iVola mai Norway

Sikovi na Vanualiwa Batabata

NI SE qai tekivu na vulaibatabata, keirau cega na ilatilati me laurai se vakacava tu na draki. Keirau marau sara ga ni karakarawa tu na lomalagi ni tolu na siga keirau na lai vunau kina e Finnmarksvidda—e toka ena dua na vanua cere bucabuca ena vualiku kei Norway.

Ni gauna batabata e Norway, keirau leqataka kina na veisiko ina vanua e tukuni mai cake. E vinaka ga ni ratou na veitomani tiko e tolu na iVakadinadina i Jiova eratou tiko ena vanua oya. Eratou kila na veika e dau yaco kina, ratou sa vakamacala vinaka tale ga vei keirau.

E sega ni levu na gaunisala, na sala vinaka duadua ga ni veilakoyaki ena vanua tu yawa qo na katapila ni ucacevata (snowmobile). Keirau usana na neirau isulu, kakana, kei na so tale na waiwai ena katapila ni ucacevata e tuya na qasita (sledge). E sega ni raici rawa na iyalayala ni vanua buca vulavula keitou lakova, ia e sa bau totoka ga ni taliva tu vaka na daimani na ucacevata ena katakata ni siga!

Era tu e Finnmarksvidda na veimataqali manumanu kila kei na bea. Keitou vakanamata ga ena neitou sotavi ira na vakaitikotiko ena vanua tu yawa qo, vakabibi o ira era vosa vakaSami e nodra ivurevure ni ilavo na vakatawa dia ni ucacevata se ra cakacaka ena nodra icili na vulagi.

Keitou sotavi ira e levu na gonevuli ena dua na icili ni vulagi, era mai vakatasisisi ena ucacevata. Ni keimami veitalanoa, era via kila na ka keitou cakava tiko e kea, keitou mani vakamacala vei ira. E tukuna e dua vei ira ni keitou biubiu: “Me kalougata na nomudou cakacaka vakavunau.” Keitou vodo tale ena katapila ni ucacevata me takosovi e dua na drano ucacevata, e sega ni dua e tu kina. Keitou na raica beka na qele ni dia ni ucacevata?

Ni keitou draiva cake yani ina dua na vale e kidavaki keitou mai e dua na turaga sa vakaitikotiko tudei eke. A raica ni sa ca tu e dua na neitou qasita mani tukuna me ripeataka. E cakava toka ga vakamalua nira sega ni dau vakatotolotaka na ka era cakava na tiko ena vanua qo. Na nona ivakarau e vakavuna me keitou wele tale ga. Keitou vakavinavinakataka na nona ripeataka na qasita, keitou vakamacalataka tale ga vua mai na iVolatabu na vuna e vakatara tiko kina na Kalou na rarawa. E vakarorogo vinaka qai taura na ivola Na Cava Sara Mada e Kaya na iVolatabu? vaka kina Na Vale ni Vakatawa kei na Yadra! E tukuna ena matadredredre: “Vinaka na veisiko mai.”

Keitou sikovi ira tale eso, ia sa buto mai na vanua keitou mani lesu ina icili. Ena ilakolako lesu qori, keitou raica sara e dua na fokisi. Ni se rarama toka, e rairai vinaka na damu ni vutina ni raici vata kei na vulavula ni ucacevata. E tu vakadua na fokisi, vakaraici keitou, oti a gole sara. Keitou sega ni raica vinaka sara na gaunisala ni sa lutu na ucacevata. Dua na ka neitou marau ni sa laurai rawa na neitou icili. Keitou waqaca na sitovu buka, vakalailai ga sa katakata mai na lomanivale. E wawale na yago ena levu ni tavaladelade ni vodo katapila ni ucacevata, ia e siga marautaki ga vei keitou.

E totolo tale na kida ni mataka. Keitou vakavodoka tale neitou iyaya ena katapila ni ucacevata, gole sobu ina buca ni keitou muri uciwai me yaco yani ena dua tale na icili ni vulagi. A tiko kina e dua na cauravou, keitou mani vakamacala sara vua ena iVolatabu. Oti sa qai vakaraitaka vei keitou na sala totolo duadua me keitou muria lesu.

Qo sa iotioti ni siga ni veisiko. Ni keitou yaco yani ina Stabbursdalen National Park, dua na ka na rairai totoka ni vanua, e caliva yawa mai na ulunivanua e ubia tu na ucacevata. Sega ni dede keitou raica sara e dua na qele ni dia vakaitamera. Era kana welewelei toka nira vakayagataka na nodra itaukuku lelevu mera seuta kina na co e kabi tu ena tolonikau (lichen) kei na lumilumi e ubia tu na waicevata. Keitou raica tale tu ga yani vakayawa e dua na turaga e vosa vakaSami ni dabe toka ena nona katapila ni ucacevata. E vakatawai ira tiko na nona qele ni dia, toka e yasana na nona koli e vakaraici ira tale toka ga na dia mera kua ni talabusese. A mai vakaboboi na koli ena vanua keitou duri tu kina, oti e lesuva tale na ka e cakava tiko. Keitou vakamacala vua na ivakatawa ni dia, e turaga yalovinaka qai vakarorogo vei keitou.

Ena ilakolako lesu i vale, keirau vakasamataki ira keirau sotava ena 300 na kilomita na yawa ni vanua keirau lakova. Dua na ka neirau marau ni keirau bau lai veivuke vakalailai ena nodra sikovi na vakaitikotiko ena vanualiwa batabata e Norway.

[iTaba ni Credit Line ena tabana e 15]

© Norway Post