena iVolatabu na noda lewaeloma. (3) Saga meda lomavakacegu ena ka e tu vei keda.—15/4, tabana e 6-7.
• Eda kila vakacava ni noda raica vakabibi na noda qarava na Kalou e sega ni kena ibalebale me sa vakaraitaki tu ga qori e matada, meda yalodredre da qai kua sara ga ni marau se veimaliwai?
Ena yaga vei keda na ivakaraitaki i Jisu. E dau tiko na nona gauna ni vakacegu qai dau marautaka na nona kanavata kei ira tale eso. E sega ni dau yalodredre. Era dau volekati koya na tamata, o ira mada ga na gone e dau rawarawa nodra torovi koya.—15/4, tabana e 10.
• Na cava erau rawa ni cakava na veiwatini ke rau sa sega ni veivolekati ni sucu oti na luvedrau?
Me vakadeitaka o tagane vei yalewa ni lomani koya, me cakava tale ga qori o yalewa. Me saga o tagane me vukei watina ena so na ka ena rairai nuiqawaqawataka. Me rau saga na veiwatini me rau dau veivosakitaka vakadodonu na ka e tu e lomadrau kei na veika e rau vinakata.—1/5, tabana e 12-13.
• Na cava e vakatakarakarataka na vuniolive ena Roma wase 11?
Na vuniolive e vakatakarakarataki ira era okati ena kawa i Eparama, na Isireli vakayalo. Ena vuniolive vakaivakatakarakara qori, o Jiova na wakana, o Jisu na tolona. Nira cati Jisu e levu na Jiu, sa qai rawa kina nira wili ena Isireli vakayalo o ira na kai veimatanitu era tavuki mera vakabauta, qori e taucoko kina na kedra iwiliwili na ikarua ni wase ni kawa i Eparama.—15/5, tabana e 22-25.
• Na itukutuku vinaka cava e rawa ni vunautaki vei ira na dravudravua?
Sa lesi Jisu me Tui na Kalou. E iliuliu vinaka me vakaotia na dravudravua. Na vuna? Baleta ena liutaka na kawatamata qai tu vua na kaukaua me cakava na ka e vinakati; e dau lomani ira na dravudravua; e rawa tale ga ni vakaotia na ka e vakavuna tiko na dravudravua, oya na noda ivakarau meda dau nanumi keda ga.—1/6, tabana e 7.
• Na cava e vakaibalebaletaka o Jisu ni tukuna vei Kaiafa: “O iko ga o sa tukuna tiko mai qori”?—Maciu 26:63, 64.
Na malanivosa “o iko ga o sa tukuna tiko mai qori,” e dua na nodra ivosavosa kilai levu na Jiu e vakadeitaka ni dina e dua na ka e tukuni. A tarogi Jisu na Bete Levu o Kaiafa ke Karisito na Luve ni Kalou. A sauma ena doudou o Jisu: “O iko ga o sa tukuna tiko mai qori.”—1/6, tabana e 18.
• Era lewe beka ni ivoli o ira era rawa ni kawa uasivi i Jisu?
Sega. O Jisu a rawa me tamadra na bilioni na kawa uasivi, ia era sega ni lewe ni ivoli o ira era rawa ni kawa uasivi i Jisu. Na bula uasivi ga i Jisu e veirauti kei na bula i Atama. (1 Tim. 2:6)—15/6, tabana e 13.
• Eda rawa ni muria vakacava na lotu vaKarisito na ivakasala me baleti ira na qasenivuli lasu e tukuni ena Cakacaka 20:29, 30?
Eda na sega ni sureti ira ena noda vale se vosa vei ira. (Roma 16:17; 2 Joni 9-11) Eda na sega ni wilika na nodra ivola, saravi ira ena tivi, se wilika na ka era vola ena Internet.—15/7, tabana e 15-16.
• O cei me vakavulici ira na gone me baleta na Kalou?
Me salavata kei na ivakasala ena iVolatabu, me rau cakacaka vata o tama kei tina ena nodra vakavulici na gone. (Vkai. 1:8; Efeso 6:4) E laurai ena vakadidike ni dau yaga sara vei ira na gone na nodrau vakaitavi ruarua na itubutubu ena nodra vakavulici.—1/8, tabana e 6-7.