Me Sauma na iVolatabu

E Rawa Vakacava Nida Digia na iTokani Vinaka?

Ena veivosakitaki ena ulutaga qo eso na taro o rairai dau lomatarotarotaka tu, o na raica tale ga na tikinivolatabu mo wilika kina na kena isau. Era marau na iVakadinadina i Jiova mera veivosakitaka kei kemuni na kena isau.

1. Na cava meda digia kina na itokani vinaka?

Nida vinakata meda taleitaki, eda dau vakatotomuri ira kina era tu wavoliti keda. Era rawa gona ni veivakamuai vakalevu na noda itokani ena noda ivakarau ni rai. Na itokani tale ga eda digia e rawa ni veivakamuai ena noda ivakarau ena veigauna se bera mai.—Wilika Vosa Vakaibalebale 4:23; 13:20.

A dau digia vinaka na nona itokani o Tevita e dua a uqeti vakalou me vola na iVolatabu. A veitokani kei ira era vukei koya me yalodina tiko ga ni qarava na Kalou. (Same 26:4, 5, 11, 12) Kena ivakaraitaki, a marautaka o Tevita na nona veitokani kei Jonacani ni dau vakayaloqaqataki koya me nuitaki Jiova.—Wilika 1 Samuela 23:16-18.

2. O rawa vakacava ni itokani ni Kalou?

E Kalou kaukaua duadua o Jiova, ia eda rawa ni nona itokani. Kena ivakaraitaki vinaka o Eparama. Ni nuitaki Jiova qai talairawarawa vua, a vakatokai kina me itokani ni Kalou. (Vakatekivu 22:2, 9-12; Jemesa 2:21-23) Eda na itokani tale ga ni Kalou ke da nuitaki Jiova da qai cakava na ka e vinakata.—Wilika Same 15:1, 2.

3. E yaga vakacava na nomu digia na itokani vinaka?

Era daudina na itokani vinaka ra qai vukei iko mo cakava na ka dodonu. (Vosa Vakaibalebale 17:17; 18:24) Kena ivakaraitaki, erau rairai veisivi ena 30 na yabaki o Jonacani kei Tevita qai dodonu me veiliutaki e Isireli o Jonacani. Ia ni lumuti Tevita me tui na Kalou, a yalodina ni tokoni koya o Jonacani. Era na doudou na itokani vinaka mera vakadodonutaki iko ke o cala. (Same 141:5) Era na vukei iko na itokani era lomana na Kalou mo bucina na itovo vinaka.—Wilika 1 Korinica 15:33.

O na sotavi ira era taleitaka na ka dodonu ena nodra Kingdom Hall na iVakadinadina i Jiova. Era tiko kina na itokani era na vakayaloqaqataki iko ena nomu sasaga mo vakamarautaka na Kalou.—Wilika Iperiu 10:24, 25.

Ia o ira mada ga na itokani era lomana na Kalou era rawa ni vakararawataki keda ena so na gauna. Me kua ni vakacudrui keda totolo na nodra cala. (Dauvunau 7:9, 20-22) Nanuma tiko, e sega ni dua na itokani e uasivi ra qai talei vei keda na itokani era lomana na Kalou. E uqeti keda na Vosa ni Kalou meda raibaleta na nodra cala na noda itokani lotu vaKarisito.—Wilika Kolosa 3:13.

4. Na cava mo cakava ke ra saqati iko na nomu itokani?

Era raica e levu nira dau veitusaqati na itokani makawa ena gauna era vulica kina na iVolatabu. Era rairai sega ni kila na itokani va qori na ivakasala yaga se na inuinui o vulica ena iVolatabu. De dua o rawa ni vukei ira tale ga.—Wilika Kolosa 4:6.

Ena so tale na gauna, era rawa ni vakasewasewana na itukutuku vinaka ena Vosa ni Kalou eso era kaya nira nomu itokani. (2 Pita 3:3, 4) Era rawa ni vakalialiai iko eso ni o saga mo cakava na ka dodonu. (1 Pita 4:4) Ni yaco qori, ena rairai gadrevi mo vakatulewataka mo nodra itokani se mo itokani ni Kalou. Ke o digia mo itokani ni Kalou, o sa digia na itokani vinaka duadua.—Wilika Jemesa 4:4, 8.

Me ikuri ni ivakamacala, raica na wase 12 kei na 19 ni ivola qo Na Cava Sara Mada e Kaya na iVolatabu?, tabaka na iVakadinadina i Jiova.